الاثنين، 8 مارس، 2010

عندى ملل وايه الجديد





هقولكم عندى ملل هتقولوا وايه الجديد يعنى ماانتى طول عمرك مملة , والناس كلها دلوقتى بقى الملل فى كل لحظة فى حياتهم .






الجديد بقى انى عندى ملل من التدوين بقيت مش بحبه ولا عايزة ادون ولا ليا نفسى ازور المدونات ولا برد على تعليقات الناس اللى هى اصلا قلت من ساعة ما رجعت من شهر تقريبا , ولا من اساسه طايقة امسك قلم واكتب حتى لمجرد الشخابيط اللى انفس بيها عن نفسى




التدوين اتغير عن زمان صح ولا انا بس اللى شايفة انه بقى ملهوش لزوم




انا بصراحة من اول ما دخلت التدوين وشايفة ان التدوين ملهوش لزوم تكتب موضوع يمكن يكون فيه فايدة بس بتكون للحظات ولو سالت اى حد بعد كده بيومين تقوله ايه رايك فى البوست مش هيفتكره لانى انا كده ممكن اقرا بوست ويعجبنى جدا وانسى اصلا هو كان عنوانها ايه بعد يومين زى ما يكون مجرد كبسولة مسكن بناخدها وبيروح مفعولها بسرعة تقريبا التدوين بقى معاملة بالمثل يعنى تزور الناس الناس تزورك تبدأ تبعد خلاص تتنسى




عايزة ارجع تانى للتدوين وارجع احبه بس مش عارفة ازاى ؟؟؟؟
ياريت اللى يعرف يقولى عايزة ارجع اكتب وانا مبسوطة حتى لو مجرد كلام ملهوش لزوم بس اكون مبسوطة بيه وان المدونة لسه روحى فيها مش كل ما ادخلها قلبى يتقبض من كآبتها .




ملحوظة :- من زمان مرديتش على تعليقات باذن الله هرد المرة دى يمكن التفاعل مرة تانية يرجعنى احب المدونة
وبشكر بجد كل الناس اللى علقت على البوستات الكتير اللى انا مرديتش على التعليقات بتاعتها انا بقرا التعليقات مرة واتنين وتلاتة
وساعات لما بكون مش عارفة اكتب حاجة برجع اقرا التعليقات بس مش بعرف ارد عليهم

هناك 20 تعليقًا:

  1. بصي يانبتي
    مفيش حاجة اسمها تحبي و تكرهي التدوين او الكتابة

    انتي بتكتبي عشان ربنا مديكي موهبة ... الموهبة مش لازم تكون هتجيب نوبل بس اداكي قدرة علي التعبير باستخدام الكتابة و غيرك عنده نفس القدرة بلعب المزيكا او الغناء او الرسم و هكذا

    يعني دي قدرة من ربنا

    انت بتكتبي لنفسك اولا
    في التدوين التفاعل هيجي من انك عن فضول و معرفة عن الناس و كتاباتهم و اسلوبهم لان ده اصلا بيثقل طريقتك انت بشكمل غير مباشر
    هتشوف اللي بيكتب اي كلام و اللي (بيسرق علني) و اللي بيكتب شعر و اللي بيكتب كلام رهيب رغم ان سنه صغير قوي ...هكذا
    التدوين مصغر للحياة بس محصورة في الناس اللي واخدة الكتابة دي تعبير عن نفسها
    والممل شئ عادي
    انا كنت بنزل بوست في الاسبوع و بقي كل اسبوعين ز حايلا داخل في 3 اسابيع مش بنزل
    ويمكن بعد كده شهر انا و ظروفي
    بس ده مش ملل من الكتابة او المتابعة (لاني بتابع كل النس حتي لو زهقنا لان ساعات كتير بيخرجوني من الملل)
    بس هي بالمزاج
    يعني مينفعش تمسكي قلم و عاوز اكتب بالعافية
    في مجموعة من المشاعر او الاحداث لازم يتعبر عنها و انت تلقائيا بتختاري الوقت ده

    انتي بس اللي نفسيا مش متظبطة و كذا مرة بقولك كده
    المسألة مش كتابة او تدوين او زهق
    المسألة فيكي انت و التغير اللي بقاله 7 قرون مستنية يحصل فيكي و مبيحصلش

    المشكلة فيكي انتي و حلها مش قفل المدونة او عدم الكتابة او التدوين

    الحل انت تاخدي قرار و تنفيذه بالتغيير اللي تحبيه و تجعلي ليكي شخصية مستقلة مش مجرد (كلام وخلاص) !

