الثلاثاء، 4 أغسطس، 2009

لعنة تقبل الذات



(بينيلوبي) بنت اتولدت فى اسرة غنية بس المشكلة انها مش مولدة طبيعية زى باقى البشر اتولدت وهى عليها لعنة لعنتها كانت ان شكل مناخيرها زى الخنزير الاب والام اول ما شوفها اتخضوا وقالوا ان الحل نبعدها عن عنين الناس كلهم ونحبسها فى القصر ومتخرجش بره القصر ابدا
*
*

لغاية ما كبرت والام اقنعت البنت ان اللعنة هتتكسر بانها تلاقى الشخص اللى يحبها ويتجوزها وترجع طبيعية تانى
وابتدت تتدبر لها جوازات من بعيد لبعيد محدش يشوف شكلها وبعد فترة لما اقتنع بيها شخص وحبها خرجت علشان يشوف شكلها اتخض وهرب ومقدرش يكمل اللحظة دى قررت تهرب من كل حاجة من ابوها وامها وحتى من اللى حبيته وتعيش حياتها حتى لو شكلها مش مقبول بين الناس مع مرور الوقت قدرت تتقبل شكلها بالتدريج والناس تحبها وفى الاخر اللعنة هتتكسر بس مش علشان لقيت الانسان اللى بيحبها على شكلها ده وقبل بيها زى ما هى لا اللعنة اتكسرت لما هى قبلت شكلها وشخصيتها واقتنعت بيهم

*
*


دا فيلم سمعته من فترة فكرته عجبتنى ويمكن لمستنى لانى ساعات بحس انى كده ملعونة بلعنة عدم تقبل الذات وبالتالى عدم الرضا عن اغلب حياتى لعنتى كبرت معايا وفضلت تكبر وتكبر لغاية ما وصلت لمرحلة انا بقيت مش عارفة ارجع زى زمان ولا عارفة اتقبل نفسى كده زى ما هى ولا عارفة اكون زى غيرى اللى طول عمرى عشت متطلعة اكون زيهم لدرجة وصلت فيها انى فقدت حتى ابسط انواع الثقة بالنفس
*
*

من وانا صغيرة مش متقبلة حياتى والدنيا حواليا وكمان مش متقبلة شخصيتى حتى اللى حواليا ساعات بيحسسونى انى مش من الشخصيات اللى تتقبل بسهولة حاولت اغير من نفسى للاحسن بس عمرى ما كنت بقدر بقيت بحملها فوق طاقتها دايما ليه مش تكونى زى غيرك ليه مش تكونى الناس اللى عايشة حواليكى

*
*

و زى بنيلوبى صدقت كلام الناس ان لعنتى هتتكسر لما الاقى اللى يقبلنى على شخصيتى دى سواء صديق او حبيب ساعاتها هحب نفسى واتغير ولاقى السعادة مليت حياتى كلها ودا يمكن مش تفكيرى لواحدى دا تفكير اغلب البنات اللى عرفتهم مش عايزين يقبلوا نفسهم زى ما هما بيحاولوا يقلدوا دى ودى وبيحاولوا غيروا فى نفسهم وبنحاول نتصنع شخصيات غير شخصياتنا وشوش غير وشوشنا علشان اللى حوالينا يقبلونا
*
*


ايوة كنت عارف ان مش الحياة كلها هتكون بمبى بس كان عندى قناعة انى هكون احسن لما الاقى الانسان اللى يقبلنى زى ما انا كده على شخصيتى وعلى كل اللى فيا لما الاقى انسان لمرة واحدة فى حياتى احس انى طبيعية مش خايفة اقول كلمة تزعله مش خايفة يشوف ايه اللى جوايا ومش خايفة انه يفهمنى غلط ملقتش الاحساس دا مع حد تقريبا لغاية دلوقتى حتى بينى وبين نفسى مش لاقية يمكن لقيته مع المدونة هى اللى قبلت شخصيتى وكل عيوبى وهى اللى بتفهمنى فى كل لحظة حتى لو مكتبتش فيها حاجة انا بدخل اتكلم معاها واحكي لها وانا اتعلمت منها ازاى اكون زى ما انا ازاى احب نفسى كده

