السبت، 8 سبتمبر، 2012

نصائح ذاتية ..



لانى دايما وحدى حتى ولو فى وسط الناس ،ببتسم وأفرح واضحك وحدى .. بزعل وببكى وبتألم وحدى .. يبقى بالتأكيد مفيش غيرى يشاركنى الفرح وتواسينى فى الجرح .

علمت نفسى استغنى عن كل الناس ، الصديق والقريب والحبيب هو نفسى .. بعيط على كتفى لما بضايق وايدى هى اللى بتمسح دمعتى .. بضحك لابتسامتى واكون سعيدة بسعادتى ..

ولأنى محتاجة الأيام دى حد يدينى طاقة إيجابية ويشجعنى ويخرجنى شوية من الحالة العجيبة اللى جوايا من لخبطة وكركبة ودوشة وربكة يبقى الأولى انصح نفسى نصايح ذاتية تخلينى اعيد ترتيب نفسى وكل شئ جوايا :-

  • أكيد مفيش حد بيحب يبقى حزين ومضايق ومكتئب طول الوقت ، لكن الظروف وضغوط الحياة بتجبره على كده مفيش مشكلة احزنى واضايقى وابكى وخرجى كل اللى جواكى لغاية ما تحسى انك صفيتى .. ادى انفعالاتك وقتها وحقها بلاش تخبيها حتى عن نفسك .
  • بلاش تقتلى كل حاجة حلوة فيكى لمجرد انك شايفة عيوبك اكتر مميزاتك .. اعرفى عيوبك وصلحيها وكمان حبى مميزاتك ونميها ومتخافيش تظهريها للناس .
  • حلمتى كتير وكام حلم من احلامك متحققوش .. ايه المشكلة لسه ياما هتحلمى ولسه ياما هتحققى انت واثقة ومتأكدة انك لو حطيتى حاجة فى دماغك بتنفذيها وبتحققيها .
  • اعرفى انك لازم تحبى نفسك الاول علشان تلاقى اللى يحبك .. خايفة تحبى نفسك ليه ؟ متخفيش مش هتتغرى ، ابسط حق ليكى عليكى أنك تحبى نفسك .
  • ومتخافيش ولا تتفزعى من فكرة انك ممكن تتحبى .. وانك هتلاقى اللى يحبك .. انتى تستاهلى الحب بجد .
  • خايفة تنكسرى .. لا انكسرى وارجعى اجبرى بخاطرك تانى ، دوقى الالم والحزن والكسر علشان تقدرى قيمة الفرح والسعادة والقوة.
  • خليكى واثقة فى نفسك انك بجد شخصية مميزة جدا جدا كمان وان اللى جواكى مش هتلاقيه فى ناس كتير .
  • نفسك تحبى ، حبى من كل قلبك كل حاجة ، ومتنتظريش مقابل للحب دا ، الحب بيحيى القلب مبيمتهوش حتى ولو اتجرح .خايفة كمان تحبى بينك وبين نفسك !
  • مش لاقية حد يشبهك ، مش لاقية حد يفهمك .. هيجى يوم وهتلاقى بس متستعجليش .
  • كان فى نفسك حاجة ومتحققتش .. يبقى خير وبركة ربنا بيختارلك دايما الصالح ليكى .
  • بعض الناس مش عاجبهم تصرفاتك .. قولى لنفسك وايه يعنى مش لازم تصرفاتى تعجب كل الناس انا اصلا فى ناس كتير مش عجبانى اللى حواليكى بيقولولك لازم تتغيرى .. قوليلهم مش من حق حد يغيرنى بمزاجه كونى زى ماانتى متتغيرش علشان انسان لو هتتغيرى اتغيرى علشان نفسك بس وانك عايزة تبقى احسن وافضل .
  • ساعات الكلام بيتوه منك ومبتقدريش تعبرى عن نفسك لاشخاص معينة .. مش تتضايقى لو هو قريب كفاية هيفهمك من غير كلام .
