الاثنين، 16 أغسطس، 2010

السيد رئيس الجمهورية تحية طيبة وبعد



السيد رئيس الجمهورية تحية طيبة وبعد :-
اكتب اليك الآن ياريس وانا فى قمة الغضب , والثورة , والفوران , والغليان , وحرقة الدم , وضغط اعصاب ,وتقريبا تقريبا قرب يجيلى سكتة قلبية دا لو ربنا ماردتش ومت لما عطشانة من قلة المية _ او مت فطسانة من انقطاع الكهرباء

سيادة الرئيس والسادة الوزراة بالمرة ليا سؤال صغير عند حضراتكم ؟؟ ياترى ياهل ترى خطة ترشيد الكهرباء والمية اللى حكومتكم الموقرة بتتبعها معانا واحنا فى شهر كريم تنطبق على كل الشعب المصرى بما فيهم الريس ذات نفسه والسادة الوزراة _ ولا دا نظام ان الشعب اولاد البطة السودا يفطسوا ولا يموتوا ولا يتحرقوا ويولعوا بجاز ؟؟


انا راضية ذمتك ياريس " ههههههه " يعنى مثلا تصور معايا حضرتك كده صحيت من النوم الصبح وحبيت تتدخل الحمام بتفتح الحنفية وفجأة تلاقى ان المية مقطوعة وانه مفيش مية تغسل بيها وشك .. ولا مية علشان تشد السيفون حتى .. ولا الموضوع مش بينتهى على كده تلاقى ان انقطاع المية دا استمر يوم بحاله واكتر !!


ممكن توصفلى شعورك فى هذه اللحظة اعتقد هيبقى شعور قذر اوى وقصر رئاسة سيادتكم هتنبعث منه روائح كريهة لا تحتمل وهتلعن الدنيا كلها ويمكن تشيل المسؤولين اللى كانوا سبب فى قطع المية عن قصر رئاسة سيادتكم ...


ولا اقول سيبك ياريس من المية هنتصرف باذن مااحنا كده كده صايمين هنعمل ايه بالمية وان كان على الوضوء والصلاة ربنا كريييييييييييم اباح لنا التيمم ....


خلينا فى الكهرباء ... مثلا ياريس وانت فى ساعة العصارى وسيادتك عارف ياريسنا ساعة العصارى فى الجو الحر دا ايه نظامها مهو خلاص موضوع حلاوة شمسنا وخفة ضلنا دا الله يرحمها ويرحمنا ... جربت فى الوقت دا وانت قاعد تشغل التكييف مهو حضرتك عندك تكييف اكييييييييييييد " ماشاء الله عواميد النور حوالين سرايتك بتزغرد " وهب لقيت الكهرباء مقطوعة وكدت تموت فطسانا ولا غرقنا فى عرقك ومرقك ممكن توصفلى شعورك فى الساعة دى دا ان ربنا كرمك وقدرت اصلا تستحمل الحر دا ساعة ولا اتنين


والله انا اشك ان سيادتك اصلا موجود فى مصرفى الوقت دا من السنة تلاقيك بتقضى شهور الصيف فى بلد تنعم بالمية والكهرباء بوفرة والوجه الحسن ويولع الشعب او يموت فطسنا او عطشنا ... واحنا مش بنقر عليك ولا بنحسد داحنا شعبك ونتمنى لك كل خييييييييير والله وانك تكون مبسوط وفى اتم صحة وعافية وقصرك عمران بالمية والكهرباء والتكيييييييييييييف وبعدين احنا عارفين ان دى "خطة يابلد بقررررر الكبير لازمن يتظبط الاول وبعدين يظبطكم ... وعن قريب ان شاء الله هتنزل علينا ".


بس والله ياريس الواحد خلاص جاب اخره لما شهر كريم والدنيا صيام و المؤذن يقول الله اكبر مش نلاقى حتى كوباية مية نبل بيها عطشنا والواحد يعمل ايه فى الظروف المهببة دى مهو مفيش مية نشرب هنقدر ندخل الحمام يعنى كمان ممكن نموت مزنوقين اهئ اهئ .

