الاثنين، 27 مايو، 2013

رحلة في الخيال ..




من اكتر الافلام اللي بحبها فيلم "Lake House" او " منزل البحيرة " وقصته كالتالي :- 

أن " كيت فوستر " او " ساندرا بولوك " طبيبة ورومانسية ووحيدة قررت تغير نظام حياتها وتأخد اجازة ، فتروح تعيش في منزل زجاجي بيطل علي البحر قبل ما تنتقل منه وترجع تعيش للمدينة ولصخب الحياة ، وقررت قبل ما تمشي تسيب رسالة للمستأجر الجديد اللى هو " أليكس وايلر"  او " كيانو ريفز" توصف احساسه الفترة اللى عاشت فيها في البيت دا وازاي هي بتحن له من وقت للتاني .

أليكس بيستقبل رسايلها وبيقرر يراسلها وبتستمر ما بينهم المراسلات بالفعل  لغاية ما بينجذبوا لبعض وبيحبوا بعض ، لكن بيكتشفوا بعد وقت قصير حاجة غريبة !!
انهم مش عايشيين بس في مكانين مختلفين ، لا كمان في زمانيين مختلفين ! وبيفصل ما بينهم بالظبط سنتين ، بيحاول اليكس بكل الطرق يقابلها ويحدد لها اكتر من ميعاد ، وتقوله بالشكل دا لازم نستني سنتين بحالهم ، وبيقولها معنديش مانع بس لازم نتقابل ، محاولاتهم بتفشل اكتر من مرة وفي الاخر بيتقابله فعلا :)

لكن هتكلم علي مشهد محدد في الفيلم دا بحبه جدا ، ولاقيته مش صعب يتنفذ لو قررنا نحرر خيالنا شوية ، لما طلب منها في مرة تقضي يوم كامل معاه ، يتفسحوا ويتفرجوا علي معالم المدينة علي الرغم من الفاصل الزمني !!  فبيقولها يوم السبت الجاي هنقضي اليوم مع بعض ،هنمشي في نفس الشوارع ونزور نفس الاماكن ،  وبيبعت لها خريطة ويحدد لها الاماكن اللى ممكن يزروها وبيكتب لها تعليقات علي كل مكان المفروض هيروحه هيقولها ايه وهيعرفها علي ايه ، ابصي هنا ، خدي بالك من المبني القديم دا اللى صممه والدي ، وهكذا

وفي نهاية اليوم بيكتب لها رسالة علي احدى المباني بيشكرها علي اليوم الرائع دا :)

الفكرة جاتلي الصبح وحبيت انفذها ، انا مستعدة اقضي يوم خيالي زي دا ، اصدقائي اللى من القاهرة الاسكندرية ومن اى محافظة تانية او حتي من بلد تانية ، عايزاكم تعزومني علي يوم اقضيه معاكم ، ابعتلولي احكولى علي اجمل المعالم في بلدكم ، الاماكن اللى هتخلوني ازورها لو انا جيت ، هتأكلوني ايه ، هتشربوني ايه ، وهكذا وفي اخر اليوم ايه الرسالة اللى هتقولهالي ، ابهروني واحرروا خيالكم ومش بعيد احسن رسالة فيها وصف " للرحلة الخيالية " دي يكسب جايزة ويجي يوم ونفذ الرحلة علي ارض الواقع بالفعل :)

مش لازم تكتبوا لي انا بس ، ممكن تكتبوا لاى حد في خيالكم نفسكم تقضوا اليوم معاه ،  وانا عن نفسي هكتب عن اليوم اللى نفسي اقضيه مع حد وهنروح فين ونقضي اليوم ازاى :)



راسلوني علي الميل دا لو حابين

Ayatmoktar@gmail.com 

 هنتظر رسايلكم حتي ولو مكنتش انا الشخص اللى هتقضوا معاه اليوم دا :)

هناك 9 تعليقات:

  1. اسمه Lake House

    وأكمل التعليق بعدين :)

    ردحذف
  2. شكرا علي تصحيح الخطأ ياأزهري :)

    ردحذف
  3. بداية الفيلم روعة
    دا غير إنى من محبى ساندرا بولوك وأعمالها
    باستثناء سبيد 2

    أنا هأبدأ أول دعوة
    بس بكرة الصبح طبعا لإنى راجع من الإمتحان ميييييييييت

    ردحذف
  4. بعشق الفيلم ده
    من الأفلام اللى تخليكى تحلمى قبل ما تستمتعى فعلاً
    عاجبانى فكرة اليوم الخيالى ده
    اتمنى اقضية معاكى
    يمكن اعملها قريب :)

    ردحذف
  5. انا بموووووووووووت في الفيلم دا

    والشجرة اللي قالتله انها بتحب الشجر وزرعهالها

    ردحذف