الثلاثاء، 6 أكتوبر، 2009

حب ايه ده اللى من غير اى حرية ؟؟؟




بيقولوا النهاردة مر 36 سنة على حرب اكتوبر , وبيقولوا برضو اننا انتصارنا دول هما اللى بيقولوا مش انا اللى بقول , وبيقولوا كمان اننا عبرنا ورفعنا العلم المصرى ورجعنا ارضك ودفعنا غالى قوى يوميها دفعنا دماء اولادك _ دفعوا اروحهم بكل حب ومن غير مقابل ادوكى اروحهم ودافعوا عنك لاخر نفس فى حياتهم وسابوا دمائهم تسيل على ارضك وانتى شربتيها بس انت طلعتى ليه جاحدة كده شربتى الدم ونسيتى اللى حصل وكل سنة بتمر بنتنسى اللى حصل اكتر واكتر ولا كأن دول اولادك ولا كأن دول ضحوا بكل حياتهم علشانك .
*
*
طيب تفتكرى لو رجع الزمان بينا تانى كنت هتلاقى نفس التضحية لو رجعوا وشافوا اللى حال اللى وصلت ليه وان دمائهم راحت هدر على ارض بقيت مش ملكنا ولا لينا الحق نسال حتى عن اللى صابها ولا حتى لينا الحق نفتح بقنا ونقول جاريلك ايه ؟؟؟
*

*
بقيتى مش بتاعتنا يامصر بقيتى مش بلدنا زمان سيناء ضاعت مننا وحسينا ان جوانا جرح مش بيلتم ابدا الا لما رجعت بعد سنين من الاحتلال تفتكرى دلوقتى محتاجين كمان قرن علشان نرجع مصر كلها ونحررها من الاحتلال اللى خانقها وبيموتها ببطئ .
*
*

ساعات بحس ان اسرائيل ضحكت علينا ورمت لينا طعم واحنا صدقناه قالت لنا يلا تعالوا حاربوا ورجعوا سيناء تانى وافرحوا بانتصاركم وافرحوا بانكم قولتوا للعالم كله احنا شعب يقدر يعمل المستحيل ويقهر الاسطورة اللى كانت فاكرة نفسها لا تقهر _علشان تيجى بعد 36 سنة تتضحك علينا واحنا مش بنفكر العزة والنصر والكرامة غير يوم واحد فى السنة نسمع شوية اغانى على كام فيلم وباقى السنة كرامة منداسة بالجزم تانى يوم بالظبط ننسى ونرجع تانى نلف فى الطاحونة اللى عايشين فيها فى مصر ونرجع لكسرة النفس والذل .
*
*
تخيلى حتى السنة دى اليوم الوحيد اللى مفروض نحس بالفخر والعزة والانتصار ملقتش حد حاسس بكده بقى مفيش جوانا نفس يمكن علشان نفتخر بمجد زايل ولا يمكن ابتدينا نفوق ونصدق اننا اتخدعنا وانهم كدبوا علينا _سنين بيربوا فينا ويملوا دماغنا بانتصار مش حقيقى ويقولنا فى كتب التاريخ شفتوا جدودكم عملوا ايه ونجحوا يعيشونا فى الماضى علشان ننسى الحاضر .
*
*
ساعات بحس اننا اتحررنا من محتل واضح وظاهر لمحتل مننا فينا خبيث بيتلون كل يوم بشكل مختلف علشان مش نقدر نحدده يااااااااااه اصعب شئ الغربة جوه الوطن و اصعب احتلال يكون احتلال الوطن ليك .
*
*

