الجمعة، 5 يونيو، 2009

حرقة دم


لما الاقى اسبوع قبل زيارة اوباما وبعد زياته هنفضل اسبوع كمان الناس بتكلم وبتكتب والتليفزيون ينقل وناس تحلل وتفصص الخطاب والزيارة وكل شئ بجد يبقى حرقة دم


لان ببساطة شديدة جدااااااااااا وواضحة زى عين الشمس كده الحداية مش بتحدف كتاكيت ومشاكلنا وهمومنا وقرفنا واى حاجة بنعانى منها فى الوطن العربى حلها مش هيجى من برة احنا شعوب ساذجة بشكل لا يحتمل بنحط امال على حاجات عمرها ما هتحقق اذا كنا بينا وبين نفسنا هنونا على بعض الابن بيضرب ابوه وامه والاخ بيقتل اخوه منتظرين العالم اللى برة دى تعمل فينا ايه الراجل واضح جدا جدا وقالها مصلحة امريكا هى الاهم هيعمل اى شئ علشان مصلحة بلده حتى انه ينافق ويجمل فى صورته قدامنا



*
*
*
*


حرقة دم لما يجى ضيف لبيتك وبدل ما تفرح بزيارته وتقول مفيش اجمل من صلة الرحم تكتشف بعد مرور خمس او ست ساعات ان الزيارة بقيت اوفر اوى المفروض يعنى نكون ناس عندها شوية حساسة ونعرف ان فى ناس تعبانة قرفانة مخنوقة والمثل بيقول يابخت من زار وخفف هنا يتحول المثل بقى يابخت من زار وتقل ورزل وغتت كمان


*
*
*
*



حرقة دم لما الاقى موضة السرقة فى كل المدونات واحد معندهوش دم ولا اخلاق ولا اى احترام للغير يجى ببساطة ياخد فكر ومجهود ومشاعر واحاسيس ناس تانية علشان هو يفرح بكلمتين اطراء واعجاب بموهبته الفذة فى سرقة غيره


*
*
*
*


حرقة دم لما اجى افتح التليفزيون وقبل رمضان بكام شهر ولاقى الاعلانات المسلسلات وحصرى على قنواتنا الفضائية وهتلاقى اللى عندنا مش عند اى حد تانى وفى وسط كل الهوجة دى مفيش برنامج دينى واحد يوحد ربنا يقولنا رمضان جه هنا لازم اقول الله يرحمك يارمضان بجد افسدتم علينا فرحته من قبل ما يجى بشهور


*
*
*
*



حرقة دم لما اسمع بنت بتقول لما مامتها "اسكتى مش النهاردة عيد ميلاد ابراهيم "

تروح ترد عليها بكل شغف لسماع باقى الكلام وحصل فيه ايه؟؟؟

فى الوقت ده تسالنى مين ابراهيم اقولك مش تفهم غلط ابراهيم ده عقبال عندك نجم استار اكاديمى

اللى طبعا هى ومامتها بيتبعوه كل يوم لدرجة انها بعتت رسالة للبرنامج علشان يبعتلها كل جديد على موبايلها

تسالنى البنت دى كام سنة اقولك 12 سنة

ماشاء الله لما البنت شايفة امها كده بالذمة تتطلع ايه لما تكبر دى مفيش فى دماغها غير الاغانى والعيال الصايعة بتاعت البرامج وقدوتنا استار اكاديمى وسمعنى سلام اذا كان رب البيت بالدف ضرب


*
*
*
*


حرقة دم لما تلاقى اعلان بيقولك ابعت رسالة على الرقم الفلانى وسعر الرسالة 6 جنيه علشان اقدر افوز بشرف المشاركة فى برنامج "اسخف ادم شو" ابعت رسايل كل رسالة ب6 جنيه علشان اروح اتفرج على واحد بيقلد القرد فى كل حركاته علشان اتفرج على كمية سخافة تفوق اى سخافة فى العالم وتلاقى شوية ناس هبلة بتصقف وتتضحك على كل كلمة هنا لازم اقول ربنا يشفي


