الأحد، 6 فبراير، 2011

هما آخر كلمتين


كل عين تعشق حليوة
و إنتي حلوة في كل عين
يا حبيبتي أنا قلبي عاشق
و اسمحيلي بكلمتين
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين


هما فعلا آخر كلمتين ومش هتكلم بعدهم تانى سواء كنت مؤيد او معارض او واقف فى النص يمكن خايف .. ويمكن ليك وجهة نظر ويمكن انت حابب تعيش كده فى امان وهمى وزايف .. ويمكن انت زيى خوفك جاى من اسباب تانية خايف تشوف شباب بيموتوا تانى وخايف على البلد دى من كل اللى بيقول مصلحتى اولا
هقولك الحق واضح وباين زى نور الشمس مش محتاج تفتح عينك اكتر واكتر علشان تشوفه الحق واقف هناك فى الميدان .. الحق كان فى كل دم سال وغطى الميدان .. الحق فى كل ارواح الشهداء اللى ضحوا بحياتهم علشان ترجع من تانى مصر تتنسم نسيم الحرية والكرامة.

كنت معاكم ووقفت لحظة علشان افكر واحسم قرارى فين الصح من تانى وفين الغلط وانا لسه بحترمكم وبشهد بعظمة ثورتكم
بس يمكن زيى زي غيرى خفت على اللى جاى هيكون ايه خفت لانى عارفة ان لسه نفوس مش طيبة وخبيثة عايشة ومعششة جوا جدران الوطن مستنية فرصة علشان تنشر سمومها فى كل مكان .

شفت الخلاف والاختلاف والشد والجذب والتنازع والتناحر واللى كان سببه مش الشباب فى الميدان .. اللى كان سببه نظام فاسد ونفوس مريضة قدرت تسيطر على مشاعر المصريين الطيبة علشان يكرهوا مجدهم ويرجعوا من تانى لذل والعار الشعب .

يسبوا الشباب يقول رايه ويعبر عن اللى عايزه من حقه يتظاهر ومن حقه يكره اللى ظلمه ومن حقه يحارب الفساد ومن حقه يشوف بلده افضل .. وانت مش عايز تشارك دا حقك بس مش من حقك تشوه صورتهم وتسوء ثورتهم وتقول انهم سبب اى شئ حصل ولا هيحصل .

كلنا خايفين على البلد وكل واحد ليه وجهة نظر لازم نحترمها في بينا خلاف دلوقتى بس بلاش تنسوا ان فى حاجة مشتركة بينا كلنا .. كلنا مصريين وكلنا بنحب البلد دى وبيتمنى يشوف اللى جاى احسن هى اختلاف رؤية مش اختلاف هدف .

هناك 7 تعليقات:

  1. الحق فعلا أبلج كما يقولون
    هم هناك في ميدان التحرير يدافعون عن حقوقنا و يتحدثون باسمنا جميعا
    و فقهم الله و حفظ مصر

    كلمات جميلة يا صديقتى
    تحياتى

    ردحذف
  2. هقولك شئ واحد احنا مافيناش حجود يااية احنا اتربينا على احترام الكبير منكرش انه غلط فى حقوق كتيرة ومنكرش انه زى ما بقراء على ويكليكس وزى ما شوفت كان عظيم اوى وكبير اوى فى حق بلده برة وجوه بردوا مصر بعد السادات كانت صحراء انا على الاقل احيب ليه انه ضغط على رجال اعمال يسحبوا فلوسهم من دول الخليج ويستثمروا فى بلدهم لكنه مش نبى ولا ملاك دا انسان وفيه الخير وفية الشر الغلط والصح الدين علمنا "وصحبهما فى الدنيا معروفا "
    فى صراع جوانا يا اية بين الجحود وحقنا لكن احنا خرجنا علشان حد يسمعنا ونسمع غيرنا مش نتسلط على راى ونلغى كل سئ ولا هو احساس القوة بيأثر على كل اللى بيحسه وبننسى وقت الضعف
    فى شئ اهم دلوقتى اسمه مصر اسمه صراع من كل اللى حوالينا بما فيهم اسرائيل اللى بتحاول تحشود جيوش دلوقتى وبعتت داتا وميديا للكونجرس ومجلس الشيوخ للى حاصل فى مصر علشان يكون حجة للدخول لا حقنا غلط ولا احترمنا لية ورؤيتنا فيه صورت والدنا وسبيته وموته غلط دا بشر فى منطقة رمادى بين كل شئ مش ابيض واسود
    انا موجوع جداااااااا وببكى كل لحظة فى حاجة غلط فى اللى بيحصل لكن مش فى مطالبنا ولا فى احترامنا لية ولا فى خوفنا على بلدنا
    اتمنى الجميع يحترم راى غيره وميتهموش زى ما بقى شايع بالخيانة والعمالة كلنا لينا حقى فى بلدنا وفى رائينا ومش كلنا صح ومش كلنا غلط لكن فى شئ اسمه نقطة التقاء
    "كفاية كدا يالدود"

    ردحذف
  3. إذا احتدمت المعركة بين الحق والباطل حتى بلغت ذروتها، وقذف كل فريق بآخر ما لديه ليكسبها، فهناك ساعة حرجة يبلغ الباطل فيها ذروة قوته، ويبلغ الحق فيها أقصى محنته، والثبات في هذه الساعة الشديدة هو نقطة التحول، والامتحان الحاسم لإيمان المؤمنين سيبدأ عندها، فإذا ثبت تحول كل شئ عندها لمصلحته، وهنا يبدأ الحق طريقه صاعداً، ويبدأ الباطل طريقه ن...ازلاً، وتقرر باسم الله النهاية المرتقبة
    الإمام الغزالي

    ردحذف
  4. السلام عليكم
    وهناك الكثيرين منهم شهيد الحرية عندي على وحي القلم

    ردحذف
  5. كلنا خايفين على البلد وكل واحد ليه وجهة نظر لازم نحترمها في بينا خلاف دلوقتى بس بلاش تنسوا ان فى حاجة مشتركة بينا كلنا .. كلنا مصريين وكلنا بنحب البلد دى وبيتمنى يشوف اللى جاى احسن هى اختلاف رؤية مش اختلاف هدف .


    انتى كده صح

    ردحذف
  6. فلنترك الخلاف لما بعد

    المهم الآن

    مصر

    ردحذف
  7. كل عين تعشق حليوة
    و إنتي حلوة في كل عين
    يا حبيبتي أنا قلبي عاشق
    و اسمحيلي بكلمتين
    كلمتين يا مصر يمكن
    هما أخر كلمتين
    حد ضامن يمشي آمن
    أو مِـآمن يمشي فين



    تكفينى هذه الكلمات

    ردحذف