الأربعاء، 28 أكتوبر، 2009

اعطاء من لا يملك لمن لا يستحق




يافتاح ياعليم يارزاق ياكريم استعنا على الشقى بالله بعد طول غياب عن المدونة كان لازم تحتاج تنضيف وتلميع ومسح وكنس والذى منه وهو ده الشقى بعينه بما انى ام الكسل بذات نفسه .

*
*

المهم طبعا انا كنت مختفية ليه ورجعت ليه هقولكم كالعادة مكتئبة ايه الجديد فى ده ولا حاجة بتحصل فى احسن البلوجرات صاحبه يكتئب يجيب دولفها ويرجع لما الغزالة تروق بس انا لسه مرقتش لسه مجنونة زى ما هى عندى ملل فظيييييييييييع وقولت الدبلومة هتسلينى لكن تقولوا ايه الفقرى فقرى شحططونى رايحة جاية جاية رايحة وفى الاخر قالولى بقى تعالى فى شهر 11 اسالى على الجدول الله يخرب بيتكم انا بجد مليت ونفسى ابدا اعمل اى حاجة ليها معنى فى حياتى

يلا قدر الله وماشاء فعل وفى عز الاكتئاب ده طقت فى دماغى فكرة مجنونة انى اعمل مجموعة مواضيع متسلسلة اكتبها كلها عندى على الجهاز لغاية ما اخلصها ولو كنت راضية عنها باذن الله يمكن اتجنن اكتر وانشرها كتاب " احلام اليقظة " ^_^

ادعولى بقى مش احبط واجى فى النص واقول مش هكمل لانى بدات تقريبا فى اول عشر صفحات ماشاء الله المهم ادعولى الدبلومة تبدا علشان انا حاسه انى عاملة زى الجزرة المخللة فى البيت انا كان ايه اللى خلانى افكر اصلا اكمل دراستى .

*
*


قولنا المهم نيجى للى مش مهم خااااااالص هو وجع قلب ودماغ وبس وكمان موضوع بيجيبلى شلل رباعى انا مكنتش ناوية انزل بوستات خاااااااالص لغاية ما استقر فى الدبلومة وامورى تظبط بس النهاردة بصراحة صعقت صدمت وجالى تقريبا نوبة صرع لقيت فيديو على الفيسبوك اللى جيبالنا المصايب دايما عاملين شوية صور كده للحزن الوطنى على الريس على ابنه تشكيلة يعنى على اغنية نانسى حبيبتشى

لو سالتك انت مصرى تقولى ايه

تقولى مصرى وابويا مصرى وكل مصر الله عليه

قولها باعلى صوت وارفع راسك لفوق

انا مصرى وابويا مصرى والى اخر الاغنية طبعا


لغاية ما الصرع والشلل جاب اخره معايا فى كلمة ملوك الجدعنة ودى حاجة فى طبعهم هنا بقى ياجماعة قولت لاااااااااا استوب يانانسى جدعنة وهى الجدعنة دى معناها ايه معلش لانى انا مش شايفة ام الجدعنة دى فى البلد فى نفر واحد ده حتى يااخت نانسى عيب عليكى ده احنا لسه فى حداد على ضحايا حادث القطار الجديد مهو تقريبا ربنا مش هيقطعلنا عادة كل كام سنة تحصل حادثة قطار على اساس الحكومة بتقولنا شكلكم نسيتوا ياكلاااااااااب ضحايا قطار الصعيد واحنا من كرم اخلاقنا قولنا نفكركم علشان انتم شعب بينسى و تيييييييييييت

*
*


النكتة البايخة بقى موضوع التوريث ده من كام سنة لما غيروا الدستور طلع شوية ناس تقول ده بيغيروه علشان خاطر يبقى فى مبرر للتوريث فى مصر بصراحة مش اخدت ولا اديت فى الكلام مهو كلام هو الكلام بيلزق ده حتى الشتيمة مش بتلزق _

وهب الكلام كبر والاشاعات بقيت حقيقية والناس كلها بترفض وتندد بالتوريث ومش عايزينك مش عايزينك ولا انت ولا اللى جيبنك _ونلاقى فيديوهات ضد الحزن الوطنى واعضاء لكن انا مكنتش مستغربة يعنى مهو داه الطبيعى شوفنا ايه حلو فى حياة باباه عمو الريس علشان نقبل ان ابنه يبقى مكانه بعد عمر طويييييييييييل باذن الله .

