الاثنين، 30 مارس، 2009

قالولى بتحب مصر... قولت انا خايف


كنت رايحة انام بس مش جالى نوم سمعت خبر عن الافراج عن الضابط اسلام نبيه المتهم فى قضية تعذيب مواطن وهتك عرضه واتحكم عليه ب3 سنين سجن وخرج من السجن وهيرجع يزاول عمله مرة تانية بس الحكومة كتر خير هتغير بس مقر عمله وتنقله لمكان تانى وبما انى وعدت انى مش هعمل بوست واكتفى بحرقة الدم قولت اتصفح فى النت شوية ودخلت اليوتيوب وشفت شوية فيديوهات عن تعذيب المواطنين وازاى بتوصل درجة الاذلال فى الوطن

ازاى اتحول الناس دى لحاجات تانية مينفعش نسميهم بشر ولا انسان مش هقول دى ناس مريضة نفسية علشان مش نعفيهم من العقاب دول اشخاص مجرمة وسفالة كمان وفاكرين انهم اقوى من الدنيا بس ربنا اقوى من كل البشر وانتقامه هيكون عسير لانتهاك حرماته بالشكل ده اللى يغيظ اكتر ان الضابط بعد ما افرجوا عنه باباه بيقول ((ان اسلام اتعلم الدرس وهيرجع يقف على رجليه تانى ومش هيستسلم ))

ياعين امه يااخويا بجد صعب عليا

مهوا لوحضرتك عرفت تربى اسلام كويس اوى مكنش اسلام ننوس عين مامته اللى فرحان بيه ده يعمل كده دى نتيجة لتربية سيادتك وامثالك للاشكال دى وبصراحة مستخسرة اخسر من حسناتى القليلة فى شتيمة الناس اللى زى كده وهتكتفى بانى كتبت حاجة بعد ما قريت قصيدة للشاعر المصرى الفلسطينى تميم البرغوثى بتقول



قالولي بتحب مصر فقلت مش عارف

المعنى كعبة وانا بوَفْد الحروف طايف

وألف مغزل قصايد في الإيدين لافف

قالولي بتحب مصر فقلت مش عارف

أنا لما اشوف مصر ع الصفحة بكون خايف


ما يجيش في بالي هرم ما يجيش في بالي نيل

ما يجيش في بالي غيطان خضرا وشمس أصيل

ولا جزوع فلاحين لو يعدلوها تميل

حكم الليالي ياخدهم في الحصاد محاصيل

ويلبّسوهم فراعنة ساعة التمثيل

وساعة الجد فيه سخرة وإسماعيل

ما يجيش في بالي عرابي ونظرته في الخيل

وسعد باشا وفريد وبقيّة التماثيل

ولا ام كلثوم في خِمسانها ولا المنديل

الصبح في التاكسي صوتها مبوظُّه التسجيل

ما يجيش في بالي العبور وسفارة اسرائيل

ولا الحضارة اللي واجعة دماغنا جيل ورا جيل

قالولي بتحب مصر أخدني صمت طويل

وجت في بالي ابتسامة وانتهت بعويل







وده كان ردى على المواقف والمشاهد اللى شفتها وجابتلى اكتئاب




قالولى بتحب مصر قولت انا خايف

لاحسن اعبر عن حبى وانا شايف

سجون ومعتقدات بيها البشر طايف

وبتعذيب وهتك للاعراض فى البلد لافف

لكل مبدا وقيمة الوطن حاذف

يامصــــــــــــــــــــــــــــــــــر

بكره فيكى احساس الغربة وغدر الزمان

بكره الظلم المعشش فى كل مكان

بكره السلطة وسطوة السجان

تعيش فيها لما ضعيف وجبان

انسان معدوم غلبان وكحيان

ويتحكم فيك بشر فى صورة حيطان وغيلان

لا بقى فيكى نديم ولا خيلان

وهرب صوت عصافيرك على الاغصان

وعشش بين اراضيكى من الالاف غربان

وهرب فيكى كل معنى جميل واحسان

امتى بس هتفوقى وتنفضى الاحزان





وفى النهاية على راى اغنية شادية فى فيلم احنا بتوع الاتوبيس


(( عملتوا ايه فى الدنيا دى آه ياولادى ... ياعمر متغطى بحضنى.... آه ياولادى..... آه ياولادى))

