الجمعة، 27 فبراير، 2009

مقاس جزمتى المحروسة ونفسيتى المهزوزة


صحيت على حلم مزعج جدا ربنا ما يوريه لحد ابدا ابدا قال ايه روحت اشترى الجزمة ولقيت الناس كلها فى المحل بعد

ما اخترت الجزمة وعجبتنى طلعت تجرى من المحل وبتهرب منى والناس كلها بتتضحك عليا اهئ أهئ أهى ,انا عارفة حلمت الحلم ده ليه بسبب تفكيرى المستمر فى الجزمة الجديدة اللى عايزة اشتريهاازمة ازمة وازمة فى قمة الغباء كمان وقربت اتجنن منها ماما ادتنى فلوس انزل اشترى جزمة جديدة وبصراحة انا متعقدة مش موضوع اللف على الجزم علشان كد ضربت عوافى على الفلوس ومشترتش حاجة ولما ماما سالت قولتلها ان شاء الله هجيبها هجيبها بس مش دلوقتى كام يوم كده وهنزل شتريها ان شاء الله لكن هناك سبب خفى ورا الموضوع ده اللى محدش يعرفه انى بحاول

اهرب من المشوار ده لاسباب تانيةانى بتبدا المعاناة وانا بدور على جزمة مقاسى بجد بجد مقاس الجزمة عملى ازمة انا
فى مؤامرة عليا طيب الهدوم ومش بلاقى مقاسى وقولنا مش مشكلة هتصرف هظبط الهدوم على مقاسى انما الجزمة اتصرف فيها ازاى ياترى هيقص منه 2 سم مثلا علشان تجيى مقاسى المشكلة انى رجلى صغيرة وبعانى علشان لاقى مقاس الجزمة بلبس ااول مقاس فى الانسات والمقاس دع صعب للاسف ونادر لما تلاقيه والمشكلة اتفاقمت مع ظهور
الجزم المعلونة اللى اسمها باليرينات

انزل علشان اجيب الجزمة الف على كل المحلات ولما جزمة تعجبنى للاسف المقاس بردو يكون كبير وكان الحل انى اللى الاقيه مقاسى اى لون اخده هوا احنا بنلاقى وده راى اختى يعنى اختار جزمة سوداء مثلا وشكل معين اخرج من المحل بواحدة بنى وشكل تانى خالص علشان المقاسات وهكذا عمرى ما نزلت وجبت جزمة كده عجبتنى فى سهولة ورجعت لازم اعانى واتعذب واتمرمت واتبهدل وتتقل قيمتى



كل ده مش مهم الاهم الكسفة قدام اصحاب المحلات اللى بتيبع الجزم لدرجة واحد يقولى العيب ياانسة مش فى الجزم العيب لا مؤاخذة فى رجلك وعلى ايه يااخويا لا مؤاخذة ما انت لازم ترميها فى وشى مهى ناقصة



اخر مرة نزلت اشترى جزمة ولفيت لما دبت وسبحان الله رجلى مش تكبر من اللف والدروان ده لا انا بلاحظ انها بتكش لما وزنى بيقل كارثة مصيبة خايفة فى يوم اصحى ادور على رجلى ملقيهاش كل يوم بتتمم عليها وبقياسها بالمسطرة خايفة لتكون بتنقص كل يوم



المهم بعد اللف كله دخلنا محل اخير وكنا بسم الله ماشاء الله انا واخواتى الاتنين وبنات خالتى الاتنين وجوز اختى وقيس كل جزم المحل طبعا طبعا ولا واحدة طلعت مقاسى والسبب انها كلها جزم ملعونة اسمها باليرينات كلها واسعة وعايزة رجول مقاس 39 او 40 لفوق علشان تملها



وانا طبعا بغلى وشوية هعيط خلاص يعنى مفيش امل هفضل عايشة بالجزمة القديمة ولا ايه طيب ولما تبوظ اعمل ايه افضل حافية اعمل ايه بس وعلى سبيل الهزار بت بنت خالتى اختارت جزمة اطفال بتقولى دى يدوب هتتطلع مقاسك ونفجر كل اللى فى المحل بالضحك حتى صاحب المحل وهوا فى قمة الانشكاح قالى على فكرة والله هتطلع مقاسك فى مقاس اكبر منها حبة وجربى



