الثلاثاء، 31 مارس، 2009

حوار مع ايوشة



فكرة جديدة ولاول مرة حل التاج بالصوت

شوفوه عند حازم فى مدونته



تاااااااااااج





ادبست فى تاج من اسافو ومفيش بعدها بساعتين ادبست فى نفس التاج من عاشقة الرومانسية
التاج ده الناس بتحسه حاجة صعبة مش عارفة ليه او يمكن بيجى فى وقت الواحد فيه مش فى مود يجاوب عليه بسهولة
المهم وانا بقلب فى النت لقيت موضوع فى مدونة بيتكلم عن التاج وانه بيعرف التاج مش زى مااحنا فاهمين انه التاج اللى بتلبس على الدماغ
Tag و ده اسم لعبة، زي استغماية كده، الولاد يجروا و و احد يجروا وراهم، و لما يلمس واحد، و يقوللوا
tag, u'r it
يبقي هو اللي عليه الدور (هواللي فيها زي ما كنا بنقولها و احنا صغيريين)
و بالتالي فدي مجرد لعبة، اسمها علي اسم اللعبة، و اللي يمررلك التاج دي، زي الي بيلمسك في اللعبة علشان يبقي انت اللي عليك الدور اقرا البوست هنا

نبدا التاج بئا
اسمك؟
مشيها آيوشةعلشان احنا صعايدة وعليا تار


المشهور بيه وسط اصحابك؟
آية,آيوشة ,آيوش ,يويو, ايويا ,وساعات توتا

سنك؟
ليه الاحراج ده بس ياجماعة
لسه صغيرة اوىىىىىىىىىى
22 سنة وشهرين



مجال دراستك؟
خريجى تربية يعنى مربية اجيال


اسم مدونتك؟
عندى اتنين احاسيس آيوشة ودى عبارة تقريبا عن شوية الخواطر الهبلة اللى بكتبها
والتانية تخاريف ايوشة ودى عبارة عن شوية التخاريف الهبلة اللى بكتبها

صورتك الرمزية فى المدونة بتعبر عن ايه؟
جدااااااااااااااااااا واخدت وقت كبير لما استقريت على الصورة اللى تعبر عنى
يعنى صورة بنت صغيرة بتفكر وجنبها ورقة وقلم
انا كده ساعات بحس انى مجرد طفلة مفكرة ومش عايزة اكبر
بس ياسلام لو كانت البت بنضارة كانت كملت وخصوصا ان بمووووووووت فى الضفاير


هل فكرت فى اغلاق المدونة ؟ والسبب؟
يوووووووووو كتيييييييييييييييير انا اصلا قفلت قبل كده بتاع اربع مدونات باكتر من اسم
والسبب انى بكتئب بسرعة واى موقف يمر عليا فى حياتى بياثر على كل حاجة فى حياتى
وفى اللحظة دى بفضل ابعد عن كل حاجة واعيش لواحدى شوية كده اراجع نفسى واتقرب من ربنا
ولما اهدى واكون احسن برجع تانى


ايه رد فعلك لو حد قل ادبه فى تعليق ؟
محدش يقدر انا اعلقه على باب المدونة ال يقل ادبه ال هههههههه
لا بجد المشكلة مش كده انا اصلا كل بوستاتى مش هيكون فيها فرصة لقلة الادب يعنى
والحمد لله عالم التدوين اغلبه ناس محترمة جدا وعلى درجة عليا من الوعى
انما لو مرة حصلت اكيد هرد بكل ذوق وادب علشان مش بحب انزل اعيش شعور الاحساس بالسوء لما اعمل نفس الغلطة وارد عليه بطريقة اوحش
يعنى اللى بيغلط كله على دماغه ومن ميزان حسناته





اسوأ مدونه؟
كتير وخصوصا مدونات الشواذ والملحدين والمجرمين اللى مش وراهم حاجة غير مهاجمة الدين



هيحصل ايه للايميل بعد ماتموت؟
ولا حاجة بس انا هدى الباس ورد بتاعى لاختى او لاقرب حد منى ولو حصل حاجة هتتدخل الايميل تبلغ الناس اللى عليه وكمان هتقفله


اديت الباسوورد لحد قبل كدة؟
مرة واحدة وكان الايميل فاضى استبن يعنى مش ايميلى الاساسى وبعدين لغيت الايميل
الحمد لله ايميلاتى مش ازمة يعنى انها الناس تشوف اللى فيها
بس طبعا مش بحب اى حد يشوف الايميلات اللى ضايفها وخصوصا لو ايميلات اصدقائى البنات


