الأحد، 30 مايو، 2010

بلا علم بلا بتنجان


من خمس شهور اتهفيت فى عقلى وقررت انى اكمل دراسات عليا يعنى قولت يمكن ربنا يكرمنى واخد الدبلومة وبعدها اعمل الماجستير

كنت تقريبا مسطولة يوم ما فكرت الفكرة الهباب دى . ركبت دماغى ومسمعتش كلام اخواتى وماما اللى فضلوا يقولوا بطلى هبل وبطلى هيافة انتى مش لاقية حاجة تعمليها وحبيت اثبتلهم العكس وروحت قدمت وكان من حظى انهم لغوا موضوع الدبلومة الخاصة السنتين وخلوها سنة واحدة بس بشرط اخد قبلها سنة مهنية , المهم قولت مفيش مشاكل هى هى كنت هاخدها فى سنتين وهى كدا بردو سنتين وماشاء الله يعنى الجامعة بتاعتنا فكروا وقرروا يخلوا الدبلومة اقسام يعنى بدل ما كانت قسم واحد لا تركوا الاختيار للناس تختار القسم اللى ترتاح له واللى تحبه وتكمل فيه بعد كدا , طبعا لحظة الاختيار دى كانت صعبة لانى اصلا مبحبش التخير بحب الاجبار اتعودت على كدا يااااناس اعمل ايه بس .

فضلت اسبوع اقول اختار ايه اختار وفى الاخر اخترت القسم اللى انا فيه قولت انا ارتحت له كان فيه قسم ارشاد نفسى وانا بصراحة شايفة انى مجنونة ومش هنفع فيه , كان فيه قسم ادراة مدرسية وانا اصلا بكره التدريس وسنينه ادخل ادارة وكمان دا للمديرين والناس الكبيرة , اصحابى اختاروا القسمين دول وداخلوا فيهم , كان فيه بقى قسمين هما اللى شدوا انتباهى قسم( التربية الخاصة _ تربية خاصة )

بس مكنتش عارفة الفرق ما بينهم وكل ما اسال اى حد يقولى معرفش حتى الموظفين هناك , بينى وبين نفسى كدا وقولت التربية الخاصة هى اللى مقصود بيها اللى بيعانوا من اعاقات ذهنية وانا بصراحة حسيت انى مش هقدر اتعامل معاهم لانى عصبية وخفت انى فى يوم لو كملت دراسات فى القسم دا اسئ معاملة العيال فقررت ابعد عنه

واختارت قسم تربية خاصة تواصل صم وعميان وقولت القسم دا حلو وانا باذن الله هرتاح له , وبدات الدراسة لقيتهم بيقولوا لازم تنقسم وتختار لما تتدرسوا تواصل صم لما تتواصل عميان .... ورجعنا لنفس النقطة انى بكرهه التخير اهئ اهئ اهئ

اصل انا عايز تحيرنى خيرنى وفين وفين وها ها اخترت تواصل صم ودا بسبب انى حابه اتعلم لغة الاشارة وفى نفس الوقت الصم فى بلادنا تعليمهم سئ جدا ومش من حقهم يدخلوا جامعات بالاضافة لصعوبة التواصل مع الناس بعكس المكفوفين اللى يتعاملهم بيكون اصل مع الناس

خمس شهور مرروا دلوقتى وانا بدرس الدبلومة تخيلوا انا استفدت ؟؟؟ ولا حـــــــــــــــاجة وبجد ومش بهزر ولا حاجة استفدتها لغة الاشارة معرفش منها غير عشر كلمات يمكن , ومحتوى علمى زفت زبالة , دكاترة اصلا مكنوش فهمين هما بيدوا ايه المناهج كانت بتتغير اكتر من مرة علشان مكنوش عارفين يدرسوا ايه لانه قسم جديد , الحاجة الوحيدة اللى كنت بحبها العيال اللى كنا بنروح لهم تربية عملى حسسونى بجد الناس دى محتاجة حد يفهمها اكتر ونقرب منهم اكتر , كانوا صبورين لابعد الحدود وهما بيعلمونا لغة الاشارة كنت اليوم الوحيد اللى بحبه فى الاسبوع على الرغم من المدرسين فى المدراس دى كانت تعاملهم حلو مع العيال وكانوا زى اولادهم بس للاسف طرق تدريسهم بدائية جدا واشاراتهم قليلة والعيال بالتالى كان تعليمهم ومستواهم وحش جدا

