الأحد، 28 مارس، 2010

عائدون للتدوين



اولا انا البوست ده بكتبه للمرة التانية لانى بغبائى مش بكتب فى ملف ورد وبعدين انقله المدونة بكتب على طول على المدونة وبحركة غباء من النت وقف وكل اللى كتبته طار غباء غباء يعنى يلا قدر الله وماشاء فعلا

البوست اللى فات كان الهدف منه انى استفز المدونين علشان يتكلموا نظرتهم للتدوين دلوقتى زى ما هى ما تغيرتش عن زمان ولا اتغيرت بقيوا بيضايقوا من التدوين وشايفين انه اتغير كتير عن زمان ولا ده شعورى انا بس فى الوقت اللى بيلازمنى الفترة الاخيرة دى كتير

هعلق على التعليقات اللى جت على البوست اللى فات لانها تعليقات محتاجة مساحات كبيرة فى المناقشة بس قبل كل ده انا بشكركم بجد انا كنت مبسوطة بالتعليقات على البوست اللى فات وخصوصا ان كان فيها تعليقات الناس اللى بحبها وباحترمها وبكون مبسوطة لما بشوفهم عندى بيفيدونى اراءهم

نيجى بقى دلوقتى نرد على التعليقات اللى كانت اغلبها ان مكنتش كلها قالت ان فعلا التدوين اختلف عن زمان وان الناس اتغيرت واحساسنا اتغير نوعا ما مبقاش زى زمان وعلى حسب رايى انا هقول بعض الاسباب اللى ممكن تكون صح ولا غلط وعلى حسب التعليقات اللى جت والاسباب كالاتى :-
ان المدون كان فى البداية حابب التدوين ومقبل عليه لانه لاقى فيه التشجيع والناس اللى بتسمعه ودايما بتستنى كلامه لكن لما ربنا كرمه وبقى التدوين من مجرد هواية لاحتراف واشتغل فى المجال ده بعد عن التدوين وعن ناسه وبعد عن كل اللى كانوا بيستنوا بوستاته وهجر المدونة وبقى مش هاين عليه حتى يكتب فى المدونة ايه الى جد فى حياته ولا ايه اللى بيحصله ويشارك الناس اللى وقفت جنبه نجاحه ولا هو تقف جنبه فى وقت اللى كان بيحاول يبدأ وبعد كده ينساهم وينسى ايامهم واذكر هنا رايى بخصوص تعليق استاذ تامر على موضوع انى مقتنعة ببعض المدونين اللى ظهروا فى اشتهروا وبقى ليهم مؤلفات وبقى يطلق عليهم كتاب ومبدعين .

وهقول انا بصراحة مقرتش كل الكتب اللى كانت من تأليف مدونين كتير ربنا كرمهم وبقى ليهم كتب فى السوق موجودة بس فى الاغلب انا معجبنيش اسلوب بعض الكتب اللى قريتها لانى من وجهة نظرى القراءة دى ليها متعة لما اقرا كلام جميل وباسلوب حلو كل دلوقتى اللى بيحصل ان اغلب الكتابات تفتقر للجمال والاسلوب الراقى وهى مجرد تسلية وكلام زى اللب نقراه وتانى يوم مش نستفيد منه بكلمة القراءة كانت زمان دلوقتى الشباب مش بيقرا اصلا والكتب اللى موجودة وموجهة للشباب فى الاغلب وباسلوبهم وبلغتهم الجيل الحالى عايز كده واغلب الكتاب دلوقتى بيلبوا طلب الجيل اللى مش عايز يتعب نفسه فى قراءة متعمقة وباسلوب لغة عربية بحت محدش دلوقتى بيعمل كده ومحدش بقى بيستمتع بالقراءة واللى بيشد الناس اسم الكتاب اللى عليه حتى لو كان محتوى الكتاب مش اد كده او اسمه مستفز او حتى افكاره قبيحة وبتروج لامور مشينة .


