الأحد، 2 أغسطس، 2009

أشياء صادقة في حياتى+تحديث


سؤال وجالى من عادل صاحب مدونة البلد دى فيها حكومة ومن احساس طفلة رومانسية وبعديها بيوم جالى انووووسة عاشقة الاحزان الى اتمنى ترجع بسرعة وربنا يبعد عنها اى حزن اللهم امين


أذكر 10 أشياء صادقة في حياتك


السؤال بسرعة صعب لانى مش عارفة احدد فين الصدق فى حياتى لانى انا اول واحدة بكدب على نفسى انا ممكن مكدبش على الناس ولا بحب الكذب عليهم بس بتفنن انى اكدب على نفسى الف وادور عليها هحاول ادور كدا جوايا يمكن الاقى العشر اشياء الصادقة فى حياتى


دينى او اسلامى اصدق شئ فى حياتى كلها بحبه ومقتنعة بيه وبغير عليه بحاول اتمسك بمبادئه على اد مقدر بس ساعات كتير بكون مقصرة بس يقينى من ان ربنا دايما واقف جنبى بيرجعنى تانى

علاقة الحب اللى بينى وبين ماما واخواتى جايز دايما فى خناق معاهم بس الحمد لله الناس بتحسدنا على الترابط اللى بينا ومفيش يوم يعدى الا لما نشوف بعض ونسال على بعض ممكن فاضل اقول عيالكم صدعونى عيالكم قرفونى بس لو مرة يوم ومشفتهمش بيكون فى حاجة نقصانى بجد


علاقتى ببنات خالتى مش بنسيب بعض تقريبا كل يوم مع بعض واليوم اللى مش بنشوف فيه بعضنا لازم يكون فيه تليفون لدرجة ناس كير فى شارعهم والعمارة عندهم افتكرونى اختهم بس كانوا مخبينى ولا حاجة اهم فعلا اخواتى من زمان لدرجة اننا ان شاء الله لما كل واحدة تروح بيته مش هنبطل نتجمع كل يوم دا احنا كمان قررنا نتجوز عريس واحد علشان مش نبعد عن بعض :))


اولاد اخواتى وشقاوتهم ورزالتهم وطولة لسانهم وعقلى الصغير اللى بيعمله بعقلهم

اصدقائى وهنا هقول اصدقائى اللى عرفتهم على النت لان بجد لقيت فيهم حاجات كتير مش لقيها فى اصدقائى الحقيقين ويمكن السبب الاساسى اللى بيخلينى كل ما اقرر ابعد انى ارجع تانى وافتح المدونة


اعصابى بتنرفز بسرعة شديدة وبيبان عليا وعلى ملامح وشى وممكن ازعل اى انسان قدامى حتى ولو ماما مادام انا عصية كله ياخد ساتر ويبعد عنى لغايةما اهدى هراجع نفسى وهعرف انى غلطت وهاجى اعتذر اكيد بس مش بقدر اعمل كدا مع ماما علشان هىمش بتزعل منى وعارفة انى غرابة بتقول ربنا يصبرنى على ما بالنى

مدونتى حاجة صادقة جدا مفيهاش رتوش انا هى دى اللى ظاهرة فى كل بوست فى كل حاجة باكتبها فيه حاجة منى راى اقتناع مبدا انا كدا متناقضة مجنونة وعاقلة حزينة وكئيبة وبحب الضحك والهزار هادية وشعنونة كل حاجة فيا بجد بستغرب نفسى انا ليه كدا وممكن يوم ملتزمة جدااااا ويوم بحاول اعيش سنى زى باقى الناس


دىحاجة جديدة عليا مكنتش فيا زمان انى اكتشفت انى مش بزعل من اى موقف ولا جرح الا وقت قليل جدا وبعديها وبنسى مع انى زمان كان قلبى اسود بشكل لا يطاق

الكمبيوتر مش مسيطر على كل حياتى ومش بمشى الا على مزاجه هو مش مزاجى انا يعنى خروج من البيت يحدده ظروفى على الكمبيوتر والمدونة مش انا اللى احدد مش بقوم من عليه الا علشان الصلاة والنوم والاكل باكل جنبه

مش سعيدة فى اغلب الاوقت هتسالوا ليه هقولكم لانى مش بعرف اعيش لحظات السعادة صح دايما بخاف من اللى جاية انا خوافة جداااااا وبخاف من المستقبل ودايما الوحش فى بالى قبل الخير


ماشاء الله مش عارفة اجيب عشرة جروا ل11 الصادق فى حياتى حبى المجهول اه يمكن قولتها حاسه انه حبى للشخص اللى ان شاء الله هيكون من نصيبى كون حب صادق جدا او هحاول على اد مقدر وفوق ما اقدر انه يكون حب صادق جداااا