    ردحذف
  2. ازيك يا ايوشه

    بصي الحاله ديه انا شايفها حاله عامه

    لأني في افلتره الاخيره دخلت عند ناس كتير بتتكلم عن نفس احساسك

    بس فعلا التوين مابقاش زي ما دخلته من سنتين

    التدوين فعلا إتغير وبقي يسد النفس عن الكتابه

    بس المشكله إن الواحد مش لاقي بديل
    ولا حتي لاقي تقدير من الناس

    ماتفهميش الناس بتفكر ازاي عشان تكتب

    او بتقيم علي اساس إيه

    بس بجد الي لاحظته والي قلته لأكتر من حد ويمكن قلته امبارح لدكتوره ستيته

    إن الناس مابقتش تجتمع علي التدوين او حتي علي المحتوي المفيد

    بل بقيت تجتمع علي المدون نفسه بغض النظر عن الماده المكتوبه او المنشوره

    انا عن نفسي بدون اولا لنفسي
    بس ثانيا لأي حد يستفاد
    لأن ممكن الي بكتبه ده انا كده كده بكتب اي مقال او اي موضوع بتناوله عندي في ورقي ممكن ماكتبش عن حاجه علي النت

    بس بفضل انشره لأني مش بحب اكتم شيء عن حد الي ممكن يكون فيه اي معلومه حتي تفيد اي حد

    ثم الكلام الي انا بكتبه ده في ورقي ما انا عارفه لو علي كده إيه الي هيفيدني لو نشرته

    بس فعلا مش عارف اقولك إيه

    بس زي ما قولتلك رغم إن التدوين فعلا بقي يسد النفس والحال كله الي حوالينا بقي يسد النفس برضه

    إلا إني مع الرأي الاول

    لازم تحاولي تطلعي نفسك من الحاله ديه
    وتسيطري شويه عليها

    لان الكتابه زي ما قال فعلا موهبه
    يعني مش كل واحد بيكتب يبقي خلاص بيعرف يكتب

    وبعدين الكتابه شيء بتفرغي فيه الحاله الي بتنتابك وبتعبري عنها بمنظور معين

    مابالك لما تكون وسيله التعبير عن ده ممنوعه

    فكري تاني يا ايوشه

    ويارب نطلع كلنا من الي إحنا فيه

    تحياتي

    ردحذف
  3. لا انتي موش ممله ابدا يا ايوشه :)

    وهترجعي تحبي التدوين والكتابه لو حسيتي انك محتجالهم

    ممكن تكوني بتفرغي طاقتك في شيء تاني او مشغوله بحاجات تانيه

    تحياتي

    ردحذف
  4. الملل
    كلنا يبقا عندنا الاحساس بالملل من ناحية حاجة بنحبها فى وقت معين
    بس بياخد وقته وبنرجع تانى للحاجة اللى بنحبها ونحبها اكتر من الاول كمان

    بس انتى اكتبى اللى فى قلبك
    مدونتك هى اللى بتفرغى فيها اللى جواكى

    مش مهم تكتبى حاجة مهمة اكتبى اى كلام وخلاص جواكى
    يمكن دة يخرجك بالتدريج من احساسك دة

    و مش مهم اللى يقرا كلامك وينساه مش مهم حد يقولك برافو كلامك جميل وميفتكرهوش بعد دقيقة
    المهم انك تكتبى اللى يريحك ويرضيكى اكتبى لنفسك مش لغيرك


