الجمعة، 26 مارس، 2010

مدونتى ....شكراً + نـــــــــــــــــــــداء





البوست ده هنقول عليه فضفضة معاكم وليكم الحق فى انكم تسمعوا فضفضتى معاكم او طبعا ليكم الحق فى انكم مش تبصوا على كلامى من اساسه ومش تشتغلوا دماغكم بيه هقول كلام كتير اغلبه هيزعل بس معلش بقى يمكن ده حل علشان عقلى يصفى شوية وعلشان كمان نحط النقط على الحروف وكل واحد يعرف راسه من رجليه فى موضوع التدوين وسنينه ده




بالنسبة للتدوين :- بقى حاجة دمها سم جدا وملهاش طعم مش عارفة هو ايه اللى حصلنا بنكتب ليه من غير روح ولا من غير نفس وبنزور بعض تـأدية واجب مش اكتر بقى الواحد قلبه والله العظيم بينقبض لما يدخل المدونة بحس ان حمل تقيل على قلبى ومش عايزة اقربلها ولا اشوف وشها واحط البوست واطلع جرى بعيد عنها واكيد ده مش احساسى انا بس ده احساس ناس كتير زهقت وطقهقت وقرفت من التدوين وهربوا منه فيهم اللى مش هيرجع يدون تانى ويفهم اللى مش عايز يرجع وفيهم اللى رجع بس مش معبر المدونة ولا المدونين وفيهم اللى بكتب فيها ومش بيزور باقى المدونات التانية ولو زار يبقى تأدية واجب (( زى حالاتى كده مثلا ))




وفيهم اللى بيكتب ماشاء الله بوست كل يوم بس صدقونى اغلبهم بقيت بوستات من غير روح زى ما قولت تأدية واجب وبس حتى وزيارته للمدونات التانية تأدية واجب وعلشان ميزعلش حد منه .


انا هتكلم عن نفسى وعن بعض الاسباب اللى سدت نفسى عن التدوين وطبعا مش هعمم انا هتكلم فى الاغلب عن نفسى ومليش دعوة بغيرى بيفكر ازاى ولا هو ايه ظروفه .


فى اول التدوين ظهر جيل ماشاء الله بيكتب بشكل حلو ومختلف وجديد والتدوين كان لسه ليه هيبة كده والحمدلله الجيل ده اغلبهم اشتهر وانتشر وحقق احلام كتير فى حياته من خلال التدوين وحياته اتغيرت بسببه اكيد ربنا يكرمهم ويوفقهم جميعا .


اللى حصل بقى اننا كنا بنتابعهم ومن جوانا نفسنا نبقي زيهم ويبقى لينا اسم وشهرة ونحقق احلامنا احنا كمان من خلال التدوين لان فى حياتنا مفيش اى حاجة عدلة نحقق احلامنا بيها مكنش فدامنا غير التدوين نثبت فيه نفسنا سواء كنا بنكتب شئ مفيد او لا وسواء كنا موهوبين اولا ناس كتير وانا منهم كنا بنحلم نبقى زى الناس اللى من الجيل الاول فى التدوين ولما مقدرناش احبطنا ونفسنا اتسدت من التدوين وقولنا ايه لزوم التدوين بقى مادام هو كمان محققش احلامنا وبقى زيه زى غيره شوية كلام ومكتوب واى حد ممكن يجى يسرقه وينسب اسمه عليه .




بس بجد نظرة غبية جدا منى انى افكر فى كده هو انا اصلا كنت بكتب ولا كنت موهوبة قبل التدوين علشان لما احس انى فاشلة لغاية دلوقتى مظهرتش فى التليفزيون ولا معملتش كتاب ولا حتى مبقاش الفريندز على الفيسبوك عندى بتاع الفين صديق ولا انى بقيت عاملة مدونة لو دخلت كحيت فيها الناس هتيجى تمدح عبقريتى الفذة .