  • سامحى ، وسامحى ، وسامحى من قلبك اى انسان فى يوم اساء فى حقك .. انتى مش بتسامحيه هو انتى بتتدى نفسك فرصة تعيشى من غير احساس الحقد والكره .
  • متنتظريش حد يسعدك انتى اللى تسعدى نفسك بنفسك .. اشترى لنفسك الورد اللى بتحبيه , والشيكولاتة , واقرى الكتب اللى بتحبيها , ضيعى كل مليم فى جيبك وبعدين اشحتى عادى انتى مش مضطرة تشيلى هم مسئوليات ولا ايه فى المستقبل .
  • بتضغطى على نفسك فى شغل مش بتحبيه لما تجيبى اخرك سبيه ودورى على غيره .. عايزة تقعدى فى البيت ومش تشتغلى انتى حرة خدى قرارك بنفسك بلاش كلام الناس يأثر فيكى ويخليكى تضغطى على نفسك بسببه .
  • على فكرة انتى مش مجنونة علشان بتبعتى لنفسك رسايل كتير على الموبايل والميل .. ايه المانع لما الواحد يستشير نفسه ويطلب منها النصيحة على الاقل محدش هيفهمك اكتر منك .
  • بتحبى الكتابة وبتتنفسى بيها يبقى حطى دا قدامك على طول مش مهم تكتبى اللى يعجب الناس ومش مهم رايهم فيه ومش مطلوب منك تفسرى وتبررى .. انتى حرة تعبرى عن نفسك وعن غيرك بالاسلوب والطريقة اللى تريحك .
  • عايزة تتعلمى الرسم ، البيانو ، التصوير ، تتعلمى لغات ، تسافرى ، اعملى دا فورا متقوليش بكبر .. هتكبرى بجد لما تبطلى تتحققى ذاتك .
  • بيقولوا عليكى معقدة ، مجنونة ، متناقضة ، غريبة ، قوليلهم ياريتكم زيى الف شخصية فى انسانة واحدة .
  • انتى مقتنعة بنفسك زى ماانتى شكلك ، لبسك ، استايلك ، يبقى مش لازم كلام اى حد انك تغيرى شكلك علشان تعجبى يضايقك ابتسمى واسكتى ومترديش حتى عليه وكملى طريقك اللى رسماه لنفسك .
  • مش لازم تعيشى دور البطل الذى لا يقهر طول الوقت ، متخافيش تظهرى ضعفك لنفسك وللآخرين .. كل البشر اصلا ضعفاء ومفيش حد فيهم يقدر يقول انا قوى.
  • عصبيتك بتخسرك كل اللى حواليكى .. اللى بيعزك بجد هيقدرك واللى يعرفك بجد هيعرف ان العصبية دى بتخبى وراءها قلب مفيش اطيب منه .
  • بتتفهمى غلط كتير وبتتضايقى من دا وكل شوية تبررى مواقفك انك مكنتيش تقصدى كده .. عادى دى طبيعة البشر كل واحد عايز يفهم اللى يريحه .
  • بتغلطى كتير اديكى بتتعلمى من اخطائك.. بلاش تندمى على كل كلمة، وكل خطوة ، وكل تصرف ، وكل حتى شعور واحساس سيبى نفسك على راحتها .
  • انتى ذكية فبلاش تستغبى علشان تبقى مقبول عند بعض الناس .
  • مش محتاجة تقربى لاى انسان ولا لاى حد سبيهم هما اللى يقربوا علشان متزعليش لما يبعدوا .
  • بتتزعلى لان كل اللى بتحبيهم بيمشوا ويرحلوا .. مفيش حاجة فى الدنيا دى باقية الا الله .
  • وفى الاخر لما تكونى عايزة تكلمى انا موجودة قوليلى كل اللى نفسك فيك انا جنب منك دايما .