الثلاثاء، 28 ديسمبر، 2010

تدوينة العزة .. حتى لا ننسى غزة



منذ أيام جاتنى دعوة من المدونة العزيزة جدا لقلبى فتافيت ربع قرن فى محاولة منها لتذكر ذكرى مجزرة غزة" هو العدوان الذي شنته قوات الاحتلال منذ يوم 27 ديسمبر 2008 على قطاع غزة. ذهب ضحية لهذا العدوان حتى اليوم العشرون ما يزيد على 1300 مدني شهيد اكثرهم من النساء والاطفال وما يقارب الـ 5300 جريح من المدنيين، ومعظم الجرحى أصبحوا عاجزين أما أهل غزة فقد ظلوا صابرين يواجهون أكبر ترسانة عسكرية بصدور عارية وقلوب ثابتة في مواجهة 10.000 طن من القنابل القيت عليهم ومنها قنابل محرمة دوليا" وتقديم عرفان منا لهذه المدينة الصغيرة مساحة .. الكبيرة قدرا ومكانة .. ولو لمدة يوم واحد لمدينة غزة الحبيبة بان يتناول كل منا موضوع صغير على صفحة مدونته لتذكير بما حدث ..

ولا أخفيكم سراَ بأن فى قرارة نفسى كنت قد قررت تحضير موضوع ولو صغير لمثل هذا اليوم وعندما بدأت الكتابة لا اعرف ماذا حدث توقفت كلماتى ولم أجد فى مخيلتى ما يصعفنى للتعبير بالكلمات عن ما أشعر به .. لا أعلم هل هذا لأن هناك دائما حاجز بينى وبين الأحداث السياسية والتاريخية .. أم لانى لا أجيد الحديث عن الانتصارات العظيمة واعطاءها حقها فى التقدير .. أم لانى بطبيعتى لا أجيد الحديث إلا عن أمور الحب والغزل .. أم ان ما يحدث على الساحة فى بلدنا مصر الحبيبة يجعلنا شعب مغيب لا يحفل إلا بما يجرى على أرضه .. أم أن اعلامنا العربى أسهم بشكل كبير فى نسياننا وتناسينا مثل هذه المناسبة .. وفى النهاية ادركت شئ آخر انى ذات ذاكرة قصيرة المدى وانى نسيت او نتناسيت هذه الحدث الجلل .. وأن دل ذلك فانه يدل على تقصيرى وجهلى وانانيتى المفرطة والتركيز على حياتى الشخصية دون النظر إلى معاناة الاخرين ..


واليوم حاولت انى جاهدة ان اكتب اى شى يعبر أو يذكر بمجزرة غزة ولو بكلمات قليلة ولكننى خاننى التعبير وغاب عن ذهنى الكلمات والتعابير المنمقة .. حاولت الرجوع بالذكرى للوراء لسنتين مضوا وأصبنى العجب بان ما حدث مر عليه كل هذا الوقت ما اسرع دوران الوقت وانقضاءه وما اعجب قدرة الانسان على النسيان ..


منذ سنتين تقريبا كنت هنا أكتب .. واشجب.. وادين .. واندد.. مثلى مثل اى فرد عربى اخر لا يملك الا الشجب .. والتنديد .. ابكى اذرف الدمع واتعذب من مشاهد القتل والدمار.. الاطفال مشوهة .. ونساء التى تبكى بحسرة.. والشيوخ والشباب القتلى ولكنهم احياء عند الله ..


اذكر ان هذه الفترة كانت عصيبة على كل من له قلب.. وحتى من ليس له قلب , واتذكر انها كانت المرة الاولى التى اخذت المباردة بتعلم الانجليزية لمحاولة بائسة منى فى التعريف بما يحدث هناك فى تلك الارضى المظلمة من قبلنا نحن العرب من قبل ان تكون مظلومة من قبل المحتل الغاشم .. واذكر مدى حماسى الشديد فى النقاش مع لا ينطق العربية ومحاولات بين انتصار وانكسار فى توصيل معلومة لو صغيرة عن ما يحدث بالفعل هناك ..
وبين الامس واليوم اتعجب لحالى أكثر كيف كنت وماذا اصبحت .. نسيت كل شئ نسيت الاطفال المشوهه .. والنساء المكلومة .. والشباب والشيوخ الشهداء والاشلاء المتناثرة والدمار الذى حل فى كل مكان , نسيت عزة رمز العزة .. نسيت كيف يكون الصمود وكيف يكون الجهاد وكيف يكون حب الوطن والدفاع عنه .. نسيت كل ذلك ولكن هناك من لم ينسى وفى كل لحظة يتذكر ويحيى ليرفع راية الجهاد والنصر انهم ابناء غزة .. هذ الشعب الذى حطم كل مقاييس الصمود واثبت للعالم اجمع بانهم على الرباط الى يوم الدين ..

انى حزينة من نفسى اشد الحزن بل حزينة عليها ... ويملؤنى الخزى والعار كيف بى أن انسى .. قد اكون نسيت ذكرى مؤلمة كطبيعة بشرية لنسيان كل ما هو اليم ومؤلم يمر بينا .. لكنى لما انسى غزة كرمز لانها سوف تبقى دائما رمز .. ولان فلسطين ليست مجرد مدينة عربية واسلامية فحسب .. بل فلسطين وطن لكل عربى مسلم كان او مسيحى..


