الأربعاء، 29 يوليو، 2009

ازاى نسامح بعض




بناء على طلب من الامووووورة البت المشمشية اننا كلنا نعمل بوست عن التسامح قبل رمضان وانا كنت محتاجة اعمل البوست دا جدا وهو جه فى وقته بنقولها ربنا يكرمك ياااااااارب على فكرة دى ويجعلها فى ميزان حسناتك باذن الله على كل انسان هيخرج من كل بوست قراه وقدر يعرف يعنى ايه يسامح ويعرف ازاى يسامح غيره









أنا آســــــف كلمة ولازم أقولها لــــك

أنا آســـــف تعالى نقولها ونتسامـــــح


تعـــالى نمــــد إيـــــدينا ونتصالـــــح


كفاية اللى كان بينا وكفاية كلام جارح


لازم ننســـى اللى حصــل بينا امبارح


أنا آسف مش علشان غلطت أنا فى حقك


ولا علشان فى يوم اتسببت أنا فى حرجك


أنا آسف لانى فى يوم خليت الغضب يعمينى


وخليته للعشرة وللحب اللى كان بينا ينسينى


هسامحك علشان اعرف اغمض فى يوم عينى


واعرف انام وانا مرتاح البال والرضا مالينى





افتكر مرة زمان كانت صاحبتى بتشرح لى مسالة وهى ماشاء الله ممتازة وانا كنت بكره الرياضة بشكل فظيع وكل ما تشرح المسالة اقولها مش فاهمة طبعا اخر ما زهقت منى قالتلى بطلى غباء ويوميها كان يوم ما يعلم بيه الا ربنا زعلت واتنرفزت وخربت الدنيا وهى من منظرى وفضلت تبكى اليوم بحاله ويجوا يحاولوا يصالحوا فيا وانا مش راضية كان قلبى اسود بعيد عنكم ههههههه وتمر الايام ونيجى فى الجامعة كنت كل ما اتكلم معاها اتنرفز بما انى عصبية ودماغى ماشاء الله دزمة قديمة :)) فى العند الاقيها مش بترد عليا وبتبتسم ولما اتكلم تسكت قولتلها انتى مش بتردى ليه عليا تناقشينى فى كلامى تثورى لما فى يوم اتنرفز عليكى قالتلى انا بحب طريقتك وبحب كلامك وبكون مستمتعة جدا وانا بسمعك الموقف دا افتكرته دلوقتى اد ايه هى كانت انسانة طيبة وقلبها طيب جدا ونسيت الموقف دا وانا اللى قلبى اسود كل شوية افكرها بيه وقولها فاكرة يوم ما قولتلى بطلى غباء هههههههه مع انها هى عمرها ما بتزعل منى علشان كدا ماشاء الله صاحبتى من 15 سنة ومن اعز اصحابى ممكن الايام تمر واحنا بعيد عن بعض بس مهما حصل بنرجع لبعض تانى فى الاخر



لما كبرت كنت بقول انا مش بعرف اسامح بسهولة بس والله مش شكر فى نفسى انا لقيت انى ساعات بوصل لحد الهبل فى التسامح بسامح لدرجة ان ممكن الموقف اللى جرحنى يتكرر اكتر من مرة وانا بسامح واقول معلش دا ساعات ان اللى بروح ابدا بالاعتذار للناس علشان مش بستحمل ابدا احساس انى شايلة من اى انسان مش عارفة بحس ان التسامح دواء او علاج ليا قبل ما يكون لغيرى


واتذكر قصة بحبها جدا ودايما بحاول احطها فى بالى فى كل وقت اي نعم بكون عصبية وتنرفز واعمل مصايب فى اللحظة اللى بيحصل فيها موقف يعصبنى بس والله مفيش ساعات قليلة وارجع انسى كل حاجة حصلت


