الخميس، 21 أبريل، 2011

قهــــوتـــك

مستنية تيجى فى ميعادك
وتحكيلى عن يومك
وأنا أهون لك فى همومك
تقولى مصاريف البيت
أقولك ربنا يرزقنا من خيره
ومتخفشى بكرة تتعدل
وأحوالنا هتتبدل
أقولك العيال كبروا
ومصيرهم لبيوتهم وينسونا
تقولى دى فرصة يفرقونا
ونبقى أنا وأنتِ لوحدينا
أضحك لك ضحكة خجلانة
خلاص كبرت وبقيت زى وردة دبلانة
تقولى لساكى زى ماأنت ِِ
شابة وصبية مكبرتيش
وحبك جوايا كل يوم عايش
أستنى القهوة هتفور
قهوتك زى ما بتحب تشربها بزيادة
بس معلش من يوم ما أنت مشيت
مبقتش بشربها غير سادة




الأربعاء، 13 أبريل، 2011

أحاسيس أنثــــى " الكتاب الأول لمواضيع المدونة "

ازيكم ياجماعة عاملين ايه يارب تكونوا بخير كلكم
الايام دى مليش نفس اكتب حاجة وبما انى فاضية جمعت مواضيع المدونة فى كتابين وعملتهم كتب الالكترونية
ودا الكتاب الاول اسمه " أحاسيس أنثى " مع انى كان نفسى اسميه باسم المدونة يلا مش مشكلة
اللى يحب يحمل الكتاب يتفضل ولو حد قرأه ياريت يقولى رايهم فيهم وبصراحة
محتاجة اسمع أراء ونقد علشان لو فيه حاجة احاول اغيرها المرة الجاية وخصوصا أسلوب الكتاب








أحاسيس أنثى