الاثنين، 20 أغسطس، 2012

أنا ليه عايزة أتجوز ؟




من فترة قصيرة كده جاتلى رسالة من صديقة متزوجة حديثا ً، زعلتنى بأنها على وشك الانفصال عن زوجها مع زواجهم مكملش سنتين ، خلانى اتذكر بعض الزيجات اللى مرت حواليا لشخصيات شابة اعرفها والشفقة اللى كنت بشفق بيها عليهم وهما بيعزمونى على أفراحهم ، وأنا بقول سرى ان طابور الفشل الزواجى زاد اتنين جداد !!
مش تشاؤم منى طبعا ً ، بل على العكس دى مجرد نظرة عاقلة ومتروية لطبيعة الزيجة وازاى تمت وبناء على ايه هتقدر تقرر ان الزواج دا هيبقى ناجح ولا لقدر الله هيكتب له الفشل ...
ولان الزواج شئ ضرورى ومهم ولا غنى عنه واننا كبنات حلم حياتنا اللى مهما نحاول ننكره هو فعلا كده :) ، قررت استوحى فكرة موقع موقع آسك بأنى أسال نفسى وأجاوب عليها ..

واسأل نفسى هو أنا ليه عايزة أتجوز ؟

وقبل ما أجاوب على السؤال هقول الاسباب اللى خلتنى أسال السؤال دا ..
السبب الأول انى محتاجة فعلا احدد اسبابى اللى علشانها ممكن اتجوز هل انا هتجوز لهدف معين ولا بتجوز علشان زيى زى غيرى اللى بيتجوزوا ؟ وبالتالى لما اعرف الهدف احطه قدامى باستمرار وعلى اساس دا يقدر الانسان يبنى حياته ويختار اللى هيشاركه فى البناء دا .
السبب التانى نوع من توجيه الاخرين لتفكير صح فى طبيعة الزواج والهدف منه ، وقفة كل واحد وواحدة مع نفسها لدقايق هيقدروا يحددوا ايه اهدافهم " بتجوز زيى زى غيرى - علشان انا كبرت ولازم اتجوز - انا خلصت تعليم والخطوة الجاية اتجوز .. وهكذا اين كانت الاهداف والاسباب " انا متقنعة تماما انك لازم علشان تتدخل فى اى تجربة وخصوصا تجربة الجواز لازم تبقى حاطط فى بالك الاستمرارية وان دى شراكة صعب او استحالة يبقى فى انفصال فى المستقبل وبالتالى بتحط فى بالك ازاى تواجه اى مشكلة تمر بيها وانت ماشى فى التجربة دى للنهائية .

