الأربعاء، 12 أغسطس، 2009

القرد هو السبب


مش انا عرفت السبب الرئيسى للقرار بتاع الاستخدام الغيرالعادل للانترنت اللى الحكومة فعلا مشكورة قدرت تحل المشكلة بسرعة قبل ما تتفاقم ومش هنقدر نحلها امبارح لقيت فيديو على اليوتيوب فيه اعلان وده نصه
_يعنى ايه الحيوانات هربت


_ياباشا اللى شفته ده عمرى ما شفته قبل كده تصدق القرد فتح القفص وجرى على الخرتيت ركب فوق ضهره وجريواعلى السيسى القرد وشوشه فى ودنه لقيتلك السيسى بينط لفوق وبيقول ياكريم وجريوا برة الجنينة
_بقى السيسى نط و قاله ياكريم

_ياباشا انا مش مجنون صدقنى بس اللى حاذذ فى نفسى مين ده كريم اللى يسبونى علشانه

*********

كريم اللى ركب وصلة دى اس ال من شركة هننصب عليك تاتا تاتا اكبر شبكة واسرع شبكة انترنت فى مصر تجيبلك الدنيا من اوسع ابوابها هننصب عليك تاتا تاتا طور حياتك
***********

ومن هنا نقدر نقول ان السبب الرئيسى للقرار ده عايزين يريحوا القرد والسيسى اللى كل يوم هربانين من الجونينة وجرى على كريم وعاملين ازمة مواصلات وتعب وارهاق على القرد بجد يعنى وده غير ان الجونينة اشتكت لاكبر واوسع شركة نصب اللى هى هاننصب عليك تاتا ان القرد والسيسى هربوا وبقيوا مفيس حد بيروح ينفعهم علشان مفيش حيوانات يلعبوا معاها يبقى الحل اللى توصلوا اليه بما انهم مش قادرين يشكموا القرد ولا السيسي ولا الخراتيت ويخلوهم يتهدوا ويركزوا فى مكانهم جوه الجونينة انهم يشوفوا الحل الاحسن كان لازم يتخلصوا من الوصلة اللى مركبها كريم اللى مشحططة القرد كل يوم ولو يطولوا يتخلصوا من كريم نفسه وابوكريم وام كريم وعيلة كريم كلها والشارع اللى ساكن فيه كريم مش هيتاخروا ده غير ان كريم شاب صايع ومفيش شغلة ولا مشغلة وباطل وعاطل واهله بيصرفوا عليه بعد ما خلص الجامعة من اكتر من خمس او ست سنين مثلا وبما انه متقل على اهله وبياخد مصروفه منهم جاب وصله هو ووصاحبه ابن الجيران اللى صايع زيه بردو واهو قال اى حاجة تسلى وقته وتخرجه من القرف والنكد اللى عايش فيه ويمكن يلاقى شغلانة ولا حاجة تفيده على النت يعنى شحات ونصاب وكل يوم مشحطط القرد معاه ده يصح بردو ا وكل ده فى سبيل القرد وعلشان راحة القرد تولع البلد كلها كله الا القرد ياجماااااااااااعة لذلك القرد والسيسى والخرتيت مش هايهربوا من الجونينة تانى الا لولد قادر يدفع تمن هروبهم ابن ناس يعنى ياحسبو :))
وعنده بابا وماما عندهم ارصدة فى البنوك ومهما ياخدوا من التل ومش بيختل
*
*
اتفرجوا على الفيديو بقى :)

video

الاثنين، 10 أغسطس، 2009

وظلمنا الحكومة


الله يكثفنى معقول اللى انا عملته فى البوست الاخير ده بصراحة مليش حق طلعت عيلة لسانها طويل ومتبرى منها وكمان ناكرة للجميل

معلش اعذرينى ياحكومة .....سامحينى ياحكومة..... غلطت فى حقك غلطة شنيعة مريعة ولا تغتفر اعمل ايه ما انا واحدة من الشعب الحاقد والناكر لاى جميل لا بجد شعب شرير ومش بيراعى الجهود العظيم والمبذولة فى سبيل الارتقاء بالبلد دى