هناك 67 تعليقًا:

  1. اول تعليق محجوز لثندر :)

    ردحذف
  2. أختي العزيزة

    واقع اليم عبرت عنه بكلمات تخرج من حنايا من يشعر بالهم

    لعل النصر يأتي قريبا
    دمت طيبة

    ردحذف
  3. انتِ كاتبة
    عبر عن إحساسك
    وبصراحه مش لاقى كلام أعبر بيه الكلام عمره ما يقدر يعبر عن اللى جوايا

    ردحذف
  4. بعد الكلمتين الجامدين اللى انتى كتبتيهم دول فى حب مصر ... اقدر اقولك وكلى حزن واسي .... انك هتوحشينا والله يا اوشة... طبعا احتمال كبير توحشينا ... واحتمال كبير ما نشوفكيش الا بعد سنين ...لان شكل الموضوع الجاي بتاعك هيكون باسم ( 25 عاماً .. تجربتى فى السجون المصرية) او يكون العنوان (مذكرات مسجونة من زمان)
    ... طبعا كل الكلام دة دعابة مني . والموضوع معبر جدا وكلناعارفين اية طعم الظلم لو وقع على حد

    ردحذف
  5. لا حول ولا قوة الا بالله ..

    والله شئ يحزن ..

    الظابط يطلع والجزاء مجرد نقله ..

    ده التعذيب اقل شئ له انه يتفصل من وظيفته ..

    كرامة الناس اللى اتعذبت هايعوضها ايه ؟؟

    هايعوض ايه راجل كبير محترم عمره ما حد مد ايده عليه ياخد قفا ولا قلم على وشه ..

    حسبنا الله ونعم الوكيل ..

    والبوست فكرنى بأبيات لفارق جويدة ..

    (( ماذا يفيد إذا قضينا العمر أصناماً
    يحاصرنا مكان
    لم لا نقول حبيبي قد مات فينا .... العاشقان ؟
    لكنني
    ما عدت أشعر في ربوعك بالأمان
    شئ تكسر بيننا
    لا أنت أنت ولا الزمان هو الزمان ))

    دمتِ بخير ..

    ردحذف
  6. لا حول ولا قوة الا بالله
    يعنى البيه خرج وحيمارس عمله
    لا حول ولا قوة الا بالله العلىّ العظيم
    شىء يبكى بدل الدموع دم والله ياأيوشة
    وبعد كده نسأل ليه بنهون على الغرب!!
    كلامك مؤلم وكلام تميم البرغوثى مؤلم ايضا:(

    ردحذف
  7. إنما مين ثندر ده ياأيوشة
    اللى محجوز له او (لها)
    اول تعليق وما جاش
    او ما جتش للحين؟

    ردحذف
  8. ياريت تبقى تقوليلى على مكانك علشان ابقى اجيبلك عيش وحلاوة
    بس بصراحه كلمات جامدة وياريت تأثر فى شوية البشر اللى مفيش فى قلوبهم رحمة لاخوانهم
    ربنا يسامحهم ويرحمنا منهم
    صحافية حرة
    حور نور

    ردحذف
  9. السلام عليكم


    دى اول زيارة للمدونة الجميلة دى


    وانشاء الله مش هتكون اخر مرة


    بجد البوست جميل جدا


    بس اعزرينى مش عارف اعبر اقول ايه


    بجد كلامك الجميل


    عفوا اعزرينى


    فلا املك سوا ان احيكيى

    على روعة ما تسطرين

    تحياتى


    رومانسى مشاكس

    ردحذف
  10. حلو قوي البوست ده خصوصا ان كنت لسه بتفرج علي احنا بتوع الاتوبيس اصلا

    بس حرقتي دمي علي الظابط اللي هيرجع يمارس عمله ده
    و اكيد هيعمل كده تاني اصل ديل الظابط مايتعدل حتي لو دخل السجن