عبرنا ورفعنا العلم فى 73 وكل يوم بشوف العلم بيختفى من جزء من ارضك ومعرفش بيروح فين وشكل وطباع مصر الحقيقية بيختفى مع العلم وبيتحط اعلام تانية وبنطبع بطباع تانية غريبة علينا ومش لوننا .
*
*
بيقولوا ان فى حرب اكتوبر كان الدول العربية كلها مشاركة فى العرب "العراق- والادرن- والمغرب- وتونس -وسوريا وليبيا -والادرن- والسودان" هو ده اكيد كان خيال الدول العربية كلها متوحدة ومتجمعة على كلمة واحدة وكلمة حق مش باطل تخيلوا بقى احنا عاملنا ايه لما انتصارنا فككنا الوحدة اللى كانت موجودة وكأن الانتصار فى الحرب نهاية العروبة اللى بتغتصب كل يوم واحنا واقفين نتفرج وياريت من برة لا مننا فينا بقينا اعداء لبعضنا بقى بدل الحب والوحدة بقي الكره والفرقة .
*
*
حرب اكتوبر كان بداية اقوى عصور الظلام ليكى لان بصراحة انتى عمرك ما شفتى نور كل واحد بيجى بيسجنك اكتر من اللى قبله ولا كانك امهم وليكى حق عليهم فى حد يسجن امه ويحطها فى بير ويقفل عليها فى حد يوقف جلاد لاخواته تصورى طلع فيه تصورى كمان ان الام ممكن تجيب اولاد عاقين تجيب اولاد كل ما تفتكر انها تعبت اد ايه علشان تجيبه لنور تلعن اليوم اللى فكرت تجيبهم فيه .
*
*
انا كنت عاملة بوست وبعدين مسحته علشان حسيت انى قسيت قوى عليكى فيه يامصر وانتى مهما كان مش لازم نقسى عليكى كفاية اللى فيكى انتى ست عجوزة كل امراض الدنيا معششة جواكى سرطنات الدنيا كله اتجمعت فيكى علشان كده مسحت الكلام القاسى كله اللى كتبته وقولت هكتب تانى مس ههنيكى على الذكرى السعيدة دى لانها فى وجهة نظرى مش سعيدة ابدا بل بالعكس تعيسة جدا بتقلب علينا مواجع وبتفكرنا بايام مضت وولت وتقريبا مش هترجع تانى بتفكرنا بشعارات واحلام كدابة وبتفكرنا بقادة افتكروا البلد تكية او عزبة يقطعوا ويوزعوا فيها زى ما هما عايزين بتفكرنا اننا بقينا من بعد الحرب ومعاهدة السلام مقطوعين وبتفكرنا اننا نسينا اخواتنا فى اماكن تانى علشان نفرح بانتصار مزيف .
*
*
ولا اقولك كل سنة وانتى فى سجن يامصر كل سنة _وانتى سجن لاولادك بايدين اولادك _كل سنة وانتى من فقر لفقر ومن جوع لجوع _ومن فساد لفساد _ومن ظلم لظلم _ومن فرقة لفرقة _ومن عصر ظلام لعصر اشد ظلمة انا يئست انى اشوف يوم حلو فيكى وانتى كمان يئستى من انك تفرحى يوم واحد فى حياتك .
*
*

معلش انا كان لازم اتكلم واقول كل اللى عايزة اقوله بس هقوله من قلبى وهلغى عقلى علشان ده اللى انتى عايزه عايزانا عايشين من غير قلب ومن غير عقل كمان بس صدقينى انا ممكن الغى عقلى لكن قلبى مش هقدر علشان قلبى مليان بحبك وصعب انى الغى قلبى لانى هموت لو حبك فى قلبى مات بس حب ايه ده اللى من غير اى حرية ؟؟؟

هناك 27 تعليقًا:

  1. طب بصي ياايوشه
    بصي كويس
    هتلاقي ان مصر ملهاش دعوه
    هتلاقيها ضحيه في وقت الحرب ووقت السلم

    احنا اللي ضيعناها وبعدين رجعناها وبعدي نسيناها

    لما اكتوبر يتحول ليوم واحد بس بندور عليه في السنه عشان ناخده اجازه

    لما ننسى ان احنا في اليوم ده كان فيه حاجات بجد لو رجعت تاني هنفتكر تاني ونرجع زي الأول واحسن

    بس دلوقتي مش وقت صحيان
    البهوات عايزنا ننااااااااااااااااام

    ردحذف
  2. اكيد يابشمهندس مصر ملهاش دعوة واكيد ان احنا اللى ضيعناها واللى ضيعها اكتر اللى متولين امورها وسايبنلهم الحبل على الغارب يعملوا ما بدا لهم ومصر تكون ايه من غير ناسها المكان مش ينداس مش ناس علشان كده لما قصدت مصر بقصد ناسها واهلها