*
*
*
*


حرقة دم لما اكون مضطرة انى اكون برة البيت ومفيش نت انى اقعد قدام التليفزيون بالجبر

علشان الناس اللى انا عندهم بيحبوا التليفزيون وبيحبوا قنوات المسلسلات العربى

بعد مرور كام ساعة بكتشف ان نسبة ذكائى ده لو كان فيه بتقل بتقل لغاية ما تختفى وهما مش متضررين ابدا وبالعكس مبسوطين اوى وفى سباق علشان يلحقوا يخلصوا مسلسل ويقلبوا على اللى بعده


*

*
*
*



حرقة دم لما حد يمسك الموبايل بتاعى ويقولى هنقل شوية حاجات بالبلوتوث وبعد خمس دقايق فى التقليب فيه يكتشف انى حاطه على الموبايل المصحف وشوية اناشيد دينية على شوية اناشيد عن فلسطين يبصلى بقرف ويقولى ايه ده اللى انت حاطه على الموبايل مفيش اغانى مفيش صور مفيش فيديوهات امال الموبايل وكارت االميمورى لزمتهم ايه


*
*
*
*



حرقة دم لما الاقى مناقشة حامية جدا بين شوية شباب على الفيس بوك عن مين الاحسن تامر حسنى ولا حماقى لو الشباب كله بالحماس ده بجد فى كل حياتهم العادية كانوا خلوا البلد دى حاجة تانية خاااااااااااااالص





شوية حاجات هحرقوا دمى خلال اليومين اللى فاتوا


هناك 40 تعليقًا:

  1. ياه عليكي يا ايوشه
    والله حرقتي دمي ع الصبح
    انا هرد على 3 حاجات

    اول حاجه حرامية المدونات
    ده شيء قذر جدا ومفيش دم ولا ضمير ولا خوف من ربنا
    أنا عن نفسي بكون خايف حد يسرق حاجه من شغلي وبالخصوص كمان الشعر لانه فعلا من بنات افكاؤي
    بس هنقول ايه غير حسبنا الله ونعم الوكيل
    في حركه حلوه عاملاها موناليزا في مدونتها وهيا انها مانعه استخدام كليك يمين في الماوس لما تدخلي صفحتها ممكن اجبلك الكود لو عايزاه


    تاني حاجه
    عيد ميلاد ابراهيم
    مين ابراهيم ده؟
    التربيه طبعا هيا السبب في ده
    يعني ام معندهاش اي احساس بالمسئوليه ومعندهاش الحد الادنى من التدين لازم بنتها تنحرف واكيد الاب راجل معندوش غيره او نخوه
    ربنا يرزقنا الذريه الصالحه


    تالت حاجه
    مسلسلات التلفزيون اللي بتقلل مستوى ذكائك
    أنا من يوم مادخلت الجامعه مش بتفرج في التلفزيون الا على مطشات الكوره والنشرات والاحداث السياسيه
    الباقي ع الكمبيوتر الحاجات الدينيه
    وأفلام الدراما الأجنبيه


    هدي أعصابك كده وبلاش حرقة دم حتى علشان تعرفي تنامي شويه
    هههههههههههههه

    ردحذف
  2. تاااااااااااانى تعليييييييييييق


    أروح أقرأ و آجى

    ردحذف
  3. مصطفى أبوزيد

    الحمد لله محدش يقدر يسرق حاجة من عندى لان معنديش حاجة تتسرق ههههههههه
    كله تخاريف وبس
    بخصوص الكود اللى يمنع النسخ للاسف ناس كتير عملته ومفيش فايدة يكتبوه الكلام بايديهم دول ناس مش بتغلب



    والحمد لله فى بيتنا مش بهوب ناحية التليفزيون الا لما بيكون فى خبر سياسى مهم كده ويستحق المتابعة غير كده مقاطعة كله حتى البرامج الدينية لو عايزة اسمع حاجة بنزلها من النت


    بخصوص اهدى اعصابى وانام تصور انت كده حرقت دمى بقولك مش بعرف انام تقولى روحى نامى :( هههههههه