    اة يابلد عايزة ولد بس انا مش فاضي

    ردحذف
  11. السلام عليكم

    قلبتي علينا المواجع
    التي نعيشها لحظة بلحظة

    احتمال كبير نفتقدك وكل اللي هيعلق هنا
    ،،،،
    ده حال مصر الان والقائمين عليها
    من أعلي سلطة(بضم السين) الي أدني فرد فيهم

    أصبح الاضطهاد والقمع سياسة

    ،،،،
    تعرفي أن بعض من هؤلاء المهدور كرامتهم
    بعد ما بيسمع بهذه المهازل
    ون أقل شئ من حقه لن يعود اليه
    بيكون هدفه أنه يقتل - من تسبب في اهانته واغتصاب كرامته

    لذلك هذا النقل لم يكن عقابا - بل لحمايته

    ،،،،
    عندك حق لو أباه أحسن التربية
    لما فعل ذلك

    ولكنه تربي علي أيدي الداخلية كذلك
    وما أدراك ما تربيتهم


    تحياتي

    ردحذف
  12. أنا سمعت عن خروجه
    لكن أول مرة أسمع عن رجوعه للشغل
    بجد دى حاجة تحرق الدم والله العظيم
    مش عارف أقول ايه .. ومش لاقى كلام أقوله


    شكراً على نقل قصيدة تميم
    قريتها وسمعتها منه قبل كده
    وهوه من أحسن الشعراء الشباب دلوقت

    ردحذف
  13. عيوشة
    شعرت بالحزن وانا اقرأ البوست
    حقيقى لازم نحزن
    بقينا فى زمن الخوف من كلمة باحبك يا مصر
    بقى حب بلادنا جريمة تقذف بنا الى المعتقلات
    ولا يبقى لنا سوى الدعاء ان يصلح حال هذه الامة
    ويرحم ابناءها
    اد ايه مشاعرك عميقة
    تحياتى

    ردحذف
  14. تعرفى يا ايوشه

    انا مش بحب اتفرج على الحاجات دى ولا حتى اقرا ولا اسمع عنهم
    لانى بحس ان الدنيا خربت
    وملهاش لازمة
    وقرفت منها فبلاش اكتئاب

    تحياتى

    ردحذف
  15. على قد ما الموضوع صعب كده و فعلاً عصيب لكن لما الواحد بيبص للدنيا بنظره بعيده شويه بيلاقي زي ما فيه ناس بتعذب و اخلاقها زفت و معندهاش حاجه اسمها احساس ...... بلاقي ناس بتموت علشان تنقذ ناس تانيه و الاقي ناس بتسهر الايام علشان تدورلك على حاجه مسروقه و بلاقي و بلاقي ناس كتيره بتموت في
    كلمه من تلت حروف .. الميم و الصاد و الراء .

    **********************

    و شكراً يا ايوشه على سؤالك الدائم انا بس كنت مشغول شويه و بتابع موضوع حلم العلم و اخر تطوراته و بإذن الله نرجع بحاجه قريبه

    ردحذف
  16. اعلان كده عالماشى
    ايها المدونين ايتها المدونات اسمعوا وعوا
    احنا بنعمل جريدة جديدة اسمعها جمهوريه شباب مصر
    ودى بنكتب فيها كل اللى احنا عايزينه بصراحه وحرية تامه ده طبعا تحت رعاية حريصة
    اللى عايز يشارك معانا يزور مدونه صحافيه حرة او ***حور_ نور*** على اللينك ده
    http://saharakl.blogspot.com/