بصراحة كنت غبية جدا جدا والغباء ده خلانى مش اشوف حاجات حلوة كتير فى التدوين وفيا وخلانى اعمل حاجات واكتب حاجات انا مش مقتنعة بيها لمجرد انى اقلد يمكن لعلى وعسى ابقى فى يوم حاجة ليها قيمة .


بس بصراحة غبائى ده دلوقتى ابتدا يتغير نوعا ما انا بقيت متاكدة انى مش بكتب كلام وبس انا بكتب باحساس واحساس مش عادى انا بجد برهق وانا بكتب عن اللى جوايا كل كلمة دلوقتى بتخرج منى بتعبر عنى او عن حد انا اتاثرت بيه , لما بكتب عن قصة فيها حزن انا بحزن لما بكتب عن فرح انا بفرح لما بكتب عن حب انا بعيش الحب ده
هى مجرد لحظات بتمر عليا وانا بكتب بس عرفت فيها معنى ان الانسان يكون عايش وجواه قلب يحس ويتاثر .


انا بقيت مشهورة وبقيت متالقة وبقيت موهوبة وبقيت كل الصفات اللى نفسى فيها بسبب التدوين بقيت بينى وبين نفسى شايفة كل المميزات دى فيا , بقيت دلوقتى عندى ثقة نوعا ما انى بعرف اعبر صح عن احساسى وبعرف اتكلم عن اللى جوايا , يمكن التدوين خلانى افكر اغير اسلوب حياتى وعلشان عادل ميقولش انا بتاعت كلام وبس :)
انا فعلا بحاول يمكن لغاية دلوقتى مقدرتش بس انا اتغيرت كتير جدا

بجد مش هقول للمدونة غير شـــــــــــــكراً بجد انتى غيرتينى وعملتينى مكونش غير نفسى , والمدونة هنا طبعا بكل ما فيها وبكل ما فى عالم التدوين عموما



نــــــــــــــــداء





المدونين الحاضرين الغايبين او المغيبين انتم فين بقى وفين النشاط والحماس اللى كان فيكم من الاول ايه كل واحد كان حاطط امل وراح منه كان نفسه يحقق حلمه وضاع وايه الجديد هو انتم يعنى كنت شايفين التدوين هو الحاجة اللى هتغير حياتكم بالعكس بقى انتم اللى هتغيروا الدنيا من خلال مدوناتكم وبوستاتكم وكلامكم زى ما التدوين اضاف كتير لحياتكم ياريت تتضيفوا انتم كمان للتدوين .


بلاش الغرور يعمينا وبلاش الاحباط واليأس ينسينا الايام الحلوة اللى كانت فى التدوين زمان
مش لما احس ان اسلوبى بقى احسن من الاول انسى اصحابى وانسى كل الناس اللى وقفت جنبى
ومش لما احسن اانى فشلت فى تحقيق حلمى فى انى ابقى مدون مشهور وصورتى فى كل مكان على النت يبقى خلاص اخر الدنيا ابعد وبردو انسى الناس اللى بتزعل من فراقنا واللى اتعودت على وجودنا
اتمنى ان كل اللى فى دماغى ده يكون تفكيرى انا لواحدى وان الظروف هى اللى فعلا بتمنع الناس من التواجد لو لساعات قليلة على مدوناتها ومدونات غيرها









واخيرا قابلت دكتورة علا :)



قابلت دكتورة علا وطبعا انا كنت بتهرب كتير معلش بقى سامحينى يادكتورة انا بطبعى جبانة وخوافة جدا وخفت اسيب انطباع سئ عندك لما اقبلك والصورة اللى يمكن كنت رسماها لايوشة تتغير
بس بجد انا بعد ما شفت حضرتك حسيت اد ايه حضرتك انسانة رقيقة وطيبة وجميلة جدا جدا جدا والله مهما فضلت اتكلم مش هقدر اقول انا مبهورة بحضرتك اد ايه لدرجة انى دلوقتى فى البيت والجامعة ومع اصحابى وبنات خالتى على طول دكتورة علا دكتورة علا :)