ولا لما الكهرباء اللى بتقطع كتير دى تحرق كل الاجهزة اللى اهلينا طلعت عينهم وعينين اهلهم فى شراءها واللى اغلبها لسه بيقسطوا تمنها .

بقول حضرتك ايه ياريس احنا شعب بيصبر وبيتحمل ومش مهم مية مقطوعة ولا كهرباء مقطوعة ويعنى دا شئ عادى فى حكم سيادتكم بس انا مواطنة صالحة اه والله بفتح الحنفية يدووووووب ومش من النوعية اللى تحب تهدر مية كتير لدرجة انى لما سمعت موضوع تقليل حصة مصر فى مية النيل _ كنت ناوية اخد قرا ر ومش استحمى غير كل مرة كل سنة .


اما الكهربا والله ياريس والله امى رافضة تماما موضوع التكيف وقلبها بيتقطع علينا واحنا بقينا زى العيال الجربانة من الحمونيل والحر بس هى تقول لاااااا يمكن ابدا يدخل التكيف بيتنا ... حتى اننا بنطفى كل الانوار فى شقتنا المتواضعة لدرجة اصبحت عادة فيا انى اطفى الانوار للناس وانا عندهم لما اتخنقوا منى ..


انا بس اتمنى من حضرتك تستضيفنى فى قصر سيادتكم لغاية العيد بس بما انى مواطنة صالحة ومش من النوع اللى بيهدر الموارد عمال على بطال نفسى ياريس مفيش حاجة تعكر عليا وتعكنن عليا فى الشهر الكريم دا ونفسى ادخل الحمام براحتى والله ياريس انا نفسى استحمى من امبارح والمية مش جاية يعنى يرضيك شابة وفى مقتبل العمر .. والعرسان المفروض بتتوافد عليها تبقى قاعدة معفنة كده.. لالالا والله تبقى عيبة كبيرة , ومعلش لو فيها رزالة هو فى قصر الرئاسة فيه وصلة نت _ لانى اعانى ايضا من ازمة نتية خطيرة والا وهى استغلال شركة النت قبضت منى الفلوس من هنا وقالتلى اهو دقنى اهو ولو شفتى وش نت

والسلام ختام ياريس لانى سامعة خير الله ما اجعله خير تقريبا صوت مية وهييييييييه هييييييييه هستحمى اخيرا

هناك 55 تعليقًا:

  1. معلش انا بصراحة جبت اخرى هلاقيها منين ولا منين نت ومية وكهربا حاجة بقيت تقرف وتشششششششششل
    مش قادرة والله اكتب البوستات بتاعت رمضان وكان لازم افضفض شوية هموت من الفرسة ياجدعاااااان
    وسلام بقى علشان بجد المية جت وعايزة استحمى

    ردحذف
  2. هههههههههههههههههههه كلامك جامد مووووووت
    انتى هتروحى ورا الشمس اللى بعد القمر بشوية

    بس على فكرة مضمونة جامد جدا كمان عاجبنى او حكايى خطة يا بلد بقرررررر
    موت من الضحك عليها

    ردحذف
  3. طيب وهو وراء الشمس فى مية وكهربا ونت
    لو فيه انا مستعدة اروح ههههههه
    لا اطمن الريس قلبه قلب طيب وهينظر فى امرى وهياخدنى اقعد معاه لاخر الشهر

    ردحذف
  4. هههههههههههههههههههههه
    هههههههههههههههههههههههههههه
    احييييييه يا ايوشة شكلك كده هاتصيفي في سويسرا السنة ديه :)))

    هههههههههههههههه عجبتني موت وانتي بتقولي للريس حضرتك.. هو صحيح الريس يتقله حضرتك برضو يا بت؟؟؟؟

    ده يتقاله فخامتك او جلالتك او سيادتك
    لكن حضرتك ديه تقولهيا لمدرس العلوم وهو بيخترع لك طريقة بدل ما تهدري الماء في شد الفيسون :)))))

