الثلاثاء، 10 أغسطس، 2010

اعترافات ليلية


1_ فى البداية النت لسه متفصلش الشركة بتلعب لعبة مش تمام معايا النت امبارح والنهاردة اتعدلوا وبقى شغال تمام , بس انا اللى بحاول اتعود على عدم وجود النت وبصراحة اتعودت شوية مش هكدب بس يمكن التعود راجع انى انا مش ليا نفس لحاجة الايام دى وشايفة انى وجودى من عدمه مش فارقة .

2_ انا بجد محتاجة اتكلم مع حد يفهمنى صح ومش يحور كلامى ويفهمه على مزاجه ويشوف ان حياتى ومشاكلى التافهة جداااااا جدااااااا مش مستدعية انى اكتئب وازعل عليها بس هيكون دا ازاى وانا شخصية مش بحب الناس او بمعنى تانى بكرهه الناس فيا .. اه والله ابتديت اشك انى عندى ازمة فى التعامل مع الناس وانى مش بعرف اتعامل مع البشر ليه بهرب منهم باستمرار وافضل الوحدة على انى ابقى مندمجمة معهم , ليه دايما خايفة ياخدوا انطباع غلط عنى , ليه دايما حاسه انى ندلة ومش من السهل ابقى صديقة وفية , وليه دايما حاسه انى جاية من عالم تانى وانى لو اتكلمت مثلا واندمجت مع الناس بتقل عليهم وبرزل عليهم وبغلس عليهم بشخصيتى الغلسة دى .

3_انا حاسه انى غلسة وانى ليا تصرفات غريبة برجع وقت ما احب وابعد وقت ما احب , اغير ايميلاتى 100 مرة كل كام شهر ..علشان كده قررت ابعد عن كل الناس لانهم مش هيفهموا انا بعمل كده ليه , مش هيفهموا ليه بكون مثلا على الفيسبوك وفى نفس الوقت مش عايزة افتح الايميل واكلم مع اقرب الناس ليا واقرب اصحابى , ليه مثلا بيكون التليفون بيرن عشر مرات متواصل وانا مش عايزة ارد , ليه فى لحظة بسأل على كل الناس ولحظة تانية ببعد اوى بصراحة انا عن نفسى مش عارفة السبب .
4_ الايام دى ماشاء الله كانت فيها مناسبات حلوة وسعيدة على ناس كتير حواليا انا اكيد كنت فرحانة لفرحهم وربنا يسعدهم كلهم .. بس القلب فيه حتة سودا كده بتخليه يفضل حزين ويقول امتى يامنيل انت كمان هتفرح , عارفين انى عندى احساس قوى انى عمرى ما هفرح فرح بحق وحقيقى وحتى لو حصل واتحققت حاجة من اللى نفسى فيها هتبقى فرحة ناقصة ومبتورة وملهاش طعم وهفرح بس كتأدية واجب مش اكتر .

5_نفسى حياتى متبقاش عادية زى كل الناس اللى عايشة عادى نفسى الاقى هدف حقيقى وسبب قوى انى اكمل فى الدنيا دى واحس انى بعمل حاجة عدلة فى حياتى , انا الايام اللى شبه بعضها دى واللى ملهاش اى طعم ارهقتنى جدا وتعبنى جدا وخلت اعصابى كل يوم فى النازل , مش عايزة بعد كام سنة ابص على حياتى الاقيها نسخة مكررة من ناس حواليا انا بكره اسلوب حياتهم اللى مفيهوش اى طموح ولا هدف ولا احلام ولا حتى مشاعر مش عايزة ده .

6 _عندى رغبة ملحة جدا الايام دى انى احب واتحب .. عااااااااااااادى شعور طبيعى عندى فراغ عاطفى , وهو بصراحة الفراغ دا من زمان مش من دلوقتى يعنى انا مش هكدب عليكم انا عمرى ما عرفت الناس بتحب وبتتحب ازاى .. يمكن اعجاب بشخصيات من بعيد لبعيد بس عمرى ما سمحت حتى لنفسى احب واعيش الحب حتى ولو بينى وبين نفسى .. الحب خطر احمر مينفعش اتعداه
كل طموحى الاقى الانسان الملتزم الاخلاق اللى هيخبط على الباب وبعدين احبه .. بس باللى شيفاه حواليا دا سواء اللى اتجوزوا ان حب او اللى اتجوزوا جواز تقليدى معتقدش فى يوم اعرف شعور الحب دا بيعشوه ازاى , الحب بين الناس بقى شئ طبيعى وعادى وكل واحد ولا واحدة تقولك بحب ومرتبطة لدرجة انا ابتديت اشك فى نفسى هو مين الصح ومين الغلط فى الزمن دا .. هو البنت من دول بقيت ايه باركينج مثلا قلبها دا يركن فيه الف واحد لغاية ما تلاقى اللى يقدر يحبها .