    ردحذف
  3. اما عن اكتوبر فهو يوم عظيم وابن لزينة وملوش دعوة بالوكسات اللي بعده

    مش احنا مكتئبين النهاردة؟
    مش كل الشعب بيقول حب ايه ده اللي من غير حرية؟
    طيب ما تيجي نشوف من غير اكتوبر وسته منه سنة 1973 كنا ها نبقى ازاي؟

    اوعي تقولي لي مفيش فرق
    فيه خمسين فرق

    من 1967 الى 1973 كان فيه رجالة واقفة حياتهم قضوا في التجنيد ست سنين واكتر
    لا شغل ولا جواز ولا امان ولا حضن اهل وبيسفوا تراب
    كل فلوس مصر "الغير مسروقة" كانت للحرب
    نفسية المبدعين اللي بيحبوا مصر بجد اتدهورت وافتكري حبيبنا صلاح جاهين

    وغيره كتير

    انا عاصرت فترة بعد الحرب يا عزيزتي كانت مصر بلا
    صرف صحي
    تليفونات
    مياه شرب
    طرق
    كباري

    محدش يجي يقول لي احنا على نفس الحال
    لو شفت قول
    لو ملحقتش صدقني انت احسن ميت مرة
    ولولا السرقة والتهليب وشغل بنوك اوروبا كنا بقينا احسن ميت مرة كمان

    6 اكتوبر كان يوم كرامة حقيقية
    من غيره كانت راسنا فضلت في الطين لما خير اجناد الأرض يغلبهم حزمة من ابناء القردة والخنازير

    بحب ستة اكتوبر
    وبكره اسرائيل وبهلوناتنا
    وإيييييييييييييييييييييييييييييه

    ردحذف
  4. السلام عليكم ورحمة الله وبركاتة ,,,
    ربنا يكرمك يارب والمسلمين ...وبصراحة الى بيحس بمصر وبحب مصر المتغرب عنها رغم الظروف الصعبة الى فيها والاهمال الواضح وكل حاجة الا ان فية امل ان شاء الله فينا كشباب بأذن الله انها ترجع احسن من الاول بالرجوع لاسلامنا ومبادئة متعاليمة لانة دينا العظيم حس على كل حاجة جميلة وعظيمة وبية ان شاء الله بأذنك يارب هنرجع احسن من الاول وانا متفائل وياريت نوحد الدعاء ان مصر تبقى احسن واجمل اللهم امين .. ومفيش حاجة بعيدة على ربنا ... لانة مقلب القلوب .
    اخوكى فى الله

    ردحذف
  5. لا يا ايوش اوعى تكونى بالاحباط دا كله
    لا ايوش انتى ماشفتيش حالنا واحنا قبل الحرب
    مكناش بنلاقى الصبونه اللى نغسل بيها وشنا او هدومنا
    والله كان الجار لما يجين صابونتين يدى لجاره واحده منها على ماتفرج
    مكناش بنلاقى اتوبيس نركبه
    ولا فرخه ناكلها
    يابنتى احنا كنا عايشين بلاطعام
    حرام كمان تضيعى شرف الرجال على الفاضى
    هما عملوا اللى عليهم وبجد تتباس رجلهم وايدهم

    ولكن طبعا ليكى بعض الحق فى اللى بتقوليه لانك طلعتى لقيتى مصر بتتنهب
    ودى بقا اللى بدعى ربنا ان كل واحد بينهب مصر
    انه لايتهنى لا هو ولا ذريته باللى بينهبه
    ولكن ارجع تانى واقول زى الرسول صلى الله عليه وسلم ماقال:
    الخير فى وفى امتى الى يوم الدين
    وكمان قال:
    عليكم بانفسكم
    لا يضركم من ضل اذا اهتديتم
    وقال كتير
    بس احنا نتمسك بكتاب الله وسنة حبيبه

    ردحذف
  6. حرام حرام حرام
    ليه بس نقول ان كل ده كان لى مفيش
    اكتوبر كان يوم نصر واعجاز اعترف بيه الكل واقرى فى كتب الاجانب تعرفى قيمته اكتر من المصريين كمان صدقينى