    ههههههههههههههههههههههه
    همووووووت من الضحك وربنا هامووووووووووووووت خلاص مش قااااااااادرة

    ردحذف
  5. هههههههه تصورى فعلا حضرتك دى مش تتقال للريس :))
    نبقى نصلح الموضوع دا علشان لما اروح اصيف فى سويسرا يبقى على حق وحقيقى
    وبعدين بعد الشر عليكى من الموت ضحكاا
    ان شاء الله فى بالى ياااااارب يموت وهو مش لاقى مية يشد السيفون هههههههه

    ردحذف
  6. ضحكتيني
    بس وجعتيني
    حتي إحتياجات الانسان الجسمانيه
    اللازمه لمعيشته اصبحت متروكه للظروف
    ووقعت تحت طائله لمن يهمه الامر
    أعاننا الله علي احوالنا
    وعلي احوال هذه الدنيا وهذه البلاد
    التي حقا لم تعد كبلادنا
    :(

    ردحذف
  7. أسلوبك جاااااااامد موووووووووت آخر حبتين تلاته .. ضحكتيني والله .. الله يجازيكي خير

    بس اسمحيلي أوقع بـ غير معرف .. ما حدش ضامن الظروف
    D:

    كل سنة وأنت طيبة وعندك ميه ونور ونت

    تحياتي

    "غير معرف"

    ردحذف
  8. ههههههههههه

    لا فعلا عندك حق
    بس على فكره احنا نستاهل لأن محدش بيتكلم خلاص كله اتعود على السكوت

    و بعدين دا الريس الكهربا عنده ببلااااااش و الميه ببلااااش و التليفون كمان ببلااااش
    ربنا يستر

    ردحذف
  9. زيزو كام فى مصر من المضحكات مبكيات
    سيب الحزن شوية ربك بكرة يعدلها بااااذن الله وكل حاجة تبقى متوافرة :))

    ردحذف
  10. P A S H A
    ههههه ايه الناس اللى بتخاف على نفسها دى وبعدين متخافش انا اللى هشيل الليلة كلها لواحدى ومحدش منكم هيضر
    لان الريس هيستضفنى عنده لغاية العيد ههههههه

    ردحذف
  11. P A S H A
    صحيح كل سنة وانت بالصحة والسلامة وعند الناس كلها نور وكهربا ونت

    ردحذف
  12. غير معرف

    اه فعلا محدش بيتكلم ولا بيطالب بحقه وصدقنى هنفضل ساكتين كتير شكلنا مش عارفة هنسكت لغاية فين تانى ابسط حاجة للناس بقى محروم منها
    وبعدين بطلوا قر على الراجل هههههه

    ردحذف
  13. أول حاجة يا ريس أنا بأقر وأعترف إنى ولا أعرف حاجة عن المدونة وصاحبتها غاوية الشكل دى
    العمر مش هدر والواحد عايز يعيش مستور

    كل سنة وانت طيبة قبل أى حاجة

    الشبكات فى مصر بالكامل حاليا بتعانى من الضغط الشديد عليها كنتيجة لشهر رمضان وخاصة فترة ما بعد الإفطار وللأسف مفيش استعداد لواجهة الوضع ده إطلاقا
    يعنى كان عندى على الفطار واحد من شركة الكهرباء عمال يبرر قطع الكهرباء وإنه خطة منسقة وكله تمام وقت السحور لقينا النور قطع تانى بقى غضبان وناقص يموتنا ومش فاهم هم بيقطعوه فى وقت مفيش فيه ضغط ولا يحزنون
    طب لييييييييييييييييه ؟

    والعاقبة عندكم فى المسرات

    ردحذف
  14. الازهرى

    يامرحبا يامرحبا اخيييييرا رجعت تزور المدونة تانى لا وايه جاى فى موضوع كارثة هنروح كلنا بيه فى داهية
    بس معلش انا مع اول قلم هقول انك انت السبب فى اى حاجة انت السبب الاساسى فى التحريض وانت صاحب الفكرة p:

    وبعدين لو المشكلة زى ماانت بتقول يبقى ايه الحكومة دى تتشال مادام مش بتعرف تفكر وتنسق ولا هى اى حد يمسك مناصب وبس

    كل سنة وانت طيب ياازهرى وكل سنة وانت زى ماانت غااااوى شكل بردو

    ردحذف
  15. يا سيادة الرئيس الريحه طالعه في المدونه

    اغيثونا تصور فخامتك سياتك عظمتك معاليك لما يكون 30 مليون مواطن بس من الشعب بنفس الظرووف
    هنعاني من الريحه لعقود قادمة و ماتقولوش انها فرصة ان الحر موجود و العرق مرق يبقي نشربه

    كده انا تعديت منك الله يسمحك و يعفو عنك ويرزقك نهر في الجنه تشربي فيه براحتك

    تحياتي

    ردحذف
  16. ألريس عنده تكيف ؟؟؟
    اول مرة اعرفه
    هما جددوا القصر الجمهوري ؟؟؟
    بس مبروك ياريسنا
    :)

    ردحذف
  17. والنبى يابنتى تبقى تسأليلى الريس كده لو ينفع اجى معاكى
    انا بردك زيك برشد فى كل حاجه الا النت
    طول النهار والليل شغال بساكيد يعنى الراجل ده عنده نت ببلاش وهاقيه عنده واحد ميجا اللهم صلى ع النبى

    وحياتك انا مستنى ردك ولو بعتيلى ومارتش عليكى يبقى انا فطست من الحر ده

    ردحذف
  18. ههههههههههههههههههههههههه

    والله شر البلية ما يضحك
    عجبني اسلوبك جدا يا ايه

    بس هتوحشينا :D

    هحوش من مصروفي واجبلك حلاوة

    شوفي حد يقفلك في طابور العيش بقي عشان مش بطيقة :D

    ردحذف
  19. هنقول ايه ولا نعمل ايه
    هكذا خلقنا الله
    نستحمل بقى ونقول يارب صبرنا عاللى بيحصل
    وانته القوى يارب
    نستحمل مفيش غير كدا
    ونتبع سياسة جرادل الميه المتخزنه
    وانا عن نفسى لو فى البلد كان زمانى راقد جمب الطرمبة
    ميه ساقعة وهنا وبالمجان
    لسه ارض مصر حنينه شوية على ولادها
    حتى لو اهلها كلهم بيضربوا بعض بالقباقيب
    :)
    تحياتى
    وربنا يفك عننا الزنقة دى
    فقرى

    ردحذف
  20. هو الكبير هيقعد يتظبط اكتر من 30 سنه ؟؟؟ هو المفروض يتظبط كام سنه وبعدين التظبيط يهبطلنا؟؟

    سعد زغلول كان حاسس
    مفيش فايده :)

    ردحذف
  21. ياخبر اسود ومنيل بستميت نيله
    أنتى يابنتى عايزه ايه
    انتى مش هتروحى ور الشمس ولا القمر
    لالالالا
    خالص
    أنتى هتروحى الغربانيات
    ده بقى مقولكيش معتقل على كيف كيفك
    فيه ترشيد لكل حاجه طبيعى
    ماهو تحت الارض بكام دور كده

    عايزه تقضى كام يوم فى الاقصر الجمهورى
    هههههههههههههههههه
    بزمتك الريس يروح فين
    هو والعيله الملكه اقصد عيلته الكريمه
    أنتى تيجى تقضى كام يوم
    وكل واحد من عامت الشعب يجى يقضى كام يوم
    والريس بقى يبات فى الشارع

    بوست رائع رائع بجد
    طريقه سردك للقصه بسخريه فظيع
    شكلك هتكونى كاتبه جامده جدا

    أنا سعيد جدا بمرورى على مدونتك

    تقبلى تحياتى

    محمد التركى

    ردحذف
  22. تصدقى بالله
    أنا غلبت بسبب الميه والنور
    والله العظيم فاطرين انهارده على ضوء الشمع والجو كان نار وكنا هنفطس والمسؤلين ولا حياة لمن تنادى وتيجى تتكلمى معاهم يقولو ضغط احمال وبنريح شويه