*
*

لكن العجب ركبنى ومش عايز ينزل من على كتفى خالص لما لقيت ان فى ناس بتقبل بالتوريث وعاملة له اغانى زى ليه ميحكمششششششششششششى ودى تقريبا كانت من تاليف ام سيد فى شبرا

*
*

وتلاقى زى ما يكون خطة مدروسة حتى انا ببص فى الاصدقاء عندى على الفتيس بوء لقيت ناس كاتبة انها من الحزن الوطنى

عااااااااااااادى انما اللى مش يتسكت عليه ابدا انهم يدنسوا الاغنية الطاهرة بالشكل ده لااااااااااااا لن اقبل

ومن الاخر كده احب اقول كلمة بتيجى على بالى كل ما سمعت موضوع التوريث ده فى الا وهى " اعطاء من لا يملك لمن لا يستحق "

مصر دى مش فيلا علشان يقولوا خد ياحبيبى علشان انت ولد مطيع وشطور واللى بيحصل دلوقتى ده احنا السبب فيه الحزب رسمها صح طلع اشاعة التوريث وساب الشعب يلت ويعجن لدرجة الستات فى البيوت بيقيت بتكلم فى الموضوع ده لغاية ما بقى فى عقولنا امر مسلم بيه يعنى احنا اللى كبرنا الموضوع واديناه اكبر من حجمه مين اصلا فيه نفس يفكر من هيحكم بعد مين هو حد ضامن عمره ولا حد ضامن بكرة فى ايه ولا ايه اللى هيحصل بعد ساعة واحدة

*
*

انا لا مع جمال ولا ضده لان بساطة ولا اعرفه ولا عايزة اعرفه من اصله لما تيجى الانتخابات هتلاقى شوية مرشحين اى كلام سيكو سيكو مش هتعرف تختار منهم حد وتقول خلينا فى اللى نعرفه احسن من اللى منعرفوش

وبعدين لو الشعب كان شعب فيه الخير وعارف يدافع عن نفسه صح مش جبان يحط راسه فى الرمل ويمشى جوه الحيط ويقول انا مالى كان ده بقى حالنا

ااااااااااااااااه ياشعب عايز السك على دماغه عايز يتساق زى الاغنام هو ده اللى ينفعه

السبت، 17 أكتوبر، 2009

قالوا الملايكة



قالوا الملايكة مصيرهم جنة مع الأبرار . مع الابرار

و ازاي نلاقي ملايكة وعايشين وسط النار ؟!. في وسط النار

!اطفال معجزين . واحنا ولا حاسين

.اكيد قلوبنا حجر مش قلب بني آدمين. مش قلب بني آدمين

.نفسك في ايه يا حلوة . قالتلي في الحنان.

وانا نفسي ارسم جنينة مليانة بالألوان.

ويا حلم بسيط وعادي مالك يا حلم بعيد .

معقولة الناس تعيِّد ودول مالهمش عيد.

اطفال معجزين . واحنا ولا حاسين .

اكيد قلوبنا حجر مش قلب بني آدمين. مش قلب بني آدمين.

وطن من غير زهور مالوش حلم و عهود

و ازاي نحلم ببكرة وهوا مش موجود

و زمنا للحضارة ولسه في عبيدطفلة مالها لقمة .

ضحكة وفستان جديد.

اطفال معجزين . واحنا ولا حاسين .

اكيد قلوبنا حجر مش قلب بني آدمين. مش قلب بني آدمين.






الخميس، 15 أكتوبر، 2009

رفضك يازمانى

رفضك يازمانى يا اوانى يامكانى انا عايز اعيش فى كوكب تانى فى عالم تانى فى لسه امانى فيه الانسان لسه انسان عايش من تانى عالم تيار ورياحه قويه بتهز كيانى تاثر فيه من غير مواعيد بتاخدنى بعيد عن معنى حياتى عن اصلى وذاتى وده مش باديه فى سد منيع عالى وفظيع عالى وفظيع بينى وبين نفسى بين روحى ورسمى بين يومى وامسى واللى اتمنيته وبنيته فى الهوا بيضيع وده مش باديه مكبوته فى قلبى احلام محسوره وحطام اقدار ايتام مبتوره وامال مطويه بتعافر فيه وكأن اوانى كان لسه شويه وفى وسط الناس والزحمه تاه الاحساس والرحمه ضاع منى سلامى تاه حتى كلامى ضاق بيه وقال كداب يازمانى كداب يازمانى رفضك يازمانى ياوانى يامكانى انا عايز اعيش فى كوكب تانى فيه الانسان لسه انسان عايش من تانى