    ويارب يخرجك من مود الملل دة قريب وترجعى تكتبى كلام جميل كعادتك


    تحياتى

    ردحذف
  5. أولا
    عندك حق جدا جدا جدا

    فى حاجة صغيرة قوى

    هقولكم عندى ملل هتقولوا وايه الجديد يعنى ماانتى طول عمرك مملة

    رايح مشوار ساعة زمن باذن الله وراجع عندى كلام كتير

    انت جيتى على الجرح

    ردحذف
  6. ايزيك يا ايوشه
    احساس طبيعى بيحصلى وبيحصلك وبيحصلنا كلنا خدى ريست مع نفسك كده ريحى دماغك من التفكير الملل صحيح جوانا بس مكن نكسره ونغيره بطرق كتير نحاول نعمل شئ مشمالوف لينا
    صنيه بطاطس فى الفرن مثلا
    دى بقى مع الزر والسلطات ويا سلام لو كانت باللحمه المفرومه
    تبقى ايه
    فكيها بقى

    ردحذف
  7. ايزيك يا ايوشه
    احساس طبيعى بيحصلى وبيحصلك وبيحصلنا كلنا خدى ريست مع نفسك كده ريحى دماغك من التفكير الملل صحيح جوانا بس مكن نكسره ونغيره بطرق كتير نحاول نعمل شئ مشمالوف لينا
    صنيه بطاطس فى الفرن مثلا
    دى بقى مع الزر والسلطات ويا سلام لو كانت باللحمه المفرومه
    تبقى ايه
    فكيها بقى

    ردحذف
  8. ايوشة انتى اولا وحشتينا جدا
    ثانيا التدوين ده مش حاجة مملة خالص بالعكس ده الواحد بيلاقى نفسه فيه
    هو المتنفس الوحيد لينا بنسمع لبعض ونشكى لبعض وبنعرف حاجات عن بعض وبناخد معلومة من عند حد
    لا يا ايوشة التدوين شىء كويس جدا بس يمكن الاحساس ده علشان انتى بعدتى فترة
    اما بخصوص التعليقات فده برضوا بسبب بعدك وعدم اهتمامك بمدونات الاخرين
    ارجعى تانى وتفاعلى وهتلاقى نفسك بتموتى فى التدوين
    وكل خمس دقايق هنلاقى بوست
    وحشتينا بجد

    ردحذف
  9. ايه يا ايوش يا قمر

    انتى عمرك ماكنتى ممله يا قمر

    وبعدين التدوين مش وظيفه يا بت

    لما تحسى انك عايزة تكتبى حاجه اكتبى ولما

    تحسى انك جايبه جاز ريحى شويه

    كلنا بيعدى علينا احساس الملل ده

    وبيبقى وقتى وبيروح

    ربنا يسعدك يا جميل

    ردحذف
  10. ايوشه .. مش هقولك ازيك ولا انتي فينك ولا ليه الغياب ولا ليه الملل .. والكلام الممل اللي بتيقال كل مره وخلاص

    البوست والكلام اللي فيه كافي انه يصف حالتك واحساسك ب البوووووورد المزمن

    .. انا بتفق مع عادل لما قالك انه مينفعش تكرهي او تحبي الكتابه .. بس اعتقد انك ممكن تملي وتبعدي شويه شويتين ده من وجه نظري سببه الكسل ..

    بس انتي في كلامك قولتي كلمتين بجد حسيت ان زيك بالظبط .. فأنا لا اعتبر نفسي مدونا لاني بطئ جدا في تجديد مدونتي برغم اللي جوايا اوقات كتيره حاجت لو دونتها في وقتها هتكون حجات مفيده جداا .. بس برجع اسأل نفس السؤال اللي ذكرتيه.
    اني ممكن اكتب شعور جميل او افكار كويسه بس ايه فيدتها بعد كده ؟؟
    يمكن انحنا واخدين الموضوع بشكل تاني
    انتي لما تكتبي عن حاجه جواكي في وقت معين ... كده انتي دونتي زكره ... مش مهم هيا عجبت مين ومين الي استفاد منها او اساسا حد قراها او عرفها ..