    ردحذف
  17. معلش بقى يا ايوشة عالاعلان وياريت تشاركى معانا يا قمر

    ردحذف
  18. مممممممممممممممممممممممممم ايه دا
    اية داا
    ماشى يا كارثة كلمات جامدة واشعار اجمد
    لا يا ايوش بجد بوست جامد اوووووووى اووووووووووووى
    وعبر كتير اوووووووووى عن حرقت الدم اللى احنا عايشنها لكن لانى فيها على طول فخلاص ولا هتفرق المهم ربنا يكون فى عون السواق دا والظابط ميوصيش ولا يستخدم لطته لانتقام وبعدين انا مرضيتش اقولك على الفيديهوات عرفتيها منين ....و خدى بالك مممممم دى للقر ((وش مطلع لسانة))
    بجد ربنا يوافقك يارب دمتِ بكل ود وخير ومن اول قلم هعترف سلالالالالالالالالام يا كارثة اشوفك فى القنطار ابو زعبل زهق منك

    ردحذف
  19. ايوشة
    ايه اترك الاحزان و الماسي عندي في المدونة الاقي هنا كمان بلاوي
    يا ساتر يا رب
    معنديش كلام اقوله
    مودتي

    ردحذف
  20. تدوينة رائعة رغم مابها من ألم

    تقديري لك يا أيوشة

    وبطلي تسهري

    ردحذف
  21. هذه حياتي
    مرسيى للمرورك

    ردحذف
  22. د/عرفه
    لازم كلنا نعبر امال نغير الواقع ازاى حتى لو لسانا يعجز عن التعبير مرسيى للمرورك

    ردحذف
  23. حازم النبراوي
    هههههههههه ايوة قولها فى وشى وانا حمل معتقدات وسجون انا ربنا يجعل كلامنا خفيف عليهم مرسيى للمرورك ياحازم

    ردحذف
  24. لجين أبو الدهب
    مفيش فى ايدينا غير نقول فعلا حسبنا الله ونعمة الوكيل مرسيى للمرورك ولاضافتك لابيات الشعر الجميلة للشاعر الرائع فاروق جويدة

    ردحذف
  25. norahaty
    مرسيى للمرورك جدا اما ثندر ده اخويا اللدود من اول الناس اللى اتعرفت عليها فى عالم التدوين وربنا يكرمه دايما يارب اكثر من اخ ودايما اللى بيغير من راى فى كل مرة بحاول اسيب عالم التدوين

    ردحذف
  26. *** حور- نور***
    ههههههههه ربنا يستر بئا انا اصلا مش بحب الحلاوة :)
    مرسيى للمرورك

    ردحذف
  27. رومانسى مشاكس
    وعليكم السلام ورحمة الله وبركاته
    اسعدنى مرور حضرتك جدا واتمنى تسعدنى دايما بمرورك
    مرسيى لمرور حضرتك

    ردحذف
  28. adel
    هههههههههه معلش افضى شوية يابنى وانقذ البلد
    لا بجد البلد مش هتتغير الا لو كل واحد فيها راعى ربنا فى شغله وحياته مرسيى للمرورك ياعادل

    ردحذف
  29. hasona
    اسفة على كمية الالم والاسى اللى اتسببت فيها بس ده الواقع ومش لازم نهرب منه ومعتقدش
    وربنا يستر ربنا فى موضوع الاعتقال خليكم شاهدين انى لو اختفيت فترة انا رحت وراء الشمس:(
    مرسيى للمرورك

    ردحذف
  30. القدر و انا
    ربنا يصلح الاحوال مرسيى للمرورك

    ردحذف
  31. د. ياسر عمر عبد الفتاح
    الخبر منشور فى الجرايد وكمان اتناقش فى برنامج البيت بيتك مرسيى للمرورك

    ردحذف
  32. زوجة عنيدة
    معلش الناس كلها جالها اكتئاب بس ان شاء الله اكيد الظلم مش هيستمر كل شئ وليه نهاية والظلم لازم فى يوم ينتهى مرسيى للمرورك

    ردحذف
  33. عبد من عباد الله
    الحمد لله انك بخير ربنا يوفقك دايما وان شاء الله عن قريب هنزل بوست حلم العلم وياريت لما تعرف حاجة تقولى عليها مرسيى للمرورك