بجد ربنا يكرمك ويخلى سيف وشادن ويحفظهم وتشفيهم احسن ناس فى الدنيا , وعلى فكرة انا دلوقتى مش بفكر انا سيبت انطباع ايه عند حضرتك لان كفاية الى يقعد مع حضرتك شوية يبقى على طبيعته ويقول كل اللى نفسه فيه ويحس انك قريبة منه جدا






صلحت الكلمة معلش خطأ مطبعى بقى :(





هناك 26 تعليقًا:

  1. أنا لسه ماعرفتش ايه الموضوع

    بس ناخد الرابع برضه

    ردحذف
  2. الخامس بقى كويس جدا

    انا باحب رقم خمسه

    ردحذف
  3. كفاية كده بقى

    رفقا بالقوارير

    زى ما امرنا الرسول صلى الله عليه وسلم

    ردحذف
  4. بس اعمل ايه بقى الشيطان شاطر

    اخد السابع

    ردحذف
  5. تعرفى يا أيوشة كلامك بجد تمام يمكن فى ناس مننا حلمت توصل للى غيرنا وصله وضيفى على كده إحساس غريب انتشر حالة ركود فى الأقلام وحالة ملل ويأس وحياة اتغيرت

    بس ناهيكى عن كل ده التدوين بجد زى تنفيس عن النفس بتخرجى فيه كل أحاسيسك اللى بتحسيها واللى نفسك تحسيها بتحلمى وتحققى حلمك بالكلمات وبصراحة فى العالم ده الواحد شاف أحلى ناس واتعرف عليهم ناس بجد تحسسك بوجودك وبأهميتك هو ده عالم التدوين بالنسبة لى مبقاش شهرة بالعكس بقى أحلى أصحاب ممكن تلاقيهم ويمكن إخوات مكنتيش تحلمى تشوفى زيهم

    تحياتى ليكى يا قمراية

    دمتى بكل الخير والحب والسعادة

    ردحذف
  6. بجد انت احسن حاجة تعمليا انك تسيبى هنا وتختفى

    مين دى اللى بتقولى عليها

    حضرتك اسنان رقية وطيبة وجميلة جدا جدا جدا

    اسنان ايه بس وضروس ايه على الصبح

    ردحذف
  7. حبه جد بقى

    كلامك فى صح كتير
    أن مثلا دخلت هنا بعد فترة متابعة كبيرة جدا ومناقشات بينى وبين ناس معينة عن انى ادخل واكتب واناقش
    وطبعا دخلت هنا بهدف كتبت جزء منه لم كنت باحتفل فى المدونة بعيدها الأول
    لكن اكون كداب لو قلت انى فضلت فى الطريق وبس
    مع الوقت حسيت بالصحبة ودا شىء أن مفتقده كتير فى حياتى بعد سفر أقرب الناس لى بعد ظروف معينة حصلت لنا وأصريت أنا إنى أفضل هنا
    وكانت حياتى ومازالت كلها شغل فى شغل
    بس كان إنى ألاقى ناس أناقشها وأضحك معاها وأحزن معاها وأتعرف عليها جميل جدا
    اما بقى بخصوص التغيب فبالنسبة لى هو لا احباط ولا غرور
    هو ظروف معينة عندى حالبا تمنعنى انى اكون موجود فى البيت وغالبا فى اى مكان فى نت اساسا
    لكن حتى بكده كنت زعلان لانى اعتبرت المدونة اجندة من اجنداتى اللى باكتب فيها ومرتبط بيها وعلشان كده خليت واحد من اصحابى موجود معايا وحركته أوسع انى كل ما اكتب اخليه ينشره
    ولحد دلوقتى مش عارف ليه عملت كده أساسا
    المهم إن التدوين مكان فضفضة جميل ورائع وبيجمع الناس بطريقة جميلة جدا وكمان بيخلى الواحد يحس إنه بيناقش العالم مش بيكلم نفسه
    صحيح فى ناس نص كم كتير هنا وغالبا بطلت ادخل عندهم بس فى نفس فى ناس حلو كتير اتعرفت عليهم وسعيد جدا انى اضمهم لقائمة اخواتى فى الحياة (وطبعا الحزب مش منهم خااااالص )
    ما علينا
    اللى عايز يكتب ويقول رأيه ويبنى نفسه لازم تكون عنده إرادة مشمجرد رعوة وت وبعدها ننام من تانى
    لازم نتعلم إننا نوصل لهدفنا ونصر على كده مش مجرد عند أول ملف ونقعد نموت

