الأحد، 30 مايو، 2010

بلا علم بلا بتنجان


من خمس شهور اتهفيت فى عقلى وقررت انى اكمل دراسات عليا يعنى قولت يمكن ربنا يكرمنى واخد الدبلومة وبعدها اعمل الماجستير

كنت تقريبا مسطولة يوم ما فكرت الفكرة الهباب دى . ركبت دماغى ومسمعتش كلام اخواتى وماما اللى فضلوا يقولوا بطلى هبل وبطلى هيافة انتى مش لاقية حاجة تعمليها وحبيت اثبتلهم العكس وروحت قدمت وكان من حظى انهم لغوا موضوع الدبلومة الخاصة السنتين وخلوها سنة واحدة بس بشرط اخد قبلها سنة مهنية , المهم قولت مفيش مشاكل هى هى كنت هاخدها فى سنتين وهى كدا بردو سنتين وماشاء الله يعنى الجامعة بتاعتنا فكروا وقرروا يخلوا الدبلومة اقسام يعنى بدل ما كانت قسم واحد لا تركوا الاختيار للناس تختار القسم اللى ترتاح له واللى تحبه وتكمل فيه بعد كدا , طبعا لحظة الاختيار دى كانت صعبة لانى اصلا مبحبش التخير بحب الاجبار اتعودت على كدا يااااناس اعمل ايه بس .

فضلت اسبوع اقول اختار ايه اختار وفى الاخر اخترت القسم اللى انا فيه قولت انا ارتحت له كان فيه قسم ارشاد نفسى وانا بصراحة شايفة انى مجنونة ومش هنفع فيه , كان فيه قسم ادراة مدرسية وانا اصلا بكره التدريس وسنينه ادخل ادارة وكمان دا للمديرين والناس الكبيرة , اصحابى اختاروا القسمين دول وداخلوا فيهم , كان فيه بقى قسمين هما اللى شدوا انتباهى قسم( التربية الخاصة _ تربية خاصة )

بس مكنتش عارفة الفرق ما بينهم وكل ما اسال اى حد يقولى معرفش حتى الموظفين هناك , بينى وبين نفسى كدا وقولت التربية الخاصة هى اللى مقصود بيها اللى بيعانوا من اعاقات ذهنية وانا بصراحة حسيت انى مش هقدر اتعامل معاهم لانى عصبية وخفت انى فى يوم لو كملت دراسات فى القسم دا اسئ معاملة العيال فقررت ابعد عنه

واختارت قسم تربية خاصة تواصل صم وعميان وقولت القسم دا حلو وانا باذن الله هرتاح له , وبدات الدراسة لقيتهم بيقولوا لازم تنقسم وتختار لما تتدرسوا تواصل صم لما تتواصل عميان .... ورجعنا لنفس النقطة انى بكرهه التخير اهئ اهئ اهئ

اصل انا عايز تحيرنى خيرنى وفين وفين وها ها اخترت تواصل صم ودا بسبب انى حابه اتعلم لغة الاشارة وفى نفس الوقت الصم فى بلادنا تعليمهم سئ جدا ومش من حقهم يدخلوا جامعات بالاضافة لصعوبة التواصل مع الناس بعكس المكفوفين اللى يتعاملهم بيكون اصل مع الناس

خمس شهور مرروا دلوقتى وانا بدرس الدبلومة تخيلوا انا استفدت ؟؟؟ ولا حـــــــــــــــاجة وبجد ومش بهزر ولا حاجة استفدتها لغة الاشارة معرفش منها غير عشر كلمات يمكن , ومحتوى علمى زفت زبالة , دكاترة اصلا مكنوش فهمين هما بيدوا ايه المناهج كانت بتتغير اكتر من مرة علشان مكنوش عارفين يدرسوا ايه لانه قسم جديد , الحاجة الوحيدة اللى كنت بحبها العيال اللى كنا بنروح لهم تربية عملى حسسونى بجد الناس دى محتاجة حد يفهمها اكتر ونقرب منهم اكتر , كانوا صبورين لابعد الحدود وهما بيعلمونا لغة الاشارة كنت اليوم الوحيد اللى بحبه فى الاسبوع على الرغم من المدرسين فى المدراس دى كانت تعاملهم حلو مع العيال وكانوا زى اولادهم بس للاسف طرق تدريسهم بدائية جدا واشاراتهم قليلة والعيال بالتالى كان تعليمهم ومستواهم وحش جدا