القصة بتقول ان الرسول صلى الله عليه وسلم كان جالس بين اصحابه قال لهم سوف يدخل عليكم رجل من اهل الجنة وشوية ودخل رجل ملامحه عادى جدا وقد يكون فقير صلى ومشى من المسجد على طول لكن تبعه صحابى اعتقد انه عبدالله بن عمرو وكان من عادة العرب انهم يقولوا مثلا انهم اغراب او انهم مش لاقين مكان يناموا فيه ان يعرضوا على الضيف لمدة 3 ايام الاقامة عنده وبالفعل استضافه الرجل فى بيه وعبدالله بن عمور يراقب الرجل دا ولاقيه عادى جدا يكاد مش بيعمل حتى كل السنن فى الاخر ساله عن السبب اللى خلى الرسول صلى الله عليه وسلم يقول انه من اهل الجنة قاله انه بنام كل ليلة ومفيش فى قلبى لا حقد ولا ضغينة ولا حسد ولا بغض لاى انسان فى الدنيا دى


قال الله تعالى:"خذ العفو وأمر بالعرف وأعرض عن الجاهلين" . ( الأعراف 199)


وقال تعالى: "وإن تعفو أقرب للتقوى"


..وقال صلى الله عليه وسلم: "أفضل أخلاق أهل الدنيا والآخرة أن تصل من قطعك وتعطي من حرمك وتعفو عمن ظلمك".


حتى علماء النفس قالوا ان الانسان المريض وبيعانى من اضطرابات نفسية بيكون السبب الاكبر عنده انه مش بيعرف يتسامح سواء مع غيره او حتى يتسامح مع نفسه


هو فى تسامح مع النفس اكيد فيه طبعا ممكن نسامح اللى حوالينا كلنا ونجى لغاية نفسنا ونعملها محاكمة عسكرية على كل شئ نعمله فى حياتنا ونحول لحياتنا لجحيم مطلق واعتقد اننا ولو مش متسامحين مع نفسنا بشكل صحيح مش هنقد نتسامح مع الناس او حتى مش هنعرف نعيش فى وسطهم حتى


وفى مقولة لآن باتون مع انى معرفش هو مين بس المقولة دى عجبتنى قريتها فى كتاب عندى اسمه الغفران الفن المفقود


بيقول ياله من قانون صعب ذلك الذى يقول اننا لا يمكن ان نشفى من جروحنا العميقة مالم نغفر


وفى مثل صينى كمان بيقول من يختار الانتقام لابد ان يحفر قبرين


عايزين نتعلم نسامح بعض الاباء يسامحوا اولادهم على الرغم من عقوقهم والابناء يسامحوا اباءهم لو فى يوم اساءوا راعيتهم وتربيتهم الاخوات بينهم وبين بعض االاصدقاء الزمايل كل الناس تسامح والاهم من دا كله نسامح نفسنا فى الاول لكن الحياة من غير تسامح مش هتكون غير جحيم لا يطاق ودنيا مفيهاش غير الانتقام
وصحيح سامحونى انى لسه مرديتش على تعليقات البوست اللى فات ربنا يكرمكم يااااااااارب بجد انا مش لاقية كلام اشكركم بيه على انكم مستحملين دايما كدا نكدى وشغل العيال اللى بعمله كل شوية حتى الكمبيوتر اللعين دا بيعمل حاجة غريبة عندى فى صفحة التعليقات بس انا هسامحه وامرى الى الله :)

الاثنين، 27 يوليو، 2009

ياكثــــــــــــــــــــــوفى

ياكثوفى ياكثوفى ياكثوفى مش عارفة اودى وشى منكم فين وشى منكم فى الارض


السلام عليكم ازيكم يابشر اولا وقبل اى شئ نتفق اتفاق صغير كدا علشان نكون على نور واللى اوله اتفاق اخره ان شاء الله مفيش خناق :)

