الاثنين، 22 أكتوبر، 2012

تحميل كتاب رحيل ملاك


 تحميل كتاب رحيل ملاك لــ آيات مختار

مجموعة قصصية صادرة عن دا ليلى " كيان كورب "
قد يرها البعض خواطر اكثر من قصص قصيرة وقد يحبها البعض ويكرهها اخرون لكنى احببتها لانها تحمل كثير من مشاعرى الصادقة

اتمنى الكتاب يعجبك ومنتظرة رايك فيه لانى يهمنى اسمع كل الاراء والنقد


الكتاب على ميديا فير
http://www.mediafire.com/view/?7g8831taw21rfzb


صفحة الكتاب على جودريدرز
http://www.goodreads.com/book/show/11836519

السبت، 8 سبتمبر، 2012

نصائح ذاتية ..



لانى دايما وحدى حتى ولو فى وسط الناس ،ببتسم وأفرح واضحك وحدى .. بزعل وببكى وبتألم وحدى .. يبقى بالتأكيد مفيش غيرى يشاركنى الفرح وتواسينى فى الجرح .

علمت نفسى استغنى عن كل الناس ، الصديق والقريب والحبيب هو نفسى .. بعيط على كتفى لما بضايق وايدى هى اللى بتمسح دمعتى .. بضحك لابتسامتى واكون سعيدة بسعادتى ..

ولأنى محتاجة الأيام دى حد يدينى طاقة إيجابية ويشجعنى ويخرجنى شوية من الحالة العجيبة اللى جوايا من لخبطة وكركبة ودوشة وربكة يبقى الأولى انصح نفسى نصايح ذاتية تخلينى اعيد ترتيب نفسى وكل شئ جوايا :-