    اما بالنسبه لما بعد الحرب فالمشكله فى مصر اننا بننسى
    ايام الحرب كان كل الناس لها هدف وهو اننا نرجع ارضنا والكل اتحد فى سبيل الغايه دى حتى الحراميه وقطاع الطرق
    بعدها وبمرور السنين ومع العيشة اللى بقت احسن والناس الخمول ظهر عندها وفقدوا الهدف وبقت الامور زى ما احنا شايفين
    العيب جوانا احنا نسينا اننا عايزين مصر تيقى احسن ولواحد بقى بيقو ل العيب فى التانى من غير ما يحاول هو يصلح من نفسه

    وضاعت مصر

    ردحذف
  7. كانوا برضه هيضحوا علشان الارض

    ماهو اصل بلد محتله بتبقا ذل ومهانه

    احنا بنتذل اه من اهلنا برضه .... بس ده احساس وده احساس تاني خالص

    الغمه هتنزاح هتنزاح .... بس احنا نشد حيلنا

    قلتي الكلام اللي في نفسي يا ايوشه .... رغم ان جوايا لسه بصيص نور وحاسه انه هيجي هيجي

    تحياتي في يوم العزه

    ردحذف
  8. السلام عليكم ورحمة الله وبركاته

    بداية دعونا لا نقلل منن شأن الانتصار والتضحيات التي قدمها ابناء هذا الوطن من جنود وضباط

    ولكن لنرى كيف تم استخدام هذا الانتصار كيف لنا ونحن منتثرين ان نقيل باتفاقية تذلنا وتحبرنا على اشياء لا يمكن لعاقل ان يقبلها

    لقد استخدمنا الانتصار في التفرقة بيننا وبين الشعوب العربية

    لقد استخدمنا الانتصار في اعادة الاحتلال الينا مرة اخرى ولكن بثور ليست بالعسكرية
    وعموماً احلى حاجة في اليوم ده انه بيبقى اجازة

    ردحذف
  9. انا مش هتكلم كتير لانى متوافق مع كل الاراء الموجودة وزيادة عن كده انا والدى حارب فى 67 و 73 والكلام اللى كان بيحكيه كان صعب اننا نعيشه اوى ،، نعيشه ايه ده كان استحالة كمان ،، كانت كل حاجة صعبة اوى ومش متوفرة ،، كانت ناس كتير بتستشهد عشان بلدها ناس مؤمنة اننا تنهى الكلام ده ،، احنا فين من الناس دى ،،

    ردحذف
  10. بصي يا اش

    انا عاكسك تماما
    بصي انا ولا عصرت حرب ولا نيلة ولا شفت من يوم ماجيت الدنيا الا شئ واحد

    لكن حرب اكتوبر ملهاش دعوة بده
    انا قارئ كتير قوي عنها و قعدت مع ناس حربوا

    حاجة بجد تشرف قوي
    الناس دي اتبهدلت بجد و لو الزمن رجع برضه هيعملوا كده

    بس الفكرة لو الحرب دي قامت بكرة مين عنده الحماس يحارب لمصر ؟؟؟
    انا هارد من غير ما تاخدني الجلالة
    انا هحارب عشان عبيط و بحب مصر بتخلف
    بس متاكد اني مش هلاقي زي كتير

    بس بعد 36 سنة مخدناش من 6 اكتوبر غير الكوبري !!!!!

    -------
    العنوان حلو جدا جدا جدا

    ردحذف
  11. ايوشة
    تصدقى انا بقالى يوم عمال اقرا
    بوستات احتفالية و مقالات عن حرب اكتوبر

    لحد ما كرهت نفسى
    الإنتصار دخل المتحف و انتهى
    كامل تقديرى ليه
    لكن احنا عاملين نقول عبرنا و عملنا و فعلنا
    و دلوقتى بنغنى على الإنتصار و بس

    كعادتنا حين نقول احنا احفاد الفراعنة

    ردحذف
  12. عارفة ياآيوشة على قد ان فعلا اليوم ده الواحد بيكون سعيد فيه الا انه بيجى يقلب مواجع موجودة اصلا
    بيخلى الواحد يفكر فين الناس دى دلوقتى
    شعب مصر ايه حصله .. بقينا حلوين قوى اننا نفخر بالماضى و المصريين زمان و قفلنا كل الابواب علينا و سيبنا بس باب الماضى مفتوح
    v_v