السبب التانى تسرب الاحباط جوه كتير من المدونين اللى كانوا حاطين امل على التدوين يحققلهم حاجة ويبقوا هما كمان حاجة فى يوم من الايام وكانت قريت جملة قبل كده لحد انه نفسه يلاقى كتاب باسمه محطوط فى مكتبة بيته لكن لما حس ان ده مقدرش يحققه احبط وقرر يبعد عن التدوين وخصوصا لو كمان مفيش تشجيع من الناس حواليه فكان من الطبيعى يقول انا طول عمرى بكتب لنفسى ايه اللى جد دلوقتى انا بردو رجعت اكتب لنفسى يبقى خلاص كتاباتى يبقى مكانها اجندتى وبلاها مدونة وبلاها تدوين من اساسه


السبب التالت التدوين كان فرصة جميلة اوى تقربنا من بعض وتجمعنا فى مواقف كتير وده ميزة كنت اتمنى انى فى محافظتنا فى الصعيد اقدر احققها فى يوم ويبقى فيه ارتباط بين المدونين عندنا وبعضهم البعض ويبقى فى تواصل دائم

لكن اللى حصل ان التقارب ده بقى مشكلة عند بعض الناس بقى فيه فى بعض الاحيان تواصل زيادة عن اللزوم وبقيت فيه مشاعر اخوة ومشاعرصداقة ومشاعر حب كمان وبقينا متعالقين ببعض بشكل قوى ولما يحصل موقف او اى ظرف وان التقارب ده ينتهى او يبعدوا ان الناس تحس بغربة تحس بالم فراق وتحاول تبعد عن التدوين بعد ما فقدت اللى اتعودت عليهم والتقارب ده بقى وراءه مشاعر زيادة واى موقف يحصل بين اتنين باختلاف العلاقة بينهم يبقى ينقل ده للتدوين ولما يتظلم من حبيبه يزعل ويقفل مدونته لما يتصدم فى صديق يبقى يحذف مدونته لما يتاكد ان موضوع مشاعر الاخوة ده كلام فى كلام يقول انا مليش عيش فى وسط الناس دى تانى

نقالنا للاسف مشاكلنا شخصية للتدوين هنا وبقى فى كتير من مدونات شتيمة لبعضهم البعض والاساءة لناس كتير غيرهم لدرجة كمان ان ينشروا اشاعات على بعضهم علشان يشوه صور بعض

فى كل مكان فيه الكويس وفيه الوحش اشمعنا فى التدوين اللى هيكون ملايكة ولا هيكونوا شياطين ومن الغلط نعمم على الناس كلها ونبعد عنهم لاننا اتظلمنا او اتجرحنا من حد معين فى التدوين



انا احساسى بان التدوين عبء عليا وبيخنقونى اتغير دلوقتى ونفسى ارجع زى زمان واحسن كمان نفسى اتفتحت للتدوين من تانى ونفسى ارجع الاقى كل الناس اللى اتعودت على وجودهم معايا ونفسى ارجع الاقى الحماس اللى كان موجود زمان

استاذ تامر قال ان التدوين لسه تعتبر تجربة جديدة لكتير مننا ولسه محدش فينا تقريبا تجاوز غير السنة علشان كده مينفعش نحكم عليها بالفشل من دلوقتى وعلشان كده مينفعش بردو نحكم على انهاءها والبعد عنها فى الوقت القصير ده

وقال ان لو مش لاقى كلام تكتبه ده سببه ضعف محصلة القراءة ودى حقيقة وكلام حضرتك صح جدا انا لما بوقف عن القراءة فترة بحس ان دماغى مفيهاش افكار ولا فى جديد اكتبه او اقدمه وده طبعا نقيس عليه بعدنا عن المدونة وعدم زيارتها ان مش بتزورها تادية واجب انت بتفيد وتستفيد انت بتشجع غيرك وبتستفيد فى نفس الوقت منه ومن افكاره ومشاعره واحساسيسه زيارة المدونات بتنشط خلايا المخ والابداع عنك علشان تلاقى افكار كتير حتى لو مجرد صورة استوقفت فى اى مكان تانى