يا تلاميذ غزة
علمونا
بعض ما عندكم
فنحن نسينا

علمونا
بأن نكون رجالا
فلدينا الرجال
صاروا عجينا

علمونا
كيف الحجارة تغدو
بين أيدي الأطفال
ماسا ثمينا

كيف تغدو
دراجة الطفل لغما
وشريط الحرير
يغدو كمينا

كيف مصاصة الحليب
إذا ما اعتقلوها
تحولت سكينا

يا تلاميذ غزة
لا تبالوا
بأذاعاتنا
ولا تسمعونا
اضربوا
اضربوا
بكل قواكم
واحزموا أمركم
ولا تسألونا

نحن أهل الحساب
والجمع
والطرح
فخوضوا حروبكم
واتركونا

إننا الهاربون
من خدمة الجيش
فهاتوا حبالكم
واشنقونا

نحن موتى
لا يملكون ضريحا
ويتامى
لا يملكون عيونا
قد لزمنا جحورنا
وطلبنا منكم
أن تقاتلوا التنينا

قد صغرنا أمامكم
ألف قرن
وكبرتم
خلال شهر قرونا

يا تلاميذ غزة
لا تعودوا
لكتاباتنا ولا تقرأونا

نحن آباؤكم
فلا تشبهونا
نحن أصنامكم
فلا تعبدونا

نتعاطى
القات السياسي
والقمع
ونبني مقابرا
وسجونا
حررونا
من عقدة الخوف فينا
واطردوا

من رؤوسنا الافيونا

علمونا
فن التشبث بالأرض
ولا تتركوا
المسيح حزينا

يا أحباءنا الصغار
سلاما
جعل الله يومكم
ياسمينا

من شقوق الأرض الخراب
طلعتم
وزرعتم جراحنا
نسرينا

هذه ثورة الدفاتر
والحبر
فكونوا على الشفاه
لحونا
أمطرونا
بطولة وشموخا

واغسلونا من قبحنا
اغسلونا
لا تخافوا فرعون
ولا سحر ةموسى
واستعدوا
لتقطفوا الزيتونا

إن هذا العصر اليهودي
وهم
سوف ينهار

لو ملكنا اليقينا

يا مجانين غزة
ألف أهلا
بالمجانين
إن هم حررونا

نزار قبانى

الخميس، 25 نوفمبر، 2010

بفرد ضلوعى


بفرد ضلوعي لحد جرحك يا صديق
وبأيد شموعي عشان اصاحبك ع الطريق
وبمد شوقي مركبه واحلم بضله قريبه
يجمعنا من تاني الغنا عن طير برئ
بفرد ضلوعي لحد جرحك يا صديق
انت اللي هـمك في الحياه هـمي
شايلك ما بين احضاني وبسمي
واسمع نداك بيئن في ضلوعي
مين الي فرق ع الدروب دمي
مين الي خان في السما قمري الـمـضيئ
بفرد ضلوعي لحد جرحك يا صديق
وانت اللي رغم الجرح بتغني شايلك ما بين الرمش والنني
واسمع غناك بيئن في سكوتي
امتي هعيش يا دنيتي سني
امتي الندي هيبات علي الورد الرقيق
بفرد ضلوعي لحد جرحك يا صديق
وبأيد شموعي عشان اصاحبك ع الطريق
وبمد شوقي مركبه واحلم بضله قريبه
يجمعنا من تاني الغنا عن طير برئ
بفرد ضلوعي لحد جرحك يا صديق


بفرد ضلوعى مدحت صالح

الثلاثاء، 23 نوفمبر، 2010

الحب الصادق



الحـب الصادق معجزة حقيقية فى زمن أنتهت فيه المعجــزات ...

وهو الطريق لليقين فى زمن انتشرت فيه الحيرة والضلال ...

وهو فقط القادر على إعادة الايمان لقلبك العاصى فى لحظات الشك والكفر ...

والحب الصادق بالنسبة لى هو "الحيــــــاة " ومن دونه ليس للوجود معنى ...

وحبى الصادق يبدأ من حب ربى ومن بعده يأتى جميع أنواع الحب بلا أستثناء ...


" إن الله ، إذا أحب عبدا ، دعا جبريل فقال : إني أحب فلانا فأحبه . قال فيحبه جبريل . ثم ينادي في السماء فيقول : إن الله يحب فلانا فأحبوه . فيحبه أهل السماء . قال ثم يوضع له القبول في الأرض . وإذا أبغض عبدا دعا جبريل فيقول : إني أبغض فلانا فأبغضه . قال فيبغضه جبريل . ثم ينادي في أهل السماء : إن الله يبغض فلانا فأبغضوه . قال فيبغضونه . ثم توضع له البغضاء في الأرض "




الأحد، 21 نوفمبر، 2010

آخــــر المشـــــوار



ووصلنا لآخر المشوار ..
اللى كنت خايفة منه حصل ..
قلبى استناك كتيــــــــر ..
لكن كل الأحلام هربت منى ..
وكل أمل جوايــا انكســــر ..
حلمى اللى عشت احلمه طول السنين ..
فستان وطرحة ودبلة وايدين متشبكين ..
وقلب اكون فى حضنه مليان بالحنين ..
خلاص انتهى جه الوقت أفكر بعقلى ..
وكل واحد مننا يمشى فى طريق ..
واسيب قلبى يموت من الأحزان غريق ..
كان صعب أشوف دموعك قصاد عنيا ..
لكن صدقنى مش بأرادتى ولا بايديا ..
خلاص انا مبقتش ليـــك ..
هبدأ حياتى مع قلب تــــانى ..
هلحق العمر ليجرى وهلحق زمانى ..
يمكن مابحسش معاه بنفس الأمان وانا بين ايديك ..
ولا بشوف نظرة حب تشبه نظرات عينيك ..
بس أهو قلـــب والســــلام ..
وده نصيبى ونهاية الأحلام ..


الأربعاء، 17 نوفمبر، 2010

الحب لا يعرف الظلمات


الحب الحقيقى كالنبتة الصغيرة لابد له من الضوء حتى ينمو ويكبر .. الحب لا يعرف الظلمات ولا يعرف الطرق الملتوية ..والحب المتوارى عن الأنظار لا يعيش طويلا ً وهو بعيداً عن ضوء الشمس ..