السفر بالنسبة لك ايه؟
حلم جميل مستنية يتحقق مع الانسان اللى ربنا هيكرمنى بيه
طول عمرى بسمع الكلمة دى فى البيت لما(( تتجوزى ابئا اتفسحى وسافرى براحتك مع جوزك))
وادينى مستنية لما هطق ان شاء الله
انا بحب السفر جداااااااااا بس الظروف لا تسمح انى اسافر لواحدى طبعا



الموود بتاعك ايه ؟
فى الاغلب مسخرة ههههههههه بموت فى الضحك والهزار وعلى الحقيقة بكون فظيعة وبقلب كل حاجة ضحك وهزار
لكن فى وسط ده كله بكون حزينة دايما وكئيبة ومتشائمة ولحظات متفائلة وكل امل
من الاخر متناقضة شوية ويمكن حاجة مميزة شخصية مش على وتيرة واحدة

بتعمل ايه فى وقت فراغك ؟
على النت دايما وفى اغلب الاوقات بس ساعات بحاول ارسم بحاول اقرا بخرج لزيارة قرايبى



الأكلة المفضلة ؟
بحب كل حاجة الحمد لله انا ذواقة فى الاكل وبعشق الطبخ جدا
على الرغم ان شكلى مش يبان عليه بس بحب الاكل مووووووووووت


الصفات التى اخذتها من والدك؟
الله يرحمه اكيد العصبية والعند والتمسك براى
ونشفان الدماغ اهم الحاجات اللى اخدتها من والدى

الصفات التى اخذتها من والدتك ؟
كتير بحكم انى قريبة اكتر من ماما من زمان
تقريبا مشابه ليها فى كل حاجة نسخة مصغرة منها
مصرفة زيها _ الطيبة اللى بتظهر عليا ساعات _ الضحك الكتير والهزار
حتى تقريبا المواقف اللى كانت بتعملها فى جدى واخواتها انا بعملها فيها دلوقتى

اكتر ست حاجات بتكرههم ؟
اولها المعاصى واغضاب ربنا
الكدب
الخيانة
النفاق
والغرور
والظلم

اكتر ست حاجات بتحبهم ؟
البراءة
الحب
الخير
العدل
الامل
الرحمة



شخصيتك نوعها ايه ؟
انا واقعية جدااااااااااا وساعات قليلة بكون رومانسية حالمة بس مش بستمر كتير فى ده
برجع للواقعية بسرعة ويمكن دى عاملتى مشاكل كتير بسبب انى مش بعرف اتفائل



لماذا دخلت عالم التدوين من الاساس؟
مش عارفة بس انا دخلت التدوين فى الاول مجرد بعلق على مدونة غادة عايزة اتجوز
وبعدين عملت المدونة لنفسى اكتب اللى بحبه من حاجات قريتها وعايزة ارجعلها فى اى وقت
وبعدين خدت الخطوة ونزلت فيها بوستات ليا والحال مشى يعنى
بحب اسمع اراء الناس وبحب يشركونى فى كل موقف فى حياتى

احلى جملة قيلت فى وصف مدونتك؟
دمها خفيف بحس بالسعادة لما اقرا التعليق ده
بترجعلى الامل فى نفسى شوية انى لسه بعرف اضحك وضحك غيرى

احلى بوست كتبته؟ ضع اللينك ثم اذكر لماذا؟
انا بعتبر كل البوستات عجبانى والا مكنتش نزلتها
بس بحب مدونى احاسيس آيوشة بكل بوست فيها لانها من جوا قلبى
اما فى تخاريف بوست مقاس جزمتى المحروسة ونفسيتى المهزوزة
لانى كتابته فى نص ساعة ومكنتش متخيلة هكتبه بالشكل ده


افضل مدونة قرأتها؟
كتير والا مكنتش بتابع المدونات باستمرار
انا كل مدونة عندى فيها حاجة مفيدةوشئ جديد
وكنز مدفون بحب ادور كل يوم عن حاجة جديدة

افضل بوست قرأته؟
كتير بردو بس بحب البوستات الاجتماعية
طبعا بوستات الدكتورة ستيتة حبيبة قلبى
وكان فى بوست كاتبه اشرف حمدى بيتكلم عن الشواذ باسلوب ساخر عجبنى جدا
اسمه ملوخية بالعسل


الشغل بالنسبة لك ايه؟
فى الوقت الحالى ضرورة ملحة علشان اخرج من جو الملل اللى انا فيه
انما انا بيتوتية مش بحب الشغل ولا بفضل شغل الستات