*
*


كل اللى مروا فى حياتى مش عايزين يقبلونى كدا انا زى ماانا ماما واخواتى واصحابى والسبب انى مش عايزة اكسر لعنتى واقبل نفسى الاول بكل عيوبها ووميزاتها بس انا كدا دايما شايفة العيوب ومش عارفة اصلحها ومش شايفة المميزات علشان اقويها مش احاول اتغير علشان ارضى غيرى انا هفضل طول عمرى كده سواء الناس قبلتنى او لا بس مش هحطم نفسى تانى فى انتظار حاجات فى علم الغيب

هناك 35 تعليقًا:

  1. in za beginning
    سيراميك and on

    loooook ...loook..lok lok lok lok

    aspeaklek لما lookkeeeeeeeeeeeeeeeely

    lok lok lok lok

    اول كومنت هع هع هع

    ردحذف
  2. آه الموضوع كبير.... كبير اوى كمان

    مش عارف انتى كاتبة الموضوع ده بنفسية ايه يا ايوشة
    يعنى عندك اصرار وعزيمة انك ما تلتفتيش للناس ولا ندمانة وحزينة انك لسه مش عارفة تتخلصى من لعنتك

    عموما انا شايف ان كل واحد يكون عنده اعتزاز بنفسه ومايهمهوش ااااى حد من البشر
    ويعيش حياته زى ما هو حابب يعيشها حتى لو كل الناس ماشية يمين وهو الوحيد الشمال مش مشكلة ..المهم انه يكون مبسوط وحاسس انه بيعمل احسن ما يستطيع

    وشايف ان الاجمل من كده كمان هو ان الواحد يبقى هو المثل اللى ضعاف النفوس والشخصيات يحبوا يبقوا زيه ... يعنى يمشى هو والناس تمشى وراه...ايه المشكلة يعنى؟؟ ولو مشى وماحدش مشى وراه برضه ايه المشكلة ولو ما قدر يمشى وقعد برضه مش مشكلة ..المهم انه ما يمشيش ورا حد وان ارضاء الناس ده امر مستحيل لكن ارضاء ربنا امر ممكن وبعدها ربنا بيخلى الناس ترضى عن الانسان

    حلو اوى بوستات الصباح الباكر دى
    تلاقيكى بعد ما اتسحرتى قعدتى تكتبيه..ماشى يا ستى ربنا يتقبل منك
    انا ما اتسحرتش ولا صمت علشان كده كنت عامل نفسى مش واخد بالى ههههههه
    سلام

    ردحذف
  3. يامرحبا يامرحبا دكتور بنجا بحاله بيعلق عندى واول تعليق مبروووووك عليك نولت الشرف دا اول تعليق فى مدونتى P:

    ونيجى للرد اولا اقطع رداعى ان كنت فاهمة كلمة من التعليق الاول :(
    دا انجليزى دا يادكتور معلش اصلى انا دراستى للاسف لا انجليزى ولا عربى حتى ابقى راعوا شعور الناس اللى مش بتفهم لغات دى تعمل ايه تولع فى نفسها :(




    بس هو الموضوع كبير بس انا مش عارفة اوصله بردو ومش مسالة نفسية والله انا افتكرت الفيلم ووعلمت البوست على دا الاساس لان انا عادية ولا مكتئبة ولا حزينة ولا اى حاجة انا بقول هتغير هقبل نفسى بكل ما فيها ومش هستنى الناس تقبلنى علشان يكون عندى ثقة بنفسى اكيد وجود الناس ورايهم فيا مهم بس مش لدرجة تتدمر حياتى
    والبوست كان الصبح بس انا متسحرتش صمت كدا اكيد فى حد حسد ولا نق على السحور :(
    ربنا يتقبل منك ان شاء الله صيام رمضان باذن الله
    مرسيى للمرورك

    ردحذف
  4. السلامـ عليكمـ

    ايه دا والله ما انا ناقصه ايه يا ايوشتي كلامك دا والله انت شخصيه زي السكر وما فيك الا كل خير بس مشكلتك انك مش حاسه بقيمة نفسك وحاسه دائما بالنقص وانك فيك شئ مش كويس عايزه الناس يتقبلوه تعرفي مش انت بس كلنا مش كاملين والكمال لله وحده بس فيه جوانب بتغطي علي جوانب تانيه وزي ما قلت لازم تتقبلي نفسك كدا واللي يتقبلها كان بها واللي لا يبقي هو الخسران اكيد

    الامور ابسط من كدا بكتير بس احنا كتير بنعقدها ونضيق الامور علي نفسنا ..