هنهدى التاااااااااااااااااج من تانى

هناك 31 تعليقًا:

  1. ياااه
    ما شاء الله عليكى
    كل ده

    ده انا بقى كدة ساقط فى السؤال ده

    ربنا يحميكى
    بس مش بالضرورة الصادق يكون شىء جميل
    يعنى تحديد كل مواعيدك حسب الكمبيوتر ده شىء اعتقد صادق بس مش جميل

    انا الكمبيوتر ابنى الصغير
    عشان بيه بوصل لكل الناس اللى بحبها من المدونين

    جميل علاقتك بأهلك و قرايبك
    نرفزتك انا زيك فيها

    انا كنت حكتب الحب فى اصدق اشياء عندى
    بس افتكرت انى ضده
    فقولت بلاش بقى تكتب
    هع هع هع هع

    ربنا يوفقك و يحميكى

    ردحذف
  2. تاني تحليق يلا مش مشكلة

    ردحذف
  3. بس سيبك اكيد رقم 5 دي عشاني
    صح
    صح
    صح

    ههههههه

    و الكمبيوتر بيحدد حياتك ؟؟
    ده استخدام التكنولوجيا الخاطيء
    انا مش بقوم من عليه الا لو خرج من بيتنا بس
    حتي الاكل بكل جمبه
    هههههههههههههه

    وكون سعيد (علي رأي برك تيما .....فرقة غنائية)
    بصي سيبك من بكرة حتي لو فيه مصايب الدنيا عيشي يومك زي ماهو و افرحي
    ربك مش بيسيب حد
    ولو في مشكلة هو موجود و هيحلها معاكي
    عيشيييييييييي
    انبسطي
    اتسعدي

    حلوة اتسعدي دي
    ههههههه

    ردحذف
  4. الله اجمل اجابات من اجمل قمر

    بجد انتى جميله اوى تسلمى

    حنين

    ردحذف
  5. جميل انه الواحد يفكر ايه الاشياء الصادقة فى حياته
    وكل الشياء الذكرتيه جميلة وخصوصا الترابط الاسرى اللى فيه ناس كتير مع الاسف افتقدته الايام ديه

    وعجبنى جدا حبك لمدونتك وكونها شيئ اساسى فى حياتك ؛واصدقائك اللى اتعرفتى عليهم من خلال النت والتدوين بالتاكيد كل ده غير فى شخصيتك وزادك خبره ؛بس يارب ميكنش اصدقائك فى النت خلاكى تستغنى عن اصدقائك فى حياتك الطبيعية لانه (الصحبه الصالحة) من الاشياء المهمة فى حياتنا
    وفقك الله

    معلش الفترة اللى فاتت مكنتش قادرة ادخل على النت؛ واحيانا لما بدخل على مدونتك بيطلب كلمة سر للمشاركين فقط وانت طبعا مش ضيفانا عندك علشان كده مكنتش بعرف ادخل المدونه

    ردحذف
  6. ماشاء الله على صدقك ياآيوشة بجد كلامك نخشش في قلبي قبل نفوخي ايه الدكاغ العالية دي وبجد برافوو عليكي انك قدرتي تتكلمي بالشجاعة دي
    سلاااام

    ردحذف
  7. جمييييييييييييل..
    بس كلمه كده لو تسمحى هو اخبار الزهايمر ايه عندك:)
    اصلى لسه مجاوبه قبلك على السؤال ده وبعتهولك هههههههههههههههه تقومى تبعتهولى تانى:)

    ردحذف
  8. ايه يا ايوشة الشطارة دى؟؟؟؟ قلتى 11 حاجة بحالهم
    واضح انك قعدتى تدورى جوا نفسك كويس اوى

    حلو اوى ما شاء الله الترابط الاسرى اللى انتى عايشة فيه ده وربنا يديمه عليكى دايما

    العصبية دى تقلليها شوية وتعالى يوم التلات خدى نتيجة التحليل ههههه

    المدونة دى صادقة فعلا بس بتبقى سكرة وهى مقفولة :P

    الكمبيوتر فعلا بيسطر على حياتك خصوصا الماوس الجديد;)

    موضوع مش سعيدة ده حاجة صعبة اوى ومش شايف لها مبرر ...

    تحياتى

    ردحذف
  9. ايوشه جميل وكويس انك مجبتيش سيرتى
    وانا موافق
    وهلى جهاز الكميوتر بعيد عنك ولو لثانيه
    جربى
    ثانيه فى اتنين فى اربعه فى دقيه فى ساعه فى يوم
    وتمر الايام وافتكرى كيمو

    ردحذف
  10. السلامـ عليكمـ

    ربنا يسعد قلبك بما تحبي دائما يارب وتشوفي في حياتك كل شئ سعيد وجميل ..