معلش سامحينى انا الغضب عمانى وخلانى مش عارفة بقول ايه والشيطان شاطر ووزنى اعمل كده من غير ما افكر واحكم بااااااااااااالعقل انك بتعملى كل حاجة فى مصلحة المواطن وواعى تنسى مصلحتك اولا هى الاهم عندنا

بعد الثورة العارمة الله اجتاحت الدولة الايوشية اللى هى دولتى يعنى حدودها متمثل فى غرفتى المتواضعة بعد معرفتى بموضوع الاستخدام الغير عادل للنت ده ومن ساعتها وثورات بقى فى الاوضة ومحدش قادر يقرب منها وعملت اعتصام وامتناع عن الاكل والشرب ونزلت هوبااااااااا اشتم فى اى حاجة قدامى واللى تطولها ايدى او لسانى وكنت بقول كلام تيييييييييييييييييت خالص المهم فتحت الايميل وانا بتييييييييييييييييت للدنيا كلها لقيت صديقى الانتيخ فاتح ومش هنقول مين علشان مش نقطع عيشه المهم ده بشتغل فى شركة تبع اى تى داتا انا شفته من هنا واتفتحت فيه معرفش ليه يمكن علشان لقيته رمز للسلطة :))

بعد كلام ومناقشات وحوارت طلعت انا اللى غلطانة ولا ومش كده طلعت انا نصابة اهئ اهئ اهئ

لا اخص عليا اخص بجد انا طلعت سوووووو باد ياجماعة وناكرة للجميل وانا هعرضلكم الاسباب اللى خلتنى اتراجع عن تعصبى الاعمى ضد قرار النت المحدود واللى اتاكدت دلوقتى انى نصابة ولازم اروح اقدم نفسى للبوليس علشان العدل ياخد مجراه

بيقول ايه ياسيدى ان القرار ده سببه الاساسى انهم عايزين يلغوا موضوع الشبكات الغير شرعية وبصراحة مكنتش فاهمة قوى ازاى غير شرعية وكان جاى فى بالى السيبرات اللى بتتدى مثلا وصلات للبيت

قوووووووووووم ايه اطلع انا مش فاهمة مش يقصدوا دول بس لا يقصدوا كمان اللى زى حالاتى اللى المفروض واخدة وصلة مش لواحدى

يعنى انا وصلتى وابن عمى وقربنا التانى فى نفس العمارة بروتر واحد قالى لا انت كده تتدخلى فى نقاط النصب على الشركة وانك بتسرقيهم علشان المفروض العقد ينص على انك انت بس اللى تاخدى الوصلة مش حد تانى

وعليه يبقى الوصلة مثلا اللى 140 جنيه انا اللى اتحملها لواحدى ومفيش حد معايا وكل فرد فى من اللى معايا كمان يدفع 140 جنيه يعنى المفروض ندفع 380 جنيه فى الشهر واحنا شباب لا شغلة ولا مشغلة وبناخد مصروفنا من اهلينا اللى مش عايزين يسمعوا سيرة النت دى تانى

**************

طيب اقوله ما انا الشركة لما روحت اقدم فيها كانت عارفة ان الوصلة مش لواحدى بدليل اننا دفعنا كل فرد فينا مبلغ متساوى اول الاشتراك

قالى لا انتى مش بتتدفعى غير الاشتراك الشهر وبس طيب امال احنا دفعنا ليه تلات اضعاف الاشتراك الشهرى ؟؟؟؟

يعنى الشركة عارفة ومتاكدة انى مش هاخد الوصلة لواحدى ومش غبية هى بدليل ان كل شهر اللى بيدفع الاشتراك شخص مختلف عن التانى يعنى لو هى عايزة تلغى وتحكم موضوع الوصلات اللى فى البيوت ده يبقى كانت الاولى فصلت عننا النت وقالت انتم خلفت الشرط الاساسى فى العقد ده غير اننا اصلا لما وصلنا جه واحد هو اللى وصل الوصلة دخل الارقام على كل الكمبيوترات يعنى المفروض لو اصلا اسرة عايشة فى بيت واحد اب واولاده متجوزين معاه فى نفس البيت مينفعش ياخدوا واصلة واحدة كل واحد يبقى ليه وصلته وروتره الخاص بيه فى شقته :))