طبعا كرامتى وجعتنى اوى الا جرح الكرامة ياخوانا ده كله يهون الا الكرامة اخر الزمن كرامتى تتهان على جزمة رفضت وبشدة وقولتله نعم ليه يعنى وااخواتى يهديكى يرضيكى قيسيها خلينا نروح تعبنا من اللف حرااااااااااام عليكى شفيها بس



وبعد ضغط والالحاح وفقت وانا منكسرة وبيصيت للرجل المسخسخ على نفسه قولتله بكل غضب هات الجزمة قالى مقاس كام 35 صح



فولتله صح فى عينك ليه يعنى هاتها 36 او 37 وانا بكل ثقة طبعا علشان احرجه



واجاب الجزمة وحاطتها فى رجلى ولقيتها واسعة برقت له كده انت جايها كبيرة ليه قالى لا والله ياانسة دى 36 ماانا قولتلك اجيبها 35 وانتى مردتيش ونظرة خباثة ومكر ولقيته هيقع مننا على الارض من كتر الضحك وابص وبرق وانفش فى مناخيرى من العصبية والرجل جبلة بعيد عنكم مش عنده اى ادنى ذوق ولا ادب ولا احترام لمشاعيرى واحساسياتى اللى اتجرحت وكرامتى اللى اتهانت فى سبيل جزمة



بصراحة انا فرفشت الراجل ده بطريقة عمره ما هيشوفها فى حياته ابدا والمفروض كان كرمنى وادانى الجزمة بلاش



وجاب الجزمة وطلعت مقاسى للاسف واخدتها واخواتى وعيال خالتى لغاية النهاردة لما يفتكروا الموقف يضحكوا



وياريت الموضوع انتهى على كده لما روحت البيت ماما شافت الجزمة بهدلتنى من طولك رايحة تيجى جزمة زى دى



ولما صرحناها بالحقيقة بصراحة حزنت عليا وعلى حالى وفضلت يعنى شايلة فى قلبها وساكتة تعمل ايه طيب وخدت موشح فى موضوع عدم الاكل ودى نهاية اهمال الاكل على اساس ان رجلى خست مثلا من زمان وانا عندى الازمة دى بس ظهرت دلوقتى وطفحت كمان بسبب الموضة اللى هتجبنا وراء ولما بقولهم ننزل اشترى جزمة جديدة فرحوا وكل واحدة عايزة تيجى معايا علشان تفرفش مش احسن من موجه كوميدى فرفشة بلاش ومجانى


هى دى ازمة الجزمة انا اتعقدت الله تولع بجاز الجزم باليرينات انا كنت بلبس كوتشيهات بس الست ماما بهدلتنى على اساس انى ناقصة قصر واصرت انى اتهبب وادور على حاجات بكعب علشان اتهبب واطول



طيب هما يجبونا قصيرين ويقرفونا تحكمات ووجع دماغ انا اعمل ايه طيب



طيب الحل دلوقتى طيب لو فيه عمليات نفخ رجول زى نفخ الشفايف ونفخ حاجات تانية اعملها من الصبح بس يكون فيه



محدش يقولى امشى كتير يوووووووو لفيت الدنيا ومفيش فايدة الازمة بتتفاقم انى اغرق اغرق اغرق



والكوابيس ابتدت تشتغل ومضطرة انزل اشترى الجزمة اللى يحب يجى يتضحك شوية معانا يتفضل ماانا بقيت مسخرة ومضحة على اخر الزمن لذلك قرار حازم وشديد هقاطع الجزم وهعمل حملة وهطالب بالقضاء على موضة الباليرينات الملعونة دى


اهئ اهئ اهئ



هناك 42 تعليقًا:

  1. اوووووووووووووووووووووووووووووول تعليق محجوز لياااااااااا ولا ازهرى يهمنى ولا سجن يلمنا وش مطلع لسااااااانة حجزنا بقة نروح نعلق