    ردحذف
  34. ** حور- نور***
    هههههه اعلانى زى ماانتى عايزة بس انا ليا نسبة فى الاعلانات دى

    ردحذف
  35. assafo anaroze
    اسافو ابتديت اعتقد ان الشئ الوحيد اللى بيجمع البشر على اختلاف اجناسهم الحزن والالم مرسيى للمرورك

    ردحذف
  36. thunder
    تعرف هتفضل تقر عليا لغاية ما تزعبل بجد يااخى تف من بقك ابو زعبل ايه بس وام زعبل ايه ههههههههه

    ردحذف
  37. ماما أمولة
    مرسيى للمرورك بجد وان شاء الله هحاول ابطل السهر لانى تعبت منه بجد بس لما ربنا يتوب عليا من الاكتئاب واعراض الالم والحسرة اللى بتشغل دماغى مش بتخلينى اعرف انام

    ردحذف
  38. قالولى بتحب مصر قولت انا خايف


    خايف فى يوم يا بلدى اتهان واضيع بين ترابك

    خايف يا بلدى لآن حبى ليكى بقى جريمة


    جايز اضيع ويمكن اروح ومرجعش

    لو فيوم قلت يا بلدى بحبك


    ياااااااااااااااااه يا زمن


    بقى حب بلدى فيك جريمة ويا ترى


    ايه تانى هيجرى ولسه يا زمان

    بحبك يا بلدى ومش خايف

    من معتقل او حتى تعذيب


    مهما يجرالى فيكى يا بلدى حبك دا شئ جوايا


    ولسة يابنتى ياما هنشوف


    smilyrose


    وردشان

    روح الحب الصادق

    ردحذف
  39. جميلة يا أيوشة القصيدة واحساسها حلو

    بالنسبة للظابط

    فهقول ايه بس

    دي مش مجرد غلطة فردية

    ده أمر منظم ومسموح بيه عندهم

    ربنا يرحمنا جميعا

    ردحذف
  40. انا كده مش لوحدى الى مجنون
    فى كتير بيحبوا مصر منهم انتى وانا

    ردحذف
  41. هي بلدنا وفيها كل العجايب
    بس اعمل ايه يارب
    في حبها وعشقها انا دايب
    اي نعم فيها العبر
    وفيها كتير مصايب ونوايب
    بس حبها شربته في اللفة
    ولسه في قلبي بينبض وانا شايب

    بوست جميل بيقلب المواجع والبطاطس
    ولولا الأمل في غد احلى كنا كلنا دخلنا مصحات نفسية
    تسلم ايدك

    ردحذف
  42. انا لما سمعت الخبر بتاع اسلام زفت نبيه ده اتغميت وزعلت
    وهنزل بوست قريب عن الموضوع ده

    وشرفك يا بلــــدي سحابه وتعدي ..
    وبرضه انتي بلـــــــــــدي


    ده احنا ياما اخدنا منك ... ياما اخدنا منك ...

    فيها ايه ؟!!!! فيها ايه ؟!!!

    فيها ايه لو يوم نيديكي ؟!!!!
    فيها ايه لو يوم نيديكي ؟!!!!

    ردحذف
  43. السلام عليكم

    ايوشتي الغاليه يسلم ايديك قصيده غايه في الروعه برغم ما فيها من مبكيات علي حال بلدنا واللي فيها

    بس قدرنا ولازم نستحمل وربنا يرفع عنا الظلم اد ايه بيكون صعب علي النفس انها تشوف الظلم كدا بقي عيني عينك بس والله ربنا صابر عليهم لكنه سبحانه يمهل ولا يهمل وكل ظالم ليه يوم
    ( ولا تحسبن الله غافل عما يفعل الظالمون * أنما يؤخرهم ليوم تشخص فيه الأبصار *).