طيب انا من امبارح اغنية ابو جريشة بتاعت 145 جنيه شوف انا هعمل بيهم ايه!!!!! شغالة تنط فى دماغى انا دول اروح ادفهم وصلة نت واشحت باقى الشهر مش كفاية اهلى بيصرفوا عليا لا كمااااااااااان اقولهم اصرفوا على النت وكده ده ليه علشان انا نصابة ومش بنفذ بنود العقد صح فى حين انى كنت اخدت وصلة من سيبر بمبلغ بسيط وكنت هبقى نصابة اكبر بالشكل ده
***************

_يجى يقولى انكم انتم الشعب عايزين تاخدوا حاجة مش من حقكم احنا نقول اللى لينا واللى علينا بخصوص الحكومة وهى عاملة الموضوع ده لمصلحة الجميع وان النت سرعته مش هتقل ولا حاجة وال40 جيجا مش وحشين انتى هفترى ده على اساس 40جيجا دول ليا انا بس ولانى اقتنعنى انى المفروض اصلح الغلط واعمل وصلة لواحدى وكل اول شهر اروح اسرق بنك علشان ادفع 140 جنيه دانا لو اشتغلت يعنى ده لو فى ظل ظروف البلد دى هشتغل مدرسة محترمة ب250 جنيه بحااااااالهم هصرف اكتر منهم على مواصلاتى ليه بقى علشان مش بشتغل فى نفس البلد لازم اتمرمت فى بلد تانية علشان اشقى واتعب فى الفلوس يعنى حتى وصلة النت مش هلاقى ادفعها بعد مصاريف المواصلات

ده غير قالى ان اصلا مفيش فى مصر حاجة اسمها النت الغير محدود حتى الوصلات العالية اللى المفروض غير محدودة ليه حد معين بس ده مش بيبان للعملاء علشان السرعة بتكون عالية وده سر من اسرار الشركة :))

_واياكم تفكروا فى يوم ان الحكومة واخدة القرار ده مثلا علشان تمنع الناس تعبر عن رايها لان النت اكبر مكان بيعبر فيه الناس عن رايهم فى قضايا البلد ومكان فسيح لمعارضة كل ما هو سئ فى البلد يبقى عيب عليكم قوى لو فكرتم كده ليه بقى علشان احنا فى شعب ديمقراطى لو انت غلطت واغضبت في يوم الناس اللى فوق مش هتعيش على وش الارض ياحلو وببساطة ممكن يخلكوا انت بنفسك تقول النت ده عمرى ما اهوب ناحيته تانى



طيب نستفيد ايه من الموضوع ده اننا زى الشاطرين نروح نصلح غلطنا وكل فرد يشترك لواحده وياخد النت المحدود اللى كل جيجا فيه زيادة ب10 جنيه يعنى انت عايز بتاع 500 جنيه لواحدك نت كل شهروبما اننا شعب ينعم بالرخاء والرفاهية وشقق مرمية واللحمة بخمسة جنيه وساعات تلاقيها بستة المفروض نحترم نفسنا بقى وبلاش نعمل زى القرد اللى بياكل فى اته محلولة مش من حقه