    شويه مين كل يوم
    هو ربنا قال كده
    ربنا ينتقم منهم اشد الانتقام وحسبى الله ونعمه الوكيل
    ربنا يولع فيهم

    مش لوحدك اللى هيستى من اللى بتشوفيه
    احناااااااااا كماااااااااااااااااام

    وكمان يومين هقبلك فى العباسيه

    وأتمنا من كل قلبى
    رسالتك توصل للريس
    وتعلقيى كمان معاهم
    ربنا يصبرنا فى البلد دى والعيشه واللى عيشنها
    تحياتى
    توتا

    ردحذف
  23. للأسف دايماً الحكومه بتبدع في حلولها الذكيه للمشاكل
    دايماً حلول المشاكل بتكون سبب في كوارث أكبر بكتيييير

    ربنا يحلها من عنده
    وكل عام وإنتي بخير

    ردحذف
  24. ههههههههههههههههههههههههههه
    رااااااااااااائعه-اسلوب-ساخر-واكتر-من-رااااائع-ياايوشه
    بجد-احلي-مقال-قريته-بقالي-فتره
    ربنايبارك-فيكي-يارب

    ممكن-اعمله-كوبي-عندي-بعد-اذنك-ياقمر؟؟

    ردحذف
  25. تحيا جمهورية مصر عربية

    لو لم اكن مصرية لوددت ان اكون .....

    لو عرفت الاجابه الصحيحه اتصل على 090009000

    ولو اتمسكتى ورحتى ابو زعبل اتصلى عليا عشان نروح سوا ناخد شاور ونقعد فى التكييف

    يابنتى دا شىء طبيعى جدا جدا
    احنا النور بيقطع والمية والدنيا ربيع والجو بديع قفلى على كل المواضيع

    وبعدين بلاش تتبطرى على النعمه لتزول هو اسراف مش كفاية انها بتكون موجودة نص اليوم ةلنص التانى بالكوز والجرادل اللى ماما بتخزنها

    انما انقطاع الكهرباء
    فهما بيعملوا كدا عشان ناخد ثواب اكتر فى الصيام انت مش واخده بالك

    وكمان مرة تحيا جمهورية مصر عربية

    بس وربنا انت حته سكره
    احبك فى الله

    ردحذف
  26. ههههههههههههه

    بجد جاااامده جدااا ^_^

    ردحذف
  27. معلش يا بنتي

    بس ما تحاوليش ... لا حياه لمن تنادي :(

    تحياتي

    ردحذف
  28. دموع القمر18 أغسطس، 2010 4:20 م

    احم حاجة الريس يستريح
    والشعب يتكيف :)

    ردحذف
  29. الرئيس مش محتاج كهرباء ولا ميه
    ده عايش فى مكان طبى وقائى ميه فى الميه
    مش تكيف وكلام فارغ
    قصور الجمهوريه دى
    صوره فاضيه
    ومتعرفش الراجل فين اصلا
    وتلاقى الشبيه قاعد فى الجونينه
    هههههههههههههههههههههههه
    مسرحيه الزعيم بقه
    كل سنه وانتى طيبه
    رمضان كريم

    ردحذف
  30. حقك !!
    بس هتوحشينا يا أيوشة و الله ..!!
    D:

    ردحذف
  31. معلش يا أيوشة هي حاجة تعصب فعلا
    ربنا يسامحه و احنا في رمضان كده و صايمين و دعانا مستجاب

