الأربعاء، 25 فبراير، 2009

مشربتش من نيلها موقفتش فى طابورها





اتخرجت من سنة ونص وقاعدة فى البيت ومش هكدب عليكم انا حابة انى اتستت فى البيت لاسباب كتيرة منها انى اصلا ضدد فكرة عمل المرآة وانا شايفة ان الست تشتغل لو هى محتاجة للشغل انما اثبت ذاتى وحققى حلمى وبنى نفسى والكلام الخايب ده مش معايا خالص مالص
السبب التانى انى اصلا بكره مجال عملى وبحس فيه انى فاشلة جدا مع ان اصحابى بيقولوا دايما انك شخصية قوية ومحببة بين الاطفال وبتعرفى تتعاملى معاهم على فكرة انا مدرسة مرحلة تعليم اساسى ده المفروض يعنى , بس فشل التعليم والتسيب والانفلات وكل السلطة اللى فيه بتخلينه اكره وكمان بخاف انى اظلم الاطفال ولانى فى الجامعة كنت شايفة ان دراستى مش تاهلنى اكون مدرسة تحمل مادة علمية تستاهل انى ادرس بيها لاطفال _المهم انا جالى اكتئاب فى البيت لانى بصراحة زى ما ماما بتقول رجلى طويلة يعنى مش بحب قعدة البيت وبحب اخرج كتير , لقيت كل الناس انشغلت بحالها وانا فى البيت زى القرد كده ولا بسال على حد ولا حد بيسال عليا _وكان اراء اللى حواليا انى افكر اشتغل وسلى وقتى وطبعا كان الحاجة الوحيدة اللى هشتغلها التدريس المهم شغل بالحصة قلة قيمة وبهدلة على الفاضى ومن قرية لقرية ما تتطلع عنين سيادتى وقلت بلاش فكرت فى المدارس الخاصة لقيت انى عصبية جدا واى عيل هيقل ادبه ممكن ابهدله وابهدل اهله كلهم
ودى مينفعش فى المدراس الخاصة لان التلاميذ فيها بيعتبروا المدرس خدام اللى جابوه وكان القرار الاخير مش هشتغل وانى اشغل وقتى باى هواية اوى اى حاجة تانية ونسيت مواضيع الشغل امبارح صحيت من النوم على صوت التليفون برد كانت بنت خالتى عايزين مدرسين طيب وبعدين قالتلى روحى يمكن انتى تقديرك حلو واكيد ان شاء الله هتتقبلى قولتلها لما اشوف وبما انى وشى ضيق قولت مش هروح بلاش بهدلة بئا لكن اللى حواليا اصروا وقالوا بلاش ياس اعملى اللى عليكى ونزلت النهاردة ورحت كملت الورق ورحت على مكان اللى طالبين فيه المدرسين وعينك ما تشوف الا النور ايه ده لقيت الشارع طويل عريض بنات ولد ورجالة وستات ووناس كبيرة فى السن انا قولتلهم يلا نروح المنظر ده مش مطمنى ياجماعة يعنى الالاف دول اللى بيقدموا هيسيبوهم وهياخدونى انا وفضلوا يشدوا فيا علشان ادخل ودخلت وياريتنى ما دخلت المعروف فى اى نظام اجتماع فكرة الطابور هى مش هننكر انها فكرة محترمة وتستحق التقدير للى اخترع الفكرة دى فكرة الطابور دى بئا ايه انك فى مصلحة ليك تقف فى صف طويييييييييل لغاية ما يجى دور سيادتك وتخلص مصلحتك وتمشى
من فوايد الطوابير توفير وقت وجهد وان كل انسان يخلص مصلحته فى سهولة ويسر
اللى بيحصل بئا فى مصر عكس كده خالص الطابور بدل ما بئا صف طويل بئا تعريفه طابور طويييييييييييل وعريض وليه ارتفاع كمان من كمية البشر اللى فوق بعضانا دخلت بسال المفروض ااقدم فين فى وسط البشر السايح على بعضه ده ومكدبش عليكم انا بخاف من التجمعات دى لانها اغلبها همجية وانا عندى انتكاريا انى حد يخبط فيا وخصوصا الرجالة ممكن ااقلع اللى فى رجلى واديله بيه لو حد خبط فيا