    ردحذف
  2. تانى تعليق بقة علشان ازهرى قال انه ممكن يغلوااااااااااا

    ردحذف
  3. التالت دا بقة اقراء برحتى وارجعلكم ومحجوز ماحدش يضمن احمد عز

    ردحذف
  4. thunder
    مش عايزين لعب هنا

    ردحذف
  5. مبروووووووووك عليك او تعليق كسبت معانا جزمة هههههههههههههه

    ردحذف
  6. يا ربي

    كان الله في عونك

    هدعيلك المره ديه تلاقي مقاسك بسرعه ان شاء الله

    :)

    اظهر وبان عليك الامان

    دا بقا سبب زعلك :) ولا يهمك يا ستي

    كلنا لها

    علي فكره سمعت ان الجزمه في الحلم عريس والله اعلم

    احلمي برحتك لعله خير

    وتنزلي تدوري علي جزمه بيضاء اللون عاليه الكعب ساعتها هتروحي جري طبعا

    ربنا يصلح الاحوال من عنده ويسعدك ان شاء الله

    دمت بخير وسعاده

    غربتي

    ردحذف
  7. ghorBty
    عريس بتكلمى جد بس بقولك بيهرب منى بيجرى والناس بتتضحك عليا (( وش بيعيط))
    والله معاناة فى الجزمة ادعولى تكسبوا فيا ثوااااااااب

    ردحذف
  8. هههههههههههههههههه

    معلش سامحينى انا لازم اضحك انا كمان مليش نفس ولا اية

    بس هقولك حل جريبة يمكن ينفع

    لما يجى الصيف ان شاء الله كدة تبقى البسى شباشب وامشى بيها كتير

    انا مرة حصلت معايا لما بطلت البش جزم وكوتشى رجلى كبرت نمرة

    انا بقى غيرك انا ايقت ورجعت تانى للجزم انا رجلى مش ناقصة انها تكبر


    وان شاء الله يكون الحلم خير بس انا عرف ان اللى بتفكرى فيه كتير قبل ما تنامى بيظهر على هيئة حلم من كتر التفكير


    تحياتى وربنا معاكى

    ردحذف
  9. ههههههههههههههه
    ياخبر ابيض
    ده انا ضحكت ضحك
    والله عيونى دمعت
    الناس نايمه وانا صوت ضحكى عالى
    زى المجانين
    بجد انتى دمك شربات

    هو انتى خلتينى تخيلتك زى عقله الصوباع
    هههههههههههههههههههههههههههه
    ههههههههههههههههههههههههههه
    ياخبر عليكى

    انا عايزه اجيب الجزمه دى معاكى بالله عليكى

    ردحذف
  10. ههههههههههههههههههههههههههههه
    هههههههههههههههههههههههه
    هههههههههههههههههههه




    أيوووووووووووووووووووش
    دا انتى تحفة بجد
    أيه دااااااااااااااااااا

    بجد البوست تحفة تحفة يعنى
    مش قادرة امسك نفسى من الضحك


    باقولك ايه
    لما تيجى تنزلى تشترى الجزمة قوليلى
    يعنى نحب نعمل اى واجب مع الحبايب

    ههههههههههههههههههههه



    دمتى بود يا قمر

    ردحذف
  11. هههههههههههههههههههههههههههه

    يوم اما رجلي كانت مكسوره كننت عاوزه اي حاجه علي الارض بس ساعتها مش كان في حد من خلاتي عارف اني رجلي مقاسها صغير كدا فااخدت كوتش البنت بت خالتي اللي مقايه 35 وكله يقولي مش هيجي ولبستها ورحت بيها الكليه لحد اما رجلي خفت :)