المفروض انى بالدبلومة دى ادرس للاطفال فى مدارس الامل بس ازاى وانا حاسه انى زى الحمارة بجد مكنتش متخيلة الدراسات العليا فى الجامعات تبقى بالغباء دا , فرقت ايه عنها عن التعليم الجامعى العادى

كنا زى فيران التجارب اول دفعة وبيجربوا فيها بجد انا كرهت التعليم كله وكرهت التعليم الجامعى اكتر واكتر , كنت بكره كلية تربية لانها كلية نظرية ومفيهاش اى افادة وبنخرج مدرسين بقر حمير مش عندنا اى محتوى علمى نطلع ازاى مدرسين لاجيال جاية بعد كدا

امتحاناتى قربت , مخلصتش الابحاث اللى ورايا اللى كالعادة مش فاهمها بس انا بدشها وخلاص بجيب من هنا ومن هنا وبروح اديها للدكتور اللى بيرميها فى الزبالة , حساه انى مخنوقة ومش طايقة الجامعة ولا سيرتها ولا الدكاترة فيها , بكره التعليم والتدريس واى حاجة ليها علاقة بيه , وصاحبتى بتقولى تعالى اشتغلى فى مدرستى , اشتغل ايه وانا شايفة اننا بندمر اجيال مش بنعلمهم

انا بجد بشفق على الاطفال اللى بيدمر عقولهم بسبب ناس زيى كانت ضحية لدكاترة فى كليات التربية مش فاهمين اصلا الى بيدرسوه مجرد نظريات عقيمة عفا عليها الزمن بتتدرسس هى هى تناقشى الدكتور فيها يقولك افهميها زى ما هى كدا لانه هو اصلا مش فاهمها هو حافظها

انا مضطرة ابعد شوية عن التدوين لابعد الامتحانات مش هذاكر متفهموش غلط , انا بس حسه انى مضغوطة وانى هنفجر , ولو اتكلمت عن الدبلومة وقرفى معاها هحتاج مجلدات مش مجرد بوست , انا بفكر اعمل كتاب عن الموضوع ده ههههههههههه

يلا اروح اشوف البحث اللى مش فاهمة منه اى كلمة منه ولو جيت السنة الجاية اقول هكمل ابقوا كلكم تفوا فى وشى واضربنى بالجزم , ومفيش مانع تحدفونى بالطماطم

العلم فى الراس مش فى الكراس يابا , بلا علم بلا بتنجان

هناك 24 تعليقًا:

  1. ههههههههههههههههههههه
    .. ربنا يكون في عونهم...

    وربنا يوفقك في الامتحانات... شدي حيلك..

    ردحذف
  2. ياحبيبتي يابنتي اتدبستي ولا حدش سمى عليكي مش عارفة ليه بقيت بحس ان كليات التربية دي شوية شوية هيضموها لرئاسة مجلس الوزرا أصل مبدأهم واحد وسياستهم واحدة وهي خليك حمار تبقى من الشطار
    واحدة صاحبتي بتاخد ياعيني الدبلومة المهنية دي وبتتلخبط في المواد من تشابهها الغبي وبتقولي في الأخر نسيت الكلمتين اللي اتعلمتهم قبل كده

    ربنا معاكي ياحبيبتي ويعينك واشوفك كده من حملة المؤهلات هههههههههههه

    اه على فكرة الميوزك اللي انتي حطاها تحفة مووووووووووت تسلم إيدك

    ردحذف
  3. أزال المؤلف هذا التعليق.