اهو احنا عاملين كده زى القرد ده عاملين ناكل زى ما يكون الموز مش هيخلص ابدا وفروا شوية ياجماعة حرام عليكم الحكومة هتجبلكم منين لما الموز يخلص تسرق يعنى وتغضب ربنا اعوذ بالله اعوذ بالله
وحسبوها صح وبدل ما تشترى شريطين علاج اشترى شريط واحد ووفر تمن التانى علشان تقدر تدفع فلوس الكيف قصدى تدفع للنت :))
بدل ما تشترى هدمة كل سنة اللى حيلتك مش تشترى خالص ووفر ومشى بلبوص وادفع وصلة النت
بلااااااااااش تاكل الفول اللى هو بقى اكلت الوحيدة والفريدة وعيش على الهوا ووفر واحسبها صح وادفع وصله النت علشان مش تكون نصاب وتساعد الحكومة ولا اعمل بنصيحة واحد قالها اللى معهوش ميلزموش واشرب من البحر واخبط دماغك فى اتخن حيطة واشرب من اقرب ترعة ومتقولش ايه ادتنا مصر قول هتسرق ايه مننا تانى مصر
***********
وعلى فكرة اللى مضايقنى فى الموضوع ده مش ان التحميل هيقل لان انا اصلا مش بحمل اى حاجة غير حاجات بسيطة جدا يعنى اغنية صورة ومش كتير يعنى انما اللى حارق دمى التحكم اللى عايزين يفرضوا على الشعب وانا عندى احساس بيقول ان الموضوع ده وراءه حجب عقول واصوات الناس اللى بتطالب بالتغير

الأحد، 9 أغسطس، 2009

قصة عشق مكررة



اولا قبل ما حد يقرا بلاش تعملوا اسقاط للكلمات انا استفذتنى الصورة علشان كده كتبت الكلمات دى

*


نثـرت بقــايـــا الـــــــورد
8
فــــوق أوراقـى المبعثـــرة
8
أطفئت شمـــوعى المضـاءة
8
فى سنــوات حبك المهـــدرة
8
محيـت بقايـــــا الخطـــــوط
8
وكلمـــات العشــــق المنثــرة
8
حسبـت أن قصتنـا مختلفــــــة
8
عن قصـــص الحــب المنشرة
8
الآن ايقنت أن حكــاية عشقـك
8
8
مثــل باقـى الحكــاية مكـــررة
8
تبــــدأ بكلمــات عــذبــــــة
8
وتنتهى بوعــــود مبــخرة
8
سئمـــت أعـذارك المبـررة
8
وفى النهــــــــــــاية
8
تقــول أنها أقــدار مقـدرة
8
لـن أتســــال بعد اليــوم
8
أمازلت تحبــنى ياتــرى
8
سوف أكتم بداخلى الحــــب
8
وأقتل ملامح حبـــك المظهرة
8
وسوف أجعل القلب
من بعدك مقبرة


*
*
*
وبمناسبة حرق الدم على الصبح ابقو شوفوا الموضوع ده

الثلاثاء، 4 أغسطس، 2009

لعنة تقبل الذات



(بينيلوبي) بنت اتولدت فى اسرة غنية بس المشكلة انها مش مولدة طبيعية زى باقى البشر اتولدت وهى عليها لعنة لعنتها كانت ان شكل مناخيرها زى الخنزير الاب والام اول ما شوفها اتخضوا وقالوا ان الحل نبعدها عن عنين الناس كلهم ونحبسها فى القصر ومتخرجش بره القصر ابدا
*
*

لغاية ما كبرت والام اقنعت البنت ان اللعنة هتتكسر بانها تلاقى الشخص اللى يحبها ويتجوزها وترجع طبيعية تانى
وابتدت تتدبر لها جوازات من بعيد لبعيد محدش يشوف شكلها وبعد فترة لما اقتنع بيها شخص وحبها خرجت علشان يشوف شكلها اتخض وهرب ومقدرش يكمل اللحظة دى قررت تهرب من كل حاجة من ابوها وامها وحتى من اللى حبيته وتعيش حياتها حتى لو شكلها مش مقبول بين الناس مع مرور الوقت قدرت تتقبل شكلها بالتدريج والناس تحبها وفى الاخر اللعنة هتتكسر بس مش علشان لقيت الانسان اللى بيحبها على شكلها ده وقبل بيها زى ما هى لا اللعنة اتكسرت لما هى قبلت شكلها وشخصيتها واقتنعت بيهم