  • أكيد مفيش حد بيحب يبقى حزين ومضايق ومكتئب طول الوقت ، لكن الظروف وضغوط الحياة بتجبره على كده مفيش مشكلة احزنى واضايقى وابكى وخرجى كل اللى جواكى لغاية ما تحسى انك صفيتى .. ادى انفعالاتك وقتها وحقها بلاش تخبيها حتى عن نفسك .
  • بلاش تقتلى كل حاجة حلوة فيكى لمجرد انك شايفة عيوبك اكتر مميزاتك .. اعرفى عيوبك وصلحيها وكمان حبى مميزاتك ونميها ومتخافيش تظهريها للناس .
  • حلمتى كتير وكام حلم من احلامك متحققوش .. ايه المشكلة لسه ياما هتحلمى ولسه ياما هتحققى انت واثقة ومتأكدة انك لو حطيتى حاجة فى دماغك بتنفذيها وبتحققيها .
  • اعرفى انك لازم تحبى نفسك الاول علشان تلاقى اللى يحبك .. خايفة تحبى نفسك ليه ؟ متخفيش مش هتتغرى ، ابسط حق ليكى عليكى أنك تحبى نفسك .
  • ومتخافيش ولا تتفزعى من فكرة انك ممكن تتحبى .. وانك هتلاقى اللى يحبك .. انتى تستاهلى الحب بجد .
  • خايفة تنكسرى .. لا انكسرى وارجعى اجبرى بخاطرك تانى ، دوقى الالم والحزن والكسر علشان تقدرى قيمة الفرح والسعادة والقوة.
  • خليكى واثقة فى نفسك انك بجد شخصية مميزة جدا جدا كمان وان اللى جواكى مش هتلاقيه فى ناس كتير .
  • نفسك تحبى ، حبى من كل قلبك كل حاجة ، ومتنتظريش مقابل للحب دا ، الحب بيحيى القلب مبيمتهوش حتى ولو اتجرح .خايفة كمان تحبى بينك وبين نفسك !
  • مش لاقية حد يشبهك ، مش لاقية حد يفهمك .. هيجى يوم وهتلاقى بس متستعجليش .
  • كان فى نفسك حاجة ومتحققتش .. يبقى خير وبركة ربنا بيختارلك دايما الصالح ليكى .
  • بعض الناس مش عاجبهم تصرفاتك .. قولى لنفسك وايه يعنى مش لازم تصرفاتى تعجب كل الناس انا اصلا فى ناس كتير مش عجبانى اللى حواليكى بيقولولك لازم تتغيرى .. قوليلهم مش من حق حد يغيرنى بمزاجه كونى زى ماانتى متتغيرش علشان انسان لو هتتغيرى اتغيرى علشان نفسك بس وانك عايزة تبقى احسن وافضل .
  • ساعات الكلام بيتوه منك ومبتقدريش تعبرى عن نفسك لاشخاص معينة .. مش تتضايقى لو هو قريب كفاية هيفهمك من غير كلام .
  • سامحى ، وسامحى ، وسامحى من قلبك اى انسان فى يوم اساء فى حقك .. انتى مش بتسامحيه هو انتى بتتدى نفسك فرصة تعيشى من غير احساس الحقد والكره .
  • متنتظريش حد يسعدك انتى اللى تسعدى نفسك بنفسك .. اشترى لنفسك الورد اللى بتحبيه , والشيكولاتة , واقرى الكتب اللى بتحبيها , ضيعى كل مليم فى جيبك وبعدين اشحتى عادى انتى مش مضطرة تشيلى هم مسئوليات ولا ايه فى المستقبل .
  • بتضغطى على نفسك فى شغل مش بتحبيه لما تجيبى اخرك سبيه ودورى على غيره .. عايزة تقعدى فى البيت ومش تشتغلى انتى حرة خدى قرارك بنفسك بلاش كلام الناس يأثر فيكى ويخليكى تضغطى على نفسك بسببه .
  • على فكرة انتى مش مجنونة علشان بتبعتى لنفسك رسايل كتير على الموبايل والميل .. ايه المانع لما الواحد يستشير نفسه ويطلب منها النصيحة على الاقل محدش هيفهمك اكتر منك .
  • بتحبى الكتابة وبتتنفسى بيها يبقى حطى دا قدامك على طول مش مهم تكتبى اللى يعجب الناس ومش مهم رايهم فيه ومش مطلوب منك تفسرى وتبررى .. انتى حرة تعبرى عن نفسك وعن غيرك بالاسلوب والطريقة اللى تريحك .
  • عايزة تتعلمى الرسم ، البيانو ، التصوير ، تتعلمى لغات ، تسافرى ، اعملى دا فورا متقوليش بكبر .. هتكبرى بجد لما تبطلى تتحققى ذاتك .
  • بيقولوا عليكى معقدة ، مجنونة ، متناقضة ، غريبة ، قوليلهم ياريتكم زيى الف شخصية فى انسانة واحدة .
  • انتى مقتنعة بنفسك زى ماانتى شكلك ، لبسك ، استايلك ، يبقى مش لازم كلام اى حد انك تغيرى شكلك علشان تعجبى يضايقك ابتسمى واسكتى ومترديش حتى عليه وكملى طريقك اللى رسماه لنفسك .
  • مش لازم تعيشى دور البطل الذى لا يقهر طول الوقت ، متخافيش تظهرى ضعفك لنفسك وللآخرين .. كل البشر اصلا ضعفاء ومفيش حد فيهم يقدر يقول انا قوى.
  • عصبيتك بتخسرك كل اللى حواليكى .. اللى بيعزك بجد هيقدرك واللى يعرفك بجد هيعرف ان العصبية دى بتخبى وراءها قلب مفيش اطيب منه .
  • بتتفهمى غلط كتير وبتتضايقى من دا وكل شوية تبررى مواقفك انك مكنتيش تقصدى كده .. عادى دى طبيعة البشر كل واحد عايز يفهم اللى يريحه .
  • بتغلطى كتير اديكى بتتعلمى من اخطائك.. بلاش تندمى على كل كلمة، وكل خطوة ، وكل تصرف ، وكل حتى شعور واحساس سيبى نفسك على راحتها .
  • انتى ذكية فبلاش تستغبى علشان تبقى مقبول عند بعض الناس .
  • مش محتاجة تقربى لاى انسان ولا لاى حد سبيهم هما اللى يقربوا علشان متزعليش لما يبعدوا .
  • بتتزعلى لان كل اللى بتحبيهم بيمشوا ويرحلوا .. مفيش حاجة فى الدنيا دى باقية الا الله .
  • وفى الاخر لما تكونى عايزة تكلمى انا موجودة قوليلى كل اللى نفسك فيك انا جنب منك دايما .

الاثنين، 27 أغسطس، 2012

اكتب ..

