الجمعة، 5 يونيو، 2009

حرقة دم


لما الاقى اسبوع قبل زيارة اوباما وبعد زياته هنفضل اسبوع كمان الناس بتكلم وبتكتب والتليفزيون ينقل وناس تحلل وتفصص الخطاب والزيارة وكل شئ بجد يبقى حرقة دم


لان ببساطة شديدة جدااااااااااا وواضحة زى عين الشمس كده الحداية مش بتحدف كتاكيت ومشاكلنا وهمومنا وقرفنا واى حاجة بنعانى منها فى الوطن العربى حلها مش هيجى من برة احنا شعوب ساذجة بشكل لا يحتمل بنحط امال على حاجات عمرها ما هتحقق اذا كنا بينا وبين نفسنا هنونا على بعض الابن بيضرب ابوه وامه والاخ بيقتل اخوه منتظرين العالم اللى برة دى تعمل فينا ايه الراجل واضح جدا جدا وقالها مصلحة امريكا هى الاهم هيعمل اى شئ علشان مصلحة بلده حتى انه ينافق ويجمل فى صورته قدامنا



*
*
*
*


حرقة دم لما يجى ضيف لبيتك وبدل ما تفرح بزيارته وتقول مفيش اجمل من صلة الرحم تكتشف بعد مرور خمس او ست ساعات ان الزيارة بقيت اوفر اوى المفروض يعنى نكون ناس عندها شوية حساسة ونعرف ان فى ناس تعبانة قرفانة مخنوقة والمثل بيقول يابخت من زار وخفف هنا يتحول المثل بقى يابخت من زار وتقل ورزل وغتت كمان


*
*
*
*



حرقة دم لما الاقى موضة السرقة فى كل المدونات واحد معندهوش دم ولا اخلاق ولا اى احترام للغير يجى ببساطة ياخد فكر ومجهود ومشاعر واحاسيس ناس تانية علشان هو يفرح بكلمتين اطراء واعجاب بموهبته الفذة فى سرقة غيره


*
*
*
*


حرقة دم لما اجى افتح التليفزيون وقبل رمضان بكام شهر ولاقى الاعلانات المسلسلات وحصرى على قنواتنا الفضائية وهتلاقى اللى عندنا مش عند اى حد تانى وفى وسط كل الهوجة دى مفيش برنامج دينى واحد يوحد ربنا يقولنا رمضان جه هنا لازم اقول الله يرحمك يارمضان بجد افسدتم علينا فرحته من قبل ما يجى بشهور


*
*
*
*



حرقة دم لما اسمع بنت بتقول لما مامتها "اسكتى مش النهاردة عيد ميلاد ابراهيم "

تروح ترد عليها بكل شغف لسماع باقى الكلام وحصل فيه ايه؟؟؟

فى الوقت ده تسالنى مين ابراهيم اقولك مش تفهم غلط ابراهيم ده عقبال عندك نجم استار اكاديمى

اللى طبعا هى ومامتها بيتبعوه كل يوم لدرجة انها بعتت رسالة للبرنامج علشان يبعتلها كل جديد على موبايلها

تسالنى البنت دى كام سنة اقولك 12 سنة

ماشاء الله لما البنت شايفة امها كده بالذمة تتطلع ايه لما تكبر دى مفيش فى دماغها غير الاغانى والعيال الصايعة بتاعت البرامج وقدوتنا استار اكاديمى وسمعنى سلام اذا كان رب البيت بالدف ضرب


*
*
*
*


حرقة دم لما تلاقى اعلان بيقولك ابعت رسالة على الرقم الفلانى وسعر الرسالة 6 جنيه علشان اقدر افوز بشرف المشاركة فى برنامج "اسخف ادم شو" ابعت رسايل كل رسالة ب6 جنيه علشان اروح اتفرج على واحد بيقلد القرد فى كل حركاته علشان اتفرج على كمية سخافة تفوق اى سخافة فى العالم وتلاقى شوية ناس هبلة بتصقف وتتضحك على كل كلمة هنا لازم اقول ربنا يشفي


*
*
*
*


حرقة دم لما اكون مضطرة انى اكون برة البيت ومفيش نت انى اقعد قدام التليفزيون بالجبر