    مرسيى للمرورك ياشمهندس

    ردحذف
  4. Soul.o0o.Whisper

    صباح الخير ياقمر وانا اقول المدونة نورت ليه :)

    ردحذف
  5. هلا أيوش صباح الخير عليكى يا جميل

    دا نورك انتى

    يارب تكونى بخير يا جميل


    ياللا دا التالت شرعا


    و اروح الحق الرابع
    :)

    ردحذف
  6. بصى يا أيوش

    فعلا عندك حق

    حاجةتغيظ لما نكون اصلا بالشكل دا

    و منتظرين ناس لا تعرف انسانية و لا تعرف ربنا اصلا ان الخلاص ييجى على ايدهم

    حاجة تنرفز بجد


    ربنا يهدى



    تحياتى يا جميلة

    ردحذف
  7. بما إن أغلب الحاجات اللي بتحرق الدم دي مصدرها التفلزيون
    فأنا بحمد بنا وببوس إيدي شعر وذقن إني كائن " لا تلفزيوني "
    وكل علاقتي بالتفلزيون تنحصر في " ماتشات الكورة "
    لدرجة إني معرفش إبراهيم .. وربنا ما أعرفه
    وأخر ستار أكاديمي عرفته كان فيه واحد من مصر إسمه محمد عطية .. هوه عامل إيه دلوقت صحيح؟

    أما بخصوص أوباما وهوس المصريين بيه بقلهم
    ما حك ظهرك مثل ظفرك

    ورغم كل ده .. برضه دمي اتحرق

    ردحذف
  8. هي بصراحة كلها حرقة دم
    ايه رايك تقفلي التليفزيون يا تجيبي قنوات دينية تحترم عقليتك و تمنعي الزوار من دخول المدونة الا بالبيرمشن !

    و في مليون حاجة كمان تحرق الدم بس بجد انتي جبتي اهم حاجات و نرفزتيني اكتر مانا

    ردحذف
  9. اجمل بوست قريته الشهر دا بجد
    والله انتي ماشاء الله عليكي
    فعلا كل الحاجات دي بتحرق دمنا وبتخلينا يجيلنا نوبة من الغثيان كدا وفقدان الشهيه للحياة اساسا
    وانتي نسيتي تقولي حرقة دم لما تنزلي الجامعه وتشوفي البنات والشباب ومتعرفيش تفرقي بينهم مين فيهم البنت ومين الواد
    لما تشوفي الواد من دول حاطط الهاند فري في ودنه وطرفه التاني في ودن صاحبته
    حاجه تقرف مش نحرق الدم بس
    تسلمي يا ايوشه علي البوست دا

    ردحذف
  10. ابوماما حرقة دم ...ده حتي راجل جامد و ضحك علي الشعب كله

    و المثل بيقول يابخت من زار و غار

    و السرقة دي طبيعية ...دا الواحد لوماتسرقش هايحس اننا مش في مصر

    و هو رمضان بقي ايه في التلفزيون غير مسلسلات و اكل ؟؟؟

    بتهزري النهاردة عيد ميلاد ابراهيم ؟
    ياخسارة
    ههههههههههه
    انا اصلا مش بكره برنامج اد البرنامج ده ....و مش بحب اللي بيتفرجوا عليه

    سخيف شو ....الحمدلله اني مابتفرجش علي الحاجات دي عشان الدكتور منعني اني اتعصب

    احساس المسلسلات ده وحش قوي ...وبالذات لما يكون في البيت و هما مستمتعين ولا الواحد مش عارف يشوف
    otv , ontv او حتي الجزيرة الوثائقية
    ولا mbc3 الللي بموت فيها
    منه له جاي رايح منه له

    انا سعد الدلي جنيه ...وانتي سعد ادلك ايه ؟؟؟

    ههههههههههههههههههههه

    الموبايل ده انا بكره و انا اختصرت جايب اصغر كارت ميموري عشان انجز و اي حد ااقواه في مزيكا عمرو خيرت علي موسيقي تصويرية افلام تنفع ؟

