الثلاثاء، 18 مايو، 2010

تخيــــــــل



تخيــــــــل








تخيل نفسك شجرة
و اثبت لانك شجرة
ضارب في الارض مسافة
وثابت
وانت أدري

تخيل نفسك نور
واعمي لانك نور
أنا كنت سور البير
وصبحت بير السور

تخيل نفسك باب
وافتح لانك باب
علي دنيا أصلا طريق
وبينتهى بسرداب

تخيل نفسك ليلة
واطول لانك ليلة
والنور سقفك .. تعالي
مهما تطول دي ليلة

تخيل نفسك وردة
وازهي لانك وردة
كل الالوان قصادي
بس الريحة واحدة

تخيل نفسك حلم
وبراحتك ماانت حلم
التتر آخر حاجة
في دنيا أصلا فيلم

تخيل نفسك بيتها
وادفي لانك بيتها
وان دقت راحتها فيك
اعرف انك حبيتها

تخيل نفسك مرة
ماتخافش جرب مرة
الدنيا ماشية أسيرة
في الوقت
وهيا حره

تخيل نفسك باقي
واحزن لانك باقى
واحلم تلقالك حاجة
واتحدى لو تلاقي

تخيل نفسك جنبي
والزق لانك جنبي
الجسم ده مش ملكي
والغنوة دي من قلبي

*
*
*
*
عمر طاهر
يناير 2006
قهوة وشيكولاتة

هناك 14 تعليقًا:

  1. عمر طاهر من الكتاب الشباب .. اللي ليهم اسلوب حلو ,, بس احيانا بيبقي مزودها شوية ...

    بما ان القصيدة عجباكي فانا طبعي هبقي دبلوماسي ومعاكي ..

    لا بجد كلماته حلوه

    احسن جملة عجبتني
    تخيل نفسك وردة
    وازهي لانك وردة
    كل الالوان قصادي
    بس الريحة واحدة

    ارزل جملة مش عجبتني

    تخيل نفسك باقي
    واحزن لانك باقى
    واحلم تلقالك حاجة
    واتحدى لو تلاقي

    لأنها بتقصي احلامي علي جنب وده لا اسمح بيه

    تحياتي لك

    ردحذف
  2. عمر طاهر اسلوبه بسيط وفى نفس الوقت عميق
    اما الجزء اللى مش عجبك هو بيتكلم على لسانى ولسانك
    انت فى لحظة ممكن تكون متفاؤل وماسك السماء بايديك وفى لحظة لابس نضارة سودا وشايف كل حاجة مستحيلة
    دا اللى اعتقده هو يقصده
    جوا منا متناقضات كتير
    ويمكن دا اكتر حاجة عجبانى انها فيها كل حاجة فيها الامل وفيها الحب وفيها الاحباط كمان
    مرسيى للمرورك

    ردحذف
  3. جميله اوي يا ايوشه ...ماكنتش اعرف ان عمر طاهر بيكتب كلام حلو كده :)

    تحياتي

    ردحذف
  4. فتاة من الصعيد
    ولا انا كنت اعرف انه بكتب شعر من اصله
    بس كتاب قهوة وشيكولاتة جميل اوى
    ايوة عايز وقت علشان تفهمى يقصد ايه
    بس بجد جميل جدا
    مرسيى للمرورك ياقمر

    ردحذف
  5. جميل ذلك التخيل

    وكثيرا ماتخيلت نفسي طائر يطير بحرية بعيداعن كل مايؤذيه

    رائعة ياصديقتي

    ردحذف
  6. الله الله الله

    إختيارك هايل
    تسلم الأيادي
    تقبلي مروري وتحياتي واحترامي
    :))

    سلام

    ردحذف
  7. عمر طاهر

    كاتب متميز
    دمه خفيف
    مثقف للغاية
    بن بلد


    شاعر ... مش بحب شعره خالص
    بما فيهم القصيدة دي

    رأي سخيف
    بس كان لازم أقوله :)

    ردحذف
  8. شكرا بجد انك شركتيهلنا...

    عمر طاهر ده ملهوش حل اصلا...

    تحياتي.

    ردحذف
  9. جارة القمر
    عارفة نفس حلمى انى ابقى طير واطير بعد عن الارض
    مرسيى للمرورك ياجميل نورتى المدونة

    ردحذف
  10. P A S H A

    انا بصراحة بحب القصيدة دى وبسمعها باستمرار
    مرسيى للمرورك

    ردحذف
  11. د. ياسر عمر عبد الفتاح

    هو مش كل اشعاره هتعجب الناس كلها وانا ليه اشعار عنده بفهمها بعد وقت طويل
    هو شعره متحرر من الوزن والقافية ومن قواعد الشعر علشان كدا مش بيعجب ناس كتير
    بس بيعجبنى افكاره
    ودا مسالة اذوق طبعا وكل انسان ليه اللى يحب يقرا له او يسمع له
    مرسيى لمرورك يادكتور

    ردحذف
  12. dr.lecter

    سمع هوص (Abo 3li)

    مرسيى للمروركم نورتم المدونة

    ردحذف
  13. تخيلات رائعة من إنسان رائع


    وحشتينى ياقلبى اووووووووووى

    اسفه مأخره عنك لظروف خارجة عن اراداتى

    يارب تكونى بخير ومتشكرة لسؤالك عنى

    ردحذف