7_ وفى النهاية الحالة اللى انا فيها دى انى بعيدة عن ربنا ومش عارفة اقربله .. وحاسه انى خلاص من كتر الذنوب اللى فوق دماغى بقيت جبل مش قادرة اتحرك وارجع تانى .. انا عارفة ربنا غفور رحيم وبيغفر وبيتوب علينا .. بس ياترى لامتى هيفضل يسامح ويتوب والانسان عاصى وقلبه مات ومش عايز ينصلح حاله




كل سنة وأنتم كلكم طيبين وبخير يارب

هناك 26 تعليقًا:

  1. كل سنة وكلكم طيبين وبخير يارب ورمضان كريم عليكم وعلى كل الامة الاسلامية
    معلش النت لسه متفصلش الشركة بتستهبل الايام دى والنت بقاله يومين معدول
    ربنا يسهل بقى ويفضل كده على طول بعد ما اضطر ادور على شركة تانية

    ردحذف
  2. انا عندي رد بس بلاش احسن
    انتي قفلتيها :)

    رمضان كريم علي الكل

    ردحذف
  3. لا رد ياعادل
    ماانا عارفة انك صريح وهتقولى كلمتين فى وشى تمام
    قول يمكن انت تلاقيلى حل للى انا فيه امال انا بكتب الكلام دا ليه علشان الاقى حل
    بس عارف انت اكتر واحد عارف انى مفيش فايدة فيا
    ومش بتغير وانت نفسك يئست من طريقتى ودماغى

    ردحذف
  4. وادى التعليقات وفتحتها ومش هعمل عليها اشراف هخاف من ايه بقى

    ردحذف
  5. فل هابعتلك الرد استني

    ردحذف
  6. الود ودى أقول لا تعليق بس هبقى كذابة عندى إحساس إن الحالة دى مش عندك لوحدك مش تهوين صدقينى بس لأن كذا حد عنده نقاط مشتركة معاكى وأنا منهم مش مشكلة هدف مش موجود بس من كتر الأهداف اللى بندور ونسعى وراها وفى الآخر مش بنحققها بالشكل اللى كنا متصورينه بيقلل من حماسنا بشكل كبييييييييير بجد

    فى جزيئة كرهك للناس خايفة أقولك طبيعى أكون بعمم ومش هقولك أنا كمان علشان أشبه نفسى بيكى والغيرة موجودة وانك نفسك تفرحى دى كمان موجودة ومش غلط مفيش حد بيفرح لحد فى حاجة هو مش طايلة إلا لما بيكون نفسه يكون له نصيب فيها

    أما بقى الحب واللى عاملين قلبهم باركينج فصدقينى مش مستريحين لأن أغلبها بعيد عن الأهل والحكاية دى مش فيها راحة أما بقى الزواج التقليدى فحاسبى رغبتك فى انك تجربى الحياة دى تخليكى توافقى على أى حد أه أنا يمكن صغيرة زى ما كتير بيقولوا بس جربت وعارفة إنك حتى برغم النصائح نفسك تجربى والحب هيجيكى هيجيكى

    وتغيير الايميلات مش حاجة صدقينى أنا وصلت لتغييير أرقام الفون بتاعى ومش تقلقى هتلاقى على الأقل حد واحد من أصحابك يفهم ويقدر والبعد فى بعض الأحيان مفيد وأحيان تانية مضر جدا

    أخر كلامى ليكى خدى وقتك بس المرة دى علشان الوضع يخف عن الأول لأن الحكاية دى صعبة أوووى ومش صعب إنك تتخطيها هى مش هتخلص مرة واحدة بس صدقينى شوية شوية بتخلص وعن اقتناع منك قبل أى حد تانى أنا جربت ده ونفع إلى حد ما ويوم عن يوم الحكاية بتقل حتى ولو حاجة بسيطة بس فى مفعول