    ودا عزانا الوحيد لكل مظلوم اتظلم في اي مكان سواء هنا او في اي بقعه من بقاع المعموره

    ومهما طال الظلم فلابد للحق والعدل ان يسود الارض يوما

    اسال الله لك صلاح الحال وهدوء النفس :)

    ولا تنسيني من دعائك

    خالص حبي لك

    غربتي

    ردحذف
  44. بسم الله الرحمن الرحيم
    السلام عليكم ورحمة الله وبركاته
    ايوشة بنت خالى
    تحياتى
    ايه ده ؟؟؟
    ماتخلينا فى حالنا ؟؟
    ماانتى عارفه اللى بيتكلم فى الموضوع ده بيروح العنبوكه عدل
    ههههههههههههههههه
    بس ايه ده كمان ؟؟ دا على كده مطلعتش انا لوحدى اللى مش عارف
    دا تقريبا الناس كلها
    الحمد لله انى حجزت الاسم لحسن بعد كده يغلى ويبقى بفلوس
    الحال فى مصر لا يسر عدو ولا حبيب
    الباشا هيرجع وهيمارس سلطته ومهام عمله عاااادى جدا وبعد شويه كده هيوصى على السواق والبشوات زمايله هيعملوا اللازم وزيادة حبتين مافيش شك
    زمان لما كانت الاحداث عندنا فى البلد فى الايام اللى بيقولو عليها الارهاب كنا بنفرح قوى لما ظابط ينضرب بس كنا بنزعل على المجندين وكان لما ظابط يقولوه انت جالك نقل ..... فى اسشيوط كان ممكن يقدم الاستقاله بتاعته
    وشكلنا كده هنرجع للايام دى تانى
    طالما انه مافيش حاجه بتنفع غير العافيه والعين الحمرا والبلد بقيت بتاعتهم وكل واحد فيهم بيعمل اللى هو عاوزة ومافيش حد بيحاسبه
    حسبى الله ونعم الوكيل
    القصيده جميلة جدا
    وقصيدتك كمان جميلة جدا جدا ومعبرة جدا جدا
    من الاخر بوست فى الجون
    (ملحوظه صغنونة رفيق مقطعش النت انا اللى كنت بره البيت)
    تحياتى ودمتى بكل خير وود
    والسلام عليكم ورحمة الله وبركاته

    ردحذف
  45. smilyrose
    مرسيى للمرورك وتعليقك بس مهما هنشوف هنفضل نحبها

    ردحذف
  46. حسام غانم
    عندك حق دى مش حالات فردية دى منظمة جدا وليها منهجية كمان ربنا يصلح الاحوال مرسيى للمرورك

    ردحذف
  47. صوت من مصر
    صلاح جاهين بيقول



    على اسم مصر التاريخ يقدر يقول ما شاء


    أنا مصر عندي أحب وأجمل الأشياء


    بحبها وهي مالكة الأرض شرق وغرب


    وبحبها وهي مرمية جريحة حرب


    بحبها بعنف وبرقة وعلى استحياء


    واكرهها وألعن أبوها بعشق زي الداء


    واسيبها واطفش في درب وتبقى هي ف درب


    وتلتفت تلاقيني جنبها في الكرب


    والنبض ينفض عروقي بألف نغمة وضرب

    مرسيى للمرورك

    ردحذف
  48. ستيته حسب الله الحمش
    هي بلدنا وفيها كل العجايب
    بس اعمل ايه يارب
    في حبها وعشقها انا دايب
    اي نعم فيها العبر
    وفيها كتير مصايب ونوايب
    بس حبها شربته في اللفة
    ولسه في قلبي بينبض وانا شايب


    يااااااه تسلم ايديكى يادكتورة يارب مرسيى لمرورك ربنا ما يحرمنى من تعليقاتك ابدا يارب

    ردحذف
  49. البت المشمشية *حلوة بس شقية *
    هى فعلا سحابة وهتعدى مرسيى للمرورك ياجميل مستنية البوست الجديد

    ردحذف
  50. بصراحة أفضل تعليق كلمات لجويدة بتقول
    فيا مصر صبرا على ما رأيت
    جفاء الرفاق لشعب أمين
    سيبقى نشيدك رغم الجراح
    يضيء الطريق على الحائرين
    سيبقى عبيرك بيت الغريب
    وسيف الضعيف وحلم الحزين
    سيبقى شبابك رغم الليالي
    ضياء يشع على العالمين
    فهيا اخلعي عنك ثوب الهموم
    غدا سوف يأتي بما تحلمين...