    نفس المسكله عااااااااااااااااااااا

    موتيني من الضحك

    ردحذف
  12. هههههههههههههههههههههههههههههه
    انا مش بضحك على الجزمة انا بضحك على المؤامرة ههههههههههههه ((وش مطلع لسانة )) الرجل مشارك بجد ومعنهدوش اى شعور بى اى ادمية يعنى منشكح على اساس اية ما دا طبيعى فى فروق فى كل البنى ادمين طبعا سوار عقلية او جسمانية وخلافة
    المهم يا كارثة انتى اعملى حل لرجلك دى احنا مش ناقصين عقد طولى صوابع رجلك بتاع مترين (( وش مطلع لسااااااااااااانة )) لابجد لا بجد بصى دى مش مشكلة المهم الصبر عندك انتى وانك تدورى وبعدين مقاس اطفال مقاس كبار على الموضة اللى احنا بنعشها والله معادت تفرق كتير وانا قوتلك موضوع البنطايل يعنى دلوقتى انا ولا انتى انتى هينهة شوية يا كارثة بوووست مقاس 35 يا ايوش وحلو جدا ربنا يديم عليكى التوفيق يااااااااارب والناس دى يعنى كانت مستنية النت يفصل يروحم هما يعلقوا اية العالم دى بس ((وش مطلع نار من ودانه )) بس دول يا كداو كلامى لناس محدش بيجبر حد صح اياكى اعنى فااهمى يا كارثة هههههههههههههههه ابطل لعب بقة واخرج سلام مؤقت واقراء التانى

    ردحذف
  13. ههههههههههههههههههههههههههههه

    ياعينى ههههههههههههههههههههههه

    صعبتى عليا تخيلى هههههههههههههههههههههه

    بجد موت ضحك .. انتى مشكله

    معلش ان شاء الله رجلك تكبر و المشكله تروح

    خلى عندك امل ياشيخه مش كده هههههههههههههههههههه

    تحياتى ياشربتاتا انتى

    ردحذف
  14. طيب انا مش ضحكت
    يبقى مفيش دفع
    صح كده ؟

    تعرفى انا البيت كله اتلم على من الضحك اعمل ايه بقى
    بسببك قالوا على مجنون
    ولو انهم بيقولها من زمان
    ما علينا

    اعملى زى انا بالبس صنادل وشباشب وكوتشى
    لكن الجزم فى حالات الضرورة القصوى جدا
    والامر لله
    وانا معاكى فى الحملة



    وقولى لسيرجو اعقل بدل ما يبقى الدور عليه بعد المقاطيع التانيين

    ردحذف
  15. ههههههههههههههههههههههههههههههههههه

    ههههههههههههههههههههههههههههههههههه

    ههههههههههههههههههههههههههههههههههه

    حبيبتى أيوشه عسل و الله دمك يا بت يا ايه شربات ايه سا بنتى ده انتى جايبه خفة الدم دى منين

    بصى يا ايوشه أقولك على حاجه بس اوعى تزعلى فكرة يمكن تنفع فصلى الشوز فى ناس بتفصل جربى كده يا ايوشه

    سلام يا قمر

    تحياتى

    ردحذف
  16. زوجة عنيدة

    لالا اضحكى براحتك طبعا مصائب قوم عند قوم فوائد ههههههههه مرسيى للمرورك

    ردحذف
  17. عاشقه الرومانسيه
    ههههههههه الله يخليكى يارب بس فعلا تخيلك فى محله نوعا ما :)
    مرسيى للمرورك ياقمر

    ردحذف
  18. كيــــــــــــارا

    ههههههههههههه اخيرا لقيت حد زى ااقولك ايه انضمى للحزب اللى هعمله نطالب بحقنا فى جزم مقاسنا من حقنا من حقنا نلبس جزم على ادنا ههههههههه
    مرسيى ياقمر للمرورك

    ردحذف
  19. thunder
    بئا هى العالم اللى عندها مشكلة ولا النت عندك صالحه يابنى وشوفك حل
    وشفت المؤمراة عليا من كل اتجاه خوووووووووونة بعيد عنك وشعب حاقد
    ربنا يخليك يارب وعلى فكرة معلش انى دايما بخنقك كل شوية بموضوع قفل المدونة اخويا اللدود بئا ولازم اقرفك (( فيه اعتراض))

    ردحذف
  20. Sweet Violet
    صعبت عليكى بس كده طب واحد يدخل المدونة يتبرع ب1 سم حتة علشان احل الازمة

    ردحذف
  21. الازهرى

    ايه ده ايه البلطجة اللى هتحصل هنا دى يعنى ايه مش هتتدفع امال يعنى فتحينها سبيل كده
    يلا خلينا احنا الطيبين او مرة ببلاش جر رجل لكن بعدين يادفع ياالحبس
    وماله سيرجو ده طيب مش زى ناس بتتدخل تحتل مدونات بحلها :)