    خناقات تامر و حماقي دي زبالة بجد
    طب نتخانق علي عمرو و منير
    هههههههههههه

    وانتي يتحرق دمك و انا اكتب كل ده و انا لسه صاحي ليه ؟
    حاجة بجد تحرق الدم

    ردحذف
  11. حقيقى حقيقى

    ليكى حق

    اشربى شوية ميا يمكن الحال يتعدل

    ردحذف
  12. السلام عليكم

    ازيك يا بلدياتى

    رغم انى محروق دمى من زمان ومش عايز احرق دمك معايا بس واضح ان دمك محروق خلقة
    الشعب المصرى يا ستى خدى عندك
    شعب سافل حقير هايف تافه مش متربى معندهوش رجولة ويستحق الضرب بالجزم من الاخر يعنى شعب يستحق الموت الا من رحم ربى خمسة مليون على اقصى تقدير من الخمسة والتمانين

    يا ما الناس قالت وعادت وزادت علشانتعدل المعوج بس هو شعب يحب الحال المايل

    بس خلاص

    عامة أعتذر على الانفعال بس من حرقة دمى

    يارب تكونى بخير دايما

    ردحذف
  13. يا ايوشه سايبك مكتئبه
    ايه قلبت معاكى باحباط الله يكون فى عون بجد

    ردحذف
  14. بلاوى والله العظيم وأوباما جه وأوباما راح وبعدييين ولا حاجة
    وحكاية الضيف بقى انا بشوف انى اوضحله علطول اصل مثلا مش هقعد معاه وانا متضايق بس تصدقى برده صعب اوضحله مش مشكلة اتحملى الشويتين دول بقى
    وسرقى افكار ناس وستار زفت اللى طالع فىا لبخت دا كمان واعلانات على تليفزيونات
    بس السؤال بقى لو قعدنا نفكر فى كل دا هل دا صح ؟
    طيب اننا نتجاهله هل دا صح ؟
    ولا نحرق دمنا برده دا صح ولا ايه
    انا بقول اننا لازم نتكلم على الحاجات دى حتى لو بتحرق دمنا بس فى نفس الوقت برده مش نديلها مساحة كبيرة من الحياة عشان كمان نقدر نشوف اى حاجة حلوة مش بتحرق الدم ان وجدت يعنى

    ردحذف
  15. السلام عليكم

    ياااااه انت اتحرق دمك خالص دا اكيد

    في بنزين جنبك

    *********
    فعلا والله حاجة تشل

    تقبلي مروري

    ردحذف
  16. السلام عليكم

    ايوشه

    والله العظيم عندك حق فى كل كلمة قولتيها

    وكلامك بجد حرق دمى

    تسلم إيديكى ياسكره

    امووووووووووووووه

    تحياتى

    انوسه

    ردحذف
  17. ايوشه
    هوني عليك
    حرقتي دمنا يا شيخه
    الحاجات دي موجوده ومش هتتغير بسهوله
    ربنا يهدي الجميع

    ردحذف
  18. تصفيق حاااااااااااد

    والله العظيم كلامك فى منتهى العقل اللى فى الدنيا

    أنا مش عارف أختار أعلق على أى حرقة دم فيهم لأنهم كلهم بجد يحرقو الدم قوى

    وفيه غيرهم كتير

    يظهر ان حالنا مش هينصلح أبدا

    بس أنا طول عمرى بقول لو عايزين حالنا ينصلح يبقى كل واحد يبدأ بنفسه

    لو كل واحد بدأ بنفسه هتلاقى كلنا أصلحنا حالنا بنفسنا

    لكن لا يأس مع الحياه ولا حياة لمن تنادى

    بجد بجد بجد تسلم ايدك موضوع ممتاز

    ردحذف
  19. السلام عليكم و رحمة الله و بركاته
    فعلا لك حق يتحرق دمك..
    و على فكرة حرقة الدم دى بثوابها ...لأنى كما أرى هى غيرة على الدين و على حال الأمة ..
    بس لازم مع حرقة الدم يكون فيه شئ إيجابى بنعمله ...مش عارف هو ايه ...بس على الأقل نصلح نفسنا و اللى حوالينا على قد ما نقدر

    احنا شعوب ساذجة بشكل لا يحتمل
    احنا شعوب نحب أكل البلوظة و الصراحة الراجل بيعمل بلوظة فى الجون...
    بس و الله فيه ناس كثير الحمد لله فاهمة الفولة...فيه ناس بدأت تصحصح

    تفائلى بالله عليكى ...اضحكى ..
    مش همشى إلا لما تضحكى ..
    ده ربنا بشرنا بالنصر و التمكين إن شاء الله..