    ردحذف
  51. ghorBty
    ( ولا تحسبن الله غافل عما يفعل الظالمون * أنما يؤخرهم ليوم تشخص فيه الأبصار *).

    املنا فى ربنا كبير ان الحق هيظهر فى الاخر مرسيى ياقمر للمرورك وربنا ما يحرمنى من تعليقاتك ولا من مرورك على المدونة

    ردحذف
  52. المعتصم
    ابن عمتى نورت البوست انا قولت عملت مشكلة مع رفيق وقطع النت ياعينى هههههههههه
    انا مش بخاف من حد ولا بنخاف من قسم ولا الكلام ده انا ورايا صعايدة ياكلوا الزلط هههههههه
    مرسيى للمرورك

    ردحذف
  53. mohamed ghalia
    فيا مصر صبرا على ما رأيت
    جفاء الرفاق لشعب أمين
    سيبقى نشيدك رغم الجراح
    يضيء الطريق على الحائرين
    سيبقى عبيرك بيت الغريب
    وسيف الضعيف وحلم الحزين
    سيبقى شبابك رغم الليالي
    ضياء يشع على العالمين
    فهيا اخلعي عنك ثوب الهموم
    غدا سوف يأتي بما تحلمين

    تسلم ايديك يامحمد على الابيات الرائعة دى ومرسيى للمرورك

    ردحذف
  54. بجد بجد تسلم ايديكى
    انتى اللى مالفه الشعر ده؟


    قالولى بتحب مصر قولت انا خايف
    لاحسن اعبر عن حبى وانا شايف
    سجون ومعتقدات بيها البشر طايف
    وبتعذيب وهتك للاعراض فى البلد لافف
    لكل مبدا وقيمة الوطن حاذف
    يامصــــــــــــــــــــــــــــــــــر
    بكره فيكى احساس الغربة وغدر الزمان
    بكره الضلم المعشش فى كل مكان
    بكره السلطة وسطوة السجان
    تعيش فيها لما ضعيف وجبان
    انسان معدوم غلبان وكحيان
    الــخ
    والله مالاقيه كلام يعبر عن حساسى واعجابى وانبهارى
    تسلم ايدك بجد
    برافو عليكى

    ردحذف
  55. كلب زي ده حده في شرع الله حد الحرابة

    لو كانت شريعة الله حاكمة تحترم في هذا البلد لطبقت فيه هذه الآية:: (إنما جزاء الذين يحاربون الله ورسوله ويسعون في الأرض فسادا أن يقتلوا أو يصلبوا أو تقطع أيديهم وأرجلهم من خلافٍ أو يُنفوا من الأرض)

    ولكل جريمة من جرائم الحرابة ما يناسبها من الأربع عقوبات السابقة الذكر في الآية الكريمة..

    شرعُ الله هو الكفيل بردع هؤلاء الكلاب من أمثاله

    أما القوانين الوضعية التي ضاهي بها البشرُ شرع الله.. وأما الأحكام التي استوردوها من مزابل الشرق والغرب.. فها نحن نري آثارها.. ثلاث سنوات ثم يخرج بثلاث أرباع المدة ويعود ليزاول عمله.. هل من عاقلٍ يقول أن عقوبة كهذه رادعة في جريمة انتهاك عرض؟؟

    مالكم كيف تحكمون!!