المفروض انى بالدبلومة دى ادرس للاطفال فى مدارس الامل بس ازاى وانا حاسه انى زى الحمارة بجد مكنتش متخيلة الدراسات العليا فى الجامعات تبقى بالغباء دا , فرقت ايه عنها عن التعليم الجامعى العادى

كنا زى فيران التجارب اول دفعة وبيجربوا فيها بجد انا كرهت التعليم كله وكرهت التعليم الجامعى اكتر واكتر , كنت بكره كلية تربية لانها كلية نظرية ومفيهاش اى افادة وبنخرج مدرسين بقر حمير مش عندنا اى محتوى علمى نطلع ازاى مدرسين لاجيال جاية بعد كدا

امتحاناتى قربت , مخلصتش الابحاث اللى ورايا اللى كالعادة مش فاهمها بس انا بدشها وخلاص بجيب من هنا ومن هنا وبروح اديها للدكتور اللى بيرميها فى الزبالة , حساه انى مخنوقة ومش طايقة الجامعة ولا سيرتها ولا الدكاترة فيها , بكره التعليم والتدريس واى حاجة ليها علاقة بيه , وصاحبتى بتقولى تعالى اشتغلى فى مدرستى , اشتغل ايه وانا شايفة اننا بندمر اجيال مش بنعلمهم

انا بجد بشفق على الاطفال اللى بيدمر عقولهم بسبب ناس زيى كانت ضحية لدكاترة فى كليات التربية مش فاهمين اصلا الى بيدرسوه مجرد نظريات عقيمة عفا عليها الزمن بتتدرسس هى هى تناقشى الدكتور فيها يقولك افهميها زى ما هى كدا لانه هو اصلا مش فاهمها هو حافظها

انا مضطرة ابعد شوية عن التدوين لابعد الامتحانات مش هذاكر متفهموش غلط , انا بس حسه انى مضغوطة وانى هنفجر , ولو اتكلمت عن الدبلومة وقرفى معاها هحتاج مجلدات مش مجرد بوست , انا بفكر اعمل كتاب عن الموضوع ده ههههههههههه

يلا اروح اشوف البحث اللى مش فاهمة منه اى كلمة منه ولو جيت السنة الجاية اقول هكمل ابقوا كلكم تفوا فى وشى واضربنى بالجزم , ومفيش مانع تحدفونى بالطماطم

العلم فى الراس مش فى الكراس يابا , بلا علم بلا بتنجان

الخميس، 27 مايو، 2010

اتعـــودت





رجعت اتفرج على صورك تانى ... رجعت اسال عليك القريب والبعيد واعرف اخبارك منهم

بعد ما كنت خلاص نسيت واتاكدت ان اللى كان جوايا ليك مهوش حب ولا غرام ولا اشتياق

كان مجرد فضول

انا واثقة انى الفضول جوايا مات وان انت جوايا بردو مت بس اللى جوايا دا مش لاقية له تفسير غير انى اتعودت كل يوم اعذب نفسى بيك


الجمعة، 21 مايو، 2010

عــرفهم من هو محمد



بسم الله الرحمن الرحيم

و الصلاة و السلام على سيدنا محمد خير خلق الله

Everybody Introduce Prophet Muhammad Day
عــرفهم من هو محمد

قامت مجموعات و مواقع كثيرة معادية للإسلام وسيدنا محمد بعمل حملة علي الإنترنت و اسمتها هيا بنا نرسم محمد
و خصصت يوم 20 مايو 2010 لتجميع أكبر قدر من الرسومات للسخرية من نبينا عليه الصلاة و السلام
بل ويريدون ان يكون يوما ثابتا في كل عام