هترجع وتقولى مفيش وقت وظروفى ومشغول نقول ده كلام غير صحيح وانا كنت بتحجج بالامر ده كتير التدوين مش بيضيع الوقت وناخد رايى دكتورة Sonnet بانك تحدد وقت معين تنزل فيه البوستات حتى لو كل اسبوع

واعمل ساعة واحدة كل يوم تزور المدونات ودى نصيحة عادل :)

هترجع تقولى انا بخاف اسلوبى ميعجبش الناس وانا بخاف انكد على الناس واضايقهم اكتبوا وقت ماانتم عايزين وباى طريقة انتم عايزينها مادام صادقة وبتعبر عنكم وراضين عنها ومتخافوش تعجب غيركم ولا متعجبش وده راى دكتورة ستيتة

وفى الاخر اتمنى اننا نرجع بنفس الحماسة بتاعت زمان وان اللى غايب عننا يرجع واللى مكسل يكتب يكتب واللى بيشاور عقله يبعد يعيد نظر فى فكرته

وبعدين فى تساؤل نفسى أساله من زمان احنا ليه مش بنزور المدونات اللى على مواقع تانية غير بلوجر زى مكتوب وجيران ووردبريس ؟؟؟؟

هناك 18 تعليقًا:

  1. لا انا بزور ساعات مدونات علي مكتوب او وردبريس
    بس الحقيقة هنا اسهل و اسرع و الاغلب هنا مش هناك

    التقارب في التدوين مش وحش
    العلاقات الانسانية موجودة في اي مكان حضرتك !!!!
    انتي لو قفلتي علي نفسك في زنزانة و معاكي دبانة
    مع الوقت هتصحبيها و هتحبيها كمان
    ده الطبيعي
    وان الناس تفضل او تفارق دي بيحددها الاشخاص و الظروف
    وحتي الحب في مثلين قريب لمدونين اتعرفوا و اتجوزوا و عادي
    العلاقات بتفشل لما احنا نؤمن بفشلها ...احنا اللي بنصمم علي استمرارها فمهما حصل هتستمر

    بالنسبة لقفل المدونات دي فاكس موت
    انتي متعرفيش ظروف الناس
    بس في ناس كتير و ده الاغلب بتعيش الدور و تحب تعمل جو و كده و تشوف اهتمام الناس و ده مش وحش بس لما تبقي كتير بتبقي اوفر و بتفكرني بقصة الواد الكداب و اللي يوم ما كان بيغرق محدش صدقه (الكلام مش عليكي انتي نهائي علي فكرة...بس علي ناس تانية كتيرررررررررررررررر)
    وفي ناس مبتقدرش تكمل لظروف عائلية او كده وانا اعرف من دول برضه و فيهم حد لسه لحد النهاردة بيعلق عندي كل ما بيعرف بغير معرف
    رغم ان مدونته مقفولة بقالها شهور كتيرة قوي

    ردحذف
  2. دبانة ايه اللى يحبها دى :(
    بس كلامك صحيح التقارب بين الناس لازم يقاربنا ويمكن يقلب فى اغلب الاحيان لحب والحب موجود فى كل مكان مش على النت ولا فى عالم التدوين بس
    لكن المشكلة اننا لما نفشل قصة حب تبقى نهاية العالم وكل انسان يشرد التانى على مدونته
    هما حبوا فى السر ومقلوش لحد يبقى المفروض لما يبعدوا يحترموا بعض ويبقى كل واحد حريص على عدم تشويه صورة التانى

    اما موضوع انهم يعمل جو وان يكسب تعاطف بقفل مدونته بصراحة معتقدش ان ده فعلا اللى بيحصل لان ساعات الانسان بتبقى حالته النفسية سيئة جدااااااا ومش بيبقى قدامه غير الحل ده ينفس بيه عن نفسه
    وموضوع الناس ليها ظروفها اكيد طبعا كل انسان ليه ظروف لكن لما يبعد يعرف الناس اللى كانت جنبه دايما ايه ظروفه مش يقلقهم عليه باستمرار