' اكتب يا هيبا ، فمن يكتب لن يموت أبداً'

*
*
*
يوسف زيدان - عزازيل

I wonder about my life


Sometimes I wonder about my life. I lead a small life - well, valuable , but small - and sometimes I wonder , do I do it because I like it , or because I haven't been brave? So much of what I see reminds me of something I read in a book, when shouldn't it be the other way around? I don't really want an answer. I just want to send this cosmic question out into the void. So good night , dear void .



الأحد، 26 أغسطس، 2012

لا أجد مؤنساً أشاركه أسرارى ..


لأننى لا أجد مؤنساً أشاركه أسرارى
دفنت آهاتى فى أوتارى
إننى قيثارة الأحزان
فأعطونى بالله مضراباً
كى أنشد أغنياتى ...


*
*
*
*
*

فروغ فرخزاد

الاثنين، 20 أغسطس، 2012

أنا ليه عايزة أتجوز ؟




من فترة قصيرة كده جاتلى رسالة من صديقة متزوجة حديثا ً، زعلتنى بأنها على وشك الانفصال عن زوجها مع زواجهم مكملش سنتين ، خلانى اتذكر بعض الزيجات اللى مرت حواليا لشخصيات شابة اعرفها والشفقة اللى كنت بشفق بيها عليهم وهما بيعزمونى على أفراحهم ، وأنا بقول سرى ان طابور الفشل الزواجى زاد اتنين جداد !!
مش تشاؤم منى طبعا ً ، بل على العكس دى مجرد نظرة عاقلة ومتروية لطبيعة الزيجة وازاى تمت وبناء على ايه هتقدر تقرر ان الزواج دا هيبقى ناجح ولا لقدر الله هيكتب له الفشل ...
ولان الزواج شئ ضرورى ومهم ولا غنى عنه واننا كبنات حلم حياتنا اللى مهما نحاول ننكره هو فعلا كده :) ، قررت استوحى فكرة موقع موقع آسك بأنى أسال نفسى وأجاوب عليها ..

واسأل نفسى هو أنا ليه عايزة أتجوز ؟

وقبل ما أجاوب على السؤال هقول الاسباب اللى خلتنى أسال السؤال دا ..
السبب الأول انى محتاجة فعلا احدد اسبابى اللى علشانها ممكن اتجوز هل انا هتجوز لهدف معين ولا بتجوز علشان زيى زى غيرى اللى بيتجوزوا ؟ وبالتالى لما اعرف الهدف احطه قدامى باستمرار وعلى اساس دا يقدر الانسان يبنى حياته ويختار اللى هيشاركه فى البناء دا .
السبب التانى نوع من توجيه الاخرين لتفكير صح فى طبيعة الزواج والهدف منه ، وقفة كل واحد وواحدة مع نفسها لدقايق هيقدروا يحددوا ايه اهدافهم " بتجوز زيى زى غيرى - علشان انا كبرت ولازم اتجوز - انا خلصت تعليم والخطوة الجاية اتجوز .. وهكذا اين كانت الاهداف والاسباب " انا متقنعة تماما انك لازم علشان تتدخل فى اى تجربة وخصوصا تجربة الجواز لازم تبقى حاطط فى بالك الاستمرارية وان دى شراكة صعب او استحالة يبقى فى انفصال فى المستقبل وبالتالى بتحط فى بالك ازاى تواجه اى مشكلة تمر بيها وانت ماشى فى التجربة دى للنهائية .