فجاء دورنا لنقوم بأكبر حملة علي الانترنت من 20 الي 30 مايو للتعريف بخير خلق الله

Everybody Introduce Prophet Muhammad Day



فمن هو خير خلق الله الذي يريدون السخرية منه؟؟


ولد فى بيئة تعبد الاصنام وتدفن البنات احياء وتقتل الجار وتهين المراة وتحتقر الضعيف
فبعثه الله الي العالم كما بعث الرسل إلتى من قبلنا ، فأمرنا بالبر والصدقة والوفاء وأداء الأمانة ، ونهانا أن نعبد الأوثان ، وأمرنا بعبادة الله وحده لا شريك له وكرم المراة وجعل لها نصيبا من الميراث واعطى للضعيف حقة من القوى وامر بالاحسان الى الجار واسس دولة عظيمة استمرت حتى الان

فمن هو هذا الرجل العظيم الذى استطاع ان يغير من الفكر البشرى ويرتقى به

اذا اردت ان تعرف المزيد عنة فادخل الى لموقع نصرة رسول الله


Muhammad

الثلاثاء، 18 مايو، 2010

تخيــــــــل



تخيــــــــل








تخيل نفسك شجرة
و اثبت لانك شجرة
ضارب في الارض مسافة
وثابت
وانت أدري

تخيل نفسك نور
واعمي لانك نور
أنا كنت سور البير
وصبحت بير السور

تخيل نفسك باب
وافتح لانك باب
علي دنيا أصلا طريق
وبينتهى بسرداب

تخيل نفسك ليلة
واطول لانك ليلة
والنور سقفك .. تعالي
مهما تطول دي ليلة

تخيل نفسك وردة
وازهي لانك وردة
كل الالوان قصادي
بس الريحة واحدة

تخيل نفسك حلم
وبراحتك ماانت حلم
التتر آخر حاجة
في دنيا أصلا فيلم

تخيل نفسك بيتها
وادفي لانك بيتها
وان دقت راحتها فيك
اعرف انك حبيتها

تخيل نفسك مرة
ماتخافش جرب مرة
الدنيا ماشية أسيرة
في الوقت
وهيا حره

تخيل نفسك باقي
واحزن لانك باقى
واحلم تلقالك حاجة
واتحدى لو تلاقي

تخيل نفسك جنبي
والزق لانك جنبي
الجسم ده مش ملكي
والغنوة دي من قلبي

*
*
*
*
عمر طاهر
يناير 2006
قهوة وشيكولاتة

الأحد، 16 مايو، 2010

الطريق إلى عتليت _ جرائم الحرب ضد الاسرى المصريين


الجزء الاول



الجزء التانى


فيلم تسجيلى مهم حول قضية الاسرى المصريين و هو فى حد ذاته يعتبر دليل قاطع على وقوع جرائم حرب فى عامى 1956 و 1967 خاصة 1956 لما تتضمنه من اعترافات اسرائيلية حول الجرائم التى ارتكبت فى سنة 1956 على يد القوات الاسرائيلية






البوست الاصلى عند دكتورة ستيتة

الخميس، 6 مايو، 2010

بموت ببطئ




..............