    أتمنى إن كلامى مش يتفهم على إنى بستهون باللى انتى حساه بس بجد الأحاسيس دى صعبة ومجرد وجودها جواكى هتنغص حياتك بشكل كبيير أتمنى إنك تحاول وتقدر بإذن الله تتخلصى منها وصدقينى محاولاتك مش هتفشل لو انتى مصممة على انها تخرج

    ربنا ياحبيبتى يسعدك ويرزقك بكل اللى تتمنيه من خير وفرح وسعادة ويديمها عليكى يارب

    ردحذف
  7. رمضان فرصة حلوة جدا لحالتك دى
    قربى من ربنا على قد ما تقدرى وانتى هتشوفى نفسيتك هتبقى عاملة ازاى
    ربنا يهيئلك كل خير
    وكل سنة وانتى طيبة ياحبيبتى

    ردحذف
  8. السلام عليكم ورحمة الله وبركاته
    رمضان مبارك عليكى وعلى الامة الاسلامية كلها وكل سنة وانتم طيبين جميعا
    مبدئيا هرد على اخر فقرة فى كلامك بالحديث دة

    جاء رجل إلى رسول الله صلى الله عليه وسلم وقال: يا رسول الله أرأيت إن فعلت ذنب أيكتب عليّ؟
    قال : يُكتب
    قال: أرأيت إن تُبت؟
    قال : يُمـحــــى
    قال: أرأيت إن عُدت؟
    قال : يُكتب
    قال: أرأيت إن تُبت؟
    قال : يُمحــــى
    قال: أرأيت إن عُدت؟
    قال : يُكتب
    قال: أرأيت إن تُبت؟
    قال : يُمحى
    فقال الأعرابي : حتى متى يمحى؟
    فقال النبي صلى الله عليه وسلم.. إن الله لا يمل من المغفرة حتى تملوا من الاستغفار"
    صدق رسول الله صلى الله عليه وسلم

    فاياكى اياكى واليأس
    واسمعى ايضا قول الله تعالى فى سورة يوسف
    بسم الله الرحمن الرحيم
    ( ولا تيأسوا من روح الله إنه لا ييأس من روح الله إلا القوم الكافرون )
    اعاذنا الله واياكم جميعا من الحزن واليأس والكفر

    طيب الحل نعمل ايه علشان نتغلب على الحالة دى
    هقولك حالا
    بس بعد الفاصل :)  

    ردحذف
  9. رجعنا بعد الفاصل :) نكمل
    قولنا عايزين نتغلب على الحالة دى واللى ممكن نسميها زهق او حزن او احباط او اى كانت الحالة المهم انها لا تتحول الى يأس والعياذ بالله
    اولا لازم نبقى عارفين انها مجرد حالة مؤقتة بيمر بيها كل الناس مهما كانوا بسبب طغوط وظروف الحياة ومهما كان الشخص دة قوى او ناجح فى حياته لازم هتعدى عليه لحظات حزن وضعف واحباط ولكنها فى النهاية ان شاء الله بتزول بزوال السبب
    يعنى هى الاخر لازم تكونى واثقة ان دى مشاعر مؤقتة و مش انا بس ولا انتى بس اللى بتمر علينا الحالات دى لا دة كل الناس
    بس كل واحد بيتعامل معاها بشكل مختلف ودة الفرق فى حد بيستسلم للحالة دى ويعيش فيها وفى اللى بيقدر يعديها بسلام
    طيب ما احنا عارفين كل دة بس برضوا معرفناش ايه الحل
    الحل ببساطة
    بعد الفاصل برضوا :)

    ردحذف
  10. رجعنا تانى و نكمل :)
    اكيد زمانك دلوقتى بتقولى كفاية رغى بقى صدعتنا ما تخلصنا فى ليلتك دى وهات من الاخر
    حاضر :) بس انتى خليكى معايا شوية عشان خاطرى