*
*


دا فيلم سمعته من فترة فكرته عجبتنى ويمكن لمستنى لانى ساعات بحس انى كده ملعونة بلعنة عدم تقبل الذات وبالتالى عدم الرضا عن اغلب حياتى لعنتى كبرت معايا وفضلت تكبر وتكبر لغاية ما وصلت لمرحلة انا بقيت مش عارفة ارجع زى زمان ولا عارفة اتقبل نفسى كده زى ما هى ولا عارفة اكون زى غيرى اللى طول عمرى عشت متطلعة اكون زيهم لدرجة وصلت فيها انى فقدت حتى ابسط انواع الثقة بالنفس
*
*

من وانا صغيرة مش متقبلة حياتى والدنيا حواليا وكمان مش متقبلة شخصيتى حتى اللى حواليا ساعات بيحسسونى انى مش من الشخصيات اللى تتقبل بسهولة حاولت اغير من نفسى للاحسن بس عمرى ما كنت بقدر بقيت بحملها فوق طاقتها دايما ليه مش تكونى زى غيرك ليه مش تكونى الناس اللى عايشة حواليكى

*
*

و زى بنيلوبى صدقت كلام الناس ان لعنتى هتتكسر لما الاقى اللى يقبلنى على شخصيتى دى سواء صديق او حبيب ساعاتها هحب نفسى واتغير ولاقى السعادة مليت حياتى كلها ودا يمكن مش تفكيرى لواحدى دا تفكير اغلب البنات اللى عرفتهم مش عايزين يقبلوا نفسهم زى ما هما بيحاولوا يقلدوا دى ودى وبيحاولوا غيروا فى نفسهم وبنحاول نتصنع شخصيات غير شخصياتنا وشوش غير وشوشنا علشان اللى حوالينا يقبلونا
*
*


ايوة كنت عارف ان مش الحياة كلها هتكون بمبى بس كان عندى قناعة انى هكون احسن لما الاقى الانسان اللى يقبلنى زى ما انا كده على شخصيتى وعلى كل اللى فيا لما الاقى انسان لمرة واحدة فى حياتى احس انى طبيعية مش خايفة اقول كلمة تزعله مش خايفة يشوف ايه اللى جوايا ومش خايفة انه يفهمنى غلط ملقتش الاحساس دا مع حد تقريبا لغاية دلوقتى حتى بينى وبين نفسى مش لاقية يمكن لقيته مع المدونة هى اللى قبلت شخصيتى وكل عيوبى وهى اللى بتفهمنى فى كل لحظة حتى لو مكتبتش فيها حاجة انا بدخل اتكلم معاها واحكي لها وانا اتعلمت منها ازاى اكون زى ما انا ازاى احب نفسى كده

*
*


كل اللى مروا فى حياتى مش عايزين يقبلونى كدا انا زى ماانا ماما واخواتى واصحابى والسبب انى مش عايزة اكسر لعنتى واقبل نفسى الاول بكل عيوبها ووميزاتها بس انا كدا دايما شايفة العيوب ومش عارفة اصلحها ومش شايفة المميزات علشان اقويها مش احاول اتغير علشان ارضى غيرى انا هفضل طول عمرى كده سواء الناس قبلتنى او لا بس مش هحطم نفسى تانى فى انتظار حاجات فى علم الغيب

الأحد، 2 أغسطس، 2009

أشياء صادقة في حياتى+تحديث


سؤال وجالى من عادل صاحب مدونة البلد دى فيها حكومة ومن احساس طفلة رومانسية وبعديها بيوم جالى انووووسة عاشقة الاحزان الى اتمنى ترجع بسرعة وربنا يبعد عنها اى حزن اللهم امين


أذكر 10 أشياء صادقة في حياتك


السؤال بسرعة صعب لانى مش عارفة احدد فين الصدق فى حياتى لانى انا اول واحدة بكدب على نفسى انا ممكن مكدبش على الناس ولا بحب الكذب عليهم بس بتفنن انى اكدب على نفسى الف وادور عليها هحاول ادور كدا جوايا يمكن الاقى العشر اشياء الصادقة فى حياتى