    صحيح لو تعرف مدونات ورد بريس او مكتوب ابعتلى الروابط بتاعتها

    ردحذف
  3. الحب بيفشل في كل حتة مش النت بس
    ومين قال في تشريد الا لو الطرفين سوري اصلا مش من النوع الـ .....* (دي كلمة و اللي بيشرد للتاني هيفهمها كويس) :):)
    البني ادم الكويس لو حب و فشل مبيشردش يا اش
    بيقلب الصفحة دي و خلاص
    اللي بيشرد ده حد مريض

    بمناسبة بقي الحالة النفسية
    هديكي مثال ... س من الناس حبيبته سبيته و ابوه انتحر و صباعه مدوحس
    ليه يقفل المدونة
    حالته النفسية سيئة اوك
    مايكتبش ... مايفتحهاش هو اصلا و يسيبها للناس !!!!
    يعني حالتي النفسية تسؤ ااقفل المدونة و الفيس بوك و الميل و اقتل امي و اولع في الشقة
    انا اللي اعرفه لما بتضايق مبعملش اي حاجة نهائي و الحمدلله بني ادم طبيعي اهو و عادي جدا

    هابصيلك كام مدونة بس انا اللي بدخل عليهم مدونات مخرجين او بيرغوا في السينما :)

    ردحذف
  4. نمسك كى بورد ونمشى عادون اليك يابلوجر ولا ايه يعنى

    كل واحد يرجع لمدونته ياعيال

    ردحذف
  5. عندك حق يا أيوشة التدوين ده أخد مننا كتير وأنا زرت كذا مدونة بصراحة غير بلوجر مكتوب وأكتر من مكان كانت بتستوقفنى وأنا بدور على صورة كان بيشدنى أوووى إى أرقأ الكلام اللى مكتوب معاها سواء شعر أو قصة فى ناس كتييير موهوبة

    أما بقى لوجودنا فى التدوين بينى وبينك أنا هنا قربت على سنتين أول حد شاف مدونتى أصحابى ومدخلتش هنا علشان حد يقرألى كنت اللى بعمله إنى بنشر وخلاص من غير ما أفكر حد هيشوف ولا لا وكنت بجد مستمتعة مع العلم إن أصحابى كانوا بيجاملونى وفوجئت إنى فى حد علق عندى لأول مرة حد مش أعرفه ده كان إسمه أسامة وكانت مدونته إسمها فارس بلا جواد وبعد كده أسامة ساب التدوين
    بس أنا أقدر أقولك التدوين قبل بداية 2010 كان بجد مذدهر بحلول 2010 اتغير كتييير

    أتمنى بجد إنه يرجع تانى زى زمان والناس اللى بنحبها ترجع من تانى ياريت نتجمع من تانى

    دمتى بكل الخير والحب والسعادة

    ردحذف
  6. اسمحيلي احيكي على الكلام الجميل دة
    انا بقالي ف التدوين سنة و نص بدت اكتب نقد سياسي مكنش حد يعرفني ساعتها بدئت انتشر انتشار بسيط و اكتب لحد ما حسيت انىبكتب كويس و بدئت اتنزع و اكتب ف كل حاجة الكل الحمد لله من خلال التعليقات بيديني ايحاء اني اكتب تاني
    يوم ما بحس انى مش عارف اكتب بحسس حاجة نقصاني مكنش حلمي انى استمر بس حسيت انى بكتب كلام بسيط و بيوصل مقرتش ولا كتاب من المدونين
    مجلتي مش معروفة اوى
    بس كفاية عندى ان فية ناس بتعلق عندى و منهم جودي بجد يني من الناس المصبراني على التدوين

    ردحذف
  7. لياااااااااااااااااا عودة بالليل

    ردحذف
  8. الابنة الحبيبة ايوشة
    ليا مدة متغيبة وجاية
    اسلم عليك واطمن على احوالك
    باذن الله تكونى بالف خير
    كفاية ان التدوين عرفنا على بعض
    باذن الله ترجع الروح الحلوة من تانى
    تحياتى