    كفاية كده شكلى اتعلمت الرغى من الحزب

    ردحذف
  8. بسم الله الرحمن الرحيم
    السلام عليكم ورحمة الله وبركاته

    الأول سلامي عليكي بعد غياب طويل ليا وكان لسبب من الأسباب اللي ذكرتيها اني كنت حسيت ان مفيش جديد ومش لاقية حد يديلي دفعة للأمام وبدأت بأني أبطل أزور الناس وبعدها قفلت المدونات لما القوالب بتاعتها باظت

    فيين وفين بقى حاولت أفوق لنفسي وغييرت القوالب وفتحت المدونات تاني لكن لسة مبدأتش أكتب فيها

    يمكن نوع من أنواع الكسل ويمكن عشان الدراسة ووقتي القليل اللي بقضيه على الجهاز

    بس ربنا يقوينا جميعا يا رب ويهدينا للي فيه الخير

    ردحذف
  9. 1-ازاي حماتي (صيدلانية) بقيت (اسنان) رقية و طيبة ؟؟
    ماعلينا

    2-انا هافضل ااقول بس اهو في بريق امل

    3-بصي يا حجة انا عن نفسي مش زي الاول بس ده مش عيب هي فترات
    الكثرة و اني اكتب كتير كان زمان
    بس مكنش بهدف شهرة ...الخ و الكلام ده
    انا بس عايز اكتب و بس
    وهو ده اللي عملته
    وبقي قليل بس مش اكتر عشان بقيت اهدا و بقيت مبحبش احب اكتب اي شئ مش راضي عنه ولو بنسبة 1%

    ردحذف
  10. صباح شريف يا ايوشة هانم
    وجمعة مباركة ان شاء الله

    ليه لازم تكتبي دلوقت زي يوم ما ابتديتي

    وهو مين مش بيقف عند نقطة ويعدل مساره ويعدل فكره؟

    لما تعوزي تكتبي اكتبي
    اكتبي لنفسك اولا وبعدها اللي يوافقك اوك واللي يخالفك فلة ياروحي

    اكتبي واللي يثمن ما تكتبي كتر خيره واللي يشوفه خاص بيكي لوحدك تبقي مخسرتيش

    اكتبي واللي يتنشر يبقى نصيبك واللي يظل كمدونة مش وحش برضه

    غيري المفاهيم ماشي
    بس لو بتحبي تكتبي اكتبي

    ده انا بتعجب اننا نفلسف شيء جميل عمل تواصل راقي بيننا .. تواصل جماعي .. ونقعد نعدد في فوائده ومضاره

    هو فضفضة
    حتى لم تعطينا فائدة مؤكده فيكفي انها خلاصة تارب البشر
    وهو احنا ايه غير شوية تجارب بشرية فوق بعض؟ :)

    ردحذف
  11. ايوشه بجد جامد اوي البوست ده والله فعلا المدونات فايدتها رهيييييييبه بتدي الواحد جراه رهيبه على انه يقول الي جواه وبكل طلاقه وصراحه

    ردحذف
  12. ممكن برضوا

    انا نفسى كان النت باظ ولما اتصلح لقيت نفسى معدش بصبر اقرا من على الشاشة
    وبحاول اهوه تانى
    دا حتى البوست الاخير عندى كان مجدول