الانترنت بالنسبة لك ايه ؟
دلوقتى حياتى كلها تقريبا

تمرر التاج ده لمين ؟

ماما فراغ

ثندر

غربتى
دهب
حروووف
زينب
استاذ محمد القويرى

المعتصم

عبد من عباد الله

محمد غالية

حازم النبراوى

صوت من مصر

ومش عايزة انسى حد

لو افتكرت حد كمان هروح لغاية المدونة عنده اديله التاج

الاثنين، 30 مارس، 2009

قالولى بتحب مصر... قولت انا خايف


كنت رايحة انام بس مش جالى نوم سمعت خبر عن الافراج عن الضابط اسلام نبيه المتهم فى قضية تعذيب مواطن وهتك عرضه واتحكم عليه ب3 سنين سجن وخرج من السجن وهيرجع يزاول عمله مرة تانية بس الحكومة كتر خير هتغير بس مقر عمله وتنقله لمكان تانى وبما انى وعدت انى مش هعمل بوست واكتفى بحرقة الدم قولت اتصفح فى النت شوية ودخلت اليوتيوب وشفت شوية فيديوهات عن تعذيب المواطنين وازاى بتوصل درجة الاذلال فى الوطن

ازاى اتحول الناس دى لحاجات تانية مينفعش نسميهم بشر ولا انسان مش هقول دى ناس مريضة نفسية علشان مش نعفيهم من العقاب دول اشخاص مجرمة وسفالة كمان وفاكرين انهم اقوى من الدنيا بس ربنا اقوى من كل البشر وانتقامه هيكون عسير لانتهاك حرماته بالشكل ده اللى يغيظ اكتر ان الضابط بعد ما افرجوا عنه باباه بيقول ((ان اسلام اتعلم الدرس وهيرجع يقف على رجليه تانى ومش هيستسلم ))

ياعين امه يااخويا بجد صعب عليا

مهوا لوحضرتك عرفت تربى اسلام كويس اوى مكنش اسلام ننوس عين مامته اللى فرحان بيه ده يعمل كده دى نتيجة لتربية سيادتك وامثالك للاشكال دى وبصراحة مستخسرة اخسر من حسناتى القليلة فى شتيمة الناس اللى زى كده وهتكتفى بانى كتبت حاجة بعد ما قريت قصيدة للشاعر المصرى الفلسطينى تميم البرغوثى بتقول



قالولي بتحب مصر فقلت مش عارف

المعنى كعبة وانا بوَفْد الحروف طايف

وألف مغزل قصايد في الإيدين لافف

قالولي بتحب مصر فقلت مش عارف

أنا لما اشوف مصر ع الصفحة بكون خايف


ما يجيش في بالي هرم ما يجيش في بالي نيل

ما يجيش في بالي غيطان خضرا وشمس أصيل

ولا جزوع فلاحين لو يعدلوها تميل

حكم الليالي ياخدهم في الحصاد محاصيل

ويلبّسوهم فراعنة ساعة التمثيل

وساعة الجد فيه سخرة وإسماعيل

ما يجيش في بالي عرابي ونظرته في الخيل

وسعد باشا وفريد وبقيّة التماثيل

ولا ام كلثوم في خِمسانها ولا المنديل

الصبح في التاكسي صوتها مبوظُّه التسجيل

ما يجيش في بالي العبور وسفارة اسرائيل

ولا الحضارة اللي واجعة دماغنا جيل ورا جيل

قالولي بتحب مصر أخدني صمت طويل

وجت في بالي ابتسامة وانتهت بعويل







وده كان ردى على المواقف والمشاهد اللى شفتها وجابتلى اكتئاب




قالولى بتحب مصر قولت انا خايف

لاحسن اعبر عن حبى وانا شايف

سجون ومعتقدات بيها البشر طايف

وبتعذيب وهتك للاعراض فى البلد لافف

لكل مبدا وقيمة الوطن حاذف

يامصــــــــــــــــــــــــــــــــــر

بكره فيكى احساس الغربة وغدر الزمان

بكره الظلم المعشش فى كل مكان

بكره السلطة وسطوة السجان

تعيش فيها لما ضعيف وجبان

انسان معدوم غلبان وكحيان

ويتحكم فيك بشر فى صورة حيطان وغيلان

لا بقى فيكى نديم ولا خيلان

وهرب صوت عصافيرك على الاغصان

وعشش بين اراضيكى من الالاف غربان

وهرب فيكى كل معنى جميل واحسان

امتى بس هتفوقى وتنفضى الاحزان





وفى النهاية على راى اغنية شادية فى فيلم احنا بتوع الاتوبيس


(( عملتوا ايه فى الدنيا دى آه ياولادى ... ياعمر متغطى بحضنى.... آه ياولادى..... آه ياولادى))