علشان الناس اللى انا عندهم بيحبوا التليفزيون وبيحبوا قنوات المسلسلات العربى

بعد مرور كام ساعة بكتشف ان نسبة ذكائى ده لو كان فيه بتقل بتقل لغاية ما تختفى وهما مش متضررين ابدا وبالعكس مبسوطين اوى وفى سباق علشان يلحقوا يخلصوا مسلسل ويقلبوا على اللى بعده


*

*
*
*



حرقة دم لما حد يمسك الموبايل بتاعى ويقولى هنقل شوية حاجات بالبلوتوث وبعد خمس دقايق فى التقليب فيه يكتشف انى حاطه على الموبايل المصحف وشوية اناشيد دينية على شوية اناشيد عن فلسطين يبصلى بقرف ويقولى ايه ده اللى انت حاطه على الموبايل مفيش اغانى مفيش صور مفيش فيديوهات امال الموبايل وكارت االميمورى لزمتهم ايه


*
*
*
*



حرقة دم لما الاقى مناقشة حامية جدا بين شوية شباب على الفيس بوك عن مين الاحسن تامر حسنى ولا حماقى لو الشباب كله بالحماس ده بجد فى كل حياتهم العادية كانوا خلوا البلد دى حاجة تانية خاااااااااااااالص





شوية حاجات هحرقوا دمى خلال اليومين اللى فاتوا


الأربعاء، 3 يونيو، 2009

هششششششش ولا نفس


هششششششششش ولا نفس مش عايزة دوشة واللى يدخل يزور المدونة يدخل ويخرج بالراحة من غير اى نفس انا عايزة اقعد شوية كده فى هدوووووء وراحة بااااااااااااال

من يومين المعتصم نزل بوست اسم حلم جميل بيتكلم فيه عن حلم الانتخة والسكينة
وبيقول ياسلام لو الدنيا دى مفيهاش موبايلات ولا كمبيوترات ولا نت تبقى الحياة حاجة تانية خالص
بصراحة انا قريت عليه وحسدت وحقدت كمان الناس بترتاح ازاى بس فى الزمن ده



انا اللى اسمى انا لا شغلانة ولا مشغلة وطول النهار والليل بهش دبان اللى بتنطط حواليا ده وبرضو مشغولة
مهو الانشغال ده مش انشغال مادى لا فى انشغال معنوى وده الاصعب والافظع ياساتر عليه


على الاقل لما بتلاقى حاجة تعملها بتتهد وتيجى اخر اليوم تتخمد على المخدة وتروووووح فى سابع نومة
انما الانشغال المعنوى والبال اللى مش رايق عمرك ما هتقدر تنام ابدا ممكن تغمض عنيك تعمل كل طقوس النوم
بس برضو مش هتقدر هتلاقى النوم تار من عنيك وعقلك مصحصح على الاخر كنت عاملة بوست من فترة عن النوم اسمه نوم الكلاب امل حياتى بجد نفسى اناااااااااااااااااااااااااااااااااااااااااااااااااااااااااام



طبعا هتقولولى ما تنامى هو فى حد مانعك انتى جاية تدوشينا ليه كل ما اقول لحد عايزة انام يقولى ماتروحى تنامى اليه اللى مانعك يعنى وهى دى حاجة صعبة ناس تانية بقى شايفة انى مش بقوم من النوم ابدا وذباب التيس تيسى قرصنى علشان كده ليل ونهار نايمة وهما مش عارفين انى ممكن بكون بالساعات على السرير ومش عارفة ارتاح حتى نص ساعة النوم والراحة والهدوء والسكينة والانتخة والكسل وكل المسميات دى مش لينا ولا فى بيتنا العزيز
واعتقد انه عمله ما هيكون فى بيتنا ابدا عااااااااااااااااااااااااااااااااااااا



انا يومى يبدا الساعة 12 بالليل وساعات يبدا من 2 او 3 بالليل الوقت ده الوحيد اللى الواحد ممكن يحس ببعض الهدوء النسبى فى شقتنا اصل الشقة عندنا دى مش بيت الواحد يرتاح فيه لااااااااااااا استحالة
ده شارع او سوق او مولد _ملاهى _ اى حاجة فيها زحمة وهيصة وبس
من بعد نص الليل لغاية الفجر انا على الكمبيوتر الفترة اللى بجد بقدر استفرد بيه على روقان
حتى اغلب البوستات بنزلها فى الوقت ده انا بقيت خلاص كائن ليلى قلبا وقاليا
بعد الفجر ولو ربنا كرمنى والنت فضل شغال مفصلش بكمل لغاية الساعة 7 او 8 الصبح
ولو فصل فى الوقت ده بقعد اقرا اى حاجة لانى استحالة اقدر انام مهما حاولت