    و الله الحق هيغلب و الخير هيسود و الأخلاق هتنتصر و ديننا هيحكم

    بارك الله فيك و زادك غيرة على حرمات الله و على الأخلاق الحسنة

    تقبلى تحياتى

    ردحذف
  20. هههههههههههههههههه
    معاكى حق والله يا اية كل دا فعلا حاجة تحرق الدم وتكسف بس اية السلام المربع الجديد دا اذا كان رب البيت بى الدف ضرب فشيمة اهل البيت الرقص ههههههههههههههههههه
    بجد فى مكانها بوست اكتر من رائع وانا معاكى حانا مين بس اللى هيسرقنا وياستى حتى لو يعنى ماهو فى الاخر هينكشف بعد فترة هتلاقية افلس لانه معندهوش جديد يقدمه ودول بيظهروا بسرعة ومبيكملوش سيبك
    المهم انا موجود انتى اللى فين بقة واخبارك اية واية الاختفاء دا بس
    اختى اللدود
    دمتِ بكل حب و ود وفى رعاية الله وحفظه دائمااااااااااا يااااااااااارب

    ردحذف
  21. لو نظرنا للدنيا بالشكل ده
    يبقى مش حيفضل عند الواحد شويه دم
    لانه حيتحرق كله

    صحتك بالدنيا
    ونسيت اقولك على كمان حاجه تبع حرق الدم

    طنط هيفا حتطلع علينا فى ركضان بالفوازير


    وعاوز منك استفسار بسيط

    مين اللى حيكسب
    تامر حزقى ولا حماكى

    ابقى قوليلى

    ردحذف
  22. كده يا ايوشة
    اول مدونة افتحها النهاردة تركزي لي حرقة الدم في كاس العذاب
    عااااااااااااااااااااااا
    طيب بجملة حرقة الدم
    مش حرقة دم إن البنات المثقفات ذوي العقول والتقوى قاعدين في بيت ابوهم وان بتوع ابراهيم واسماعيل وتتح هم دول اللي مطلوبين في سوق جواز ذكور آخر الزمان
    مقهورة منك
    وفي نفس الوقت مقدرة جدا لحرقة دمك
    بس كل الأصناف دي بتثبت ان المنحنى لابد يطلع تاني
    مبقاش في تحت عن كده ينزل له

    ردحذف
  23. حرقة الدم في كل ما تقع عليه العين المجرده في كل لحظة ولكن الإنسان لازم يتعامل مع الأمر الواقع ويحتسب ند ربنا لأن بالطريقة بتاعتك دي أحب أقولك إنك مش هاتكملي 30 سنه بالكتير ويجيلك الأمراض المستوطنة بتاعتة حرقة الدم اليومي :))))

    لاء بجد ساعات الأمر بيخرج عن احتمال الانسان لكن في النهاية ما في يدنا تغييره نغيره وماليس لدينا فيه خيار نكله لله

    تحياتي :)

    ردحذف
  24. بوست يحرق الدم
    تحياتى
    ----
    سلام بقى الحق اشرب كوبايتين دم
    بسرعة
    دمى راح يا ناس
    :-)

    ردحذف
  25. بخصوص اوباما
    فانا متغاظ من اللى صقفلوله
    و اللى قالوا ده وحش و مقالش شىء كويس

    هو مش حيعمل حاجة للناس اللى مش حتعمل حاجة لنفسها
    ---
    اما بخصوص شهر رمضان
    ففيه حد قال مرة
    شهر رمضان معدش الذى انزل فيه القرآن
    بقى شهر رمضان الذى انزل فيه المسلسلات
    !!!!
    و بعدين عم رمضان بيحب التليفزيون
    ههههههههههههه