انا عيلة والدكتور بتاعى طلع لى شهادة تفيد بانى اعامل معاملة الاطفال ومش اى اطفال لاااااااااااا الاطفال اللى مطلعين عنين اهليهم وكل اللى حواليهم كالعادة تراجعت عن فكرة قفل المدونة وطلعت عيلة للمرة الكام صحيح مش فاكرة من كتر ما اخدت القرار دا والناس زهقت منى فيه مبقتش اعد تقريبا كل اسبوع او اسبوعين بالكتير اقول هقفل المدونة وبرجع فى قرارى عيلة والله العظيم عيلة يمكن العيال بتعرف تتمسك بالقرار اللى هى واخده شوية لكن انا لا
مش هتكلم عن السبب اللى بيخلينى اقفل المدونة لان السبب تقريبا واحد كل مرة بعمل كدا بيكون هو هو
لكن هتكلم عن السبب اللى خلانى ارجع طبعا اخر بوست عملته من فترة كبيرة يمكن اسبوعين وبين كل بوست والتانى بردو بيكون مدة وقولت قبل كدا انى بقيت بمل من التدوين ومش لاقية حاجة اكتبها تانى
لكن بحاول اغصب على نفسى علشان مش عايزة اسيب الاصدقاء والاخوات اللى عرفتهم من خلال التدوين واللى كل شوية قرفاهم بمشاكلى وبجنانى



وكنت خلاص هقفل المدونة واكتب فيها لنفسى بس دا لو لقيت حاجة تتكتب وابتديت اقول للناس اللى متابعة المدونة وتعرفنى انى فعلا خلاص قفلتها لغاية اول امبارح لما قولت لشخص عزيز عليا بجد واعتز بصداقته وهو اخويا قبل الصداقة دى مكنتش متخيلة انه يعمل كدا علشان ارجع تانى قفل المدونة وحلف انه مش هيفتحها الا لما افتح مدونتى لكل الناس وبصراحة دا السبب الرئيسى انى تراجعت عن قرارى وبعدين لما بتكلم مع اصحابى واللى هما عارفين انى بدون بس مش ليهم اى علاقة بالتدوين واللى من شهوووووووور بحاول اقنعهم يدخلوا عالم التدوين ويعملوا مدونات ولقيتهم اليوم اللى قررت ابعد هما اخيرا وافقوا على انهم يدونوا يجربوا ايه تدوين وان شاء الله هعرفكم بيهم قريب



انا فتحتها والله اعلم هرجع تانى للقرار دا تانى ولالا وانا عندى قناعة انها مش هتكون اخر مرة اطلع عيلة
بس امركم لله انى ربنا ابتلاكم بمجنونة زيى



بس فى الاخر الكلام دا بينى وبينكم انى اعامل معاملة الاطفال مش تسيحوا لى بقى فى كل مكان ودا اعتراف منى بذلك ودا اعتذار منى لثندر اخويا اللدود اللى طلع اجن منى اكييييييييييد بس بجد انا مفتحتش المدونة الا علشان تفتح مدونتك غير كدا انا المدونة كلها ولا تفرق معايا لانى خلاص طلعت من عالم التدوين باللى انا عايزه باعز اصدقاء واخوات عرفتهم فى حياتى كلها

انا كنت هقفل التعليقات علشان بجد موضوع انى ابعد وارجع بقى بايخ جدا وبقيت انا نفسى بايخة جدااااااااااااا
بس هسيبها ومش تتعبوا نفسكم بجد فى الرد زى كل مرة واعتبروا البوست ولا كانه موجود
بس انا عاملته علشان اشكر ثندر اللى دايما مستحمل غباوتى وجنانى

الجمعة، 10 يوليو، 2009

وما احلى الرجوع اليه


وبدون أن أدري تركت له يدي. لتنام كالعصفور بين يديه.
ونسيت حقدي كله في لحظة. من قال إني قد حقدت عليه.
كم قلت إني غير عائدة له. ورجعت ما أحلى الرجوع إليه