    ردحذف
  4. معلهش يا ايوشه شدى حيلك
    ربنا يسعدك يارب ويوفقك
    ودايمآ دوام الحال من المحال

    ان الله مع الصابرين
    المهم انك خرجتى الكبت اللى جواكى

    خلى بالك من نفسك

    ردحذف
  5. مش معني الدراسة دي في مصر اللي هتبقى مظبوطة
    إحنا معندناش تعليم
    خمس سنين صيدلة أخدتهم كمان في ستة (زيادة تأكيد يعني) وطلعت معرفش حاجة
    كل اللي اتعلمته إني أقدر أقرأ أبحاث طبية وأقدر أعرف مصطلحات ,,, بس كده


    ربنا يوفقك

    ردحذف
  6. آه ياني انا هآجي اعيط جنبك
    طيب انا بقى اتهفيت ف دماغي لتاني مره على التوازي وعملت فعله شنعاء وباخد الدبلومه الخاصه دلوقتي ولايحه جديده برضه وبيتجرب فينا عااادي

    صحيح العلم ف الراس مش ف الكراس بس الحمد لله انا حاولت استفاد على قد ما قدرت

    حاسه بيكي خالص يعيني هو تعب قلب صحيح بس اهو الواحد بيجرب

    ربنا معاكي ياقمر ويوفقك وتخلصي البحث وتذاكري وتفهمي وتنجحي يارب

    ردحذف
  7. ههههههههه
    ربنا يوفقك
    ويسعدك اولا ..
    وصدقيني هيقلوبكم زي ايام الكلية ..
    فيه خلل في التعليم .. وعلي رأي واحد زميلي قالي يا صديقي الجامعة ما هي إلا مدرسة ثانوي كبيرة.

    السبب ان الدكتور اللي ماسك غالبا أصلا مش بيكون فاهم مدته .. ولو فاهم بعتبر اللي قدامه اينتشين ولا مشرفة ويبدأ يلخبطه وقليل اللي عندوا ضمير ..انا فاكر دكتور مادة الإنجليزي في تربية عندنا .. قالنا بصوا انا هديكوا بعض اسئلة الامتحان ومتقلقوش .. بس أهم حاجة نتعلم من بعض .. وقعد يعلمنا لغه .. طبعا العميد مشاه لأن ادا درجات عليا في الانجليزي اللي هيا مادة العميد ,,

    بس اليوم جاي وهتاخذي الدبلومة .. وتفيدي غيرك بها .

    تحياتي

    ردحذف
  8. هنا فى تعليق وخبر حلو

    التعليق إنى لقيت نفس المشكلة واجلت الدراسة كلها للسنة الجاية علشان اقدر اختار جامعة اقدر ادرس فيها القسم اللى باحبه

    اما الخبر احلو
    فنك هتغيبى علشان الامتحانات
    يا فرج الله

    ردحذف
  9. الحمد لله الكلام ده مش هيحصل لي دلوقتي

    أنا مش قد تحديفي بالطماطم يا اختي



    شدي حيلك و ربنا هيوفقك إن شاء الله

    ردحذف
  10. قولى الحمد لله انها جت على اد كده

    وانك دلوقت الحمد لله بخير


    انا هيجيلى شلل بسبب الماستر والسيمنار
    والمشرفه على الرساله حطانى فى دماغه يعنى قربت ارضع عيلها

    ربنا يجعل كلامنا خفيف عليهم


    تحياتى

    ردحذف
  11. ههههههههه انتي هتقوليلي غباء مستحكمممم


    معلش ربنا معاكى ياقمر

    ردحذف
  12. اجهز الطماطم ولا ايه

    ردحذف
  13. السلام عليكم و رحمة الله و بركاته
    بالتوفيق يا استاذة
    و التهريج مش غريب علينا .... اصل احنا فى مصر ... مش عايزين حد يتعلم و لا يفهم ... ربنا يزيحهم من على قلوبنا
    تحياتى