    ردحذف
  26. وانا موافقاكى وريحة الشياط اهى طلعت عشان انا كمان دمى اتحرق

    ردحذف
  27. يا حبيبتي
    بتقولي لمين
    دى مسألة تعود زي ما بيقولوا
    الناس اتعودوا على كدة
    كبرنا لقينا اهلنا بيعملوا كدة
    عايزانا نعمل ايه
    غير اننا نقول سمعا وطاعة بالغصب
    مش بلوم الاهالى لواحدهم
    لا برده المفروض نخلي عندنا ذرة دم واحدة ونحس بملايين الناس اللي بيموتوا خلال ساعة المسلسل و لا الساعتين بتوع الفيلم
    وهو شغال بقى " يا تري البطل حيعمل ايه !! حينقذ حبيبته ولا حيسيبها "
    وهي عمالة تقول " الله ع الرومانسية شايف يا حج يا جوزى "
    ويخربوا بيوت الناس
    حسبي الله ونعم الوكيل
    تقولى ايه بقى
    غير فعلا
    " حرقة دم "
    تسلم ايديك يا قمر

    ردحذف
  28. يااااااااه
    ده انتى دمك محروق اوى كده
    اولا انا فعلا معرفش ابراهيم ده مين
    وثانيا
    الناس بتعمل معايا كده برضه لما تمسك الموبايل بتاعى بالظبط ونفس نظرة الاقرف
    ثالثا
    انا اكتر حاجة بكرهها المسلسلات وخصوصا التركية اللى الناس بتابعها جامد اوى دى
    فعلا ممكلة اوى
    اصل انا كنت مضطر اعد امبارح والنهاردة على التليفزيون زيك تمام بس طبعا مفيش مسلسلات


    ربنا معاكى
    ممكن اعزمك على كوباية عصير تروقى بيها دمك

    ردحذف
  29. سلامتك يا ايوشه من حرقة الدم بس و الله يا بنتى أنا كمان دمى أتحرق معاكى :)
    بالذات بقى موضوع ستار أكاديمى اللى بجد بقى غير محتمل من جميع النواحى و أحيانا لما بأفكر فيه و فى نوعية الشباب و البنات اللى بيقدموهم كقدوه بأشعر اٍن الموضوع خبيث جدا و فيه ما لا يمكن تصوره بالعين المجرده ..
    تقبلى تحياتى و تقديرى ..

    ردحذف
  30. ازيك يا ايوشه
    بصراحيه يا ايوشه انت دمك اتحرق من حاجات كتير قوى ... بس اكتر حاجه تحرق الدم وحرقتى دمى معاكى هو النقاش بين العيال عشان مين احسن تامر حسنى ولا الواد اسمه ايه ده
    فعلا كل حاجه بقت تحرق الدم اليومين دول
    تحياتى

    ردحذف
  31. :S:S:S

    انا تعبت من البلد دي بجد

    نو كومنت عشان هتشل

    ردحذف
  32. كل الحاجات دي بجد تحرق الدم وتخنق

    اول زيارة لمدونتك الجميلة ومش هتكون الاخيرة ان شاء الله

    ردحذف
  33. مع التحفظ الشديد عن حرقة الدم الأولى
    أشاطرك الرأي في الباقي...ولكن يبقى الحال كما هوعليه
    لك كان لحرقة الدم وما شابهها من امتعاض يغير ويؤثر لبالغنا فيه..ولكن حسبنا أننا ننفس عن أنفسنا ..حتى تنصلح الأمور وتتعدل

    الحارة سد

    ردحذف
  34. أيوشة
    أوباما خلاص زي ما جه زي ما راح.. واحنا أخدنا شوية تصفيق حاد يكفونا سنتين تلاتة وخلاص.. يللا أهو غار في ستين سلامة