ودلوقتى انا ليه بقى عايزة أتجوز ؟

  1. عشان احب أنى أستن بسنة الرسول صلى الله عليه وسلم "من أحب فطرتي فليستن بسنتي ومن سنتي النكاح."
  2. عشان نفسى الاقى السكن مع انسان بحبه ويبقى بينى وبينه مودة ورحمة وحب "وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً "
  3. عشان نفسى اختار لاولادى رجل على دين وخلق يبقى زيه لما يكبروا "إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير "
  4. عشان عايزة اكون من اكثر النساء بركة بانى لما الاقى الانسان اللى على خلق اقوله كفاية اخلاقك هندى ومش محتاجة لا شبكة ولا نيش ولاشقة اربع اوض "أقلهن مهورا أكثرهن بركة "
  5. عشان نفسى اطلب منه بدل النيش نعمل مكتبة تبقى لينا ولاولادنا فى المستقبل ويبقى لينا وقت مخصص كل يوم للقراءة وللمناقشة لأن ربنا قال " اقْرَأْ بِاسْمِ رَبِّكَ الَّذِي خَلَقَ. "
  6. عشان نفسى نصحى بعض فى كل صلاة فجر ، ونذكر بعض بصيام كل اثنين وخميس , وعشان نتنافس على ختم القرآن "وَفِي ذَلِكَ فَلْيَتَنَافَسِ الْمُتَنَافِسُونَ "
  7. عشان نفسى يوم الفرح البس فستان ابيض وحجاب ابيض واعمل وليمة للاهل والاقارب والاصدقاء ونوفر فلوس الفرح لشئ اخر نكسب منه ثواب فى الآخرة .
  8. عشان نفسى اول ما ندخل بيتنا نصلى ركعتى الزفاف وابقى هموت من الفرح ان اخيرا بصلى خلق رجل بحبه ..
  9. عشان امنية حياتى انى نفسى اسافر مع زوجى فى بداية حياتنا زيارة لبيت الله الحرام .
  10. علشان نفسى ادخل الجنة من خلال طاعتى له " إذا صلت المرأة خمسها و صامت شهرها و حصنت فرجها و أطاعت زوجها قيل لها : ادخلي الجنة من أي أبواب الجنة شئت "
  11. عشان نفسى أطبخ له الاكل اللى بيحبه وأكله ويأكلنى بايده " إنّ أعظم الصدقة لقمة يضعها الرجل في فم زوجته "
  12. عشان نفسى يمسك ايدى قدام الناس كلها وبقى حاسه بالامان ان انا ملكه وهو ملكى .
  13. عشان نفسى اهتم بنفسى واخد بحريتى البس واتزين زى ماانا عايزه فى بيتى ولزوجى (ألا أخبركم بخير ما يكنز المرء ؟ : المرأة الصالحة ، إذا نظر إليها سرته ، وإذا غاب عنها حفظته ، وإذا أمرها أطاعته ) .
  14. عشان نفسى يوم ما ازعله مستناش لحظة واراضيه بسرعة .. قال أمير المؤمنين (ع) : خير نسائكم الخمس ، فقيل : وما الخمس ؟.. قال : الهينة ، اللينة ، المواتية ، التي إذا غضب زوجها لم تكتحل بغمضٍ حتى يرضى .
  15. عشان نفسى الاقى اللى باستمرار يعينى على الطاعات وعلى عدم التكاسل باللين والمودة " وَأْمُرْ أَهْلَكَ بِالصَّلاةِ وَاصْطَبِرْ عَلَيْهَا "..
  16. عشان نفسى يبقى عندى احدى زينة الحياة الدنيا وهى البنون " الْمَالُ وَالْبَنُونَ زِينَةُ الْحَيَاةِ الدُّنْيَا "
  17. عشان نفسى يكون عندى اولاد صالحين اربيهم صح وأبرهم فى الصغار عشان الاقى اللى يبرنى فى الكبر .
  18. عشان اعين زوجى على البر بأهله وصلة رحمه وانى اكسب رضاه برضى وامه و برى بها ..
  19. عشان لو يوم لقدر الله حصل خلاف بينا ومقدرناش نحله نرجع للقرأن ونجيب اللى يصلح ما بينا ويرجع الامور زى ما كانت واحسن " إِنْ خِفْتُمْ شِقَاقَ بَيْنِهِمَا فَابْعَثُواْ حَكَمًا مِّنْ أَهْلِهِ وَحَكَمًا مِّنْ أَهْلِهَا إِن يُرِيدَا إِصْلاَحًا يُوَفِّقِ اللّهُ".
  20. عشان لما يغيب يبقى واثق ان فى انسانة بتحفظ عرضه , وماله , واولاده فى غيابه .
  21. عشان نفسى يكون لى اب واخ وزوج وصديق بيسمعنى ويفهمنى وكتف اسند راسى عليه لما الدنيا تكسرنى .
  22. عشان نفسى الاقى ايد بتتمد تمسح دموعى اول ما ابكى بدل ما الواحد بيخاف يبكى ولايظهر مشاعره قصاد اى انسان .
  23. عشان نفسى فى انسان يتعامل معايا انى طفلة وشابة وعجوزة فى نفس الوقت ويفهم طبيعتى المتقلبة وان فى كل لحظة هكون محتاجة ايه .
  24. عشان نفسى اربى طفل كبير وادرب على تربية الاطفال عليه قبل ما اجيب منه اطفال ..
  25. عشان نفسى اكون ام واخت وزوجة وصديقة لانسان بحبه .
  26. عشان نكبر ونعجز مع بعض ونفضل زى مااحنا بحبه ويحبنى .
  27. وفى النهاية اكيد مش دى كل اسبابى لكن دى اكيد اهمهما عندى واللى بحطها قدامى باستمرار لما يبقى الزواج هو دا اللى فى بالى لما بلاش احسن :)