    ربنا يصلح لنا ولك الاحوال وييسر لنا الامور ..

    ومش احبك اشوفك كاتبه عن نفسك كدا تاني علشان دا هيدخل في الكذب لاني حاسه انك مش كدا خالص علي فكره ..

    دمت بكل خير ..

    ردحذف
  5. ايوشة

    لاقى حد تثقى فية من الاهل او الاصدقاء واتكلمى معاة بقلب مفتوح

    لكن طول ما انتى قافلة على نفسك اكيد شعورك نحو ذاتك مش هيتغير

    بصى حوليكى --- فية حد مستنيكى انك تكلمة وتفضفضى معاة

    لكن هو مين؟؟ دة اللى عليكى تكتشفية بنفسك

    تحياتى واحترامي

    ردحذف
  6. انا شفت الفيلم دا من فترة كدا وعجبنى
    زى ما قلتى فكرتة تقبل الذات بس مش عشان تتفك اللعنة لا لانها هى عايزة كدا يعنى هى مكنتش عايزة تتقبل ذاتها فالناس حبوها هى كانت عايزة تعيش بين الناس بس متكونش محبوسة
    عشان كدا طول الفيلم حققت هدفها بس برضو مكنتش مرتاحة لحد ما لقت ان فى حياه تانية هتتفرض عليها فحست ان حياتها دى افضل حتى لو بشكلها دا على انها تقضيها مع حد مبيحبهاش ومنها تقبلت كل شئ حوليها حتى هى نفسها
    ومنها اصبحت مع من تحب فى حياه سعيدة

    الفكرة فى نظرى مش تقبل الذات
    بغرض تحقيق هدف ما وهو حب الناس الفكرة اننا نحب روحنا و الدنيا من حوالينا عشان الناس تحس بروحنا الحلوة مش الحزينة او المتمردة او المكتئبة فتحبنا زى ما احنا

    بس بغض النظر عن روح التفاؤل والحياة كلنا فينا عيوب محتاجة اصلاح عشان كدا بنفكر فيها كتير عايزين نوصل للكمال اللى هو بتاعنا احنا موصفات معاينة حطينها لنفسنا سواء شكل او الصفات
    دا مش خطاء اكيد بس الخطاء اننا يبقى كل اللى بيربطنا بالدنيا والناس هو محاولة تصحيح العيوب اللى فينا
    واهمال المميزات والنواحى الايجابية

    صباح النور :)
    تقبلى مرورى

    ردحذف
  7. السلام عليكم
    هناك فرق بسيط بين نقد الذات وبغض الذات
    أنا اعشق الاولى لانها محاولة للاصلاح

    ردحذف
  8. فعلا يا ايوشه

    الموضوع ده تقريبا مش مشكلتك لوحدك

    الموضوع ده مشكله كل الناس تقريبا

    محدش عجبه حاله محدش جبه نفسه ونفسه يكون غيره

    مع ان سبحان الله لو فكر بتمعن كده وشاف تفاصيل حيات غيره الى مسخبيه عنه

    هيعرف ويثق ان مفيش شخصيه تنفعه الا شخصيته

    وانا ربنا فعلا قدرله ان يكون الشخصيه دى

    وممكن نبصلها من زويه تانيه

    منقلش مثلا انا نفسى ابقى زى فلان عشان اعمل كذا

    ليه منقلش هو انا ربنا خلقنى كده ليه اكيد فى هدف منى وربنا سبحانه وتعالى مش خلقنى بلا فائده

    ادور على الحاجه الى اقدر اعملها واتفوق واتميز فيها عن غير واعملها

    على فكره فيلم احمد مكى الجديد بيتكلم عن الحكايه دى مبتبقاش عجباه شخصيته يفضل يغير سبع شخصيات يظن انهم هيعجبوه لكن بيكتشف ان كل شخصيه فيها عيب وفى الاخر يعرف ان مفيش احسن من شخصيته