الاثنين، 15 نوفمبر، 2010

العيد فرحتين ^-^


ازيكم ياجماعة اخباركم ايه والله وحشتونى جدا جدا جدا والمدونة دى متتصورش وحشتوووووووونى اد ايه طبعا فى ناس استغربت انا غبت ليه بعد اخر بوست وافتكروا لقدر الله ان الريس قرأ الرسالة وقام بالواجب معايا وعزمنى على شهر فى قصر الرئاسة هههههه بس الحقيقة لا ... هو النت اللى قام بالواجب وفصل وحصلت مشاكل مع الشركة القديمة وغيرنا الشركة ويدوووووووب لسه النت واصل النهاردة علشان يبقى العيد بالنسبة لى فرحتين فرحة العيد وفرحة النت

كل سنة وانتم طيبين كلكم يارب وعيد سعيد عليكم وعلى الامة الاسلامية وربنا يعيد عليكم الايام دى باليمن والبركات ونتظرونا بقى فى الايام الجاية أن شاء الله ارجع اتابع من جديد بس يارب اقدر لان عندى كورسات بخلص الساعة 8 بالليل اهئ اهئ وبرجع ميتة وبنام على طوووووول

كل سنة وانتم طيبين مرة تانية وبجد بجد وحشتووووووووونى جداااااااااااااااااااا

الاثنين، 16 أغسطس، 2010

السيد رئيس الجمهورية تحية طيبة وبعد



السيد رئيس الجمهورية تحية طيبة وبعد :-
اكتب اليك الآن ياريس وانا فى قمة الغضب , والثورة , والفوران , والغليان , وحرقة الدم , وضغط اعصاب ,وتقريبا تقريبا قرب يجيلى سكتة قلبية دا لو ربنا ماردتش ومت لما عطشانة من قلة المية _ او مت فطسانة من انقطاع الكهرباء

سيادة الرئيس والسادة الوزراة بالمرة ليا سؤال صغير عند حضراتكم ؟؟ ياترى ياهل ترى خطة ترشيد الكهرباء والمية اللى حكومتكم الموقرة بتتبعها معانا واحنا فى شهر كريم تنطبق على كل الشعب المصرى بما فيهم الريس ذات نفسه والسادة الوزراة _ ولا دا نظام ان الشعب اولاد البطة السودا يفطسوا ولا يموتوا ولا يتحرقوا ويولعوا بجاز ؟؟


انا راضية ذمتك ياريس " ههههههه " يعنى مثلا تصور معايا حضرتك كده صحيت من النوم الصبح وحبيت تتدخل الحمام بتفتح الحنفية وفجأة تلاقى ان المية مقطوعة وانه مفيش مية تغسل بيها وشك .. ولا مية علشان تشد السيفون حتى .. ولا الموضوع مش بينتهى على كده تلاقى ان انقطاع المية دا استمر يوم بحاله واكتر !!


ممكن توصفلى شعورك فى هذه اللحظة اعتقد هيبقى شعور قذر اوى وقصر رئاسة سيادتكم هتنبعث منه روائح كريهة لا تحتمل وهتلعن الدنيا كلها ويمكن تشيل المسؤولين اللى كانوا سبب فى قطع المية عن قصر رئاسة سيادتكم ...


ولا اقول سيبك ياريس من المية هنتصرف باذن مااحنا كده كده صايمين هنعمل ايه بالمية وان كان على الوضوء والصلاة ربنا كريييييييييييم اباح لنا التيمم ....


خلينا فى الكهرباء ... مثلا ياريس وانت فى ساعة العصارى وسيادتك عارف ياريسنا ساعة العصارى فى الجو الحر دا ايه نظامها مهو خلاص موضوع حلاوة شمسنا وخفة ضلنا دا الله يرحمها ويرحمنا ... جربت فى الوقت دا وانت قاعد تشغل التكييف مهو حضرتك عندك تكييف اكييييييييييييد " ماشاء الله عواميد النور حوالين سرايتك بتزغرد " وهب لقيت الكهرباء مقطوعة وكدت تموت فطسانا ولا غرقنا فى عرقك ومرقك ممكن توصفلى شعورك فى الساعة دى دا ان ربنا كرمك وقدرت اصلا تستحمل الحر دا ساعة ولا اتنين


والله انا اشك ان سيادتك اصلا موجود فى مصرفى الوقت دا من السنة تلاقيك بتقضى شهور الصيف فى بلد تنعم بالمية والكهرباء بوفرة والوجه الحسن ويولع الشعب او يموت فطسنا او عطشنا ... واحنا مش بنقر عليك ولا بنحسد داحنا شعبك ونتمنى لك كل خييييييييير والله وانك تكون مبسوط وفى اتم صحة وعافية وقصرك عمران بالمية والكهرباء والتكيييييييييييييف وبعدين احنا عارفين ان دى "خطة يابلد بقررررر الكبير لازمن يتظبط الاول وبعدين يظبطكم ... وعن قريب ان شاء الله هتنزل علينا ".


بس والله ياريس الواحد خلاص جاب اخره لما شهر كريم والدنيا صيام و المؤذن يقول الله اكبر مش نلاقى حتى كوباية مية نبل بيها عطشنا والواحد يعمل ايه فى الظروف المهببة دى مهو مفيش مية نشرب هنقدر ندخل الحمام يعنى كمان ممكن نموت مزنوقين اهئ اهئ .

ولا لما الكهرباء اللى بتقطع كتير دى تحرق كل الاجهزة اللى اهلينا طلعت عينهم وعينين اهلهم فى شراءها واللى اغلبها لسه بيقسطوا تمنها .

بقول حضرتك ايه ياريس احنا شعب بيصبر وبيتحمل ومش مهم مية مقطوعة ولا كهرباء مقطوعة ويعنى دا شئ عادى فى حكم سيادتكم بس انا مواطنة صالحة اه والله بفتح الحنفية يدووووووب ومش من النوعية اللى تحب تهدر مية كتير لدرجة انى لما سمعت موضوع تقليل حصة مصر فى مية النيل _ كنت ناوية اخد قرا ر ومش استحمى غير كل مرة كل سنة .


اما الكهربا والله ياريس والله امى رافضة تماما موضوع التكيف وقلبها بيتقطع علينا واحنا بقينا زى العيال الجربانة من الحمونيل والحر بس هى تقول لاااااا يمكن ابدا يدخل التكيف بيتنا ... حتى اننا بنطفى كل الانوار فى شقتنا المتواضعة لدرجة اصبحت عادة فيا انى اطفى الانوار للناس وانا عندهم لما اتخنقوا منى ..