    ردحذف
  22. بصي يا بنتي انا كنت كاتب لك تعليق طويل قوي على قفل المدونة ده
    و مش حأعرف أكتبه تاني
    و حضرتك كنتي قافلة التعليقات كمان
    الخلاصة انتي بنت هوائية و حساسة زيادة عن اللزوم و نرفوزة شوية
    إهدي و ركزي و فكري في كل كلمة قبل ما تكتبيها و تنشريها

    لو غلطتي في حد عادي انك تعتذري
    مش تروحي قافلة المدونة

    ربنا يوعدك بجزمة حلوة و لو نها و تفصيلتها يعجبوكي و تكون مقاسك
    :)

    ردحذف
  23. مهندس مصري
    ربنا يكرمك انا فعلا متهورة ومش بفكر بعقل فى اغلب الاوقات ان شاء الله هحاول اصلح الحكاية دى
    مرسيى للمرور

    ردحذف
  24. السلام عليكم
    اول زياره كنت اتمنى انى اجى فى مئساه اصغر من كده بشويه
    ههههههههههه
    على العموم انتى والله دمك زى العسل فى البوست بتاعك ده
    على الموم ممكن تلاقى فى الاطفال
    ههههههههههه
    تحياتى بطووووط

    ردحذف
  25. Batoooot
    مرسيى للمرورك

    ردحذف
  26. السلام عليكم ورحمة الله وبركاته

    لا القصير نافع ولا الطويل نافع

    تيجي نعمل اضراب احنا كمان :)

    انا كمان اسوء مشوار في حياتي يوم ما بنزل اشتري جزمة :(

    مش عارفة مين اللي فرض ان الحريمي يبقي من 38 - 40 واللي فوقهم وتحتهم يلزموا الشبشب يعني ولا ايه :(

    متزعليش نفسك :) ليكي شركاء في المعاناة :) انتي مش لوحدك :)

    ردحذف
  27. أليس في بلاد العجائب
    ههههههه معلش ده اضطهاد للمراة على فكرة ولازم نعترض مرسيى للمرورك

    ردحذف
  28. الأخت آيوشة
    مسكينة يا أختي
    وجعتي ألبي

    "وهعمل حملة وهطالب بالقضاء على موضة الباليرينات"

    وأنا وياكي

    ـــــــــــــــــ
    بيني وبينك :

    أخني يسعدني التواصل مع مواضيعكم الشيقة ، وقد قمت بوضع راوابط مدوناتكم على صفحتي وافتخر بها .

    ردحذف
  29. ههههههههههههههههههههههههههههههه
    يخرب عقلك ضحكتينى....يا عينى انتى بتلبسى جزم اطفالى يا بنتى؟؟؟ ربنا معاكى يا حبيبتى بس اقولك على حاجة والله ارجعى تانى للكوتشيات بلا جزم وكعوب بلا قرف يا شيخة بلاش هم عودى سالمة لاستخدام الكوتشى ولا يهمك

    ردحذف
  30. محمد سعد القويري
    استاذ محمد اسعدنى مرورك وتعليقك واسعدنى اكتر وضع مدونتى ضمن مدونات حضرتك المفضلة اتمنى اكون دايما عند حسن الظن
    وعلى فكرة حضرتك بتتكلم مصرى حلو اوى :)

    ردحذف
  31. enjy
    ههههههه طيب هرجع للكوتشيهات على ضمانتك بئا يادكتورة ولو نفسيتى حصل فيها حاجة تعالج عندك مرسيى للمرورك

    ردحذف
  32. الحمد لله
    انا بلبس كوتشى

    ردحذف
  33. احمد سعيد
    احمد ربنا على النعمة دى مرسيى للمرورك

    ردحذف
  34. انا بعد كدة هقراء مواضيعك فى البيت
    ايوة.. زملائى فى الشغل قالوا انى اتجننت... وبضحك لوحدى... والله شكلى هترفد بسبب جزمتك المحروسة..