    وبهديلك كلمات اغنيه الفيلم



    ماتحولش تبقى اي حد تاني غير نفسك


    دور بنفسك جوة نفسك

    ماتحولش تبقى اي حد تاني غير نفسك

    خليك واثق في نفسك


    قوم دور بنفسك جوة نفسك
    هتلاقي حاجه محدش فيها ينفسك

    ماتحولش تبقى اي حد تاني غير نفسك

    دور بنفسك جوة نفسك
    ماتكسلش وقوم دور هتلاقي ميزتك في صوتك او في جسمك

    ماتستبعدش تبقى ميزتك حركه بيعملها جسمك

    او فكرة فانتاستيك في مخك

    ممكن كمان تكون مميز في الطب او في الحساب

    او ميزتك نفسك في طبخك

    ممكن ميزاتك تطلع في لوحه او كتاب

    او ممكن تكون ميزك لياقتك

    ميزتك انك قلب ميت ممكن تضرب كل الناس

    بادي جاررد

    او تكون ميزتك سياستك

    ميزتك انك رومانسي ومرهف الأحساس

    او تكون ميزتك فرستك

    ممكن ميزتك تكون قلب ابيض او حنون

    ممكن تكون ميزتك حماشتك

    في ناس ممكن تفصل لبس ناس بكل احساس

    مهما كان نوع قماشتك

    وناس تقدر بفاس تحول تربه قلقاس
    او اناناس
    بفضل ربي مش بفضلك

    ولو في ناس لبست قضيه
    في ناس ميزتها هيه انها تجيب براءتك

    ركز في اللي جاي

    محدش عجبه حاله

    حالة غيرة اللي بتحلاله


    دايما شاهين بيغرب
    وهيثم مش بيبقى ايمن

    تخين بيخسس
    والتاني رفيع نفسه يتخن

    اسمر بيفتح
    ابيض نفسه يبقى black


    احمد خلفلك بنت لأ
    نفسه يخلف واد


    ايون....ايون....ايون


    ياسلام لو ترضى بحالك ديما عاجبك حال الغير



    مهما تكون حالتك دايما باصص للتغيير


    صدقني لو بصيت جواك هتلاقي ياما كتير قدرات

    وميزات ان كنت غني او فقير

    ما تقللش من نفسك

    دة انت بنفسك طاقه خير
    هتحقق اللي في نفسك واللي يمسك خليه يطير

    ارضى يابن ادم باللي تقسم عليك
    ولاوني عارفك مش هترضى غير بتراب في عنيك

    ربك ميز كل واحد منا بحاجه

    علشان الناس تفضل لبعض دايما محتاجه

    دور والقي ميزتك
    حاول حافظ عليها

    دور ميز بيها حياتك هتلاقيها دايماماشيه صح طول ما انت راضي بيها
    ارضى بحياتك انت وقبلها باللي فيها

    الرضا نعمه كبيرة احمد ربك عليها

    وخدها كلمه مني ما في حاجه بتساويها

    حد يترجملي بيقول ايه الواد دة


    انا اقولك عيقول

    ماتحولش تبقى حد تاني غير نفسك


    قوم دور بنفسك جوة نفسك هتلاقي حاجه محدش هينفسك فيها غير نفسك


    say what? say what?
    يابوي يابوي

    لو مالكش عازة ماكنتش اتخلقت
    ولا اتحسبت من الناس ولا اتخلقت

    ردحذف
  9. حبيبتى واحشتنى قوووووووووووووووووى كتير
    والله ربنا ما يحرمنيش منك يارب
    ويسعد قلبك

    ردحذف
  10. حبيبتى الغاليه

    انا فاكره قصة الفيلم ده قوووووووووى
    وانتى بتتكلمى دارات الاحداث اما عينى

    بس ياترى بجد انتى فعلا بتمرى بنفس الحاله دى
    حبيبتى ربنا يبعد عنك اى حزن وهم ويكرمك ارب
    تعرفى بجد بحس فيكى بحاجات كتير قوووى منى

    بدعى من ربنا وبحق الايام الجميله والفضيله دى ان كان جواكى اى الم وحز يزيحه عنك قادر ياكريم

    وان شالله مرحاه وبتعدى

    خلى بالك من نفسك قووووووووووووووى
    بحبك فى الله
    انوسه

    ردحذف
  11. ايوشة
    عزيزتي انت ليه بتقليلي من قيمتك
    يا ستي كوني نفسك و اللي مش عاجبه يخبط في الحيط
    في مثل بيقول : كن على طبيعتك تريح و تستريح
    ليه بنبحث على ستيل مش بتاعنا ليه بنبحث على شخصية بعيدة عننا فقط من اجل اننا نثير اللي حوالينا
    يا اية يا بنتي ارجعي لعقلك و كبري مخك و كوني انت
    كوني اية اللي بنحبوها و نقدروها
    مودتي