انا بس اتمنى من حضرتك تستضيفنى فى قصر سيادتكم لغاية العيد بس بما انى مواطنة صالحة ومش من النوع اللى بيهدر الموارد عمال على بطال نفسى ياريس مفيش حاجة تعكر عليا وتعكنن عليا فى الشهر الكريم دا ونفسى ادخل الحمام براحتى والله ياريس انا نفسى استحمى من امبارح والمية مش جاية يعنى يرضيك شابة وفى مقتبل العمر .. والعرسان المفروض بتتوافد عليها تبقى قاعدة معفنة كده.. لالالا والله تبقى عيبة كبيرة , ومعلش لو فيها رزالة هو فى قصر الرئاسة فيه وصلة نت _ لانى اعانى ايضا من ازمة نتية خطيرة والا وهى استغلال شركة النت قبضت منى الفلوس من هنا وقالتلى اهو دقنى اهو ولو شفتى وش نت

والسلام ختام ياريس لانى سامعة خير الله ما اجعله خير تقريبا صوت مية وهييييييييه هييييييييه هستحمى اخيرا

الخميس، 12 أغسطس، 2010

وليعفوا وليصفحوا ألا تحبون أن يغفر الله لكم




_ قيل للأحنف بن قيس : ممن تعملت الحلم ؟ فأجاب من قيس بن عاصم المنقرى .. اذ كنت فى ضيافته , وبينما نحن مستغرقون فى الحديث اذ دخل جماعة يحملون قتيلا وآخرون يحملون رجلا مقيدا , وقالوا : هذا ابن اخيك وقد قتل أبنك .. فوالله ما فك حبوته ولا قطع حديثه .. فلما فرغ من حديثه معى نظر الى بنيه وقال لهم : فكوا وثاق ابن عمكم , وواروا اخاكم , وأدفعوا الى أمه مائة ناقة دية ابنها فأنها غريبة .. ثم التفت الى ابن اخيه وقال له : لقد لطمت خدك بكفك .. وقللت من عددك , وزودت فى عدد عدوك .. اذهب فشارك اخوتك فى تشييع جنازة أخيك ثم قال لأولاده : حذار ان يلحقه أى أذى .. ثم عاد الى مخاطبتى .




_ وكان لعبد الله بن الزبير - رضي الله عنهما مزرعة في المدينة مجاورة لمزرعة يملكها معاوية بن أبي سفيان - رضي الله عنهما وفي ذات يوم دخل عمّال مزرعة معاوية إلى مزرعة إبن الزبير فغضب إبن الزبير وكتب لمعاوية في دمشق , وقد كان بينهما عداوه من عبدالله إبن الزبير إلى معاوية ( إبن هند آكلة الأكباد ):

أما بعد فإن عمالك دخلوا إلى مزرعتي فمرهم بالخروج منها ..أو فوالذي لا إله إلا هو ليكوننّ لي معك شأن !
فوصلت الرسالة لمعاوية وكان من أحلم الناس فقرأها ..ثم قال لإبنه يزيد ما رأيك في إبن الزبير أرسل لي يهددني ؟
فقال له إبنه يزيد : إرسل له جيشاً أوله عنده وآخره عندك يأتيك برأسه , فقال معاوية : بل خيرٌ من ذلك زكاة وأقرب رحما , فكتب رسالة إلى عبدالله بن الزبير يقول فيها
من معاوية بن أبي سفيان إلى عبدالله بن الزبير (ابن أسماء ذات النطاقين:(
أما بعد .. فوالله لو كانت الدنيا بيني وبينك لسلمتها إليك ولو كانت مزرعتي من المدينة إلى دمشق لدفعتها إليك فإذا وصلك كتابي هذا فخذ مزرعتي إلى مزرعتك وعمالي إلى عمالك فإن جنّة الله عرضها السموات والأرض
فلما قرأ إبن الزبير الرسالة بكى حتى بلها بالدموع وسافر إلى معاوية في دمشق وقبّل رأسه وقال له لا أعدمك الله حلماً أحلك في قريش هذا المحل



_ورحم الله الحسن البصرى الذى يقول :" والله لو شتمنى أحد فى أذنى اليمنى , ثم جاء إلى فى الأذن اليسرى معتذرا , ما استحققت رحمة الله أن لم أقبل عذره "

وهو القائل ايضا : لو كان للكلمة الواحدة سبعون وجها من الشر ووجه واحد من الخير , ما استحققت رحمة الله أن لم أؤولها اليه

سئل الجنيد : بم نشترى عفو الله ياجنيد قال : بعفوكم عن الناس ...


_ " وَلَا يَأْتَلِ أُوْلُوا الْفَضْلِ مِنكُمْ وَالسَّعَةِ أَن يُؤْتُوا أُوْلِي الْقُرْبَى وَالْمَسَاكِينَ وَالْمُهَاجِرِينَ فِي سَبِيلِ اللَّهِ وَلْيَعْفُوا وَلْيَصْفَحُوا أَلَا تُحِبُّونَ أَن يَغْفِرَ اللَّهُ لَكُمْ وَاللَّهُ غَفُورٌ رَّحِيمٌ " [النور 22]
(ولا يأتل) يحلف (أولوا الفضل) أصحاب الغنى (منكم والسعة أن) لا (يؤتوا أولي القربى والمساكين والمهاجرين في سبيل الله) نزلت في أبي بكر حلف أن لا ينفق على مسطح وهو ابن خالته مسكين مهاجر بدري لما خاض في الإفك بعد أن كان ينفق عليه وناس من الصحابة أقسموا أن لا يتصدقوا على من تكلم بشيء من الإفك (وليعفوا وليصفحوا) عنهم في ذلك للم}منين قال أبو بكر بلى انا احب أن يغفر الله لى ورجع إلى مسطح ما كان ينفقه عليه (ألا تحبون أن يغفر الله لكم والله غفور رحيم)

الأربعاء، 11 أغسطس، 2010

آفــات الحســد



السلام عليكم فى البداية انا الحمدلله بقيت كويسة وكل اللى كنت حاسه بيه من يومين راح شكرا لكل التعليقات على البوست اللى فات عادل والزهرة البرية _ موناليزا _ محمد التركى _ محمد حجاز _دموع القمر _ الباشا _حتى الغير معرف اللى ساب كلمة واحدة ومشى :))

وشكر خاص لاستاذ برهام اللى كنت بتابع تعليقاته وفى انتظار باقى التعليق علشان انا بجد منتظرة الحلول العملية علشان انزلها بوست ونستفيد كلنا .. حاول انزل كل يوم بعض الحاجات اللى قريتها وعجبتنى لحين بقى ما ارجع اكتب تانى بوستات عادية




آفــــــــــــــــات الحســـــــــــد


قال الفضيل : خمس مصائب تلحق الحاسد قبل أن يلحق المحسود منها شئ :-

أولاها : غم لا ينقطع أبدا .. فكلما مر على زراعى اخيه ووجدها ناضرة , أو تجارة أخيه ووجدها رابحة , أو على بهائم اخيه ووجدها ولودا سمينة اتقدت النار بين اضلاعه .