    من الاخر زى ما انتى قولتى بالظبط انك حاسة انك بعيدة عن ربنا

    وفعلا البعد عن ربنا دة بيبقى اوحش حاجة فى الدنيا لان ساعتها اى مشكلة هتحصلنا مهما كانت بسيطة هنشوفها كبيرة جدا و انها نهاية العالم
    وفى المقابل القرب من ربنا بيبقى احلى حاجة فى الدنيا لانه بيهون علينا اى مشكلة حتى لو كانت كبيرة

    فمن وجد الله ماذا فقد ومن فقد الله ماذا وجد

    بس اكيد مش انتى لوحدك اللى بيحصل معاكى كدة
    دة كل انسان معرض انه يبعد احيانا لانه ببساطة الايمان بيزيد وينقص
    ومهما كان الانسان متدين اكيد هتيجى عليه لحظات ممكن يضعف ويبعد
    بس اهم حاجة انه مهما حصل يفضل اللى بين ربنا وبينا موصول ولو حتى بخيط رفيع يرجعنا مهما بعدنا

    لازم نعرف ان ربنا سبحانه وتعالى هو من خلقنا وعارفنا اكتر من نفسنا وعارف اننا فينا ضعف وعلشان كدة فهو سبحانه اعطانا الوسائل اللى نتغلب بيها على الضعف دة مهما كان

    طيب فى الاول ايه اللى بيبعدنا وايه اللى بيقربنا

    اكتر حاجة هتبعدنا هى الذنوب والمعاصى والانشغال بالدنيا ونسيان الاخرة
    واكتر حاجة هتقربنا هى ترك المعاصى والالتزام بالطاعات الصلاة والصوم و قراءة القرآن

    تمام
    طيب وبعد كدة ايه بقى الوسائل اللى هنقوى بيها نفسنا علشان نبعد عن المعاصى ونلتزم بالطاعات ونقرب من ربنا ومنبعدش تانى

    اكيد محتاجين لقوة
    طيب ايه نوع القوة دى وهنجيبها منين

    اولا هى مش قوة واحدة دى 3 قوى فى بعض او تقدرى تسميها القوة الثلاثية اللى ان شاء الله هتقضى على الضعف تمام
    وهنجيبها منين
    اكيد من صاحب القوة
    الله سبحانه و تعالى فلا حول لنا ولا قوة الا بالله
    هنستعين بالله انه يمدنا بالقوة
    ازاى
    طيب ناخد فاصل صغير ونرجع
    واتفضلى اشربى العصير :)) ولو مفيش عصير على فكرة ممكن شاى
    >>>>

    ردحذف
  11. ايه يابنتى السواد ده كله واحنا داخلين على شهر كريم وايوام مفترجه وحاجات كده

    احب اقولك ان الاحساس ده ناتج عن احساسك الدائم بالوحده وللاسف انتى مصممه ومساعده نفسك على كده فالحل للموضوع انك حاولى دايما تسألى ع الناس وابعدى عنك الصوت اللى جواكى اللى دايما يقولك ما هما مش بيسألوا عليا انا هاسأل ليه او هما بسألوا عشان مصلحتهم ومضايقين وجايين يفكوا عندى بأه وانا اصلا مش نقصاهم

    حاولى تسعدى اللى حاوليكى وتتمعنى فى اضحكتهم اوى وتدلى كده جوه قبلهم هاتحسى بسعادتهم

    دورى على حاجه تقعدى معاه وتحكيله وتقوليله على كل اللى نفسك فيه وتتكلمى وتتكلمى ومل تسيبهوش يروح خالص

    تالت حاجه واجمل حاجه ودايما عديها على نفسك كتير وسمعيها لنفسك وقوليها باقتناع جامد جوه قلبك وهى
    قانون التفاؤل حسن الظن بالله

    رابع حاجه ربنا يوفقك ان شاء الله ويبسطك دايما يارب

    ردحذف
  12. السلام عليكم ورحمه الله وبركاته

    كل عام وأنتى بألف خير وسعاده
    والله أنا قرأت كلامك أكتر من مره
    يخلص أطلع تانى وأجيبه من الاول
    بحاول أوصل لتفسير للحاله اللى انتى عليها
    ولقيت تفسير أنتى نفسك قولتيه
    وحساه وعارفاه