    البوست دا حلو

    ردحذف
  13. كيف احوالك أيوشة؟؟؟؟؟


    امممممم

    انا برضه كده احيانا بكون زهقان من المدونة زى الاسبوعين اللى فاتوا

    ولما كنت بقعد على النت مكنتش بفتحها حتى

    بس ده عادى لازم الواحد كل فترة يريح منها شوية مفيهاش حاجة علشان يقدر يكتب تانى


    بس فيه نقطة مهمة اوى

    ايه السبب الاساسى من الكتابة فى المدونة ده شىء مهم اوى علشان يستمر او لا

    لازم فعلا نعيد حساباتنا ونعرف احنا بنكتب ليه.......؟؟؟


    عموما ربنا يصلح حالك دايما

    ردحذف
  14. عزيزتي حاولي توزعي وقتك تدوني في اوقات ثابتة مرة او مرتين أسبوعيا أو كل اسبوعين حسب وقتك المهم الالتزام بالوقت
    بين الحين و الحين قومي بتخزين أي بادرة تأتي لك على الكمبيوتر و لا تنشريها الا في وقتها و بعد تعديلها
    ربما تتكون لديك تدوينات على مدى اسبوعين و ربما لا تكتبي شيئا لكن المهم المواظبة
    دمت بخير
    اتابعك على الفيسبوك

    ردحذف
  15. ايوشه
    فعلا كل كلمة قولتيها صح
    اكيد بعضنا معدش حماسه للتدوين زي الاول
    بس دا بسبب انه عايز يكتب مواضيع جديده تفيد الناس ويدور ميلاقيش حاجه مهمه اوي
    انا واخد منهج من يوم ما دونت وهو اني مش بكتب الا لما اكون عاوز اكتب فعلا
    اما بخصوص المدونات التانيه فانا لازم اقرا موضوعهم كويس يعني مش تقضية واجب وخلاص علشان حتي لما ارد اعرف انا برد علي ايه
    تسلم ايدك
    وانا اتمني ان كل المدونين اللي اختفوا يرجعوا يكتبوا تاني
    تحياتي يا ايوشه

    ردحذف
  16. كلامك فعلا صح عن الاحساس اللي بيربط المدون بعالم التدوين .. فعلا فيه حاله زهق وملل الى حد ما بتصيب العديد من المدونين

    بس دا مش حاله دائمه وبتتغير بين الحين والاخر

    "
    بلاش الغرور يعمينا وبلاش الاحباط واليأس ينسينا الايام الحلوة اللى كانت فى التدوين زمان
    مش لما احس ان اسلوبى بقى احسن من الاول انسى اصحابى وانسى كل الناس اللى وقفت جنبى"

    اتفق معاكي جدا في رأيك

    وزيدي عليه كمان اتفاقي مع رأي استاذتنا اللي بنتعلم منها كلنا الدكتوره ستيته


    ربنا يوفقك

    تقبلي مروري

    ردحذف
  17. السلام عليكم و رحمة الله و بركاته
    أختى الكريمة
    غبت كثيرا لظروف قهرية و عدت لأجدك صادقة و بسيطة كما كنت
    انت لمستى أوتار كثير عند ناس كثير
    ربنا يوفقك و يبارك فيك و يرزقنا و اياك الصدق و الإخلاص