    ردحذف
  12. بصي يابنتي

    بصيتي ؟؟؟

    لا يصح الا الفطير
    وياسلام لو بالعسل

    فكك من الافلام ....مش ده كلامك ليا
    مش مهم حد في ام الدنيا دي يتقبلك
    المهم انتي تقبلي نفسك
    وبعدين ببساطة انتي خلقة ربنا و ربنا مش بيخلق حد وحش
    ولا ايه ؟؟؟؟

    وبعدين فكك من الحاجات دي
    فين الحماس و الصور اللي هتغرق بلوجر

    انا قالت النهاردة الصبح هاقرا عن اول معرض ليكي

    يلا يلا بلاش افكار هادمة و سيبالي انا الافلام و بعدين لو عايزة فيلم االفالك واخد حالا

    بقولك واحدة اسمها ايوشة كانت دماغها غريبة حبيتين و لما عادل كلمها اتعدلت و بقيت كويسة و ميكي اتجوز زيزي و عاشوا في سعادة للابد

    حلو كده ؟؟

    ردحذف
  13. نحجززززززززززززززززززززز
    تعليق
    ونرجع تاااااااااااااااااانى
    يابينيلوبى

    ردحذف
  14. انا بدراوى
    بس مش عامل تسجيل دلوقتى
    -------
    نفس المشكلة بعانى منها
    بس بشكل اكبر شوية
    انا حاسس انى الناس مش قابلانى
    خالص
    و نفسها انى اخرج من حياتها خالص
    احساس صعب اوووى
    بالنسبة لى
    حبقى اوضحه فى بوست قريباً ان شاء الله

    ردحذف
  15. الشعور بعدم تقبل الذات
    هو فعلا الواحد لو نظر الى عيوبة لم يتقبل ذاتة ...واذا نظر الى مميزاتى تقبل ذاتة ك هى
    فاى انسان فى العيوب والممميزات ..فانظرى الى مميزاتك وهى كثيرة.

    ولكن نظرة الناس لى على انهم لم يتقبلونى فهذا ناتج طبيعى لنظرتى لنفسى..يعنى نا لو تقبلت ذاتى ...شعرت ان الناس تتقبلنى .
    وانى لو لم اتقبل نفسى ..سأشعر ان الناس تقبلتنى

    هو موضوع جميل بجد
    وتحياتى لكى

    ردحذف
  16. لالالالالالالالا

    لازم يكون عندك ثقه فى نفسك كبيره

    وثقه فى ربنا اكبر

    خلى ربنا دايما راضى عنك وانت هترضى عن نفسك

    ربنا معاكى يارب

    حنين

    ردحذف
  17. ليه بس كده يا ايوشه ؛فعلا احيانا كتير احساس عدم الرضا عن النفس بيتغلب على الواحد نتيجة لبعض المواقف اللى بنمر بيها فى حياتنا انا مريت بالفترة ديه كذا مرة وكتير ؛بس بالاستعانه بالله عز وجل والقران الكريم والصحبه الصالحة نقدر نتغلب على الاحساس ده
    انت ممكن تتفقى مع اللى حوليكى انه على فترات فى ساعة صفا يقلولك على اكتر شيئ بيضيقهم منك او عيوبك اللى بيشفوها وانت كده ممكن تحاولى تصلحيها ؛وبرده اكتر شيئ بيحبوه منك وتحاولى تصليحيها

    بس واضح من مدونتك انك شخصيه كويسة

    انا حبيت اكون صديقة ليها بجد

    (اللهم اهدنا وارحمنا ووفقنا لكل ما تحب وترضى ) اللهم امين

    ردحذف
  18. أنا حاسس بالكلام ده
    ومش هقدر أنصحك إنك تتقبلي نفسك
    لأن دي حاجة بديهية ,, وكمان إنتي عارفاها