ثانيتها :- ان هذا الغم لا ثواب له , ما أن الرسول الكريم صلى الله عليه وسلم يقول " لا يصيب المؤمن هم ولا غم , ولا نصب ( تعب) ولا وصب (مرض) حتى الشوكة يشاكها ألا كفر الله بها من خطاياه " ... لكن غم الحاسد لا ثواب له عليه


ثالثتها :- غلق باب التوفيق .. اذ كيف يوفق الله شخصا معترضا عليه كأنه يقول لربه : لست بالحكيم تعطى الحلق لمن لا أذن له , وتعطى الفلاحة لمن لا ولد له ... وصدق من قال : " الحاسد جاحد .. لانه لا يرضى بقضاء الواحد " ..



ورحم الله الامام الشافعى أذ يقول :

الا قل لمن بات لى حاسدا اتدرى على من أسأت الادب

أسـات الى الله فى فعــله لأنك لم ترض لى ما وهب

فكـان جزائى ان خصنى وسد عليك وجوه الطلب

رابعتها :- غضب الله : واذا غضب الله على شخص نادى فى الملا الاعلى والادنى " ان الله يبغض فلانا فأبغضوه " .. فيكتب له عدم القبول فى السماء والارض .. ومن يتحمل غضب الله !!



خامستها :- غضب المخلوقين عليه فلا يتعاونون معه

وابن سيرين يقول : ياابن آدم .. لم تحسد أخاك !! فان كان قد أعطاء الله لكرامته عليه , فلم تحسد من أكرمه الله ... وان كان العطاء استدراجا والمآل الى النار .. فلم تحسد من مآله الى النار



اللهم اجعل قلوبنا خالية من الحسد والحقد والكراهية ... وأجعلها نقية بيضاء .. اللهم كن فى قلوبنا دوما يامقلب القلوب والأبصار

الثلاثاء، 10 أغسطس، 2010

اعترافات ليلية


1_ فى البداية النت لسه متفصلش الشركة بتلعب لعبة مش تمام معايا النت امبارح والنهاردة اتعدلوا وبقى شغال تمام , بس انا اللى بحاول اتعود على عدم وجود النت وبصراحة اتعودت شوية مش هكدب بس يمكن التعود راجع انى انا مش ليا نفس لحاجة الايام دى وشايفة انى وجودى من عدمه مش فارقة .

2_ انا بجد محتاجة اتكلم مع حد يفهمنى صح ومش يحور كلامى ويفهمه على مزاجه ويشوف ان حياتى ومشاكلى التافهة جداااااا جدااااااا مش مستدعية انى اكتئب وازعل عليها بس هيكون دا ازاى وانا شخصية مش بحب الناس او بمعنى تانى بكرهه الناس فيا .. اه والله ابتديت اشك انى عندى ازمة فى التعامل مع الناس وانى مش بعرف اتعامل مع البشر ليه بهرب منهم باستمرار وافضل الوحدة على انى ابقى مندمجمة معهم , ليه دايما خايفة ياخدوا انطباع غلط عنى , ليه دايما حاسه انى ندلة ومش من السهل ابقى صديقة وفية , وليه دايما حاسه انى جاية من عالم تانى وانى لو اتكلمت مثلا واندمجت مع الناس بتقل عليهم وبرزل عليهم وبغلس عليهم بشخصيتى الغلسة دى .

3_انا حاسه انى غلسة وانى ليا تصرفات غريبة برجع وقت ما احب وابعد وقت ما احب , اغير ايميلاتى 100 مرة كل كام شهر ..علشان كده قررت ابعد عن كل الناس لانهم مش هيفهموا انا بعمل كده ليه , مش هيفهموا ليه بكون مثلا على الفيسبوك وفى نفس الوقت مش عايزة افتح الايميل واكلم مع اقرب الناس ليا واقرب اصحابى , ليه مثلا بيكون التليفون بيرن عشر مرات متواصل وانا مش عايزة ارد , ليه فى لحظة بسأل على كل الناس ولحظة تانية ببعد اوى بصراحة انا عن نفسى مش عارفة السبب .
4_ الايام دى ماشاء الله كانت فيها مناسبات حلوة وسعيدة على ناس كتير حواليا انا اكيد كنت فرحانة لفرحهم وربنا يسعدهم كلهم .. بس القلب فيه حتة سودا كده بتخليه يفضل حزين ويقول امتى يامنيل انت كمان هتفرح , عارفين انى عندى احساس قوى انى عمرى ما هفرح فرح بحق وحقيقى وحتى لو حصل واتحققت حاجة من اللى نفسى فيها هتبقى فرحة ناقصة ومبتورة وملهاش طعم وهفرح بس كتأدية واجب مش اكتر .

5_نفسى حياتى متبقاش عادية زى كل الناس اللى عايشة عادى نفسى الاقى هدف حقيقى وسبب قوى انى اكمل فى الدنيا دى واحس انى بعمل حاجة عدلة فى حياتى , انا الايام اللى شبه بعضها دى واللى ملهاش اى طعم ارهقتنى جدا وتعبنى جدا وخلت اعصابى كل يوم فى النازل , مش عايزة بعد كام سنة ابص على حياتى الاقيها نسخة مكررة من ناس حواليا انا بكره اسلوب حياتهم اللى مفيهوش اى طموح ولا هدف ولا احلام ولا حتى مشاعر مش عايزة ده .