وانتم بقى عايزين تجوزوا ليه ؟؟؟

هناك 10 تعليقات:

  1. ماعتقدش ان فى اسباب اهم واجمل من دول كلهم عشان الواحد يتجوز :)

    ردحذف
  2. طبعا لسه راجع من برة

    أنا وأفوق وأقوم أقرأ

    بس السبب المنطقى بالنسبة لك

    تلاقى حد تعكننى

    ردحذف
  3. الزواج رحلة
    يجب ان ننتقي الرفيق الصح
    علشان الرحلة تمشي صح
    وماتقلبش غم

    ومهما خدنا بالنا
    هو في الاول والاخر نصيب

    ردحذف
  4. عشان نفسى الاقى السكن مع انسان بحبه ويبقى بينى وبينه مودة ورحمة وحب "وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً "


    ددى النقطة الجوهرية اللى الكل بينساها حاليا وبتكون السبب فى فشل أغلب الموضوعات

    ردحذف
  5. يمكن 16 و17 اهمهم
    والهدف الاساسى بالنسبة لى
    هى الحاجات التانية مهمة وكنت بفكر فيها زمان برده
    بس بمنطق التمنى انه يبقى نفسى عندى زوج فى كذا وكذا واطيع ربنا فيه وكده
    بس حتى الامنية دى ذبلت عندى شوية بشوية
    اما لاقيت معظم المتدينين اللى اعرفهم ع الاقل
    عندهم جفاء بشكل غير طبيعى
    طبعا ده مالوش علاقة بالدين ليه علاقة بيهم هما
    انهم فاكرين بجفائهم ده انهم كده يبقوا زاهدين ف الدنيا بقى وكل حياتهم طاعة وبتاع
    وباموت من الاستغراب لما الاقيهم بيسمعوا سيرة الرسول صلى الله عليه وسلم وهو كان بيشرب من نفس مطرح شرب السيدة عائشة وهى حائض وساعة ما كان بيثنى ركبته عشان يطلع زوجته ويركبها على الدابة
    ومع كل ده ولا بينفذوا منه اى حاجة
    الناس دى بقى هى اللى خلتنى اتغاضى عن اى امانى كانت جوايا
    وعشان مبقاش زيى زى غيرى هتجوز والسلام قعدت ادور على حاجة تكون سامية وذات قيمة يعنى اواجه بيها نفسى بنفس ذات السؤال هو انا هتجوز ليه
    مالاقيتش غر ان اما يبقى ليا ثمرة ف الدنيا هازرعها واعتنى بيها من صغرها واديها حقها عشان تفرح بنفسها اما بتكبر وتفرحنى معاها وربنا يرضى علينا سوا
    بس كدهون
    وانتى ازيك كده واخبارك وعيد سعيد وكده
    ووحشتينى جدا جدا جدا على فكرة
    :)

    ردحذف
  6. مع قناة فيديو ارابوتك
    لفة الطرحة المناسبة للعروسة المحجبة
    http://arabotic.com/videos/category/apparel-fashion/page/2/?lang=ar_ar

    ردحذف
  7. وانا نفسى الاقى واحده زيك

    ردحذف