    بس يكفي إني أدعيلك ربنا ييسرلك أمرك
    ويكرمك بالسعادة في الحياة

    ردحذف
  19. انتى ليه شايفة نفسك كده كل انسان وله طبيعته وانتى طبيعتك كده ،،، اكيد هتقابلى الناس اللى تتوافق معاها ايا ًكان صديقة او صديق او حتى حبيب بس انتى بجد شخصية واضحة وصريحة والدليل قالوله لا بجد الدليل انك بتعترفى بحاجات غريبة ممكن تلاقى كتير مش بيقدر يتكلم فيها اصلا

    وحدى الله كده وقمى اتوضى وصلى ركعتين لله واحمديه على كل شىء
    وادعيلى معاكى ربنا يكترلى فى قططى

    ردحذف
  20. طيب ممكن تجربى وتتبنى قطة صغننة كده واكيد القطة دى هتغيرك كتير على فكرة انا باتكلم
    احنا ياما اتعلمنا من الكائنات دى كتير والكلام ده اتذكر فى القراءن وطبعا حضرتك اكيد حافظة كتير اوى من القراءن واكيد كمان عارفة الكلام ده قبل ما اقوله






    ياترا ايه اخبار النسر اللى كنت سايبه هنا واختفى مرة واحدة

    ردحذف
  21. ياااااااااااااه
    يا أيوشة بجد مش عارف أقول لك ايه
    فى الجزء ده فى شبه كبير بيننا

    أنا برضه فضلت كتير كده وكانت مشكلتى مشكلة لانى نشأت فى وسط ريفى بحت
    وبالعكس كان أخوالى فى القاهرة والجيرزة يعيشون فى وسط مختلف وخرجت إلى الدنيا فى سن صغير ما بين الأنشطة الرياضية والثقافية ووقعت فى حيرة أى الطرق اتبع
    فمع كل تيار تجد التيار الأخر يعيب عليه ووقعت فى يرة شديدة وترددت وكانت لى اختيارات خاطئة عديدة
    وفى النهاية هدانى الله إلى أن أكون أنا
    دون زيادة أو نقصان بأخلاقى وصفاتى ومميزاتى
    وبالعفل كانت النتيجة أن أصبحت اكثر نجاحا ووفقنى الله إلى تحقيق الكثير مما كنت أتمناه
    وفى نفس الوقت أحبنى من حولى ورضوا بى

    فلله الحمد من بل ومن بعد

    تحياتى دوما

    ردحذف
  22. ايوة كنت عارف ان مش الحياة كلها هتكون بمبى بس كان عندى قناعة انى هكون احسن لما الاقى الانسان اللى يقبلنى زى ما انا كده على شخصيتى وعلى كل اللى فيا لما الاقى انسان لمرة واحدة فى حياتى احس انى طبيعية مش خايفة اقول كلمة تزعله مش خايفة يشوف ايه اللى جوايا ومش خايفة انه يفهمنى غلط ملقتش الاحساس دا مع حد تقريبا لغاية دلوقتى حتى بينى وبين نفسى مش لاقية يمكن لقيته مع المدونة هى اللى قبلت شخصيتى وكل عيوبى وهى اللى بتفهمنى فى كل لحظة حتى لو مكتبتش فيها حاجة انا بدخل اتكلم معاها واحكي لها وانا اتعلمت منها ازاى اكون زى ما انا ازاى احب نفسى كده

    كلامك رائع بجد با أيوشة
    وتعليقك على القصة حلو أوى
    بجد مش لاقى كلام يناسبه اقوله

    ردحذف
  23. be ur self
    ولما تكوني نفسك ..... حاولي تقبليها ...... وبكده هترضي كل الناس ..... لان الناس بتحب الانسان التلقائي موش المصطنع

    ردحذف
  24. أختي آيوشة
    أصعب إحساس في الدنيا إنك تعيشي في صراع دائم مع ذاتك
    فأجمل شئ في الدنيا هو أن يشعر المرء بقيمة ذاته ولكن دون أن يغتر ودون أن يشعر أنه شخص كامل فلا يغير من نفسه فتحترق روحه
    وقال ابن القيم عن الرضا عن الذات أنه باب الله الأعظم و مستراح العابدين و جنة الدنيا
    أراح الله بالك وفكرك وحبب فيك خلقه
    السلام عليكم ياغاليتي

    ردحذف
  25. الحرباية بتغير لونها علي حسب لون الحاجة اللى اوادمها عشان تحمي نفسها من الاعداء
    لكن انتي انسان , الانسان اعظم مخلوق خلقه ربنا -سبحانه و تعالي- خليكي علي طبيعتك و ماتحوليش تغيري نفسك لو شايفة انك صح , لو غيرك شايف غير كدة , يخبط راسه في الحيط ...