الاثنين، 12 أكتوبر، 2009

الهامى




اسم الكتاب :الهامى
صاحب الكتاب :أحمد محى الدين أحمد

مدونة:elham-me2.blogspot.com

اسماء واحلام فى وجدانى

الكتاب عبارة عن ديوان شعر
فية الكثير من الاشعار الجميلة والرائعة

لتحميل الكتاب
http://www.4shared.com/file/140034494/5eb080a2/_online.html



عقبال ما نبارك على الكتاب المطبوع باذن الله يااحمد

الأحد، 11 أكتوبر، 2009

راية بيضا

يوم الخميس جت عندنا جنا بنت اخويا ومامتها قالت انها حفظت اغنية جديدة والشعنونة كانت حفظها وهى يدوب لسه عندها سنتين وشهرين بس ماشاء الله عليها لسانها متبرى منها وبتكلم احسن منى كمان بس الاغنية كنت اول مرة اسمعها وعجبتنى جدا , بس اكتر حاجة عجبتنى بجد ان مرات اخويا بتعرف بتختار للبنت ايه اللى تسمعه وايه اللى تحفظه وطول اليوم يلا نغنى ويلا نقول الادعية ويلا نسمع القرآن بجد البنت بقيت ماشاء الله فى قمة الذكاء بتفكرنى بنفسى وانا صغيرة ^_^



بجد ساعات كتير لما بشوف جنا بنت اخويا بتمنى بنتى او ابنى ان شاء الله يكونوا زيها فى ذكاءها واتمنى انى اقدر فعلا اربى اولادى صح زى ما رسمه فى بالى وان الدنيا مش ترغمنى انى اربيهم والسلام يبقى ساعتها بالهم احسن لو مكنش الاولاد يرفعوا الراس ويكونوا سبب فى دخول الجنة يبقى بلاش احسن
صدعت دماغكم شوف الاغنية



الثلاثاء، 6 أكتوبر، 2009

حب ايه ده اللى من غير اى حرية ؟؟؟




بيقولوا النهاردة مر 36 سنة على حرب اكتوبر , وبيقولوا برضو اننا انتصارنا دول هما اللى بيقولوا مش انا اللى بقول , وبيقولوا كمان اننا عبرنا ورفعنا العلم المصرى ورجعنا ارضك ودفعنا غالى قوى يوميها دفعنا دماء اولادك _ دفعوا اروحهم بكل حب ومن غير مقابل ادوكى اروحهم ودافعوا عنك لاخر نفس فى حياتهم وسابوا دمائهم تسيل على ارضك وانتى شربتيها بس انت طلعتى ليه جاحدة كده شربتى الدم ونسيتى اللى حصل وكل سنة بتمر بنتنسى اللى حصل اكتر واكتر ولا كأن دول اولادك ولا كأن دول ضحوا بكل حياتهم علشانك .
*
*
طيب تفتكرى لو رجع الزمان بينا تانى كنت هتلاقى نفس التضحية لو رجعوا وشافوا اللى حال اللى وصلت ليه وان دمائهم راحت هدر على ارض بقيت مش ملكنا ولا لينا الحق نسال حتى عن اللى صابها ولا حتى لينا الحق نفتح بقنا ونقول جاريلك ايه ؟؟؟
*

*
بقيتى مش بتاعتنا يامصر بقيتى مش بلدنا زمان سيناء ضاعت مننا وحسينا ان جوانا جرح مش بيلتم ابدا الا لما رجعت بعد سنين من الاحتلال تفتكرى دلوقتى محتاجين كمان قرن علشان نرجع مصر كلها ونحررها من الاحتلال اللى خانقها وبيموتها ببطئ .
*
*