    الا وهو الفراغ العاطفى
    أدى الفرصه لنفسك شويه ولقلبك انه يحب
    وكمان ادى الفرصه للى قدامك انه يدخل قلبك ويعبرلك عن حبه
    مش تصديه من أول مايحاول يعبر او يبين عن اللى جواه
    أنتى زيك زى اى حد بس انتى اللى قفله على نفسك وعلى قلبك
    حرمتى عليه الشى اللى هو بيجيده جدا
    وهو الحب
    من غير قلب شغال مفيش حب
    مفيش احساس بالوجود والحياه
    ححس ازاى انى عايش وانى ليا لزمه وانى انسان اساسا
    من غير ما احب واتحب
    من غير ما اشتاق ويشتاق اليه
    من غير ما اسهر افكر ويتسهر يتفكر فيا
    من غير ما اغير ويتغار عليا
    من غير ما اغضب ويتغضب منى
    من غير ما اصالح واتصالح
    حاجات كتييييييييييييييييير جدااااااااااااااا
    لولو الحب ماعمرنا هنعشها ولا عمرنا هنحسها

    اعطى الفرصه لنفسك ولقلبك قبلك
    انه يحب
    فكى قيوده
    طلعيه من زنزانته
    اللى محبوس فيها من سنين من غير زنب ارتكبه

    صدقينى على قد ما فى لوعه فى الحب وعزاب
    بس ليها طعم بتحسس الواحد بوجوده
    وقد ايه حلوة الحب واحساسه
    لو اجتمع كل فنانين الكون ومعشاقه ومحبيه
    من اول قيس وليلى
    وعنتر وعبله
    ورميو وجواليت
    لحد عشاق سفينه تيتانك
    عمرهم مايقدرو على وصف حلوة الحب واحساسه
    ورومانسيته
    وتلاعبه بالقلب
    واندماجه مع الروح
    لزم تعيشيه انتى
    لزم تجربيه بنفسك
    صدقينى عمرك ماهتندمى
    ولو ندمتى مره مش هتندمى تانى مره

    الحب شئ جميل لا يوصف ولكن يجرب

    أناس اسف للأطاله عليكى
    تقبلى مرورى ليس الاول ولا بالأخير

    تحياتى لقلب سجين بدون حب

    محمد التركى

    ردحذف
  13. كل سنة وانت طيبة ياقمر
    هو بصى نو كومنت عندى كلام كتير بس مش هيكون هنا
    هقولك على الفيس :)

    وبصى انا بدى كورس اسمه يلانعيشها صح ((افتح قلبك ))
    لو عايزة تحضريه خدى الميل دا وضفيه وهيكون النهاردة الساعه 8ونص
    free.online4tanmya@yahoo.com

    ردحذف
  14. معلش الكهرباء كانت قاطعة معرفتش اكمل كلامى
    بجد حكاية الكهربا دى زهقت الواحد و بقت مزعجة جدا كل شوية تقطع ولمدد طويلة وبتعمل مشاكل فى الجهاز
    على العموم ان شاء الله ارجع اكمل غدا باقى الكلام
    فانتظرونا وان شاء الله الكلام اللى جاى هيكون كلام مهم جدا وبخطوات عملية جدا جدا وعن تجربة للخروج من كل حالات الاحباط اللى احنا فيها
    والحمد لله هل رمضان موسم الخيرات وسلسلت الشياطين فتجهزوا واجتهدوا وان شاء الله رمضان مبارك عليكم وتقبل الله منا ومنكم اللهم امين 

    ردحذف
  15. كل سنة وحضرتك طيبة وبألف خير وصحة وسلامة إن شاء الله
    :)
    رمضان كريم

    ردحذف
  16. الحب بعض من تخيلنا .... لو لم نجده لأخترعناه

    ماتخافيش هتلاقيه ده اكيد يعني ... ده غريزه طبيعيه واحتياج انساني

    كل سنه وانتي طيبه وبالف خير

    رمضان كريم

    ردحذف
  17. ياااااااااااااه ده انتى جواكى كتير اوى
    بصى انا مش هقولك غير حاجه واحده بس
    خليكى صادقه مع ربنا المره دى بجد وشوفى حياتك هتبقى ازاى

    ردحذف
  18. انا اول مره بدخل مدونه و كتير عجبني الحكي اللي فيها عموما انا حاب احكي معك kankash90@yahoo.com

    ردحذف