    ردحذف
  9. الفكرة هي فكرة
    انت عايز ايه من التدوين؟
    بمعنى ان لو انت بتدون للمتعة و تبادل الأفكار و الأراء او التنفيس عما يدور في النفس
    فالتدوين حاليا افضل مما سبق بأعتبار ان عدد المدونات قد تضخم و تورم
    اما لو القضية هي بحث عن الشهرة و السبوبة فهي تختلف من شخص لأخر طبقا لما حققه في عالم التدوين

    ردحذف
  10. (( فى الاغلب انا معجبنيش اسلوب بعض الكتب اللى قريتها لانى من وجهة نظرى القراءة دى ليها متعة لما اقرا كلام جميل وباسلوب حلو كل دلوقتى اللى بيحصل ان اغلب الكتابات تفتقر للجمال والاسلوب الراقى وهى مجرد تسلية وكلام زى اللب نقراه وتانى يوم مش نستفيد منه بكلمة القراءة كانت زمان دلوقتى الشباب مش بيقرا اصلا والكتب اللى موجودة وموجهة للشباب فى الاغلب وباسلوبهم وبلغتهم الجيل الحالى عايز كده واغلب الكتاب دلوقتى بيلبوا طلب الجيل اللى مش عايز يتعب نفسه فى قراءة متعمقة وباسلوب لغة عربية بحت محدش دلوقتى بيعمل كده ومحدش بقى بيستمتع بالقراءة واللى بيشد الناس اسم الكتاب اللى عليه حتى لو كان محتوى الكتاب مش اد كده او اسمه مستفز او حتى افكاره قبيحة وبتروج لامور مشينة .))


    الله ينور عليكى

    فعلا الكلمتين دول فى الجووول جدا

    إنتى عبرتى عما يعتمل فى نفسى بكلام مكونتش عارف أجيبه


    *************

    بالنسبة بقى للتدوين

    * كون إنك تكتب إللى يجى على بالك ــ طالما مش فاحش ولا بذيء و لا مسيء ــ فدى حاجة فى منتهى الروعة و تزداد روعة بإمكانية إن الناس تشاركك فى الكلام دا

    * فى معلومات كتير و أفكار كتير ممكن نكتسبها من المدونات

    * بالنسبة للصداقات و كمان علاقات الحب ....مفيش تجمع بشرى فى الدنيا قائم بأى شكل من الأشكال مفيهوش العلاقات دى

    تنجح بقى ، تفشل ....دا برضه بحصل عادى فى أى مكان


    * العالم كله حاليا بيتجه نحو التكتلات و التجمعات

    فأكيد يبقى شيء لطيف جدا إن شباب مصر يبقى ليهم مكان يتجمعوا فيه ، و دا على فكرة إتحاد قوى جدااا لإنه إتحاد فكرى أكثر منه أى حاجة تانية
    و المدونات أحسن بكتير من المنتديات لإن المنتديات ــ بالذات غير النتخصصة ــ بتبقى عاملة زى الموالد




    * همومنا مشتركة و أفكارنا مشتركة

    الأكيد الأنسب إننا نتشارك فيها



    * أخيرا ...التدوين دا حاجة حلوة و شاطر و كويس

    ردحذف
  11. السلام عليكم و رحمة الله و بركاته
    الأخت الكريمة
    أجمل ما مدونة حضرتك الصراحة و الصدق و حقيقى أنا أحييك عليهما
    من أهم ما استفيد من المدونات إنى أنظم أفكارى و أعرف الناس بتفكر ازاى ... استفيد و احاول افيد ...
    اناقش و اتنقد و انقد ...
    اكثر ما يزعجنى فى المدونات ....آمين ..
    ناس تدخل أى مدونة و تقرأ أى كلام و تصدق عليه و ممكن بعد كده تصدق على كلام عكسه فى مدونة تانية ...
    اعتقد ان المدونات لطرح الآراء و المواهب و مناقشتها وصولا للأفضل مع تبادل أخبار و أفكار
    و مع ذلك فممكن تعارف بين اتنين ييجى تلقائى مع المناقشات و الزيارات الإلكترونية
    و فى الآخر أنا لا أؤيد الحب الإلكترونى
    فالحب أنواع .. وما يخص الرجل و المرأة لا يكون إلا للزواج أما لو صادف أحد الحب فالأفضل فى رأيى أن يبتعد إن لم يستطع أن يرتبط من خلال شرع الله فوالله الحب على غير هدى من الله لن يجلب إلا التعب و الآلام و العذاب
    و الله الهادى و الموفق إلى الصراط المستقيم
    فى انتظار تدويناتك ....فعلا مش مجاملة
    بارك الله فيك