    ده ليه .. لاننا مش بنكتب في جرنال ولا مجله ولازم تكتبي لجمهورك الكلام اللي بيحبه . . لااااااااا انتي بتكتبي لنفسك .. ونفسك هيا اللي بتحركها ظروف الحياه اليوميه اللي بنعيشها..

    انا رغيت كتير بس حبيت بس اقولك اني زيك تماما تماما بمل وامل وامل وبعدين ..بندم علي المواقف الي فاتت مني من غير ما اكتبها حتي لمجرد التزكره فيما بعد ...
    عموما توكلي علي الله ..
    واكتبي .. وعبري .. حتي لو هتدخلي تقولي سلامو عليكم .. وخلاص

    وكفايه فيس بوك وابون يور بلووج..

    ردحذف
  11. ياااااااااااه
    حاسه انى بقالى فتره كبيره مش جيت هنا

    انتى بجد وحشتينى قوى ياايوشه
    معلش
    اعذرينى
    اصل انا كمان زيك
    والله قلت الكلام ده لدكتوره ستيته
    التدوين اختلف عن الاول
    كل كلمه فى البوست ده اعتبريها على لسانى بجد
    تحياتى

    ردحذف
  12. دا بس من ااحساس العام فاليومين دول بأن مفيش حاجه ينفع تكتبي عنها
    وان مهما قولتي مفيش حاجه بتتغير
    ومعلومه:احيانا بيبقي في فدماغي حجات كتيييييييييير عوذه اكتبها
    بس موش بيبقي ليا نفس اكتب
    وساعات مفيش اي حاجه فالجمجمه نوهائي
    الاقس الكلام بيطلع لوحده ويعمل بوست حلو
    حاولي تطلعي من حاله الملل دي بأي طريقه
    علشان كدا هتذهقك من حجات كتير
    يارب تطلعي منها بسرعه
    تقبلي مروري وتحياتي

    ردحذف
  13. التدوين اتغير عن زمان صح ولا انا بس اللى شايفة انه بقى ملهوش لزوم

    من هنا نبتدى الكلام
    الكل بيقول الموضوع ده
    لكن اجابته احنا داخلين التدوين ليه أن لو لقيت المدونة عندى من غير تعليقات نهائى ولا الدموع لإنى دخلت التدوين على إنه نوتة بأكتب فيها وأحيانا بأططلب التفاعل كنوع من إبداء الرأى فى امور معينة وخلاص وده بيفيدنى لإنى فى الحياة مشغول وتقريبا عمرى ما كلمت حد عن اى حاجة تخصنى طبعا فى ناس دخلته بقصد إنها الكتابة بهدف معين أو لنشر محاولاتهم الأدبية ولهم منى كل الأحترام التقدير
    أما بخصوص إنه مسكن والكلام ده فلإن البعض بيقرأ ويرمى من دماغه وواخدها تسلية والسلام وكمان فى ناس بتكتب ملوخية والكارثة إن فى ناس بقت بتجامل وتقول عسل شهد كمان وبكده بدأ النفاق والتزوير والجو بقى خنيق فى مدونات كتير وأنا كمان بطلت تعليق بكثافة زى زمان حتى لما بأكون موجود مش غايب
    الناس نسيت إن معظمنا موجود هنا علشان يعرف ناس على حقيقتها من غير نفاق ولا تزوير وهو ده أكترحاجه خلت الموضوع يقلب بغم
    وكمان أحيانا الواحد بيفضل يفكر إزاى يكتب موضوع ويجمله علشان الناس تقرأه مع إن الأساس فى رأيي إنك تكتب من جواك
    تكتب على طبيعتك وخلى الناس تحكم أو تناقش موضوعك حسب الهدف من الموضوع
    وهو ده لزوم التدوين الحقيقي فى رأيي