السبت، 28 مارس، 2009

ع عبعال




تعالى ياعبعال نشموا الهوا شوية


قوليلى اللى انتى رايداه وعايزة تتجوزيه اسمه ايه0


كل واحد ليه هواية ياعبعال انا لما اخش الحمام بحب اغنى انت بتغنى بتقول


بالك ياست سكينة من شهرين فاتوا دخلت الحمام استحمى حمية العيد الكبير انا يدوب قولت ياليل ياعين صوتى جاب الميدان

العين سيبك من ليل وخليك فى العين0اول حرف من اللى بحبه عين


وكتاب الله المجيد


عوضين

عين عين


سهليها شوية


عين عبعال


ايوه انا عارف اسمى بس انتى سهليها شوية0

مهى هتيجى ان شاء الله

عين عبعال


عين الصيرة


عين عبعال عين عبعال


ايوة عرفته اول عرف من اسمه عين.......... عااحمد


عااحمد0


انت لما بيندهولك يقولك ايه؟؟؟؟

ياحضرة السول وساعات ياشاويش والاصل امباشى

امباشى فى ايه؟؟؟؟


فى الحكومة


الاسم ايه؟؟؟؟؟


قسم اللبان


انى بيقولولى يا سكينة انا لما امى زلظتنى سمونى سكينة ولما يدلعونى يقولولى روحى يابت ياسكويننا تعالى يابت ياسكونينا انت بندهولك بيقولك ايه؟؟؟؟


وكتاب الله المجيد اللى يقولى تعالى ياسكويننا اخذق عنيه الاتنين0



المحروس اسمه ايه؟؟؟


المحروس ابن عمى تعرفيه

0

يالهوتينننننننننننننننننننننننننننننى0

انتى اللى مش عارفة تسالى طيب اسالى وانا اجاوب


واتزرونوم

؟؟؟؟؟؟؟

عبدالعال جرجاوى عوف عبد العال

عرفتها بالاعنجليزى


طب انا دلوقتى اسمى عبدالعال ايه دخل اسمى فى حرف العين

0

بالهوووووووتينى انت كل اسمك عين

عبعال جرجاورى عوف عبعال

وكتاب الله المجيد يابت انا فاهمك بس بتقل ياسكينة

0

طب وتتقل ليه جاتك مصيبة 0


اللى رايداه وعايزه تتجوزيه اسمه عبدالعال ..............على اسمى0!ياخرااااااااااااااااااااااااااااااااااااااااااااااااااااااشى0

بيشتغل فين



فى البوليس

مالا الخاذوق ياسكينة اللى رايداه وعايزة تجوزيه يكون امباشى زيى0


اطلع برة ياعبعال علشان انا عندى الضغط جاتك قنبلة جاتك نيلة 0


مالك ياست سكينة انتى كنتى زى الوردة المفتحة



وانت اللى قافلتها ماانا مفتحة زى ماانا

افهههههههههههههههههههههههم


افهم ايه


انى انا بحبك انت ياطور يابهيم 0


كمواااااااااااااااااااااااان وكتاب الله المجيد يابت



الا الخاذوق لتكون مفهمتش



لا دانا افهمها وهى طايرة 0وساكتة ليه ياسكينة

يانااااااااااااااااس يااااااااااااااااهو انا بحب الامباشى عبعال وعايزة اجوزه 0

قولت ايه ياسعادة الباشا نجيب المؤذون



ليه هتجوزى



يالهوووووووووووووووووتيننننننننننننننننننننننننننننننننى0




المشهد ده كنت بسمعه امبارح وفكرنى بموقف حصل لواحدة صاحبتى بتشتغل مع شاب من الواضح انه معجب بيها وهى

كمان معجبة بيه وبصرف النظر عن تفاصيل الموضوع كلامها معاه بيكون شديد شوية كل ما يحاول يكلمها وساعات

بتانب نفسها انه يمكن بطريقتها دى بتحسسه انه مش عايزه وانه خايف يصارحها بمشاعره لتصده


حوالت باكتر من طريقة تبين بيها انها معجبة بيه يعنى لما اتقدملها اكتر من واحد ومحصلش نصيب كان بيسالها باستمرار

عن اسباب رفضها للعريس ولما يعرف ان فى موضوع يتضايق ويقلب وشه


مرة اخدت اجازة لمدة كام يوم وفضل يقنع فيها بلاش الاجازة وانك مش هترتاحى فى البيت لكن هى اصرت واخدتها