    ردحذف
  26. انا شوفت الفيلم ده..
    بس اقولك فى اغنيه بتقول:
    انا ده انا كدا وانت المفروض تاخد على كده..
    يعنى من الاخر احنا كده بعيوبنا قبل مميزاتنا واللى يحبنا ياخدنا كده حته واحده..
    زماااااان كان عندى احساسك ده وكنت اجى على نفسى واغير حجات لمجرد انى ارضى اللى حواليا بس وحياتك كان تغيير لمده نص ساعه وبرجع تاااااااانى اناا..انا شيما واللى يحبنى كأصحاب ,زمايل وات ايفر يقبل شيما زى ماهى,,بعيوبها قبل مميزاتها..
    سيبك وخليكى ايوشه ولا شئ سوى ايوشه:)

    ردحذف
  27. اعتقد ان الواحد المفروض يتقبل نفسه اولا وبعد كده يحاول جاهدا انه يتصلح



    تحياتى اللاسعه

    ردحذف
  28. جميله هذه الكلمات يا ايوشه
    ادام الله عليكي قلمك
    ودمتي مبدعه

    ردحذف
  29. السلام عليكم
    متزعليش مني
    دا انا حبيبتك
    كفاياك استعباط
    ايه التهريج ده
    دي بس افكار الساعة بعد 77 ونص المسا
    كفاياك تخارييييييييف يا بنتي
    اسمعي
    لا انتي اول واحده ولا الاخيرة
    بس الواحد اهو بيتعود
    وكل ما نكبرو نفهم بتزيد ثقتنا بنفسنا
    متزعليش من كلامي
    اصلو مدب

    ردحذف
  30. أيوشة الجميلة ...

    حقيقى موضوع رائع جدا
    و تقبل الذات مش عارفة فعلا بالاقيه مشكلة فى الوقت دا

    مفيش حد راضى عن نفسه
    و كله بيسعى انه يكون فى زى ما يحب يشوف نفسه فى عيون الناس
    مش فى نفسه هو


    تحياتى يا جميلة
    و اتمنالك فعلا حياة احلى مع صحوبية جميلة بينك و بين نفسك
    :)

    ردحذف
  31. شكلك ياايوشه من النوع اللي بيقع مع نفسه كتير

    زي مانتي شايفه حاجات مش عارفه تغيريها لازم في نفس الوقت تشوفي الحاجات الجميله اللي فيكي ولازم تحافظي عليها
    والا هتضيعي كتير من عمرك بتصلحي 10% وبتهملي 90%


    رأي الناس ممكن يكون مهم لو كان مرايه صادقه
    لكن لو كان كرباج لتأنيب وتعذيب النفس, يبقى قلته أحسن

    ردحذف
  32. انا شفت الفيلم دة وعجبنى فعلا

    هى لعنة انا وافقاكى اوى اوى اوى

    وحشتينى على فكرة

    ردحذف
  33. جميلة أوي أحداث الفيلم اللي ذكريته بالأول..فكرني الي حد ما بجملة اتقالت في فيلم شقة مصر الجديدة
    وعلي رأي الحكمة الشهيرة كن أنت نفسك ولو كنت صعولكا وضيعا..عش طاهرا شريفا حتي لو كانت حياتك هبابا وطينة
    :)
    تحياتي

    ردحذف
  34. يا ابن ادم ارضى بما قسمه الله لك



    اذا رضينا سوف نستوعب الخلاف


    واذا استعبنا الخلاف


    ادراكنا اننا سنكون محل لهذا الخلاف


    فالرسول ص

    قال:

    (الارواح جنودمجندة فمن تقابل منها ائتلف ومن تنافر منها اختلف)


    اى ان البنى ادمين


    ممكن ان يختلفوا

    واذا تقبلنا الاخرين


    سنتقبل ذواتنا


    لاننا سنرغمهم على تقبلنا

    -------------------------------
    الموضوع قوى
    ومهم وذكى

    وانا كنت عايز اقول كلام منظم بس


    مش عارف

    ------------------------
    مع تحياتى / حازم ربيع

    ردحذف
  35. رحت فييييييييييييين ؟

    ردحذف