6 _عندى رغبة ملحة جدا الايام دى انى احب واتحب .. عااااااااااااادى شعور طبيعى عندى فراغ عاطفى , وهو بصراحة الفراغ دا من زمان مش من دلوقتى يعنى انا مش هكدب عليكم انا عمرى ما عرفت الناس بتحب وبتتحب ازاى .. يمكن اعجاب بشخصيات من بعيد لبعيد بس عمرى ما سمحت حتى لنفسى احب واعيش الحب حتى ولو بينى وبين نفسى .. الحب خطر احمر مينفعش اتعداه
كل طموحى الاقى الانسان الملتزم الاخلاق اللى هيخبط على الباب وبعدين احبه .. بس باللى شيفاه حواليا دا سواء اللى اتجوزوا ان حب او اللى اتجوزوا جواز تقليدى معتقدش فى يوم اعرف شعور الحب دا بيعشوه ازاى , الحب بين الناس بقى شئ طبيعى وعادى وكل واحد ولا واحدة تقولك بحب ومرتبطة لدرجة انا ابتديت اشك فى نفسى هو مين الصح ومين الغلط فى الزمن دا .. هو البنت من دول بقيت ايه باركينج مثلا قلبها دا يركن فيه الف واحد لغاية ما تلاقى اللى يقدر يحبها .

7_ وفى النهاية الحالة اللى انا فيها دى انى بعيدة عن ربنا ومش عارفة اقربله .. وحاسه انى خلاص من كتر الذنوب اللى فوق دماغى بقيت جبل مش قادرة اتحرك وارجع تانى .. انا عارفة ربنا غفور رحيم وبيغفر وبيتوب علينا .. بس ياترى لامتى هيفضل يسامح ويتوب والانسان عاصى وقلبه مات ومش عايز ينصلح حاله




كل سنة وأنتم كلكم طيبين وبخير يارب

الخميس، 5 أغسطس، 2010

إهئ إهئ إهى ....واأسفاااااااه



مش عارفة بجد انا مضايقة جدا يعنى كنت خلاص كل حياتى اتعدلت وبقيت بحاول استفيد بوقتى واقدر فى نفس الوقت اتابع التدوين ورجعت اكتب تانى واحب التدوين زى زمان النت يستهبل معايا وشركة النت الزبالة دى تستندل معايا بالشكل دا مش بيجى غير ساعة ولا اتنين طول اليوم وايام مش بيجى اصلا

للاسف انا مضطرة افصل النت فترة الله اعلم هتستمر كام لانى هغير الشركة وبجد مش عارفة هقدر الاقى شركة تانية احسن منها بسرعة ولالاربنا ييسر بقى واقدر ارجع تانى بسرعة حاول كل ما اكون فى مكان قريب من النت ادخل سريع كده اتابع التدوين من تانى لغاية ما اشترك فى شركة تانية المدونة امانة فى رقابتكم بقى انا مش راضية اقفلها قولت اسيبلكم ذكرى منى اهئ اهئ اهئ كل سنة وانتم طيبين ورمضان كريم عليكم وعلى الامة الاسلامية كلها بجد هتوحشونى :((

الثلاثاء، 3 أغسطس، 2010

أمر عجيب

أنه حقا ً أمر يثير العجب !! أن لا يصيب القلب الندم من جراء جرحه لقلوب الأخرين , وإقتلاع أحلامهم , وتدمير طموحاتهم العريضة المبنية علينا .


ولكن الأمر الأعجب !! هو اصرار هؤلاء المجروحين رغم قسوتنا معهم على العودة إلينا مرة بعد مرة غير عابئين بتكرار الجرح ..... وذلك لأن قلوبهم مازالت تحمل الكثير من _الود.. والحب .. والشوق _ لقلبنا القاسى .



الثلاثاء، 27 يوليو، 2010

انا نجحت


رجعت تانى زى الشطورة لان بجد الملل اللى الواحد فيه والزهق والقرف مش مخليه حتى يفكر هو بيعمل ايه ولا ايه القرارات اللى بياخدها ... حصل كام موقف خلانى اشك فى ان كلامى اصلا اللى باكتبه ليه هدف ولا معنى مع ان ده مش جديد يعنى ... بس ملل بملل واكتئاب باكتئاب هجى اكتئب هنا فى مدونتى

انا نجحت وجبت جيد جدا ازاى معرفش :)

وبجد مستغربة التقدير دا لانى التيرم التانى كنت بحل وانا اصلا مش عارفة ايه اللى بكتبه

المهم الحمدلله على كل حال خلصت من السنة الشؤم دى

المشكلة بقى دلوقتى اكمل السنة التانية من الدبلومة ولا اقعد فى البيت اقشر بصل

امممممممممم ازمة جديدة محتاجة تفكير واتخاذ قرار ودا شئ صعب فى فترة الاكتئاب دى اللى بمر بيها

الخميس، 10 يونيو، 2010

يابلد قلبها من حجر














خالد محمد سعيد صبحى(28 عاما) مات وسط زهول الجميع ,وصمت الجميع!! خالد لم يكن إرهابيا مطاردا تطلبه الشرطة -حيا او ميتا - ولم يكن يمثل خطرا على أى شئ فى الحياة ,التى فارقها دون ذنب ,أو جريمة . ..كعادته ذهب خالد "الى نت كافيه" بشارع بوباست , بمنطقة كليوباترا , التابعة لقسم شرطة سيدى جابر!! واثناء جلوس خالد فى "النت كافيه" لاحظ دخول مخبرين يفتشون رواد الكافيه بغلظة لم يقبلها خالد مبديا امتعاضه فقط .. .. وقبل ان يبدى خالد اعتراضه على الإجراء التعسفى ,سحبه المخبر محمود الفلاح من ملابسه وصفعه على وجهه,لم يكذب عوض المخبر الأخر زميله الفلاح و انهال على خالد بالصفعات ,واللكمات,حتى سقط الشاب خالد على ارض النت كافيه وسط ذهول الجميع من رواد الكافيه و اصحابه ..فجأه أمسك أحد المخبرين برأس خالد ,وظل يرطمها فى رخامة بالمقهى ,حتى فقد خالد الوعى ,وسالت الدماء من فمه و وجهه ,بينما اصحاب المقهى يتوسلون للمخبرين بالتوقف عن ضربه , فسحبه أحدهم مرة أخرى الى مدخل عقار مجاور للمقهى و أنهالوا عليه ركلا وضربا ورطما لجسده بمدخل العقار وبوابته الحديدية ..خالد كان يلفظ أنفاسه الاخيرة ,بينما الجناة يحملون جسده النحيل و يلقون به داخل سيارة الشرطة ,التى انطلقت به بعيدا عن عيون الناس والشهود وعادت بعد مده بسيطة لتلقى بالجثة فى قارعة الطريق!! ..مات خالد .. دون ان يعرف جريمته,دون أن يفهم احد لماذا قتلوه!!