ساعات بحس ان اسرائيل ضحكت علينا ورمت لينا طعم واحنا صدقناه قالت لنا يلا تعالوا حاربوا ورجعوا سيناء تانى وافرحوا بانتصاركم وافرحوا بانكم قولتوا للعالم كله احنا شعب يقدر يعمل المستحيل ويقهر الاسطورة اللى كانت فاكرة نفسها لا تقهر _علشان تيجى بعد 36 سنة تتضحك علينا واحنا مش بنفكر العزة والنصر والكرامة غير يوم واحد فى السنة نسمع شوية اغانى على كام فيلم وباقى السنة كرامة منداسة بالجزم تانى يوم بالظبط ننسى ونرجع تانى نلف فى الطاحونة اللى عايشين فيها فى مصر ونرجع لكسرة النفس والذل .
*
*
تخيلى حتى السنة دى اليوم الوحيد اللى مفروض نحس بالفخر والعزة والانتصار ملقتش حد حاسس بكده بقى مفيش جوانا نفس يمكن علشان نفتخر بمجد زايل ولا يمكن ابتدينا نفوق ونصدق اننا اتخدعنا وانهم كدبوا علينا _سنين بيربوا فينا ويملوا دماغنا بانتصار مش حقيقى ويقولنا فى كتب التاريخ شفتوا جدودكم عملوا ايه ونجحوا يعيشونا فى الماضى علشان ننسى الحاضر .
*
*
ساعات بحس اننا اتحررنا من محتل واضح وظاهر لمحتل مننا فينا خبيث بيتلون كل يوم بشكل مختلف علشان مش نقدر نحدده يااااااااااه اصعب شئ الغربة جوه الوطن و اصعب احتلال يكون احتلال الوطن ليك .
*
*

عبرنا ورفعنا العلم فى 73 وكل يوم بشوف العلم بيختفى من جزء من ارضك ومعرفش بيروح فين وشكل وطباع مصر الحقيقية بيختفى مع العلم وبيتحط اعلام تانية وبنطبع بطباع تانية غريبة علينا ومش لوننا .
*
*
بيقولوا ان فى حرب اكتوبر كان الدول العربية كلها مشاركة فى العرب "العراق- والادرن- والمغرب- وتونس -وسوريا وليبيا -والادرن- والسودان" هو ده اكيد كان خيال الدول العربية كلها متوحدة ومتجمعة على كلمة واحدة وكلمة حق مش باطل تخيلوا بقى احنا عاملنا ايه لما انتصارنا فككنا الوحدة اللى كانت موجودة وكأن الانتصار فى الحرب نهاية العروبة اللى بتغتصب كل يوم واحنا واقفين نتفرج وياريت من برة لا مننا فينا بقينا اعداء لبعضنا بقى بدل الحب والوحدة بقي الكره والفرقة .
*
*
حرب اكتوبر كان بداية اقوى عصور الظلام ليكى لان بصراحة انتى عمرك ما شفتى نور كل واحد بيجى بيسجنك اكتر من اللى قبله ولا كانك امهم وليكى حق عليهم فى حد يسجن امه ويحطها فى بير ويقفل عليها فى حد يوقف جلاد لاخواته تصورى طلع فيه تصورى كمان ان الام ممكن تجيب اولاد عاقين تجيب اولاد كل ما تفتكر انها تعبت اد ايه علشان تجيبه لنور تلعن اليوم اللى فكرت تجيبهم فيه .
*
*
انا كنت عاملة بوست وبعدين مسحته علشان حسيت انى قسيت قوى عليكى فيه يامصر وانتى مهما كان مش لازم نقسى عليكى كفاية اللى فيكى انتى ست عجوزة كل امراض الدنيا معششة جواكى سرطنات الدنيا كله اتجمعت فيكى علشان كده مسحت الكلام القاسى كله اللى كتبته وقولت هكتب تانى مس ههنيكى على الذكرى السعيدة دى لانها فى وجهة نظرى مش سعيدة ابدا بل بالعكس تعيسة جدا بتقلب علينا مواجع وبتفكرنا بايام مضت وولت وتقريبا مش هترجع تانى بتفكرنا بشعارات واحلام كدابة وبتفكرنا بقادة افتكروا البلد تكية او عزبة يقطعوا ويوزعوا فيها زى ما هما عايزين بتفكرنا اننا بقينا من بعد الحرب ومعاهدة السلام مقطوعين وبتفكرنا اننا نسينا اخواتنا فى اماكن تانى علشان نفرح بانتصار مزيف .
*
*
ولا اقولك كل سنة وانتى فى سجن يامصر كل سنة _وانتى سجن لاولادك بايدين اولادك _كل سنة وانتى من فقر لفقر ومن جوع لجوع _ومن فساد لفساد _ومن ظلم لظلم _ومن فرقة لفرقة _ومن عصر ظلام لعصر اشد ظلمة انا يئست انى اشوف يوم حلو فيكى وانتى كمان يئستى من انك تفرحى يوم واحد فى حياتك .
*
*