    بس هو فعلا مش حاسس بأى حاجة

    طب يا رب الميه تقطع عنده و تيجي عندنا و النور كمان

    ردحذف
  32. ههههههههههههههههههههههههههه

    والله موتينى من الضحك يا ايوشة بجد

    الله يسعدك تسلم ايدك بجد

    وحقيقى هتوحشينى بعد الرسالة

    دى يا اوختى

    ردحذف
  33. صدقتى يا اختىىىىى والله
    من ميه لكهربا يا قلبى لا تحزن
    بس انتى بتشتكى للريس ليه يابنتى
    ما تسيبية يصيف فى هدوووء وبعدين انتى جبتى له المراه انتى والشعب اللى بتقولى عليه ده
    الراجل خلاص
    سنه كبر وتعب يا شيخة
    ارحمى شوية
    ارحمو من فى قصر الرئاسة تجيلك ميه طوول الشهر
    اسلوبك جميل
    دام قلمك

    ردحذف
  34. ازيك ياطانت
    اخبارك ايه
    انا جيت ازورك
    يارب تكونى كويسه
    ابقى زورينى ماشى
    مع السلامة
    كل سنة وانت طيبة

    ردحذف
  35. هههههههههه والله تحفه يا آيه قال يعنى الريس هيطلع يستنى ميه وكهرباء مش بعيد تقوليلى بيتسحر فول وبيشرب عرقسوس على الفطار هههههههه كل سنه وانتى طيبه ياقمرايا

    ردحذف
  36. ظاااااااااالمه يا ايوشه..
    الريس راجل لسه بيكون مستقبله.. انا فخور بيه وعشان كده بقوله
    هشتكنا وبشتكنا ياريس دانتا رئيس والنعمه كويس
    واحنا اللي شعب وحش قليل الادب..

    ردحذف
  37. السلام عليكم ايوشه النوشه كونوشه
    تحياتى
    وقال الوزير قرأت له تصريح بيقول اننا مش معقول نصرف 8 مليار جنيه عشان نعمل ماكينات توليد جديده اقصد زياده عشان خاطر ساعتين فى اليوم وتانى يوم لحس التصريح ده
    اما بقى حضرتك عايزه يضيفوك فى قصر الرئيس طول شهر رمضان .. بعينك يا حلوه .. انت كنت بنت مين فى مصر .. هو واحد بس اللى يجب وهلبت وربما ولازمن يتمتع بكل حاجه واحنا ما لناش حق فى اى حاجه .. عايز ياكل بطيخ ياكل .. عايز ياكل تفاح .. ياكل .. ربنا يتفحهم ويبطخهم ويخرب بيتنا احنا الشعب اللى مش راضين ان سعادتهم يتهنوا وينبسطوا وينشكحوا كمان
    عيد سعيد وكل عام وانت بخير
    تحياتى

    ردحذف
  38. كل سنه وانتي طيبه يا جميله :)

    عيد سعيد عليكي وعلى كل الاسره :)

    ردحذف
  39. يارب بس توصل الرسالة دي
    يارب


    كل سنة وانتي طيبة
    تقبل الله منا ومنك

    ردحذف
  40. ما قلت لك خليكى فى حالك واقعدى واسكتى
    يعنى لازم يا ريس ومش يا ريس

    اديكى ولا حد يعرف عنك حاجة

    عموما كل سنو وانت وكل احبابك فى سرو وهناء وسعادة

    ايه ده
    ولا أعرفها والله يا بيه بس كنت معدى رايح الجامعة مش أكتر

    ردحذف
  41. عيد سعيد وكل عام انتم بخير

    ردحذف
  42. مش عارفه عملت تعليق وطار راح فين

    نعيده تاني

    ازيك يارب تكوني بخير
    وكل سنه وانتي طيبه

    :))
    موضوع الميه والكهربا ده فكرت فيه كتير
    طيب الميه تنقطع لما بتيجي ادينا بنملي ميه نمشي بيها حالنا لما تنقطع تاني
    :))
    تحياتي

    ردحذف
  43. ثقافة الهزيمة.. أسكندرية ...ليه؟

    متحف الأسكندرية القومى والمتحف اليونانى الرومانى و متحف المجوهرات الملكية و متحف الفنون الجميلة و متحف الأحياء المائية و متحف محمود سعيد ، و قلعة قيتباى و قصر المنتزة و مكتبة الأسكندرية الجديدة و الميناء الشرقى و حديقة أنطونيادس و نصب الجندى المجهول.