محدش يفهمنى غلط الكلام ده مش متوجه لشخص يعنى وهيتوجه لمين ياحسرة ^_^
الكلام ده متوجه لبيتنا حبيب قلبى ياااااااااااااه اتارى بيتنا ده عزيز عليا واتارى انا كنت فى نعمة
ياسبحان الله من اسبوعين كنت مخنوقة ن البيت بشكل لا يطاق وكل شوية اشتكى من الدوشة والزيطة والزنبليطة
اللى بتحصل فيه كل يوم وعيال اخواتى العفاريت مصورة اللى مش بتهنئ الواحد فى بيته
بس بصراحة انا كنت مخنوقة من كل حاجة حتى المدونة والكمبيوتر نفسه وقولت هاخد شوية وقت كده اتعدل وارجع
وياااااااريتنى ما كنت فكرت الفكرة دى من اصله انا قولت يومين اغير مودى الكئيب طلعت شوية ظروف من تحت االارض خالتنى حتى مش قادرة انام بنت خالتى كانت تعبانة وكان لازم اكون موجودة معاها لانها مش بنت خالتى وبس دى اختى بالظبط وطبعا اسبوعين من دكتور لدكتور وبالاضافة لحرق الاعصاب اللى كنا عايشين فيه والحمد لله ربنا عدت على خير فى بيت خالتى اول مرة احس انى قاعدة فى منفى مش فى بيت ايه دا مش معقول ابدا الاحساس اللى حسيته مش عارفة يمكن علشان القلق اللى كنا عايشين فيه كنت حاسه انى عايزة امشى النهاردة قبل بكرة ولا يمكن علشان اول مرة اقعد عندهم
المدة الكبيرة دى ولا يمكن علشان اسبوعين من غير نت شئ صعب عليا :)
وما صدقت النهاردة لقيتها بقيت احسن شوية ولميت هدومى واستندلت معاهم جامد قولتلهم معلش انا لازم ارجع بيتنا
وطبعا وليه وعلشان ايه طيب خليكى معانا شوية وتحت الالحاح والاصرار قولتلهم بصراحة البيت وحشنى
اخواتى وحشونى ماما وحشتنى اولاد اخواتى العفاريت وحشونى
الكمبيوتر وحشنى والاهم من الكمبيوتر السرير اااااااااه السرير صحيح محدش يرتاح الا فى بيته وعلى سريره
كنت مرة قريت جملة للشيخ عائض القرنى بيقول (( فليسعك بيتك ))
بجد محستش بالكلمة دى الا دلوقتى انا مش بعرف ارتاح الا فى بيتنا وانى لو ملقتيش الراحة دى فى بيتنا ووسط اهلى واخواتى مش هلاقيها فى اى مكان تانى
بجد الحــــــــــــــــــــــــــــــــمـــــــــــــــــد للـــــــــــــــــــــــــــــــــــــــــه
على النعمة اللى انا عايشة فيها فى بيتنا بكل الدوشة والمهرجان اللى فى البيت اى نعم رجعت النهاردة اللى هو يوم الخميس يوم لمة العيلة وقررت انام ومعرفتش من دوشة اخواتى وعيالهم بس بردو احساس حلو وكانى كنت فى منفى ولا سجن وخرجت منه
انا اسفة على انى مكنتش قاردة اتابع المدونة ولا مدوناتكم واسفة اكتر انى مقدرتش اطمنكم وشكرااااااااااااا بجد لسؤالكم المستمر عنى وشكراااااااااا لكل الناس اللى اتصلت تتطمن عليا انا زى القرود مفيش حاجة بس الظروف اللى واحد كان فيها مكنش ينفع خالص يكون دماغى فى اى حاجة تانية ولا اقدر اتابع المدونة ببال رايق كده ومكنش فى نت فى المكان اللى كنت فيه علشان اعمل بوست فى المدونة اطمنكم انى بخير ومفيش اى حاجة انا اتعلمت الدرس اه والله
مش هقول زهقت من البيت تانى خاااااااااااالص انا عايزة شهرين اشبع من بيتنا بس للاسف عااااااااااااااااااااااااااااااا
انا لازم ارجع تانى لغاية ما بنت خالتى تخف خاااااالص وتكون احسن واحسن هحاول كل كام يوم انى ارجع البيت واتابع المدونات زى الاول والله بجد غصب عنى الظروف اقوى منى ادعولى لانى مش بنام اهئ اهئ اهئ