نقط كتير فوق السطور

زى دوامات جو البحور

كل دوامة ليها الف معنى

والكلام جوايا مات

وانا اصلا بكره السكات

جوايا تايهة من غير نهاية

فى دايرة بمشى ملهاش بداية

والدنيا دى زى الحكاية

بسمة وامل

ودمعة وندم

وحياتنا مالها هدف

ولاحتى غاية

هموم تنوح ويا الجروح

ترفض تبوح

وانا لسه ثابتة بقول يارب

يارب قلبى رافض يموت

بس السكوت

ده موت بطئ

يألم بجد

وعقلى سارح فى كل شئ

ولا عمره يوصل لاى شئ

محتاجة جنبى إنسان وقلب

يضم روحى ويا روحه

شيل جروحى واشيل جروحه

وندوب فى بعض


السبت، 1 مايو، 2010

الأيـــــــدى النــــاعمة










ازاى يعرف الانسان المصرى انه فى اجازة رسمى ؟؟؟

اقولكم انا لو فى اول السنة الهجرية يعرضوا فيلم فجر الاسلام

ولو احنا فى المولد النبوى يعرضوا فيلم الشيماء

ولو فى 6 اكتوبر هيعرضوا الرصاصة ما زالت فى جيبى واغنية على الممر

ولو عيد العمال زى النهاردة اكييييييد لازم يعرضوا اغنية دور ياموتور _ وفيلم الايدى الناعمة _ ومراتى مدير عام

وبما ان النهاردة بيقولوا عيد العمال قولت ادور فى التليفزيون علشان انا بحب التلات حاجات دول اخررررر حاجة لا لقيت فيلم مراتى مدير عام ولا لقيت الايدى الناعمة اللى عرفت بعد كده انه شغال على الاولى اللى محدش بيسمعها من اساسه دلوقتى ولا اغنية دور ياموتور


واكيد مش هيعرضوهم لان ده هيبقى تحريض صريح للناس العاطلة والباطلة اللى زيى انهم يقموا يطالبوا بحقهم بالعمل وده اللى الدولة مش عايزة تتعب دماغها بيه ......... ما علينا مش ده موضوعنا

موضوعى هنا فيلم الايدى الناعمة واللى مش عارفة انا ليه بحبه وبستناه يوم عيد العمال مخصوص فيه حتة كده فى الفيلم لما صباح تحب احمد مظهر ومش تترضى تجوزه علشان هو مش بيشتغل وعاطل ومش توافق بيه الا لما يكون ليه وظيفة مش عارفة ليه الفكرة دى سيطرة عليا لغاية دلوقتى , يمكن تكون فكرة غبية بعيد عنكم وبقى فى دماغى ان الراجل اللى مش بيشتغل ويعرف بجد ازاى يتعب علشان يعيش
يبقى ميستحقش اى شئ فى الدنيا ولا هيقدر يحافظ على اى حاجة فى اى حاجة .

علشان كده بستغرب جدا لما واحدة يتقدم لها واحد لسه بيبدا حياته وتقولك عايزة شبكة وتجهز شقة وفرح فى احسن مكان وهو اصلا لسه شاب فى بداية حياته طيب هيجبلك منين مش كفاية ان ربنا كرمك بانسان بيعتمد على نفسه ومش بيعتمد على حد انسان وهيقدرك بجد

وباستغراب اكتر لما واحدة تفرح بالامكانيات الفظيعة والشقة والشبكة والفرح الضخم وعريسها اصلا مدفعش فيهم مليم بس اهله اللى دفعوا زى حكاية سمعتها جابلها شبكة مش عارفة 100 الف وفرح معرفش بكام , ومش هو اللى دافع مليم فيهم ده باباه

طيب وهو الانسان اللى زى ده اللى مش متحمل مسئولية يعتمد عليه ويشيل هم بيت ده فى اى لحظة هيقولك بالسلامة علشان متعبش فى اى حاجة زى ما باباه جوزه مرة يجوزه تانى وتالت


يمكن انا لسه بفكر غلط بس الفكرة اللى فى دماغى ومش عايزة تتغير ان الراجل لازم يبقى بيشتغل واى شغل المهم المهنة شريفة ومش مستنى من بابا يصرف عليه ويجبله كل حاجة ويجوزه كمان








ملحوظة

فيه حملة اسمها 30 يوم من التدوين اتمنى كلنا نشوفها ونتابعها وده الرابط بتاع الموضوع


حملة 30 يوم من التدوين