    ردحذف
  13. مش عارف اعلق والله

    لما قريت الكلام زعلت اوى

    لانى بحب بلدى

    حتى لو الفساد انتشر

    برغم كل شىء

    انا سعيد بالذكرى

    وحاليا هتناسى كل البلاوى اللى فى مصر

    وهقول الله اكبر

    واحاول افتكر اليوم الخالد دا

    تحياتى
    شاب فقرى

    ردحذف
  14. السلام عليكم

    في البداية احب احييكي علي مدونتك

    دي اول زيارة وباذن الله مش أخر زيارة

    نيجي بقا للموضوع المهم

    اخيرا لقيت حد بيتكلم بموضوعية

    بمناسبة الانتصار الجزئي

    اللي كان هيتم فعلا بتحرير الاراضي العربية في معركة اشتركت فيها جميع الدول العربية

    منقدرش ننكر دورهم والا كنا جاحدين

    دلوقتي احنا بقا ف النكسة

    النكسة الفكرية

    نكسة العلم

    بس محدش هيخرجنا منها غير ايدينا

    تحياتي

    ردحذف
  15. ياما مويل الهوا ياما مويليا

    طعن الخناجر ولا حكم الخسيس فيا

    ردحذف
  16. والنبي انا مش قادرة أستحمل يا آيوشة اليوم ده بقى ذكرى حزينة نتحسر فيه على الراح وإحنا اصلا مابقاش لينا لازمة

    ردحذف
  17. تعرفى انى متفقه مع كل حرف انتى كتبتيه



    فعلا اصعب شىء ان الواحد يحس بالغربه جوه ارض وطنه



    الاحتلال منتهاش


    ان كنا انتصرنا فى حرب اكتوبر فده مش معناه ان الاحتلال انزاح عننا وبقينا فى سلام


    الحرب مش بس الحرب بالمدافع والدبابات والاحتلال مش بس احتلال اراضى الوطن


    لو جينا نحسبها هنلاقينا محتليين اكتر من زمان


    بس مين يحس

    ردحذف
  18. طيب قافلة ليه التعليقات
    ينفع كده

    ردحذف
  19. وده حب فطرى متأصل فينا

    بالرغم من اى حاجه ومن كل حاجه

    كل سنه وانتى طيبه يا قمر

    ردحذف
  20. ايوشة انتي بتكتبي بقوة 20 بوست في الساعه

    انا مبلحقش اقرا البوست الا والاقي اللي بعده نزل

    المهم مين قالك ان مصر مش حرة

    مصر حرة برجالتها النايمين اللي مسيرهم يصحوا

    مصر حرة بولادها اللي بيحبوها بس مش عارفين ينطقوا لكن مسيرهم ينطقوا

    مصر حرة بكل واحد بيراعي ربنا في عملة ودينه ودنيته

    وهاتفضل حرة بس عايزة نشيل التراب

    ردحذف
  21. حرب اكتوبر تشرف كل واحد فينا وحتى العرب لفترة طويلة كانوا بيتمحكو فينا طمعا في ان ينولهم جانب من حب شرف النصر اللي ربنا حففه على ايدين اهالينا
    لكن.........
    الحياة وقفت عند الحرب
    36 سنة بنغني لورا مافيش حاجة قدام بنقول عليها الله ونفخر بيها
    اعوذ بالله
    لو بلد زينا بموقوماتها وثرواتها من بعد الحرب للنهاردة كنا بقينا سويسرا الشرق لكن اكيد ربنا ليه حكمة في اللي بيجرى فينا

    ماما الفراغ للاسف باختلف معاكي
    اه بقينا كباري وانفاق وموبايلات ومنتجعات لكن كل ده والشعب يسبح في مستنقع ضحل من الفقر والقشرة العلوية فقط من المجتمع هي اللي تتمتع بخيرات 80 مليون بني ادم

    ردحذف
  22. السلام عليكم ورحمة الله وبركاتة
    انا هعلق على بوست مين اللى قال مش بحبك يا بلادى
    انا معاكى فى كل اللى انت قولتية اننا لازم نفتخر باللى احنا بنعملة بس ازل مل نلاقى حاجة نفتخر بيها
    بجد نفسى ك المسامين يتدوا نفسى اصلى فى الاقصى السير الحزين فى ايدى الصهاينة الملاعين
    دمت بالف خير

    ردحذف
  23. ايوشه الحلوه

    السلام عليكم

    خواطرك كتير وافكاره كبيره وسرحانك كمان كبير وبتسألى اسئله كتيره قوى ..