ودلوقتى انا ليه بقى عايزة أتجوز ؟

  1. عشان احب أنى أستن بسنة الرسول صلى الله عليه وسلم "من أحب فطرتي فليستن بسنتي ومن سنتي النكاح."
  2. عشان نفسى الاقى السكن مع انسان بحبه ويبقى بينى وبينه مودة ورحمة وحب "وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً "
  3. عشان نفسى اختار لاولادى رجل على دين وخلق يبقى زيه لما يكبروا "إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير "
  4. عشان عايزة اكون من اكثر النساء بركة بانى لما الاقى الانسان اللى على خلق اقوله كفاية اخلاقك هندى ومش محتاجة لا شبكة ولا نيش ولاشقة اربع اوض "أقلهن مهورا أكثرهن بركة "
  5. عشان نفسى اطلب منه بدل النيش نعمل مكتبة تبقى لينا ولاولادنا فى المستقبل ويبقى لينا وقت مخصص كل يوم للقراءة وللمناقشة لأن ربنا قال " اقْرَأْ بِاسْمِ رَبِّكَ الَّذِي خَلَقَ. "
  6. عشان نفسى نصحى بعض فى كل صلاة فجر ، ونذكر بعض بصيام كل اثنين وخميس , وعشان نتنافس على ختم القرآن "وَفِي ذَلِكَ فَلْيَتَنَافَسِ الْمُتَنَافِسُونَ "
  7. عشان نفسى يوم الفرح البس فستان ابيض وحجاب ابيض واعمل وليمة للاهل والاقارب والاصدقاء ونوفر فلوس الفرح لشئ اخر نكسب منه ثواب فى الآخرة .
  8. عشان نفسى اول ما ندخل بيتنا نصلى ركعتى الزفاف وابقى هموت من الفرح ان اخيرا بصلى خلق رجل بحبه ..
  9. عشان امنية حياتى انى نفسى اسافر مع زوجى فى بداية حياتنا زيارة لبيت الله الحرام .
  10. علشان نفسى ادخل الجنة من خلال طاعتى له " إذا صلت المرأة خمسها و صامت شهرها و حصنت فرجها و أطاعت زوجها قيل لها : ادخلي الجنة من أي أبواب الجنة شئت "
  11. عشان نفسى أطبخ له الاكل اللى بيحبه وأكله ويأكلنى بايده " إنّ أعظم الصدقة لقمة يضعها الرجل في فم زوجته "
  12. عشان نفسى يمسك ايدى قدام الناس كلها وبقى حاسه بالامان ان انا ملكه وهو ملكى .
  13. عشان نفسى اهتم بنفسى واخد بحريتى البس واتزين زى ماانا عايزه فى بيتى ولزوجى (ألا أخبركم بخير ما يكنز المرء ؟ : المرأة الصالحة ، إذا نظر إليها سرته ، وإذا غاب عنها حفظته ، وإذا أمرها أطاعته ) .
  14. عشان نفسى يوم ما ازعله مستناش لحظة واراضيه بسرعة .. قال أمير المؤمنين (ع) : خير نسائكم الخمس ، فقيل : وما الخمس ؟.. قال : الهينة ، اللينة ، المواتية ، التي إذا غضب زوجها لم تكتحل بغمضٍ حتى يرضى .
  15. عشان نفسى الاقى اللى باستمرار يعينى على الطاعات وعلى عدم التكاسل باللين والمودة " وَأْمُرْ أَهْلَكَ بِالصَّلاةِ وَاصْطَبِرْ عَلَيْهَا "..
  16. عشان نفسى يبقى عندى احدى زينة الحياة الدنيا وهى البنون " الْمَالُ وَالْبَنُونَ زِينَةُ الْحَيَاةِ الدُّنْيَا "
  17. عشان نفسى يكون عندى اولاد صالحين اربيهم صح وأبرهم فى الصغار عشان الاقى اللى يبرنى فى الكبر .
  18. عشان اعين زوجى على البر بأهله وصلة رحمه وانى اكسب رضاه برضى وامه و برى بها ..
  19. عشان لو يوم لقدر الله حصل خلاف بينا ومقدرناش نحله نرجع للقرأن ونجيب اللى يصلح ما بينا ويرجع الامور زى ما كانت واحسن " إِنْ خِفْتُمْ شِقَاقَ بَيْنِهِمَا فَابْعَثُواْ حَكَمًا مِّنْ أَهْلِهِ وَحَكَمًا مِّنْ أَهْلِهَا إِن يُرِيدَا إِصْلاَحًا يُوَفِّقِ اللّهُ".
  20. عشان لما يغيب يبقى واثق ان فى انسانة بتحفظ عرضه , وماله , واولاده فى غيابه .
  21. عشان نفسى يكون لى اب واخ وزوج وصديق بيسمعنى ويفهمنى وكتف اسند راسى عليه لما الدنيا تكسرنى .
  22. عشان نفسى الاقى ايد بتتمد تمسح دموعى اول ما ابكى بدل ما الواحد بيخاف يبكى ولايظهر مشاعره قصاد اى انسان .
  23. عشان نفسى فى انسان يتعامل معايا انى طفلة وشابة وعجوزة فى نفس الوقت ويفهم طبيعتى المتقلبة وان فى كل لحظة هكون محتاجة ايه .
  24. عشان نفسى اربى طفل كبير وادرب على تربية الاطفال عليه قبل ما اجيب منه اطفال ..
  25. عشان نفسى اكون ام واخت وزوجة وصديقة لانسان بحبه .
  26. عشان نكبر ونعجز مع بعض ونفضل زى مااحنا بحبه ويحبنى .
  27. وفى النهاية اكيد مش دى كل اسبابى لكن دى اكيد اهمهما عندى واللى بحطها قدامى باستمرار لما يبقى الزواج هو دا اللى فى بالى لما بلاش احسن :)