معلش انا كان لازم اتكلم واقول كل اللى عايزة اقوله بس هقوله من قلبى وهلغى عقلى علشان ده اللى انتى عايزه عايزانا عايشين من غير قلب ومن غير عقل كمان بس صدقينى انا ممكن الغى عقلى لكن قلبى مش هقدر علشان قلبى مليان بحبك وصعب انى الغى قلبى لانى هموت لو حبك فى قلبى مات بس حب ايه ده اللى من غير اى حرية ؟؟؟

الاثنين، 5 أكتوبر، 2009

مـــــدونتك هتـــنقذ طفـــــلك









فكرة حــــــملة" مـــــدونتك هتـــنقذ طفـــــلك " - اولا اسم الحملة نابع من ان الاطفال الى ان شاء الله هنساعدهم (اطفال مستفى 57357 )زى اطفالنا فواجب علينا نعمل كدة او هنقدم حاجة بسيطة لمساعدتهم وان شاء الله تكون ليها اثر كبير بأذن الله وخير علينا كلنا بأذن الله ومش تفتكروا ان مساعدتكوا دى بسيطة لا بالعكس ومش كلامى دة كلام رسولنا العظيم ومعلم البشرية جمعاء :-قال أتى النبي صلى الله عليه وسلم رجل يستحمله فلم يجد عنده ما يتحمله فدله على آخر فحمله فأتى النبي صلى الله عليه وسلم فأخبره فقال إن الدال على الخير كفاعله وفي الباب عن أبي مسعود البدري وبريدة قال أبو عيسى هذا حديث غريب من هذا الوجه من حديث أنس عن النبي صلى الله عليه وسلم ...قوله : ( يستحمله ) أي يطلب منه المركب ( فحمله ) أي أعطاه المركب ( فقال ) أي رسول الله -صلى الله عليه وسلم- ( إن الدال على الخير كفاعله ) لإعانته عليه ، فإن حصل ذلك الخير فله مثل ثوابه ، وإلا فله ثواب دلالته قاله المناوي
* * *
.- هنســـــــــــاعدهم ازاى :---- ان شاء الله الفكرة ببساطة اننا عاوزين كل المدونات الى هتشترك معانا فى الحملة دى هتحط شعار المستشفى واللينك الخاص بالمستشفى على المدونة الخاصة بكل واحد هيشترك بأذن الله معانا وكمان فوق الشعار هتكون كلمة( اتبرع وانت فى بيتك ولو بجنية او دولار من هنا ) والناس الى مبتدئين فى المدونات هشرح لهم بطريقة مختصرة ازاى هيحطوا الصورة واللينك وهى( انكوا تفتحوا صفحة التخطيط فى مدونتكم وبعدين اضافة اداة وبعدين نختار من اضافة اداة اختيار اضافة صورة وبعد كدة لما تفتح نحط فى خانة اسم النموذج الكلام الى اتفقنا علية وهو" اتبرع وانت فى بيتك" وفى خانة وصل هنحط اللينك بتاع موقع مستشفى 57357 والى هو

http://www.57357.com/Default.aspx?PageContentID=8&tabid=155

وبعد كدة هنضيف الصورة بتاعة المستشفى وهى موجودة اعلى الموضوع بتاعى فوق وبس وجزاكم الله خيرا ) علشان فية ناس كتيرة متعرفش عن طرق التيرع الى هى كتيرة ومش معروفة وممكن تحقق عائد كبير جداا جداا ومش متركز عليها فى اعلانات التلفزيون والراديو ووسائل الاعلام وهدفنا فى الحملة دى اننا نوضح طرق التبرع المتعددة الى بدورها هتجيب عائد اكبر واكتر لو كل واحد استخدم ولو طريقة واحدة وهو فى بيتة وهقولوكوا نبذة عن طرق التبرع دلوقت :- ....
- البنوك :- (ودى متركز عليها كتير فى وسائل الاعلام ومش هنخوض فيها ) .

* *

2- انترنت الخير (هنركز اكتر عليها ):-يمكنك التبرع من خلال أستخدام ارقام انترنت الخير : 07775757 أو 07075757 بنفس سعر المكالمة العادية كما انه يمكنك حساب صافي قيمة ما تبرعت به بأستخدام عداد الخير ...