    عايز اقول لك يا ايوشه :

    لا اسرائيل ضحكت علينا فى حرب اكتوبر
    ولا العرب هما السبب فى انتصارنا فى اكتوبر
    ولا كمان دخول سوريا معانا الحرب وفتحت جبهه اخرى امام اسرائيل

    عارفه يا ايوشه بالورقه والقلم ولو جبتى اله حاسبه وحسبتى السلاح بتاعنا (يعنى العرب كلهم) والسلام الاسرائيلى كنت تلاقى السلاح الاسرائيلى اكتر من ناحية الكم واحسن من ناحية الكيف

    زى انا ما قلت فى تدوينتى ان الدرس العظيم المستفاد من هذه الحرب ليس هو الانتصار العسكرى فقط ولكنه كان ارادة الانسان المصرى الذى لو اراد

    فى اكتوبر اردنا فخططنا واحسنا التخطيط والتدبير وكما ذكرت اننا نجمع بين المتناقضات وكان المتناقض الطافى ايامها الحلو فينا والجميل. فعملنا عقولنا احسن عمل واستغللناها احسن استغلال.

    عارفه يا ايوشه ايه مشكلتنا: اننا غير ديمقراطيين ولا نؤمن بالانسان والانسان غندنا ليس له قيمه وليس له معنى ..

    لو كنا نعطى الانسان قيمه ما كان هذا حالنا

    يجب ان نعطى ما لقيصر لقيصر وما لله لله
    فالاسرائيليون الذى نسبهم ونشتمهم ولا نحبهم يفعلون هذا ويحترمون الانسان (الانسان الاسرائيلى طبعا) ولا يحبون ولا يحترمون الانسان العربى) عارفه ليه

    عشان الانسان العربى ليس محترما وليس محبوبا فى بلده فما بالك الاغراب ولكنهم ليسوا الاغراب فقط ولكنهم الاعداء

    الاسرائيليون يجيدون التخطيط والتفكير الاستراتيجى - تصورى ان عندهم تصور وخطه لاسرائيل عام 2020 واحنا ايه اللى شايفينه لبلدنا السنه دى - ما فيش حاجه خالص

    احنا عملنا اكتوبر وفرحنا باللى عملناه وخلاص ليس فى الامكان ابدع مما كان ورجعنا لعادتنا السيئه المباهاه بما كنا وما كان وحضارة 7 الاف سنه وحرب اكتوبر .... وبعد كدا نيام نيام نيام. وما فيش عندنا تصور لبكره

    عشان كدا هما عندهم تصور لبكره وتفوقوا علينا -- واخده بالك انت ايام الانتخابات الاسرائيليه ومتابعة العالم كله لتلك الانتخابات والثناء عليها .. مش زى عندنا اللى عايز ينتخب بحق وحقيقى يقتلوه زى ما حصل فى كفر الشيخ ودمياط ومات 14 واجد برصاص وعصى الامن المركزى.

    ياخساره يا مصر .. ياخساره يا عرب.. منكم لله يا حكامنا .. ويا ولاة امورنا

    انا ح اسكت بقى عشان ح اطق وح اتفلق وح اروح فى ستين داهيه

    تحياتى يا ايوشه

    ردحذف
  24. عارفه يا يوش نصر اكتوبر عظيم وده شئ لا يحتمل اى جدال

    انما احنا بعظمه مقاربه مبنحافظش عليه ولاا عرفنا نخليه نصر متواصل يعنى شوفى حالنا احنا مع بعض
    الواسطه والمحسوبيه والكسل والروتيين وغيره وغيره

    انا اعتقد لو نصر اكتوبر رجلا لتبرأ منا

    ردحذف
  25. السلام عليكم ورحمة الله وبركاتة ,,,
    موضوع جميل ومعبرا جدااااا
    وياريت تشاركى معانا فى حملة نصرة الاقصى والموضوع بسيط جدا وياريت تشوفى موضوعى على مدونتى وتقوليلى رأيك.. رأيك يهمنى اكيدددد ..

    ردحذف