    ردحذف
  14. يالهووى يا أيوشة ده انا اقنعت بابا وماما والناس اقتنعت بجد ودلوقتى بيتحايلوا عليا بينى وبينك أنا لسه مخلصة كورسات ICDL من كام يوم بعيد عنك شوفت الويل بهدلة أخر بهدلة بس الحمد لله عديتها كله فى مرة واحدة يعنى مش عيدت امتحان ربنا سترها بس بجد لما لقيت ماما بتقولى جهزى نفسك للدبلومة أنا كنت هقع من طولى ده حتة بتاع لا راح ولا جه عمل فيا اللى ما يعمل وكفر سيئاتى وانتى كمان بصراحة فاتحة نفسى على الآخر الله يطمنك قوليلى يا أختى أعمل ايه والحقينى قبل ما انتحر وأقول انتى السبب انتى اللى مش نصحتينى أنا بقولك أهو انا عينتك مستشارة ليا وذنبك بقى على جنبك خلصى امتحانات وتعالى قوليلى أعملها ولا أنسحب

    ردحذف
  15. هههههههههه
    انتي هتقوليلي يا ايوشه
    4 سنين دراسه في النظريات دي وحياتك
    لما ورمنا
    وفي الاخر ولا استفدنا منها اي حاجه في اي حاجه
    بصي
    انتي تدرسي باسلوبك وبطريقتك
    وسيبك من اي نظريات

    ردحذف
  16. ياللهول
    فيه حد بيعمل دراسات عليا في كليات التربيه اليومين دول؟
    حتى لو انتي خريجة تربيه
    المفروض يوم ماتفكري تكملي دراسات اعمليها في حاجة بعيد عن المجال التربوي العقيم
    اعمليها في أداب حسب تخصصك ولا حاجة قريبه منه

    او حتى اعملي دراساتك العليا في مجال مختلف

    انما التربويات دي حاجات انا اسمع انها عقيمه بشكل مستفز

    وهو التعليم في مصر بشكل عام كدا
    ميخلتفش كتير الا من رحم ربي

    ربنا يوفقك وشدي حيلك الاول في الدبلوم دا الاول وبعدين تقرري بعد كدا

    تقبلي مروري

    ردحذف
  17. الله ايكون بعونك وبالتوفيق يا رب :)

    مدونه جميله تقبلي مروري :)

    ردحذف
  18. كارثه حقيقيه وفايرس غباء مصاب بيه التعليم العالي كله للاسف

    معلش حاولي تعلمي نفسك بنفسك ... ومفيش حاجه هتخسر :)

    تحياتي

    ردحذف
  19. ايوشه ابنتي رضوي حصلت علي هذه الدبلومه العام الماضي من تربية اسيوط برضه لو عايزه مساعده يمكنك التواصل معها

    ردحذف
  20. انا بحضر ماجستير من 2008 ولغايه دلوقتي متعملمتاش حاجه وفين؟ في القصر العيني معقل العلم

    ردحذف
  21. بداية ربنا يوفقك

    هو احنا عندنا تعليم اكاديمي ف مصر
    اصلا

    ربنا يعينك

    انت تقفي كده وتقولي

    انا اللي جبت ده كله لنفسي

    ردحذف
  22. موضوع الدبلومه ده انا ليا صحابى كتير عملوه والكل بيكرر نفس كلامك فى النهايه . قاعات دراسة الدبلومه تتحول مع الوقت مع ما يمكن تسميته مكتب زواج صالونات للدارسين

    ردحذف
  23. ربنا يكون فى عونك والله
    حد يتجنن ويعمل عملتك دى هههههههه
    التعليم من اوله منيل اصلا
    هتيجى بقى على الدراسات والا الدبلومه
    ربنا معاكى
    ويوفقك

    ردحذف