* *

- التليفون (هنركز اكتر عليها ):- يمكنك الاتصال برقم 1468 أو 2357 من اي تليفون محمول او برقم 09009555 أو 09000957 و التبرع لصالح المستشفى اثناء استماعك للرسالة الصوتية . سعر الدقيقة جنيهان
* *


4- بطاقة الائتمان (هنركز اكتر عليها ):- خدمة جديدة تقوم بها مستشفى 57357 لتسهيل التبرع بالتعاون مع بنك مصر و شركه Verisign العالمية لتأمين المواقع على الانترنت. يمكنك التبرع بأي عملة صدرت بها بطاقتك الائتمانية في أي بلد في العالم بما يعادلها من الدولار و ستقوم مؤسسه فيزا و ماستر كارد بتحويلها إلى دولار .فقط اضغط على اختيار دولار ,فنحن بحاجة إلى العمله الصعبة لتمويل عملية استيراد الأجهزة و المعدات الطبية .
* *

5 - البريد المصرى (هنركز اكتر عليها ):- يمكن التبرع فى اى فرع من فروع مكاتب البريد المصرى لحساب رقم 26386
* *

حملتنا على ال facebook ( ودى اهداء من مدونة قطرات ندى . جزاها الله خيرا ) :-- احب قبل وماكتب لينك الجروب علشان ان شاء الله تشتركوا معانا فية احب اشكر المدونة وربنا يجزيها خير ودة مثال حى للعمل الجماعى و ياريت كمان ياجماعة الى يحب يشارك بعمل شعار للحملة وعندة معرفة بالفوتوشوب ويصمم شعار خاص للحملة يبقى جزاة الله خيرا وربنا يجعل عملة فى ميزان حسناتة ان شاء الله .واليكم لينك الجروب على الفيس بوك :-1 - http://www.facebook.com/group.php?gid=139959994897&ref=search&sid=100000133813777.2100342868..1

* *


وبعد ياجماعة ماستعرضنا كل حاجة عن الحملة عاوزين بقى ان شاء الله نبدأ بقى بأذن الله وتكون على خطوتين ان شاء الله :-1- ان كل صاحب مدونة او اى حد يقدر يساعد او اى حد يعرف صاحب مدونة يقولة على الموضوع والى معندوش مدونة ومشترك فى موقع يقدر يحط الموضوع ويبقى عمل خير ربنا يجزية علية بأذنة تعالى وبعد كدة نرجع للمدونين نحط زى ماتفقنا الصورة الى موجودة بالاعلى واللينك زى ماشرحنا عن سابق ... وتخيلوا ان شاء الله لو كل مدونة زارها فى اليوم 100 شخص او 200 شخص وضغط على اللينك وعرف طرق التبرع واتبرع تخيلوا الخير الى هيعم شكلة اية يأذن الله تعالى وان شاء الله ربنا هيوفقنا علشان نيتنا خير ان شاء الله وصدقة جارية كمان فى مدونتكوا ان شاء الله.. بقول رسول الله صلى الله عليه و سلم : « إذا ماتَ ابْنُ آدَم انْقَطَع عَملُهُ إلاَّ مِنْ ثَلاثٍ : صَدقَةٍ جارية ، أوْ عِلمٍ يُنْتَفَعُ بِهِ ، أوْ وَلدٍ صالحٍ يدْعُو لَهُ » - رواهُ مسلمٌ .
* *

2 - نحدد يوم نحط الموضوع دة كلة بكامل تفاصيلة على المدونات الى هتشترك معانا فى الحملة ويكون يوم موحد ان شاء الله لكل المدونات وهنعرف اليوم دة من خلال تعليقاتكوا على الموضوع علشان يقرا اكبر عدد وتعم الفايدة والخير علينا كلنا بأذن الله وربنا يكرمكوا يارب ويوفقكوا ويثبتكوا على العمل الصالح وعلى شكرة وحسن وعبادته اللهم امين



لينك الموضوع الاصلى مدونة طهر فؤادك جزاه الله كل خير

الأحد، 4 أكتوبر، 2009

أزمتى الحقيقية





البوست اللى فات مكنش لعبة بصراحة كان اختبار صغير ليا وليكم علشان اعرف انا ايه من وجهة نظركم واعرف اللى بتحبوه فيا واللى بتكرهوا فيه وبيضايقكم منى وده اللى كان يهمنى لانى عارفة وواثقة ومتاكدة من اللى بيضايقكم فيا بس كنت محتاجة اسمع منك زيادة تاكيد يعنى .