دينى او اسلامى اصدق شئ فى حياتى كلها بحبه ومقتنعة بيه وبغير عليه بحاول اتمسك بمبادئه على اد مقدر بس ساعات كتير بكون مقصرة بس يقينى من ان ربنا دايما واقف جنبى بيرجعنى تانى

علاقة الحب اللى بينى وبين ماما واخواتى جايز دايما فى خناق معاهم بس الحمد لله الناس بتحسدنا على الترابط اللى بينا ومفيش يوم يعدى الا لما نشوف بعض ونسال على بعض ممكن فاضل اقول عيالكم صدعونى عيالكم قرفونى بس لو مرة يوم ومشفتهمش بيكون فى حاجة نقصانى بجد


علاقتى ببنات خالتى مش بنسيب بعض تقريبا كل يوم مع بعض واليوم اللى مش بنشوف فيه بعضنا لازم يكون فيه تليفون لدرجة ناس كير فى شارعهم والعمارة عندهم افتكرونى اختهم بس كانوا مخبينى ولا حاجة اهم فعلا اخواتى من زمان لدرجة اننا ان شاء الله لما كل واحدة تروح بيته مش هنبطل نتجمع كل يوم دا احنا كمان قررنا نتجوز عريس واحد علشان مش نبعد عن بعض :))


اولاد اخواتى وشقاوتهم ورزالتهم وطولة لسانهم وعقلى الصغير اللى بيعمله بعقلهم

اصدقائى وهنا هقول اصدقائى اللى عرفتهم على النت لان بجد لقيت فيهم حاجات كتير مش لقيها فى اصدقائى الحقيقين ويمكن السبب الاساسى اللى بيخلينى كل ما اقرر ابعد انى ارجع تانى وافتح المدونة


اعصابى بتنرفز بسرعة شديدة وبيبان عليا وعلى ملامح وشى وممكن ازعل اى انسان قدامى حتى ولو ماما مادام انا عصية كله ياخد ساتر ويبعد عنى لغايةما اهدى هراجع نفسى وهعرف انى غلطت وهاجى اعتذر اكيد بس مش بقدر اعمل كدا مع ماما علشان هىمش بتزعل منى وعارفة انى غرابة بتقول ربنا يصبرنى على ما بالنى

مدونتى حاجة صادقة جدا مفيهاش رتوش انا هى دى اللى ظاهرة فى كل بوست فى كل حاجة باكتبها فيه حاجة منى راى اقتناع مبدا انا كدا متناقضة مجنونة وعاقلة حزينة وكئيبة وبحب الضحك والهزار هادية وشعنونة كل حاجة فيا بجد بستغرب نفسى انا ليه كدا وممكن يوم ملتزمة جدااااا ويوم بحاول اعيش سنى زى باقى الناس


دىحاجة جديدة عليا مكنتش فيا زمان انى اكتشفت انى مش بزعل من اى موقف ولا جرح الا وقت قليل جدا وبعديها وبنسى مع انى زمان كان قلبى اسود بشكل لا يطاق

الكمبيوتر مش مسيطر على كل حياتى ومش بمشى الا على مزاجه هو مش مزاجى انا يعنى خروج من البيت يحدده ظروفى على الكمبيوتر والمدونة مش انا اللى احدد مش بقوم من عليه الا علشان الصلاة والنوم والاكل باكل جنبه

مش سعيدة فى اغلب الاوقت هتسالوا ليه هقولكم لانى مش بعرف اعيش لحظات السعادة صح دايما بخاف من اللى جاية انا خوافة جداااااا وبخاف من المستقبل ودايما الوحش فى بالى قبل الخير


ماشاء الله مش عارفة اجيب عشرة جروا ل11 الصادق فى حياتى حبى المجهول اه يمكن قولتها حاسه انه حبى للشخص اللى ان شاء الله هيكون من نصيبى كون حب صادق جدا او هحاول على اد مقدر وفوق ما اقدر انه يكون حب صادق جداااا





هنهدى التاااااااااااااااااج من تانى