ولما رجعت كان بيعاملها بطريقة تشكك اكتر من الاول وفى الاخر قررت تضرب فى وشه القنبلة الاخيرة اصل بعيد

عنكم البعيد غبى الظاهر


قررت تسيب الشغل وكان قرار لانها اتعلقت بيه فعلا ومينفعش يفضل يسبل ويتغزل فيها ويلمح من غير خطوة ايجابية

وبما انها رومانسية زيادة عن اللزوم اتعلقت ومش بتعرف تخبى للاسف مشاعرها بس ازاى يعنى الانسان ده مش حاسس

انها هى التانية معجبه بيه اذا كان الشاعر بيقول ان المحب تفضحه هعيونه لو واقفين فى وسط الالاف عنيهم هتتلاقى مع

بعضها الحب ده حاجة غريبة بيجذب اتنين لبعض وتحس باللى بتحبه وحتى لو مش شايفه

ولنا هنا واقفة ((( محدش يشغل ذكاءه الحاد ويقول ودى تعرف منين الكلام ده ودى اكيد انتى


مش عايزين ذكاوة انا لاجربت ولا اتهبتت ولا بشتغل من اصله علشان ترتاحوا))

السؤال هنا:1_ ايه اللى يخلى شخص يعمل كده مهوا حاجة من الاتنين لما بيستهبل عليها وبحاول يضحك عليها وبس ومش ناوى ياخد اى خطوة


2_لما البعيد غبى وعنده خوف يصارح لاسباب لا نعلمها


بس انا دايما بقول اللى يحب حد يحارب الدنيا كلها علشان وياخد الخطوة اللى تقربهم من بعض ولا يفضل يستغبى لما

يجى فى يوم يعمل زى وائل جسار ويغنى يوم زفافك مقدرتش امسك دمعتى


هى اخدتت قرار تسيب الشغل وتبعد عن الانسان ده وبصراحة انا كمان شجاعتها على ده علشان اللى عايز ياخد خطوة كان خدها من زمان ولا هوا مستنى يعنى تيجى تقولى تعالى اخطبنى يااسمك ايه


ده قمة الاستهبال اذا كان مش عارف ياخد قرار فى اول قرار يثبت حسن نيته يبئا مش يستاهل يتفكر فيه ويتستاهل ضرب بالجزم انه علق البت بيه بكلامه وطريقته 0




الخميس، 26 مارس، 2009

مطر الاحزان







غرابـــــــــــــــــــــــى الحزيـــــــــــــــــــــــــــــن

اعلم انك فى نظر البشر نذير للشر والشؤم اللعين

فتـحت لك نافــذة حيـاتى لبعـض الوقـــــــــــــت

وليـــــــــــس لطــــــــول العمر والسنيــــــــــن

طمعت فى عطفى وعشقى للآلآم والآنيــــــــــــن

جلبـــــــــــــت اصـدقـائــــــــــــك الى شرفتـــى

ولــم تغادر وقــررت البقـــــــاء وحلفت اليمين

تـــــــــــــــالله لسوف أحيــــــــــــــا هنــــــــــا

واجلب بصوتى من كل صوب وحدب آحزان السنين



كلمة قريتها مرة لمحمد ((الفارس الملثم )) ربنا يرحمه ويسكنه فسيح جناته


ليه ساعات كتير بنحس بدموع كتير جوانا خنقانا نفسها تنزل مش عارفين ليها سبب او يمكن لينا اسباب كتير للدموع بس احنا كنا عاملين نفسنا اننا مش واخدين بالنا لكن فى لحظة بتتجمع الحزن جوانا على شكل غمامة مستنية المطر





طيب واللى احزانه اتحولت لسيول ومش عارف يوقفها يعمل ايه مستنى فى لحظة الشمس تنتصر على الغيوم اللى فى قلبه وتشرق وتجيب معاها السعادة او حتى تقاوم وتخرج من بين الغيوم لكن الظاهر الشمس يئست من المقاومة ضعفت قوتها وقررت الاستسلام

من صغرى بحب المطر على الرغم انهم كان بيمنعونا نخرج فى المطر وبتكون الشوارع كئيبة والناس بتجرى لبيوتها

وانا لواحدى فى البلكونة حابة الجو ده مكنتش متخيلة انى لما اكبر هفضل فى عزلة امطار دموعى زى زمان

اكيد الدموع بتريح بس مش بتحل مشكلة وانا زهقت من الكآبة والغيوم اللى فى حياتى

كان نفسى شمس احلام تشرق بجد وتقاوم بس هى نفسها نورها وحرارتها انطفت من الدموع