    وتفضلي كدا علطول منورة مدونتك يا قمريا ..

    بجد انت من الناس اللي بحبهمـ في الله ومن كل قلبي ..

    دمت بكل خير يارب ...

    ردحذف
  11. بيعجبنى الوفاء للأهل و الأصدقاء ..
    ردودك ممتازه و الله و فيها عقل و حكمه كده يمكن مش موجوده عند الكثيرين ..
    ربنا يوفقك و شكرا أنك عرفتينا على مدونة أصدقائك آدينى رايح أشوفها أهو ..
    دمتى بخير و تقبلى تحياتى ..

    ردحذف
  12. على فكره حاولت أعلق فى مدونة أصدقائك الجديده طلعت لى رساله بتقول اٍن التعليق مقصور فقط على فريق العمل !!

    ردحذف
  13. الحبيبة ايوشة
    جميلة انتى كما اتخيلك
    البنت الحامية العصيبة واللى بعد
    شوية هادية ورايقة
    ربنا يبارك فيكى وفى اسرتك
    وربنا يرزقك الزوج الصالح علشان بفجر
    المشاعر المكنونة بداخلك ويكون بحق يستاهل ايوشة
    تحياتى

    ردحذف
  14. حلوة ردودك قوى

    وربنا يديم عليكى نعمة الصدق والصداقة الحلوة دى

    ملحوظة:

    ده اللى طلعلى فى مدونة حكاوى الأصدقاء

    كان نفسى أكون أول تعليق :(

    "التعليقات على هذه المدونة الإلكترونية مقيدة على أعضاء فريق العمل.
    تم تسجيل دخولك حاليًا باسم Me7'o. قد لا تتمكن من إدراج تعليقات باستخدام هذا الحساب."

    ردحذف
  15. هييييييييييه الحمد لله اسمي مش مكتوب هههه

    اجاباتك جمييله جدا والله يا آيوش

    ربنا يارب يكرمك في كل ال بتحبيهم يارب وتجتمعوا دايما علي الخير يارب

    بس تتجوزوا واحد ؟؟ يالهوي ههههههه

    فاكرة الفيلم بتاع محمود عبد العزيز ده

    لا يابنتي منصحكيش لا هههه

    ربنا يارب يسعد قلبك دايما

    دمتي بألف خيررر

    ردحذف
  16. ايه
    مين
    فين
    هو كل ماواحد يجيله تاج يهديهولى ولا ايه؟؟
    وبعدين انا مش هعرف يااختى اجاوب عليه حلو كده زيك
    وكمان انا مااعرفش ايه هى اصدق 3 اشياء فى حياتى
    قوم انتِ عاوزانى اقول على 10 طب منين ؟؟
    عموما نأجلها شوية يمكن اقدر افتكر
    ههههههههههههههههه
    المهم بقى ربنا يبعد عنك الحزن ويملا حياتك سعاده وفرحه ويرزقك بابن الحلال اللى يحبك وتحبيه ويكون حبكم كله صدق وحياتكم جميلة
    ســــــــــــــــــلام

    ردحذف
  17. هولع فيكىىىىىىىىىىىىىىىىىى
    فى اشاعات بتقول انك كاتبة ان المدونة من الاشياء الصادقة عندك
    اخيرا اقتنعتى بيها وانها جزء منك على المدى الطويل كمان
    بس اية نزلت امته البوست داااا انتى مش كنتى عند خالتو يابنتى لاحقتى مركبة فى رجلك ترسيكل ولا اية
    وانا لو لا ان ماما الفراغ الاول فى الترتيب سكت عاااااااااااهههههههههههههههه
    حجة علشان اهرب ((وش مطلع لسانة ))
    اختى اللدود وحشانى والله جدا اظاهرى وبان عليكى الامان
    ولا انتى افكترى انك هتصومى فابتخزنى الاكل قبل رمضان كل سنة وانت ىطيبة ياارب
    اختى العزيزة دمتِ يارب بكل حب و ود وفى رعاية وحفظ الله دائماااااااا

    ردحذف
  18. جميلة جدا اجاباتك

    لكن بجد اللى نفسي تغيرية هو رقم 10

    لان الحياة فيها حاجات كتير حلوة وتفرح

    تحياتى وتقديري

    ردحذف
  19. بنتى وحبيبتى ايوش
    جميل الصدق ده ...بيريح القلوب
    وجميل اننا نمثل الصدق جوا قلبك
    وربنا يخلى بنات خالك وخالتك
    انا اكبر ولاد فى العيله وماعنديش ولاد خاله احبهم وولاد عمى بعيد بعيد قوى عننا
    وفكره حلوه انكم تشتركوا فى راجل واحد...كدا تضمنوا تباتوا فى القسم كل يوم وتاكلوا عيش وحلاوه مجانا
    هههههههههههههههه
    ربنا يسعدكم كلكم

    ردحذف
  20. هييييييييييه
    عديت انا من التاج :))))))

    اجاباتك جميله اوي يا ايوشه .. بس كويس انك دورتي جوه نفسك كويس ولقيتي 11 حاجه ..