وانتم بقى عايزين تجوزوا ليه ؟؟؟

الأحد، 19 أغسطس، 2012

العيد هذا العام !!






العيد هذا العام أيضاً أخطئ منزلنا ولم يأتى !!

كنت فى شرفة المنزل أنتظره وهو أتٍ من بعيد مستبشر فرح ..

لوحت له بيدى نحن هنا بالأعلى تعال ..

ولكنه لم يسمعنى ولم يرأنى ..

لم يلمح الزينات والأعلام التى وضعناها من أجله ..

لم يشتم راحة الحلوى التى صنعناها من أجله ..

ولم يسمع صوت الأناشيد والأغانى التى نغنيها من أجله ..

العيد هذا العام طرق بيت جارتنا الثكلى ، فودعت حزنها وفرحت ..

العيد هذا العام زار بيت جارنا القعيد ، فنفض عنه مرضه وفرح ..

العيد هذا العام زار فتاة مشتاقة ، فنسيت شوقها وفرحت ..

العيد هذا العام زار شاب متألم ، فلتئام جرحه وفرح ..

العيد هذا العام زار مساجدنا وأسطح منازلنا ..

أرصفة الشارع ..

حتى أنه زار حمائم المدائن التى استقرت عليها ..

ولكن العيد هذا العام لم يزورنا ، ولم يلقى حتى بالتحية ..

فعل ما فعله العام الماضى والعام الذى سبقه ..

تجاهـــــل بيتنا ..

تجاهــــل شرفتنا ..

وتجاهل اشتياق قلوبنا لفرحة ، ورحل ..

الاثنين، 30 يوليو، 2012

لتمام الظهور ..لابُد من غياب


أدركت أخيراً أن بينى وبينك كما يقول نزار " علاقة حب صعبة " و كان علي أن اقاومها وأن أحتج عليها .. وعلي .. وعليك ، وأن أقف فى وجه التيار إلا يأخذنى نحوك بعد الآن ..



بينى وبينك حالة متأرجحة بين الحب واللاحب .. ومشاعر مختلطة بين الغيرة المشتغلة و اللامبالاة الباردة .. و تناقضات عجيبة لا تخدم أبدا مشاعر الحب ..




بينى وبينك رجل شرقى _ هو أنت _ تحاول أن تخفيه فتفشل .. وأنا امرأة لا يرضى عنها كثيراً رجل شرقى ، لأنى امرأة لا تعرف الخداع ولا المراوغة ولا تجيد الآعيب النساء وحيلهم لتوقعك فى شركها الأبدى ..



ولأنى أذا ارضيتك اليوم سوف يأتى يوما ً لا أعرفنى فأكرهك .. أو يأتى يوما ً تعرفنى فتكرهنى ..



وبينى وبينك امرأة آخرى ظهرت فى الأفق من جديد , وكنت أظن أنها لن تعود أبدا ً ، ولكنها عادت .. وأنا امرأة تحرقها نار الغيرة وأرفض أن اتشارك بك .. وأنا أمرأة ترفض أن تصبح طرفا ً فى نزاع بين امرأة آخرى للفوز بك ..



بينى وبينك الآن اشلاء حب .. وفتات ذكريات .. وبقايا حلم وسوف ارحل واترك كل شئ بين يديك لتقرر أنت .. أنا ؟ أم هى ؟ أم كلتانا لا نصلح لك ؟



ولأن " لتمام الظهور ..لابُد من غياب " **



سوف أرحل لأن أكتمال حضورى بداخلك .. يستلزم رحيلى عنك ..



ولأن التأكد من حبك بداخلى .. لا يكتمل إلا بغيابى عنك ..



ولأن التأكد من حبك لي .. أم لها .. اترك لك فرصة الأختيار ..






**لــِ جمال الغيطاني