مش متخيلة اننا بقينا ببشاعة دى هى دى بلدنا ولا بلد حد تانى .. لو مش بلدنا قاعدين فيها ليه هو ذنبنا اننا اتولدنا فيها .. غضب ربنا علينا لما اتولدنا لقينا نفسنا فى بلد ظالمة مبترحمش .. مش عارفة الاقى حاجة واحدة دلوقتى فيكى تتحب .. بقى معنديش امل فيكى .. يومين وهنهدى تانى وهننسى خالد وهننسى الاف غيره ولا كأن حاجة حصلت .....








الأحد، 30 مايو، 2010

بلا علم بلا بتنجان


من خمس شهور اتهفيت فى عقلى وقررت انى اكمل دراسات عليا يعنى قولت يمكن ربنا يكرمنى واخد الدبلومة وبعدها اعمل الماجستير

كنت تقريبا مسطولة يوم ما فكرت الفكرة الهباب دى . ركبت دماغى ومسمعتش كلام اخواتى وماما اللى فضلوا يقولوا بطلى هبل وبطلى هيافة انتى مش لاقية حاجة تعمليها وحبيت اثبتلهم العكس وروحت قدمت وكان من حظى انهم لغوا موضوع الدبلومة الخاصة السنتين وخلوها سنة واحدة بس بشرط اخد قبلها سنة مهنية , المهم قولت مفيش مشاكل هى هى كنت هاخدها فى سنتين وهى كدا بردو سنتين وماشاء الله يعنى الجامعة بتاعتنا فكروا وقرروا يخلوا الدبلومة اقسام يعنى بدل ما كانت قسم واحد لا تركوا الاختيار للناس تختار القسم اللى ترتاح له واللى تحبه وتكمل فيه بعد كدا , طبعا لحظة الاختيار دى كانت صعبة لانى اصلا مبحبش التخير بحب الاجبار اتعودت على كدا يااااناس اعمل ايه بس .

فضلت اسبوع اقول اختار ايه اختار وفى الاخر اخترت القسم اللى انا فيه قولت انا ارتحت له كان فيه قسم ارشاد نفسى وانا بصراحة شايفة انى مجنونة ومش هنفع فيه , كان فيه قسم ادراة مدرسية وانا اصلا بكره التدريس وسنينه ادخل ادارة وكمان دا للمديرين والناس الكبيرة , اصحابى اختاروا القسمين دول وداخلوا فيهم , كان فيه بقى قسمين هما اللى شدوا انتباهى قسم( التربية الخاصة _ تربية خاصة )

بس مكنتش عارفة الفرق ما بينهم وكل ما اسال اى حد يقولى معرفش حتى الموظفين هناك , بينى وبين نفسى كدا وقولت التربية الخاصة هى اللى مقصود بيها اللى بيعانوا من اعاقات ذهنية وانا بصراحة حسيت انى مش هقدر اتعامل معاهم لانى عصبية وخفت انى فى يوم لو كملت دراسات فى القسم دا اسئ معاملة العيال فقررت ابعد عنه

واختارت قسم تربية خاصة تواصل صم وعميان وقولت القسم دا حلو وانا باذن الله هرتاح له , وبدات الدراسة لقيتهم بيقولوا لازم تنقسم وتختار لما تتدرسوا تواصل صم لما تتواصل عميان .... ورجعنا لنفس النقطة انى بكرهه التخير اهئ اهئ اهئ

اصل انا عايز تحيرنى خيرنى وفين وفين وها ها اخترت تواصل صم ودا بسبب انى حابه اتعلم لغة الاشارة وفى نفس الوقت الصم فى بلادنا تعليمهم سئ جدا ومش من حقهم يدخلوا جامعات بالاضافة لصعوبة التواصل مع الناس بعكس المكفوفين اللى يتعاملهم بيكون اصل مع الناس

خمس شهور مرروا دلوقتى وانا بدرس الدبلومة تخيلوا انا استفدت ؟؟؟ ولا حـــــــــــــــاجة وبجد ومش بهزر ولا حاجة استفدتها لغة الاشارة معرفش منها غير عشر كلمات يمكن , ومحتوى علمى زفت زبالة , دكاترة اصلا مكنوش فهمين هما بيدوا ايه المناهج كانت بتتغير اكتر من مرة علشان مكنوش عارفين يدرسوا ايه لانه قسم جديد , الحاجة الوحيدة اللى كنت بحبها العيال اللى كنا بنروح لهم تربية عملى حسسونى بجد الناس دى محتاجة حد يفهمها اكتر ونقرب منهم اكتر , كانوا صبورين لابعد الحدود وهما بيعلمونا لغة الاشارة كنت اليوم الوحيد اللى بحبه فى الاسبوع على الرغم من المدرسين فى المدراس دى كانت تعاملهم حلو مع العيال وكانوا زى اولادهم بس للاسف طرق تدريسهم بدائية جدا واشاراتهم قليلة والعيال بالتالى كان تعليمهم ومستواهم وحش جدا

المفروض انى بالدبلومة دى ادرس للاطفال فى مدارس الامل بس ازاى وانا حاسه انى زى الحمارة بجد مكنتش متخيلة الدراسات العليا فى الجامعات تبقى بالغباء دا , فرقت ايه عنها عن التعليم الجامعى العادى

كنا زى فيران التجارب اول دفعة وبيجربوا فيها بجد انا كرهت التعليم كله وكرهت التعليم الجامعى اكتر واكتر , كنت بكره كلية تربية لانها كلية نظرية ومفيهاش اى افادة وبنخرج مدرسين بقر حمير مش عندنا اى محتوى علمى نطلع ازاى مدرسين لاجيال جاية بعد كدا

امتحاناتى قربت , مخلصتش الابحاث اللى ورايا اللى كالعادة مش فاهمها بس انا بدشها وخلاص بجيب من هنا ومن هنا وبروح اديها للدكتور اللى بيرميها فى الزبالة , حساه انى مخنوقة ومش طايقة الجامعة ولا سيرتها ولا الدكاترة فيها , بكره التعليم والتدريس واى حاجة ليها علاقة بيه , وصاحبتى بتقولى تعالى اشتغلى فى مدرستى , اشتغل ايه وانا شايفة اننا بندمر اجيال مش بنعلمهم