*
*
*

كل التعليقات تقريبا كانت بتقولى حاجة واحدة مكنتش بطريقة مباشرة بس هى كانت واضحة بين السطور انى عايشة مع نفسى ومش عارفة اعيش وسط الناس سواء فى الحقيقة او على النت قولتولى اخرجى وشوفى الدنيا وشوفى اصحابك الحقيقين الحياة مش نت وبس لكن اللى مش تعرفوه انى بتحجج بالنت علشان اهرب من ازمة جوايا ازمة.

*
*
*

ازمتى انى بحب اقرب من الناس واتعرف عليهم ويبقى حواليا اصدقاء وناس كتير مش بحب اعيش لواحدى لكن بعد ما بتعرف على الناس فجاة مرة واحدة ببعد وباخد ركن لواحدى حاولت افهم السبب اللى بيخلينى اعمل كده اللى بيخلينى انعزل واكتئب وانا فى قمة سعادتى بصداقتى ومعارفى الجداد مش بحاول حتى ادى نفسى فرصة علشان اوثق علاقتى باى انسان ويمكن ناس كتير من المدونين حسوا بالموضوع ده وفى ناس زعلتهم منى باسلوبى ده انى ببعد من غير اى مبررات او اعذار او اعتذار.

*
*
*

بعد تفكير طويل عرفت السبب الحقيقى اللى بيخلنى اعمل كده انا بخاف من الفراق قوى بخاف الظروف والدنيا زى ما عودتنى طول عمرها انها بتاخد منى كل شئ جميل وكل ذكرى جميلة فى سكتها بخاف تكرر نفس الكرة تانى جربت اصادق واتعرف على ناس كتير والدنيا فرقتنا علشان كده قولت مش عايزة اتعود على وجود حد فى حياتى وفجاة الحياة تحرمنى منها .

*
*
*
قولت النت مش زى الحقيقة ومش هتعلق بالناس بسرعة زى الحقيقة وحطيت فى بالى دايما ان النت وعلاقته وهمية جدا وكله زيف وخداع ومش لازم تكون علاقتى عليه قوية لكن اللى حصل غير كده اتعلقت بكل الناس اللى عرفتهم من على النت وبقيت حياتى كلها مرتبطة بيهم كلامى كله عليهم فلان قال وعلان عمل وفلانة حصلها كذا وكذا.

*
*
*

وتعلقى زاد اكتر بالمدونين حسيت انهم قريبين منى قوى يمكن هما شايفين روحى الحقيقية بقيوا شئ مهم فى حياتى بفرح جدا لما اشوف تعليقاتكم وبزعل جداااااا لما يغيب عن المدونة صديق او صديقة اعرفها بخاف جداااا لما حد يغيب وافضل اسال طيب هما روحوا فين وغابوا ليه ويمكن من المرات اللى اعصابى تعبت فيها لما غاب ثندر اللى بجد اكتر من اخ ومقلش لحد غايب ليه وفين ساعتها رجعلتى تانى فكرة الفراق اللى بتسيطر على عقلى باستمرار لقيته بيقولى فوقى بلاش تتعلقى بعالم وهمى كل حاجة ومصيرها لفراق وخصوصا انى عارفة ظروفى كويس قوى وعارفة انى هيجى يوم ومش هقدر اتواصل تانى مع كل الناس اللى حبتها وعرفتهم ظروفى اللى خنقتنى زمان ولسه بتخنقنى لغاية دلوقتى ومش عارفة هتخنقنى لامتى تانى .

*
*
*

انا بهرب من حاجات كتير فى حياتى بتخنقنى للنت علشان احس بشوية حرية وشوية لاحترام ذاتى وكيانى وانى الاقى ناس بتهتم بيا لكن لاقتنى شغلتكم باكتئابى وهمى وحزنى وبدل ما اكون صريحة فى كل كلامى بقيت غامضة ومش واضحة وبدل ما اقرب ببعد وابعد وابعد .

*
*
*

فى جملة قريتها بتقول ان الفقد علمنى محبش حد
دكتورة ستيتة ودكتورة مروة قالولى لو هتموتى بكرة صارحى اللى بتحبيهم بحبك تصوروا انى لما فكرت لقيت انى من كتر خوفى من الفراق والفقد بقيت مش بحب قوى ولا عايزة اتعلق بحد , لكن الحقيقة انى حبتكم واتعلقت بيكم واتمنيت كتير انى كنت اعرفكم على الحقيقة بكون حزينة جدا لما اسمع عن لقاء مدونين وانا مش قادرة احضر لما بتعملوا لقاءات خيرية وانا مش قادرة اشارك لما بتكونوا عارفين مناسبات الحلوة والحزينة وبتهنوا وبتواسوا بعض وانا مش قادرة لانى عايشة فى اخر بلاد المسلمين .