    ردحذف
  18. ازيك يا ايوشه

    انت قلتي كلام فعلا كلنا بنحس بيه

    معرفش انا سبب دخولي عالم التدوين

    ومعرفش برضه سبب الحاله اللي انا فيها

    واللي اغلبنا فيها

    لكن كل اللي اعرفه

    اني بحب كل الناس دي بجد

    من غير اي غرض او سبب غير انهم ناس يستاهلوا اني احلهم

    زعلان من نفسي اني بعيد ومش بتابع

    وفيه ناس بقرالهم اغلب بوستاتهم ومش بعلق


    التدوين حاله جميله من التواصل

    يمكن اغلبنا مش موهوبين

    بس بنفضفض

    بنعبر عن نفسننا

    بنكتب لنفسنا

    وبنتبسط اوي من التعليقات اللي بيبقي اغلبها مجامله

    كفايه كده

    ردحذف
  19. بالمناسبة

    التدوين نزل علشان الفيس بوك

    رغم انى مش شايفله ميزة غير انه مساحة للتواصل والدردشة مش أكتر

    عامة

    موضوع مهم عندى على المدونة

    مستنى رأيك

    مودتى

    ردحذف
  20. أنا هنتقد البوست ده وعاوزك تعلقي على انتقاداتي علشان وجهة نظرك توضح أكتر
    - انت قلت ان التدوين بقى حاجه سم وانك بتحسي بانقباض عند دخول المدونة وبعدين قلت انك اكتشفت مميزات في التدوين وان احساسك ونظرتك للتدوين اختلفت ... فهل تلاشى الاحساس الاول ؟
    - هل من وجهة نظرك كل المدونين اللي حققوا نجاح وطلعوا في التليفزيون واتنشرت اعمالهم وطبعت يستحقوا ذلك لموهبتهم وأنهم فعلاً عندهم شيء يقولوه ؟ ولا كان في اسباب أخرى منها ما لانرضاه لأنفسنا كان وراء نجاحهم فبعض المدونين المشهورين مشهورين لشذوذهم في الكلام الذي يصل لحد ما بعد السفالة فهل ترضين بذلك ؟.... والبعض ليس له أي موهبة في الكتابة الأدبية لكنه تناول موضوعات يراد لها ترويج اعلامي بشكل ما فسلطت عليه الأضواء لهدف ما " مثل مروجي مقاومة التحرش وحقوق المرأة ومدعي الحرية ... كلهم مقاتلين أمام طواحين الهواء ... فهل تحبين أن تحتذي بهم ؟

    التدوين عبارة عن تجمعات لأشخاص متقاربين في الفكر والتوجه والمرجعيات .. والتجمع التدويني الخاص بنا له مرجعية اخلاقية ودينية وينتمي لتيار معارض نوعاً ما للتوجهات السياسية الحالية لذلك لاتتوقعي تسليط الأضواء عليه أبداً ولكن يمكن عمل شيء مشترك يجمعنا وننشره لو حبينا أو حتى يمكنك نشر أعمالك لو أردت فذلك متاح للجميع .
    - الكتابة هي محصلة القراءة ولو حسيت انك مش لاقيه شيء يتكتب اتهمي نفسك فوراً بأتك مقصرة في القراءة فكل سطر في كتاب قد يلهمك فكرة يكتب لها بوستات عديدة
    - لاتعتبري كتابتك في المدونة واجب عليك أو زيارة المدونين كذلك لا تعتبريه حمل ثقيل كما يبدو من كلامك فنحن لسنا إلا كلمات على شاشتك تقرأينها وتتواصلي معها بلا حرج أو الزام أو عبء نفسي يكون نتيجته نفورك من المسألة كلها ولو احسست بذلك فبالتأكيد يوجد في الموضوع شيء غير صحيح يجب مراجعته .
    - أخيراً معظمنا يكتب منذ فترة تتجاوز السنة بقليل فلم العجلة في الحكم على تجربة حديثة نسبياً بهذا "العنف" :)))

    أخيراً نشكر لك هذا التقييم والمصارحة وكل هذه الشفافية في رؤية الذات التي لاتتمتع بها الحكومة الرشيدة :))))
    تحياتي :)

    ردحذف
  21. عايزه اقولك يا ايه ان معظم كلامك ان ما كانش كله صح كل واحد فينا وصل لمرحله معينه وبعد واختفى واكتفى باللى هو فيه اما غرور او احباط ويأس والنداء بتاعك شىء قمه الصح لازم نرجع لازم نعيد كتاباتنا وافكارنا من تانى ونرجع احسن من الاول تسلم ايدك

    ردحذف
  22. كلامك كتير حمسنى بما أنى لسة مستجد فى عالم التدوين وكتير علمنى أشياء هحاول أتعلمها وأعملها
    --------------------------
    وعلى صوتك يأم الضفاير وأكيد لو بطلنا نحلم نموت

    ردحذف