النوم يبتدى يجى على 7 الصبح وتلاقى الجو حلو كده وجميل وهدوء مفيش غير صوت العصافير اللى واقفة على الشباك نص ساعة وتلاقى التليفون يعمل ترررررررررررررررررررررررررررررررن
طبعا انا عارفة مسبقا مين اللى بيتكلم وعايز ايه اكييييييييييد اولاد خالتى عايزينى اروح لهم عايزين يخرجوا فى مشوار بدرى وبطبيعة الحال عارفين انى مش نايمة وبكل برود يقولولى وانتى من امتى بتنامى اللى ينام ينام بالليل
صح والله عندكم حق وانا استاهل ضرب الجزم مهو لو احترم نفسى وانام زى الناس مجبش لنفسى الكلام
زمان كنت بخاف ازعلهم وانزل اروحلهم انما دلوقتى اتعلمت الندالة والاستندال ونبهت عليهم اى واحدة فيهم
هتتصل بيا بدرى هتشوف يوم اسود من قرن الخروب باذن الله سيبوووونى انام بقى



ده كان من فترة والحمد لله عدت الايام دى رايقين عليا ومش بيكلمنى الصبح ولو عايزين حاجة بيتفقوا عليها من بالليل
لكن ايه انا ربنا بعتلى اللى افظع منهم واحدة صحبتى انما ايه ماشاء الله استاذة فى انها تنكد على خلق الله
ومش تهنيهم على حياتهم طول الليل نتكلم على الايميل لما نافوخى تورم كده وبالعافية اقدر اهرب اقولها هروح انام
وياويلى وياسواد ليلى لو يوم مكنتش موجودة
تهرينى رن على الموبايل ورسايل لغاية ما افتح الايميل ومش بيحللها ترن غير على الوقت اللى المفروض هنام فيه
والحمد لله المرحلة دى عدت برضو بسلام انى قفلت موبيلى وارتحت وريحت بعد ما جالى فترة اكتئاب
لكن هل لغاية هنا والامور انتهت لا طبعا اصل انا امى داعية عليا بقلب جامد اوى اى نعم مطلعة عنيها الاتنين
وجبتلها ضغط بس هى بصراحة زودت الدعاوى حبتين تلاتة اربعة




الساعة 7 الصبح الباب يخبط تكون ميييييييييييييييييييييييييييييييييين
اختى جاية تجيب عيالها الاتنين علشان هتروح الشغل
طبيعى شئ عادى بيحصل فى كل العائلات البنات تتجوز وبدل ما نرتاح والعدد يقل تلاقى يحل محلها اولادها
المشكلة فى الاطفال دول الاطفال زى الملايكة واحباب الله بس مش عيال اختى دول معجونين بمية عفاريت زرق



الولد الصغير يويو 3 شهور ماشاء الله صرينة صراخ متواصل من ساعة ما يدخل البيت عندنا لغاية ما يجى يروح
صراخ صراخ صراخ ليوم الصراخ وعمره ما يضحك بيبكى على طول
وهو يصرخ وماما وراه ولو مش بتزعق فى العيال بتهشتكهم وبتلعب معاهم اصل امى تمووووووووت فى العيال



اما الكبيرميدو 3سنين تحدث ولا حرج ماشاء الله عليه ليه مستقبل باهر فى الاجرام والتشرد الاطفالى
ميدو ده اعتقد ان العفاريت مش هتقدر تعمل اللى بيعمله بنكون جيوش مجيشة وراه وعنينا فى وسط راسنا منه
لاحسن يعمل حاجة فى نفسه او فى اخوه الصغير من الغيرة