*
*
*
علاقاتكم ببعض بتتقرب وانا قررت ابعد لانى اعصابى تعبت ومبقتش مستحملة احساس انى كل يوم بزداد تعلق بيكم وفى نفس الوقت مش قادرة احتى اشوفكم ولو مرة واحدة وجها لوجهه.

*
*
*

حتى دكتورة علا لما اتكملت معايا وقالت لازم نتقابل خفت وحسيت انها لو شافتنى على الحقيقة الصورة اللى كانت رسمها لايوشة هتتهز واول كلمة هتقولها مش انتى ايوشة اللى اعرفها

*
*
*

عادل انت قولت انى جبانة ودى حقيقة واجبن خلق الله كلهم كمان ميمى قولتلى انى مغرورة بس هو مش غرور اكتر من خوف وانطواء زمان لما كنت بفكر اصدقائى فى المدوسة مش حابين يصاحبونى كنت باخد ديسك لواحدى فى اخر الفصل اقعد فيه ومش بتكلم مع حد مع انى بكون نفسى هموت انى ابقى فى وسط شلة البنات اللى جنبى بس بخاف انى اخد الخطوة واروح اتكلم احسن يحرجونى وكنت بقول خلينى كده لغاية ما يجوا هما ويكلمونى وفعلا جات واحدة كلمتنى بس قالتلى نفس كلمتك انتى مغرورة علشان مش بتكلمى حد ولا بتصاحبى حد فينا مبررتش موقفى ولا شرحت اسبابى اكتفيت انى اسكت .

*
*
*

الحقيقة انا بحب اخد خطوة الفراق قبل ما الخطوة تيجى غصب عنى انا مش بحب اكون لواحدى بحب دايما احس ان حواليا ناس كتير حواليا باى شكل بس مش بحب يقربوا قوى ولا بحب علاقاتى بالناس تكون جامدة وعلاقات قوية
اصحابى فى الجامعة حاولت ابعد عنهم فى اخر سنة علشان لما يجى وقت ونفترق مش اتاثر او ازعل وبدل ما استغل كل فرصة انى اقرب منهم واستغل كل لحظة كنت بفكر فى لحظة الفراق وبقيت ببعد بالتدريج
دى حالتى دلوقتى انا اتعودت عليكم وحبيتكم مع انى معرفكمش شخصيا واتعلقت بيكم حياتى كلها دلوقتى بقيت متعلقة بيكم ولانى عارفة وواثقة ان هيجى يوم مش هقدر استمر وهقولك سلام وظروفى هتكون اقوى منى وهتجبرنى ابطل تدوين وانسى النت نهائى ويوميها مش هقدر استحمل بجد لان هيبقى كل حاجة حبيتها واتعلقت بيها ضاعت منى .

*
*
*

كان الحل انى مش اتعود عليكم ولا على وجدكم فى حياتى باستمرار وبقيت ببعد اقفل المدونة اتعمد انى مش ازور المدونات اللى متعودة ازورها علاقاتى بقيت محدودة وتعليقاتى بقيت سخيفة وبايخة وبقيت برد بشكل الالى مفيهوش روح بقيت اغيب من على الايميل ومش بفتحه وايام قفلت الموبايل وقولت ده الحل علشان متعودتش على وجودكم وقولت هقدر ابعد بسهولة بعدها لكن مقدرتش ومش قادرة ابعد ورجعت تانى بس بعد ما خسرت ناس كتير بحبها وبعزها
ساعدونى اتغير للاحسن ساعدونى انى مخفش من انى احبكم ولا اتعلق بيكم



السبت، 3 أكتوبر، 2009

تيجى نلعب شوية




دى زى لعبة بيلعبوها على الفيسبوك وانا جبتها هنا لهدف فى دماغى اعتبروها تاج وهيتحل ممكن :))






ممكن توصفونى فى كلمة واحدة ؟؟؟؟
*
*
*
*
*
*
*
*


قولولى حاجة بتحبوها فيا وحاجة تانية بتكرهوها ؟؟؟

*
*
*
*
*
*
*


لو هموت بكرة وفى فرصة تقولولى حاجة هتقولولى ايه ؟؟؟؟؟