    ردحذف
  12. انت تقريبا جبتى الاسباب الللى بتخلى ناس تدخل التدوين وتخرج منه او تبعد عنه

    هو تقريبا زيه زى اى مجتمع فيه الكويس والوحش

    والواحد المفروض يتعامل بطيبو واخلاق وكل حاجة كويسة وفى نفس الوقت يتوقع ان ممكن يحصل حاجة مش كويسة

    ردحذف
  13. ازيك يا ايوشه

    انا شخصيا لما قريت البوست اللي فات

    قررت ارجع ادون

    او ع الاقل اتابع المدونات

    ردحذف
  14. عزيزتي ايوشه
    المفروض ان يكون كل شئ في حياتنا مهدف حتي التدوين انا حاولت ان اكون اتحاد لمدوني الصعيد وفشلت لان الناس في الصعيد منغلقه علي نفسها اكتر مش زي اخواننا المدونين في بحري اللي بيلتقوا ويقوموابأعمال انسانيه ويتبادله خبرات لكن اما ماش علي نفس الخط الفكري لمدونتي دون ملل او كلل ...طبعا فكرة التدوين تجذب الانسان اولا لكن عندما يكون التدوين من اجل التدوين يصبح مجرد مفكره شخصيه لذا انا اعيد طرح اتحاد مدوني الصعيد مره اخري من خلال مدونتك ولن امل.
    اما عن الحب فنحن في زمن تغير فيه شكل ولون وطعم ورائحة الحب اصبح الحب كالماء ليس له لون او طعم او رئحه...
    ويذكرني هنا قول الشاعر:-
    تري هل يأتي يوما يصبح فيه الحب عقيده
    باقة ورد او قصيده

    ردحذف
  15. بجد يا ايه عايزه احييكى على اهتمامك ومتابعتك ومناقشتك للموضوع ده بكل جوانبه ربنا يكرمك ياقمر ويعود حقا التدوين لسابق عهده

    ردحذف
  16. والله يا بنتى بجد انتى دماغ..
    دماغ دماغ يعنى مش اى كلام (:
    انا قولت اسلم بس عالسريع
    ومعلش مش هعلق عالبوست علشان مستعجل سلااااام

    ردحذف
  17. واغلب الكتاب دلوقتى بيلبوا طلب الجيل اللى مش عايز يتعب نفسه فى قراءة متعمقة وباسلوب لغة عربي
    عندك حق أوى في دي أنا ليا واحدة صاحبتى لما بتشوف اللى أنا كاتباه تقولى و النبي أكتبي بالعامية كلمينى بأسلوب سوقي
    و لا حول و لا قوة إلا بالله
    أنتى عندك في رأيك عن التدوين أنا كتير بلف في المدونات بحس إنى بضيع وقت و مفيش حاجة أرد عليها لإنى مش مقتنعة بجدية الكلام و معظمه تهريج للأسف
    بس أكيد في مدونات ليها إحترامها زى مدونتك الجميلة و مدونات تانية جميلة و اعذرينى إنى مش برد من فترة عشان مش بعد نت كتير

    ردحذف
  18. انا لسه راى متغيريش يا ايووووش عن زمااان وهيفضل زى ما هو واظاهرى مش بلاقيكى ليه ؟؟؟
    دمتِ يارب بكل جب و د وفى رعاية وحفظ الله ائماااااااا

    ردحذف