    جزيل الشكر لك أختنا الكريمة علي ابياتك الصادقة

    تحياتي

    ردحذف
  56. بوست جميل جداً أحييك عليه فعلاً وعلى النضج الفكري اللي في كتير للأسف شعرهم شاب ولسه بيقولوا مفيش تعذيب واحنا بنعيش أزهى عصور الديمقراطية :)

    قصيدة جميلة جداً ... وتعقيبك جميل برضه:)
    تحياتي

    ردحذف
  57. بعيدا عن حرقة الدم من الخبر



    ايه الكلام الجميل ده
    ايه الاحساس العالي ده

    في كده

    بجد مش لاقيه كلام

    بس هاتلاقيني هنا كتييييييييييييييير

    ان شالله

    ردحذف
  58. وازاي بقى خايفه
    ولسانها قايد نار
    عمال يحدف زلط
    على ناس تقال وكبار
    ازاي تقول خايفه
    وسيفها في ايديها
    مشتاق يصيبه الدم
    ايشي من خسيس وعويل
    يا بنت يا صغيره حاسبي
    دي مصر كانت زيك
    واخدها شجاعتها
    وقفولها حراسها
    بدل ما يحموها
    باعوا للعدا شرفها
    وفرطوا فيها
    صبحت كما تعرفي
    عجوزه مخنوقه
    لا سابوها بنت بنوت
    ولا خلصوا عليها

    ===================

    خدي بالك بقى من نفسك يا فالحه

    سلااااااااااااااااااااام
    اخوكي ايهاب

    ردحذف
  59. عاشقه الرومانسيه
    مرسيى للمرورك ياجميل

    ردحذف
  60. القلم السكندري
    هو لو كان شرع ربنا مطبق صح فى البلد كان الحال وصل لكده ربنا يصلح الاحوال كلها مرسيى للمرورك

    ردحذف
  61. سوبيا
    مرسيى للمرورك وانتى تشرفى المدونة فى اى وقت

    ردحذف
  62. تامر علي
    المثل بيقول اللى مش يشوف من الغربال يبقى اعمى ازاى يعنى بنعيش ازهى عصور الديمقراطية ازاى
    مرسيى للمرورك

    ردحذف
  63. الشنكوتي الكبير
    وازاي بقى خايفه
    ولسانها قايد نار
    عمال يحدف زلط
    على ناس تقال وكبار
    ازاي تقول خايفه
    وسيفها في ايديها
    مشتاق يصيبه الدم
    ايشي من خسيس وعويل
    يا بنت يا صغيره حاسبي
    دي مصر كانت زيك
    واخدها شجاعتها
    وقفولها حراسها
    بدل ما يحموها
    باعوا للعدا شرفها
    وفرطوا فيها
    صبحت كما تعرفي
    عجوزه مخنوقه
    لا سابوها بنت بنوت
    ولا خلصوا عليها

    الله الله على الكلمات التحفة دى بجد تسلم ايديك
    لو كل الناس خافت مين اللى هينقذ مصر
    ونخاف ليه والحق معانا
    مرسيى للمرورك

    ردحذف
  64. أسعدنى التعرف عليكى وعلى مدونتك الجميله دى

    كمان عقليه جميله وراقيه
    ونظمك الزجلى على وزن القصيدة الاصليه مميز

    مش هعلق على التعذيب ولا ألمعتقلات ولا الظباط عشان مرارتى مش مستحمله
    بس انت كاتبه فى ملف التعريف صعيديه !!!
    احنا بلديات على كدة
    سعيدة بمرورى عندك

    ردحذف
  65. صفـــــاء
    مرسيى للمرورك وانا اسعد بمرورك على المدونة
    ايوة انا من الصعيد بس تقريبا المحافظة مختلفة اسافو قالى مرة انك من الصعيد بردو

    ردحذف
  66. السلام عليكم و رحمة الله

    أيوشة الغالية..
    حقيقى يا أيوشة وجعتى قلبى أوى

    كل كلمةقلتيها بتعبر عن واقع عايشينه
    بس يا أيوش مش لازم نستسلم

    لازم نحاول إلىأن يجعل الله لنا مخرجا



    بجد القصيدة فى الصميم
    تسلم إيدك


    بصى حاولى تضيفي ميلىتانى عندك يمكن فى مشكلة
    لانى باكلمك مش بتردى


    سلام يا قمر

    ردحذف
  67. Soul.o0o.Whisper
    مرسيى للمرورك ياجميل

    ردحذف