الجمعة، 11 فبراير، 2011

والله وعملوها الرجالة

مش هعارفة اقول غير الف الف مبروووووووووك ويارب اللى جاى احسن واجمل
هرجع اكتب بوست تانى كبييييييييييير بس لما استوعب لانى بجد مش مستوعبة
ولسه فى ذهنى منظر الناس فى الشارع وهى بتسجد من الفرح وبيزغرطوا :))
الف شكر الف شكر لكل شهيد وكل بطل وكل واحد شارك علشان يحرر البلد دى



الأحد، 6 فبراير، 2011

هما آخر كلمتين


كل عين تعشق حليوة
و إنتي حلوة في كل عين
يا حبيبتي أنا قلبي عاشق
و اسمحيلي بكلمتين
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين


هما فعلا آخر كلمتين ومش هتكلم بعدهم تانى سواء كنت مؤيد او معارض او واقف فى النص يمكن خايف .. ويمكن ليك وجهة نظر ويمكن انت حابب تعيش كده فى امان وهمى وزايف .. ويمكن انت زيى خوفك جاى من اسباب تانية خايف تشوف شباب بيموتوا تانى وخايف على البلد دى من كل اللى بيقول مصلحتى اولا
هقولك الحق واضح وباين زى نور الشمس مش محتاج تفتح عينك اكتر واكتر علشان تشوفه الحق واقف هناك فى الميدان .. الحق كان فى كل دم سال وغطى الميدان .. الحق فى كل ارواح الشهداء اللى ضحوا بحياتهم علشان ترجع من تانى مصر تتنسم نسيم الحرية والكرامة.

كنت معاكم ووقفت لحظة علشان افكر واحسم قرارى فين الصح من تانى وفين الغلط وانا لسه بحترمكم وبشهد بعظمة ثورتكم
بس يمكن زيى زي غيرى خفت على اللى جاى هيكون ايه خفت لانى عارفة ان لسه نفوس مش طيبة وخبيثة عايشة ومعششة جوا جدران الوطن مستنية فرصة علشان تنشر سمومها فى كل مكان .

شفت الخلاف والاختلاف والشد والجذب والتنازع والتناحر واللى كان سببه مش الشباب فى الميدان .. اللى كان سببه نظام فاسد ونفوس مريضة قدرت تسيطر على مشاعر المصريين الطيبة علشان يكرهوا مجدهم ويرجعوا من تانى لذل والعار الشعب .

يسبوا الشباب يقول رايه ويعبر عن اللى عايزه من حقه يتظاهر ومن حقه يكره اللى ظلمه ومن حقه يحارب الفساد ومن حقه يشوف بلده افضل .. وانت مش عايز تشارك دا حقك بس مش من حقك تشوه صورتهم وتسوء ثورتهم وتقول انهم سبب اى شئ حصل ولا هيحصل .

كلنا خايفين على البلد وكل واحد ليه وجهة نظر لازم نحترمها في بينا خلاف دلوقتى بس بلاش تنسوا ان فى حاجة مشتركة بينا كلنا .. كلنا مصريين وكلنا بنحب البلد دى وبيتمنى يشوف اللى جاى احسن هى اختلاف رؤية مش اختلاف هدف .

السبت، 5 فبراير، 2011

ومين يهمه

و مين يهمه ...
لو ان دم عصفور صغيّر ع الأرض سال ؟
لو ان وردة لسّا بنداها دُسنا عليها و الغصن مال ؟


و الآن قلب و روح بيتقسموا
و الآن وطن بيسلّم حروف اسمه
بيخلع آخر هدمة على جسمه
و مين يهمه ؟

مين يهمه ...
لو اتسرق نبض الخطاوِى م الشوارع ؟
و الأمان هجر البيوت ؟
و الخوف خطف منّنا لمعة عينينا ؟
و القهر عشّش عنكبوت ؟

بلاش تجاوب ع السؤال
اكتم فى قلبك صرختك !
بلاش تجاوب ع السؤال
أصل اللى جابك موّتك !
و مين يهمه ؟

و الآن قلب و روح بيتقسموا
و الآن وطن بيسلّم حروف اسمه
بيخلع آخر هدمة على جسمه
و مين يهمه ؟
الآن وطن بيغيّر العنوان

و منين نجيب قدرة تملانا تانى بروح ..
تدب فينا حياة .. ننسى هوان و جروح ؟
لو لسّه ف قلبى و قلبك أحلام مش راضية تموت
لو لسّه لكلمة بلدى .. ريحة و طعم و جبروت
المحنة سحاب هيعدّى و الصعب أكيد هيفوت
طول عمرك و انت الأبقى و الخالد رغم الموت
والكل هيهمه.. والكل هيهمه