    موضوع التلافزيون بكل اللي فيه دة.. انا من كتر حرقة دمي منه فعلا بقيت اخليهم قاعدين يتفرجوا على التلفزيون وانا متنحة فيه معاهم بس مش بتفرج.. تؤ تؤ تؤ.. ابدا وحياتك دة انا كنت بركز الشعاع وانا بدعي انه يبوظ.. والحمد لله بيجيب نتيجة الموضوع ده
    التلفزيون من غباءه بقى يستاهل انه يتقاطع اساسا


    البنت ومامتها.. دول عينه من حاجات أسوأ كمان بكتييييييير.. الامهات الوقتي بقت أهبل من البنات اساسا.. كل ده من البيوت اللي مفيهاش ود ولا رحمة ولا تواصل ولا احترام ولا مبادىء.. بس مع ذلك فيه كتير جدا بيوت مليانه مبادىء واحترام وبيربوا ولادهم على كدة.. والحمد لله الامل لسة موجود شوية.

    موضوع السرقة ده بقى عمره ما هينتهي.. بس المسروق بقى عليه عامل مهم جداااااااا في انه ياخد حقه ويسعي انه ياخد حقه.. طالما مش هنعرف نمنع الحرامي يبقى نفضحه.

    انا لو منك محرقش دمي.. الاحسن نفكر كويس وباذن الله نلاقى حلول ولو كانت بسيطة.

    ردحذف
  35. حرقة دم لما الاقى موضة السرقة فى كل المدونات واحد معندهوش دم ولا اخلاق ولا اى احترام للغير يجى ببساطة ياخد فكر ومجهود ومشاعر واحاسيس ناس تانية علشان هو يفرح بكلمتين اطراء واعجاب بموهبته الفذة فى سرقة غيره


    !!!!!!!!!!!!!!!


    اهى ده اللى بتغيظنى اوووووووووى


    بتخلينى اطق والله

    ردحذف
  36. والله معاكى حق

    بس تفتكرى ممكن نعمل حاجة

    ابدا

    احنا شكلنا هنموت ودمنا محروق

    ردحذف
  37. نسيت اقولك

    اشهد ان لا اله الا الله

    واشهد ان محمد رسول الله

    الحمد لله انى قدرت اوصل لصفحة تعليقاتك

    واكتب فيه ولو كلمة

    الحمد لله

    ردحذف
  38. ايوشه

    مش عارفة أقول لك إيه ، الحاجات اللى قولتيها دى بتسلط الضوء على عيوب أخلاقية و إجتماعية و سلوكية و و و

    تصدقى أول مرة أعرف دلوقتى حكاية اعلانات المسلسلات دى!!!!هم بيعلنو عن دلوقتى؟؟؟!!!!!!، مممممم لأ خير خير

    معلش يا ايوشه ماتحرقيش فى دمك ، مافيش حاجة تستاهل، أنا لما باشوف الحاجات اللى تحرق الدم دى بأقول جملتين
    الأولى: ربنا يهديهم يا رب
    التانية: الحمد لله الذى عافانا مما ابتلى به غيرى و فضلنى على كثيرا من خلقه تفضيلا

    فأوصى نفسى و إياكى بالجملتين دول علشان ماتحرقيش فى دمك كتير

    أشكرك يا ايوشة على زيارتك لمدونتى و بإذن الله يدوم التواصل

    تحياتى ليكى دايما، ربنا يوفقك و يبارك فيكى

    ردحذف
  39. السلام عليكم

    الحمد لله أنا خاصمت التليفزيون من يوم ماعرفت النت وتابعت زياره أوباما على النت وكل اللى طلعت بيه إنه راجل جابوه علشان يجمل وجه أمريكا القبيح
    وياما حاجات بتحرق الدم
    وياما دقت على رأسنا طبول ولسه هتدق

    مدونتك جميله وتستاهل الزياره
    برغم حرقه الدم التى قابلتنى فى هذه الزياره لدرجه إنى شميت ريحه شياط
    وسأعود لإستكمال جولتى

    وتقبلى تحيتى ومرورى

    ردحذف
  40. أول مرة أقول على حاجة حرقت دمى إنها حلوة

    تحياتى

    ردحذف