الأحد، 21 نوفمبر، 2010

آخــــر المشـــــوار



ووصلنا لآخر المشوار ..
اللى كنت خايفة منه حصل ..
قلبى استناك كتيــــــــر ..
لكن كل الأحلام هربت منى ..
وكل أمل جوايــا انكســــر ..
حلمى اللى عشت احلمه طول السنين ..
فستان وطرحة ودبلة وايدين متشبكين ..
وقلب اكون فى حضنه مليان بالحنين ..
خلاص انتهى جه الوقت أفكر بعقلى ..
وكل واحد مننا يمشى فى طريق ..
واسيب قلبى يموت من الأحزان غريق ..
كان صعب أشوف دموعك قصاد عنيا ..
لكن صدقنى مش بأرادتى ولا بايديا ..
خلاص انا مبقتش ليـــك ..
هبدأ حياتى مع قلب تــــانى ..
هلحق العمر ليجرى وهلحق زمانى ..
يمكن مابحسش معاه بنفس الأمان وانا بين ايديك ..
ولا بشوف نظرة حب تشبه نظرات عينيك ..
بس أهو قلـــب والســــلام ..
وده نصيبى ونهاية الأحلام ..


هناك 10 تعليقات:

  1. الحالة نفسها مش صح 100%
    اخر جملتين اللي هي قلب والسلام دي غلط
    لو في حد خلاص هتفرقيه وهيجي حد تاني لازم تحبيه وتتقبليه برضه
    لان لو حاطه في دماغك انه حاجة والسلام دي هتبقي دايما موجودة مهما حصل

    ردحذف
  2. للأسف كلماتك واقعيه جداً و تحدث كثيراً و مع أني ضد أن نرتبط فقط لتستمر الحياه و لمداواة جرح لكنه أحياناً يكون الحل الوحيد للنسيان
    تحياتي لك

    ردحذف
  3. الكلمات كلها وجع

    غلط اننا ناخد قرار و قت انفعال و صعب ندوس على القلب لان العقل يحتاج ان يقتنع بالخطوة فيقنع القلب اولا

    ردحذف
  4. adel

    هى اكيد مش حالتى يعنى ومش اتمنى تبقى حالتى فى يوم
    وهى فعلا حالة غلط وينفع الانسان يكمل مع قلب والسلام
    بس صدقنى دا بيحصل فى حالات كتير جدا الدنيا بقيت بتشجع الانسان يبيع مشاعره الجميلة حتى الحب
    هى مكنش هينفع تفضل جنبه لاخر العمر وهو مش بياخد خطوة ايجابية
    مرسيى للمرورك ياعادل :)

    ردحذف
  5. شيرين سامى


    هى واقعية وشوفتها كتير والبنات بتعتبر خاينة بعد تصرف زى دا بس هى الحقيقة اى بتجرح نفسها قبل ما تجرح غيرها
    لان ببساطة هتعيش مع واحد وقلبها مع واحد تانى
    مرسيى للمرورك جدا نورتى المدونة

    ردحذف
  6. همسات وبحــ الحياه ــر

    من غير زعل ربنا ما يكتب الفراق على اى اتنين بيحبوا بعض ابدا
    مرسيى للمرورك نورتى المدونة


    Tears
    هى اكيد مش اخدت القرار وقت انفعال يمكن هى فكرت كتير بدليل انها لسه متألمة من جرحها ليه ولسه بتحبه بس ساعات الواقع بيفرض علينا اننا نختار اختيار مش مع رغبتنا
    مرسيى للمرورك نورتى المدونة

    ردحذف
  7. ايات
    يسعد مساك
    قلت مش بتتكلمي عن نفسك و مابتحبيش تكوني في الموقف ده لكن ابداعك ده و اللي خطته اناملك بيدل على انك متفقة على الموقف انها تعيش مع واحد ثاني بالرغم انها مابتحبوش بعلة انه لم يقم ياي موقف ايجابي اتجاهها و لا يمكن تستناه لاخر العمر ده موقفك
    و اسمحيلي يا ايات اقول لك انك غلط و اي واحدة في نفس الموقف و اتخذت نفس الحل هي غلط لانها بقرارها ده بتبين انها فقط عايزة تتجوز و ان كل طموحاتها بتكون في بيت العدل زي ما بتقولوا
    الحب عزيزتي مش كده ابدا الحب تضحيات جسام و معاناة كبيرة و عراقيل اكبر في ظل حياة قاتمة بس لازم نتخطاها بيقينا ان الحب قادر على تخطي كل حدود المستحيل
    عزيزتي اتمنى ان اللي بتتكلمي عنها ان هي لسه مارميتش نفسها في النار تلحقيها و تقوليلها تصبر مع حبيبها يمكن ان حبها الكبير يوصلها لبر الامان
    مودتي

    ردحذف