    ومن الآثار الرومانية الموجودة بالإسكندرية المسرح الرومانى و عمود السوارى و معبد الرأس السوداء وحمام كوم الدكة الرومانى والذى أقيم على طراز الحمامات الرومانية القديمة ، و مسجد سيدى بشر ومسجد سيدى جابر ومسجد القائد إبراهيم ومسجد المرسى أبو العباس، وكاتدرائية الكرازة المرقسية وكاتدرائية اليونانيين الأرثوذكس و كنيسة سان مارك.

    محطة الرمل وكامب شيزار وسان ستيفانو وسيدى بشر ، و طريق الجيش الممتد بمحاذاة الكورنيش ، و سى جل للأسماك فى أبوقير و بحرى، و جيلاتى عزة و جيلاتى النظامى و قدورة للأسماك فى بحرى ، و شارع سعد زغلول و شارع صفية زغلول وفول محمد أحمد و حلوانى طلعت وهريسة الحلبي و البن البرازيلى فى محطة الرمل، و حلواني صابر بالأبراهيمية، و مشويات أبن البلد بمصطفى كامل، و سان جيوفانى فى ستانلى ، و مول سان ستيفانو ، و مشويات حسنى بالمندرة ،و مشويات بلبع فى سيدى بشر قبلى، و حلواني شهد الملكة فى ميامى و فيكتوريا، وركوب الترام من غير محطة محددة فقط كى تتفرج على الأسكندرية من شباك الترام و أهل الأسكندرية الطيبين.

    هذة بعض ما تحتويه مدينة الأسكندرية من معالم سياحية و مع ذلك لا تجد مدينة الأسكندرية على خريطة المدن السياحية الجديرة بالزيارة فى مصر فى مكاتب السياحة بالخارج و التى تنظم لها رحلات سياحية..

    باقى المقال ضمن مقالات ثقافة الهزيمة بالرابط التالى www.ouregypt.us

    ردحذف
  44. wooooooooooooooh
    Sarcasm Sarcasm Sarcasm
    I love ur hot sarcastic attitude frind
    its awesome letter,and I hope it reaches in the right mail box
    miss u so much
    Peace

    ردحذف
  45. خير الكلام ما قل ودل
    و دلعنا و هشتنكا ياريس و النعمه دنت هترفعنا ياريس

    ردحذف
  46. للأسف يا أيوشة انتى ناقشتى موضوع فى غاية الألم والأهمية بس الحمد لله ضحكتينا بجد بتعجبنى كتاباتك

    ردحذف
  47. مصر فى مهب الريح

    فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.

    1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
    2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
    3- مشكلة تعمير مصر والتى يعيش سكانها على 4% من مساحتها.
    4 – العدالة الاجتماعية .. وأطفال الشوارع والذين يملكون كل شىء .
    5 – ضرورة الاتحاد مع السودان لتوفير الغذاء وحماية الأمن القومى المصرى.
    6 – رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

    لمزيد من التفاصيل أذهب إلى مقالات ثقافة الهزيمة بالرابط التالى www.ouregypt.us

    ردحذف
  48. حبيبتي

    احنا أصعب من وضعكم وبنتحمل


    وكليها لربك كل الحكومات سكة

    ردحذف
  49. والله الكل يعاني في الكثير من بلادنا العربية بس نقول إيه غير لله الامر من قبل ومن بعد

    تحياتي

    ردحذف
  50. من ساعة ما كتبتى جواب الريس دة وانتى ولا حس ولاخبر ايه اللى حصل روحتى فين
    ياترى انت فين يامرزوق :) قصدى ياترى انتى فين يا ايوش
    ربنا يستر ويرجعك بالسلامة

    ردحذف
  51. انا بس جاى اسال عليكى واقولك اخباراتك ايه

    ردحذف
  52. السلام عليكم
    ياهلالالالالالالالالا
    معلش لازم نستحمل ونصبر علي الريس ده ربنا ياخده
    هاااااااااا فينك مش كتبتي بقالك كتير
    مستنياكي

    ردحذف