الكمبيوتر_ الموبايل_الا دراج _الكتب _ البوتاجاز _ حنفيات المية انا نفسى مش بسلم منه ومن قلة ادبه وماشاء الله ماشاء الله قاموس شتايم متحركة مش بيفتح بقه ده الا علشان يشتم ويطول لسانه فى الوقت ده النوم راح خلاص ما احنا فى عذاب لغاية الساعة 2 بعد الضهر لما امهم تيجى تاخدهم اطنننننننننننننننننش انا على الاخر واسيب ماما واختى اللى اكبر منى يتصرفوا انا مالى انا لو قمت همسك العيلين دول ارميهم من الشباك


طيب تيجى الساعة 2 الضهرهنا نتنفس الصعداء ونقول الحمد لله الهم انزاح لالالالالا ابداااااااااااااااااااا
تبدا النبطشية التانية جونى هانم بنت اخويا اى نعم البنت هادية ونادية ومفيش فيها غير لسان بس التانية بقيت اخر شقاوة وعايز كسر دماخها اللى زى الجبس دى مش عارفة العيال دول جايبين العصبية والنرفزة والدماغ النشفة لمين :))


وهكذا لغاية بالليل يتجمعوا اخواتى كلهم عندنا لغاية بعد نص الليل ده فى اغلب الايام ونقول اسكت ياود_ اسكتى يابت
اتهد يازفت_ اتهدى ياغرابة _مفيش فايدة وانا اللى بصرخ فى العيال اصلى البعبع اللى بيخافوهم بيه
((لو مسكتش انده على ايوشة تزعق فيك انت فاهم ))
لما العيال الحمد لله كرهونى وبصراحة هما عندهم حق انا اتكره انا عاملة زى الغرابة فى البيت هيرا الشريرة محدش بيصدق انى ممكن اكون كده فى البيت صراخ وزعيق وشخط ونطر



وفى خلال المعمعة والاحتلال والحروب اللى فاقت حروب العالمية الاولى والتانية نلاقى عيال الجيران طلعوا
موكا ورورو والواد بوتا ماشاء الله السوق اكتمل

يوم الخميس بقى لمة العيلة ولمة العائلات كلها فى شارعنا والشوارع المجاورة مش كفاية علينا المهرجان
اللى فى البيت لااااااااااا ازاى نلاقى عيال الجيران واحفاد الجيران عندنا اه والله تقولش فى سكر فى الشقة عندنا لدرجة انى بحاول ادور على خرم ابرة اقعد فيه خلاص بقى احتلال رسمى والكمبيوتر كمان مش بيسلم من الاحتلال ده هو كمان
وباقى الايام مش بتخلوا بقى يوم خالتى وعيالها الغربان يوم عمتى وعيالها وهكذاااااااااااااااااااااااااا


لدرجة انى طلبت من بنت خالتى تتدينى نوع منوم فضلت تتدينى فى محاضرة هتتعودى عليه ومعرفش ايه
وانتى مش بتريحى نفسك وانتى اللى تستاهلى وعاشت دور الدكتورة عليا حتى لما بروح ابات عندهم بقول ارتاح شوية
مش بعرف بيجيلى قلق لانى باصحى من اقل صوت



الادهى بقى ان الاسبوع ده جالنا ضيوف من مصر والدنيا كلها بقيت عالم عيال عيال عيال
تفتح الحنفية تنزل عيال ترفع المخدات تلاقى عيال تحتها بخاف افتح التلاجة الاقى حد فيها
مهو العيال دى عايزة تسد جوعها اكيد علشان كده بقول انا فى احتلال ولما اتكلم مع ماما واقولها مينفعش كده كل واحدة تلم عيالها فى بيتها تهب فيا طبعا مش احفادها ونتفلق انا والبت الغلبانة اختى دى طيب شكلنا مطولين فى البيت ده كام سنة لقدام
نفضل فى العذاب ده لغاية امتى ولا حياة لمن تنادى بتكلم نفسك




واخيرا قررت الرحيل معرفش هروح فين بس بجد انا هرحل فى اى مصيبة ارتاح فيها شوية
اللى يعمل فيا جميل بجد يستضافنى اسبوع انام فيه وارجع كائن نهارى تانى زى زمان
ودلوقتى اروح اقتل القطة بنت القطط دى اللى فى المنور علشان من بالليل وشغالة تنونو لما قرفتنى



ملحوظة : معلش هتوقف عن التدوينة الدينية شوية لانى بجد مش عارفة اركز ابداااااااااااااااااااا