    حاولي متكدبيش علي نفسك لانه بجد حاجه وحشه اوي .. :((

    وربنا يخليلك قلبك ابيض كده علي طووول :)


    معلش كنت مقصره معاكي بس كنت مسافره

    تحياتي

    ردحذف
  21. ايوش الجميله اليى وحشانى جدا جدا

    هقولك زى ما الكل بيقولاجابتك عجبتنى

    لا ااقلك هقلك بتعجبنى التيجان دى واجابتها فى انها بتعرفنى على المدونه او المدونه عن قرب

    وزى احساسى بيكى انتى بنوته جميله وراقيه

    ربنا يكرمك يا حبيبتى ويوفقك فى كل شئ خير ليكى

    ردحذف
  22. وكل شهر فضيل وانتى بالف خير وسلام يا يوش

    وشكرا على سؤالك عنى فى المدونه

    ربنا ميحرمنيش من ذوقك وكرم اخلاقك ايدا يا جميله

    ردحذف
  23. ربنا يكثر الحاجات الصادقة اللي في حياتك
    ويجعل حياتك كلها صدق × صدق
    علشان تكتبي من الصديقين




    هعمل نفسي مش واخد بالي
    ولا كأني شفت إسمي فوق
    معلش ,, بجد مش هعرف أجاوب
    مبحبش النوع ده من الأسئلة ومبعرفش أجاوبه خاااااااالص

    ردحذف
  24. مسائك سكر يايويو

    ان يكون الانسان صادق مع نفسه اصبح صادق مع الاخرين و تعامل بشكل من المسئولية
    عجبتنى اجابتك اوى لان فيها حكمة وعقل
    ربنا يسعدك يارب و يجمعك مع احبابك دايما على كل خير

    موضوع راجل واحد دا مشكلة
    هههههههههه دايما الزوجة مش بتحب تكون لها شريكة ابدا

    الكمبيوتر و النت زى الادمان
    بس ادينا بنحاول نسيطر على نفسنا شوية

    العصبية من اسؤا الصفات بس احيانا بيكون الموقف يستحق و دايما اللى بيحبونا بيقدروا الموقف

    ربنا يسعدك و يسعد قلبك يارب
    تحياتى
    يويو

    ردحذف
  25. احنا بنخاف ليه من الجهادوبنتكلم عليه على اساس انه دفاع عن الارض فقط , فيه كمان جهاد الطلب وهو محاربة جيوش الاقوام غير المسلمة حتى يكون المجال متاحا لدعوة الشعوب للاسلام الموضوع فيه تفصيل كثير لن يسعنا الوقت لتوضيحه ولكن لانريد ان نستحى من الجهاد فقط لشبهات الغرب المتكررة عنه ويكفينا فخرا القواعد التى وضعها الاسلام لهذه الحروب وفيها رقى اخلاقى لم يعرفه الغرب -الذين يثيرون الشبهات- فى تاريخ حروبهم القذرة (ردا على تعليقكم فى مدونة وحى القلم -البوست الاخير-) محمد اخو مصعب

    ردحذف
  26. كم هو رائع الصدق فى حياتك

    ردحذف
  27. اجاباتك بتدل على انك شخصية عندها هدف



    ربنا يقدرك وتحققى كل ما تتمنيه


    بس على فكرة انا زعلان


    لان ما مررتيش التاج ليا

    ----------------------------------
    مع تحياتى / حازم ربيع

    ردحذف
  28. bgd zy 3adtk sadka awy wgmela awy ya amraya rbna ykhly lk mamtk wakhwatk wokl as7abk wyrzoak bly y7bk wyadark bgd

    ردحذف
  29. حبيبتىىىىىىىىىىىىىىىى
    وحشتينى جدااااااااااااا
    كل سنة وانتى بخير ورمضان كريم
    بجد موضوع جامد اخر حاجة وكالعادة موضوع لذيذ
    تحياتى ووحشتنينى جدا

    ردحذف
  30. أمة الرحمن4 أغسطس، 2009 9:56 ص

    السلام عليكم ورحمة الله وبركاته
    عاجبانى فكرة اهداء التاج هذه
    اقبلينى صديقة جديدة وانتظرك فى مدونتى "سكون الروح"
    sokonelro7.ahlablog.net

    ردحذف