    ردحذف
  14. يعني اقولك الحالة دي اى حد بيمر بيها اى انسان اى روح اى عقل اى فكر بس محدش يستسلم .. التدوين دة مع احترامي هو زي كشكول كدة بتكتبي فيه الى نفسك فية متنعة عاوزة تكتبي زكرياتك موقف اى حاجة نفسك فيها بتكتبيها عشان تخرجي من الى انتى فيه فضفضة مع نفسك و مع القلب التعليقات بتجي عشان تناقشي الكلام الفكرة الموضوع تناقشي تختاري من بين كل الحلول حل فاهمني يعني مشاركة من نناس مش تعرفك و ممكن ناس تعرفك توال معرفة تقدري تحكمي كدة يعني
    حاولي افتحي صفحة الرسايل و اكتبي بوست جديد هتتلاقي الكتابة بتيجي ورا بعضها
    اسئلي مجرب
    تحياتي

    ردحذف
  15. عايزه تحبي التدوين وتحسي انه مفيد شاركي دائما زي ما شاركتي معنا في حل مشاكل القراء علي مدونة دقات قلب بعد الخمسين

    ردحذف
  16. عادى مرحلة من مراحل الحياة

    و عرض طبيعى من أعراض الحياة فى بلد لطيف زى مصر


    هتعدى

    ردحذف
  17. بصي انا ماليش فى التدوين والكلام ده جوزي هوه اللى عرفني اصلا علي الموضوع ده وهوه اللى بيحب يدون انا بعرف اكتب كويس الحمد لله بس بحس ان المدونات مفتوحة لاسباب معينة :
    1- فراغ واحد عايز يتخلص منه ويضيع وقته
    2- قصور فى الشخصية وعدم ثقة بالنفس فبتحاول تكتب اى حاجة حتى لو تافهة عشان الناس تيجي وتعمل علاقات
    3-اذا كان فى موهبة فعلا حقيقة فبتكتب لابراز موهبتك و عشان تحس بالتشجيع واعتقد ده هدف سامي
    4-راجل عايز يصاحب بنات او بنات عايزة تصاحب ولاد
    5-نية للتغيير من السئ للجيد ونوع من انواع الامر بالمعروف والنهى عن المنكر وده برده هدف سامي

    اللى بشوفه كمان انى افتح مدونة الاقى حد كاتب فيها انه قام الصبح وشرب شاي وزرار قميصه اتخلع ونزل الشغل ومش عارفة قابل مين طب يعني انا مالى اقرا يومياتك بتاع ايه يعني وايه المهم فى كده مش فاهمة طب لو حاجة فيها عظة او موقف معين ماشي انما الحاجات دى ممكن تكتبها مثلا ع الفيس بوك ولا حاجة لكن تعملها موضوع ... واسعة شوية

    بصراحة انا شايفة ان التدوين لو بعد عن هدف ابراز الموهية او النصح والتوعية للمجتمع يبقى كلام فاضي ورغي وخلاص
    انا بصراحة معرفش مدونتك اول موضوع اقراه فيها هوه ده بس اللى عارفاه ان جوزي بيشكر في كتاباتك
    واتمنى انك تخرجي من حالة الملل دي يا ايوشة :)

    ردحذف
  18. الملل لما يجى بيبقى قاتل ويمكن لما يقتل بيريح لكن لما احنا بندور عليه بيبقى مستفز قاهر ومش معنى كدا انك انتى اللى دورتى عليه لكن حاولى تهربى منو ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

    ردحذف
  19. تصدقى نفس احساسى واحساس ناس كتير بردوه اعرفهم بيدونوا
    التدوين مبقاش يغير بجد ويتحس زى الأول
    والاغلب دلوقتى للاسف بيعملوها مصدر شهرة او مجرد مجاملة بالكومنتات دة بقى غير اللى مدوناتهم ملهاش اى هدف اصلا ومش بيكتبوا اى شىء بيقدم جديد او بيقدم اصلا حاجة بيبقوا كانهم بيعملوا شات فى البلوج

    مدونتك بجد عسولة..وبجد حبيتها
    لا مش اول مرة اجى بس اول مرة اناقش
    جيت مرتين قبل كدة قرات فيها وحبيتها والنهاردة جيت تانى
    تحياتى ليكى :)

    ردحذف