انا بجد بشفق على الاطفال اللى بيدمر عقولهم بسبب ناس زيى كانت ضحية لدكاترة فى كليات التربية مش فاهمين اصلا الى بيدرسوه مجرد نظريات عقيمة عفا عليها الزمن بتتدرسس هى هى تناقشى الدكتور فيها يقولك افهميها زى ما هى كدا لانه هو اصلا مش فاهمها هو حافظها

انا مضطرة ابعد شوية عن التدوين لابعد الامتحانات مش هذاكر متفهموش غلط , انا بس حسه انى مضغوطة وانى هنفجر , ولو اتكلمت عن الدبلومة وقرفى معاها هحتاج مجلدات مش مجرد بوست , انا بفكر اعمل كتاب عن الموضوع ده ههههههههههه

يلا اروح اشوف البحث اللى مش فاهمة منه اى كلمة منه ولو جيت السنة الجاية اقول هكمل ابقوا كلكم تفوا فى وشى واضربنى بالجزم , ومفيش مانع تحدفونى بالطماطم

العلم فى الراس مش فى الكراس يابا , بلا علم بلا بتنجان

الخميس، 27 مايو، 2010

اتعـــودت





رجعت اتفرج على صورك تانى ... رجعت اسال عليك القريب والبعيد واعرف اخبارك منهم

بعد ما كنت خلاص نسيت واتاكدت ان اللى كان جوايا ليك مهوش حب ولا غرام ولا اشتياق

كان مجرد فضول

انا واثقة انى الفضول جوايا مات وان انت جوايا بردو مت بس اللى جوايا دا مش لاقية له تفسير غير انى اتعودت كل يوم اعذب نفسى بيك


الجمعة، 21 مايو، 2010

عــرفهم من هو محمد



بسم الله الرحمن الرحيم

و الصلاة و السلام على سيدنا محمد خير خلق الله

Everybody Introduce Prophet Muhammad Day
عــرفهم من هو محمد

قامت مجموعات و مواقع كثيرة معادية للإسلام وسيدنا محمد بعمل حملة علي الإنترنت و اسمتها هيا بنا نرسم محمد
و خصصت يوم 20 مايو 2010 لتجميع أكبر قدر من الرسومات للسخرية من نبينا عليه الصلاة و السلام
بل ويريدون ان يكون يوما ثابتا في كل عام


فجاء دورنا لنقوم بأكبر حملة علي الانترنت من 20 الي 30 مايو للتعريف بخير خلق الله

Everybody Introduce Prophet Muhammad Day



فمن هو خير خلق الله الذي يريدون السخرية منه؟؟


ولد فى بيئة تعبد الاصنام وتدفن البنات احياء وتقتل الجار وتهين المراة وتحتقر الضعيف
فبعثه الله الي العالم كما بعث الرسل إلتى من قبلنا ، فأمرنا بالبر والصدقة والوفاء وأداء الأمانة ، ونهانا أن نعبد الأوثان ، وأمرنا بعبادة الله وحده لا شريك له وكرم المراة وجعل لها نصيبا من الميراث واعطى للضعيف حقة من القوى وامر بالاحسان الى الجار واسس دولة عظيمة استمرت حتى الان

فمن هو هذا الرجل العظيم الذى استطاع ان يغير من الفكر البشرى ويرتقى به

اذا اردت ان تعرف المزيد عنة فادخل الى لموقع نصرة رسول الله


Muhammad

الثلاثاء، 18 مايو، 2010

تخيــــــــل



تخيــــــــل








تخيل نفسك شجرة
و اثبت لانك شجرة
ضارب في الارض مسافة
وثابت
وانت أدري

تخيل نفسك نور
واعمي لانك نور
أنا كنت سور البير
وصبحت بير السور

تخيل نفسك باب
وافتح لانك باب
علي دنيا أصلا طريق
وبينتهى بسرداب

تخيل نفسك ليلة
واطول لانك ليلة
والنور سقفك .. تعالي
مهما تطول دي ليلة

تخيل نفسك وردة
وازهي لانك وردة
كل الالوان قصادي
بس الريحة واحدة

تخيل نفسك حلم
وبراحتك ماانت حلم
التتر آخر حاجة
في دنيا أصلا فيلم

تخيل نفسك بيتها
وادفي لانك بيتها
وان دقت راحتها فيك
اعرف انك حبيتها

تخيل نفسك مرة
ماتخافش جرب مرة
الدنيا ماشية أسيرة
في الوقت
وهيا حره

تخيل نفسك باقي
واحزن لانك باقى
واحلم تلقالك حاجة
واتحدى لو تلاقي

تخيل نفسك جنبي
والزق لانك جنبي
الجسم ده مش ملكي
والغنوة دي من قلبي

*
*
*
*
عمر طاهر
يناير 2006
قهوة وشيكولاتة

الأحد، 16 مايو، 2010

الطريق إلى عتليت _ جرائم الحرب ضد الاسرى المصريين


الجزء الاول



الجزء التانى


فيلم تسجيلى مهم حول قضية الاسرى المصريين و هو فى حد ذاته يعتبر دليل قاطع على وقوع جرائم حرب فى عامى 1956 و 1967 خاصة 1956 لما تتضمنه من اعترافات اسرائيلية حول الجرائم التى ارتكبت فى سنة 1956 على يد القوات الاسرائيلية






البوست الاصلى عند دكتورة ستيتة

الخميس، 6 مايو، 2010

بموت ببطئ




..............

نقط كتير فوق السطور

زى دوامات جو البحور

كل دوامة ليها الف معنى

والكلام جوايا مات

وانا اصلا بكره السكات

جوايا تايهة من غير نهاية

فى دايرة بمشى ملهاش بداية

والدنيا دى زى الحكاية

بسمة وامل

ودمعة وندم

وحياتنا مالها هدف

ولاحتى غاية

هموم تنوح ويا الجروح

ترفض تبوح

وانا لسه ثابتة بقول يارب

يارب قلبى رافض يموت

بس السكوت

ده موت بطئ

يألم بجد

وعقلى سارح فى كل شئ

ولا عمره يوصل لاى شئ

محتاجة جنبى إنسان وقلب

يضم روحى ويا روحه

شيل جروحى واشيل جروحه

وندوب فى بعض