    ردحذف
  35. حازم النبراوي
    ههههههههه اى خدعة مريى للمرورك

    ردحذف
  36. انا برضه مقاسي صغير 37 بس عكسك تماما بلاقيه بسهوله علشان المقاسات الكبيرة هي اللي بتخلص بسرعه مش عارفه بقا المشكله في بلدكم مش في مقاسك مقاسك طبيعي يا بنتي

    ردحذف
  37. السلام عليكم
    هههههههههههههههههههه
    عسل والله كلامك تسلم ايدك
    بجد ضحكتيني
    وكل سنه وانت طيبه

    ردحذف

  38. هههههههههههههههههه

    انا قريت البوست .. ولحد نصه افتكرت ان مقاسك اللي مش لاقياه ده هو البعبع
    45 ههههههههههههههه

    بس اتضح لي بعد السطرين التاليين انه العكس تماما وبتلبسي قريب من مادو ابن اخويا ^_^

    بهزر طبعا

    الحتة دي موتتني من الضحك :

    "اخر مرة نزلت اشترى جزمة ولفيت لما دبت وسبحان الله رجلى مش تكبر من اللف والدروان ده لا انا بلاحظ انها بتكش لما وزنى بيقل كارثة مصيبة خايفة فى يوم اصحى ادور على رجلى ملقيهاش"

    هههههههههههههه

    ليست المطالب بالتمني ولكن تؤخذ الدنيا غلابا .. والممنوع دايما مرغوب
    هنعمل ايه بقى !

    وعندي استفسار مهم .. هو جمع رجل ايه النهاردة .. رجول زي ما انتي قولتي ؟ شكلك قسم لغة عربية ههههههههههههههه

    --------

    "وخدت موشح فى موضوع عدم الاكل ودى نهاية اهمال الاكل على اساس ان رجلى خست مثلا"

    لالالا معلهش متقنعينيش انك مش بتاكلي كتير .. مش معقوله هتشذي عن قاعدة بنات حوا اللي خاربه البيوت وبتاكل أد آدم ست اوسبع مرات هههههههههههه

    -------

    "محدش يقولى امشى كتير يوووووووو لفيت الدنيا ومفيش فايدة الازمة بتتفاقم انى اغرق اغرق اغرق"

    لا فيه حل سهل اوي .. تمشي في الشقه ترددي مع نفسك وتقولي : أنا مش قصير أوزعه أنا طووووووويل واهبل
    هههههههههههه سوري يعني هقول ايه طيب


    ---------

    بجد بجد بجد البوست هايل جدا وضحكني بأمانه .. ^_^

    دمتم في حفظ الله

    ردحذف
  39. ههههههههههههههههههههههههههههههههههههههههههههههههههههههههه

    موقف تحفة بجد

    انا من انصار الكوتشى ثم الكوتشى ثم الكوتشى خاصة ان رجلى بتوجعنى من الجزم وجبستها قبل كده مرتين فمش ناقصة تعب اكتر

    ردحذف
  40. مش عارف اعلق هنا وللا ارجع اعلق هناك

    الحل يا ايوشه انك تشتري حاجات اطفال وامرك لله

    او تروحي اليابان

    اصلي اسمع انه بتوع اليابان معرفش بيعملوا ايه كده عشان رجليهم ما تكبرش


    واحنا صغيرين كانوا بيقولولنا ما تمشوش حافيين عشان رجليكم ما تكبرش

    وبالتالي امش حافيه بقي عشان رجليكي تكبر

    علي فكره فيه كوتشيات عاليه قوي


    ولا اقولك

    ارفعي قضيه

    اه ارفعي قضيه علي مصانع الجزم

    وانا مستعد اشهد معاكي

    ردحذف
  41. هههههههههههههه

    على فكره العيب مش في رجلك

    المفروض إن رجل البنت مبتبقاش كبيره يعني

    بس واضح إن البلد بتتغير واحنا مش واخدين بالنا

    وعموما أنا عندي فكره كنت باعملها وأنا صغير لما تعجبني جزمه وألاقيها كبيره

    كنت باحشي نصها القداماني قطن وألبس النص الوراني

    ههههههههههههه

    كانت بتنفع والله

    أصل الواحد لازم يلبس اللي على مزاجه برضه

    وميسبش حاجه تافهه زي "المقاس" تعوقه

    بوست رائع

    تحياتي

    ردحذف
  42. معاناتي زي معاناتك
    وان شاء الله راح اطلب من الصين جزم مقاسات صغيرة

    ردحذف