المفروض فيه طابور للستات وطابور للرجالة ودى فكرة مصرية بحتة وفكرة خبيثة جدا والسبب فيها المطالبة بالمساواة بين الرجالة والستات اللى حصل غير كده خالص انا لقيت البنات مع الولاد كتلة واحدة ملتحمين بشكل غريب مع بعض اللى بطرحة واللى نقاب واللى بخمار واللى واللى كله على بعضه مع الرجالة كله عايز يقدم ورقه وادور على الرجل اللى بيخد الورق انى المحه ولا اسمع حتى صوته تقريبا اتعجن من الناس المهم انا قولت اركن لما يخلصوا وبعدين اروح على هدوء
وقفت اخر واحدة فى الطابور المهم يجى بعدك ناس مش تقف وراكى لا تزاحم على دور التانى من غير احم ولا دستور ولا استاذن ولا اى حاجة وممكن تتضربك علشان تاخد مكانك
المهم فى ده كله انا فضلت واقفة تلات ساعات متواصل وفى الاخر اتعصبت واتخنقت من الزحمة والناس اللى معندهاش اى ادنى ذوق وقررت امشى ومقدمتش الورق وقولت ملعون ابو دى وظيفة اللى هموت وانا فى الطابور علشان اقدم ليها
الطابور المصرى بئا بيتميز بطابع خاص كده مش زى باقى الطوابير اللى فى العالم بدءا بطابور العيش واى طابور لا يخلوا من الطابع المصرى المميز ليها



ده طابور فى بلد اجنبية لو لحظنا انه مش فيه طابور للستات واحد تانى للرجالة لالا كلهم فى طابور واحد وكل واحد فى مكانه مستنى دوره بين الواحد والتانى مسافة مناسبة يتنفس وشم نفسه كده ويقف براحته طيب بلاش فى الصور دى احسن تقولوا بتقارنى بدول اوروبية وناس منظمة والكلام ده



دى طوابير فى السعودية للتقدم للوظايف على فكرة شوف الناس منظمة ا زاى
نجى نشوف الطابور اللى فى مصر




انا نفسى ااعرف افرق بين واحد والتانى بين ست وراجل فى الطابور ده مش لاقية الشعب المصرى حبوب اوى لطيف جدا وبيحب الالفة كده علشان كده مش بيحب يفترق عن اخوه المواطن او اخته المواطنة فى اى موقف من المواقف تلاقيهم لزقين فى بعض لزقة غراء بعيد عنك شفت الحب_ مش بيسمحوا حتى انك تتنفس ولا فرصة انك تتحرك يعنى تتدخل طابور من دول متتطلعش منه الا على نقالة ان شاء الله لو حبيت تغير رايك وتخرج من الطابور ياويلك وسواد ليلك تخرج ازاى هوا دخول الطابور زى خروجه وفى وسط الطابور ده الناس بيتعيش حياتها بيتعارفوا على بعض وانتى منين وفين يتكلموا عن كل شئ وهما فى وسط الطابور وفى وسطت طوابير الستات بما انى جربتها تلاقى الايادى الطايشة اللى نازلة عليك الله اعلم هتروح فين الحمد لله ان النضارة فى اكتر من وقف كانت هتتكسر والنهاردة كانت واحدة هتخرم عينى بقلم فى ايديها حاجة حلوة بردو فى الشعب المصرى لو لقى طابور فى اى مكان مش يقدر انه ميدخلهوش حتى لو مش عارف الطابور ده ليه وعلشان ايه لازم يدخله يمكن يلاقى حاجة تفيده فيه وتلاقى الللى بيسالك هما هنا بيبعوا ايه

نصيحة منى علشان تقف فى طابور فى مصر :
اكتب وصيتك قبل ما تتدخل ولو قررت تتدخل ولابس نضارة اخلعها ماسك موبايل اديه لاى حد
لازم تتمرن كويس اوى ويكون عندك قوى جسدية رهيبة علشان التزاحم والحشر اللى هتتحشره بين الناس
ابئا متنساش ترش برفيم وانت رايح طابور الناس اللى هتتحشر دى كلها مع بعض هتعمى من الروايح ان شاء الله


الرسول صلى الله عليه وسلم نهى عن التزاحم فى الحج ما بالكم فى الحياة العادية وقال تفسحوا يفسح الله لكم
عايزين نغير ثقافة الطابور عندنا ياريت يعنى لو كل انسان التزم بمكانه مش نختصر فى الوقت والجهد بدل التزاحم والصراعات اللى بتحصل فى الطوابير نفسى بجد نتعلم النظام انا جالى اكتئاب من منظر الناس النهاردة وده السبب الاساسى اللى خالنى ااقول اتخنقت

هناك 22 تعليقًا:

  1. هههههههههههههههههههههههههه

    ياعينى ده انتى الله يكون فى عونك

    يابنتى خليكى قاعده فى البيت و لاشغل ولا وجع دماغ مدام الشغل بيوقفك فى الطابور

    عموما الشعب المصرى بيحب الهيصه و اللمه و حبوب كده

    ((:

    ردحذف
  2. هههههههههههههههههههه
    عايزة تغيرى ثقافة الطابووووووووووور
    ده واضح إنك عايزة تغيرى نظام البلد
    ده تأمر على البلد هههههههههههههه
    خدى بالك من نفسك بقى

    ردحذف
  3. عجيتنى الوصية يا كارثة اوووووووووووووووووووووووووووووى الوصاية ويا حبذا بقة لو لعبة فى الجيم وتخرجى على طول على الطابور هههههههههههههههههههه كارثة وربنا يابنتى يابنتى حرام عليكى شكلك انتى مشربتيش من نيلها بوست منيل كلعادة طبعا والفراق واضح بين الثقافة والطباع والفهلوة اللى احنا بنعشها وعدم احترام الاخر دى دى بلدنا بسلاطاتها يا ايوش بنحب اوى الخروج على النظام فى كل حاجة احنا شعب عايش على كلمة خالف تعرف مش همجية على ماقد انها ثقافة مفقودة ... لكن نرجع بقة دا مش سباب انك تنسحبى ايوا انا مش من اناصر ان المراءة تشتغل مش لسبب معين لكن لان دا بيكون من وجهة نظرى نقص من الرجل انه مش قادر يصرف على بيتة لكن حاولى مرة واتين وتالتة فاهمة ومش من محاولة هنقف طالما محتاجة تعيش تجربة جديدة

    ردحذف
  4. حبيبتى أيوشه

    ههههههههههههههههههههههههههههههههه

    ههههههههههههههههههههههههههههههههه

    هههههههههههههههههههههههههههههههههه

    كلامك يا ايه يموت من الضحك بجد و الله و خاصة الحته دى

    (انا نفسى ااعرف افرق بين واحد والتانى بين ست وراجل فى الطابور ده مش لاقية الشعب المصرى حبوب اوى لطيف جدا وبيحب الالفة كده علشان كده مش بيحب يفترق عن اخوه المواطن او اخته المواطنة فى اى موقف من المواقف تلاقيهم لزقين فى بعض لزقة غراء بعيد عنك شفت الحب

    مش بيسمحوا حتى انك تتنفس ولا فرصة انك تتحرك يعنى تتدخل طابور من دول متتطلعش منه الا على نقالة ان شاء الله لو حبيت تغير رايك وتخرج من الطابور ياويلك وسواد ليلك تخرج ازاى هوا دخول الطابور زى خروجه )

    نيجى بأه للجد انتى عندك حق فى كل كلمة قلتيها مش عارفه ليه بنكره النظام و بندور على وجع القلب و الله مش عارفه مع ان لو عملنا زى ما انتى بتقولى هنستريح

    لا حول و لاقوة الا بالله

    المهم يا ايوشه قدمتى و لا لأ ؟؟؟

    تحياتى

    ردحذف
  5. هههههههههههه

    انتى لسه جايه تاخدى بالك من الطوابير دلوقتى

    يا بنتى دى بقت من الاساسيات

    ههههههههه

    الله يكون في العون

    ردحذف
  6. Sweet Violet
    هههههههه والله انا جالى اكتئاب من الطوابير وبلا شغل بلا نيلة هوا فى احلى من قعدة البيت نورتى ياجميل

    ردحذف
  7. mohamed ghalia
    ياخبر انت فهمتنى صح على فكرة دى البداية نغير ثقافة الطابور ومين عارف بكرة هيحصل ايه (( وش بيستهبل))

    ردحذف
  8. thunder
    تعرف انت قولت الخلاصة هى عدم احترام لاخر هى السبب اى مشكلة فى المجتمع عندنا
    اما بالنسبة للوظيفة انا بجد مش هفكر فى الموضوع ده دلوقتى لوفترة كبيرة علشان مش عايزة ارجع لخنقتى تانى :(
    انا فعلا محتاجة تجربة جديدة فى حياتى هو ده الحل بس مش عارفة هتكون ايه

    ردحذف
  9. zainab
    هههههههه مش هنقول غير ربنا يصلح الاحوال مرسيى للمرورك ياقمر على المدونة

    ردحذف
  10. يا بنتي الطابور الوحيد الزحمة اللي شفته منظم في حياتي في مصر كان فيه عسكري بينظمه و بيضرب بخرزانة اللي يخل بنظام الطابور

    ردحذف
  11. غروب
    لا ده من زمان بس دلوقتى حسيته اكتر علشان بقيت نفر من ضمن الطوابير الكتييييييير اللى فى البلد مرسيى للمرورك

    ردحذف
  12. مهندس مصري
    ههههههههه كنا عايزين عسكرى زى ده فى كل طابور لا بجد السبب فى ده كله الناس مش بتراعى النظام ولا بتحترم غيرها

    ردحذف
  13. قضيها يا حببتي مشربتيش طب جربي تشميها حتلاقيها ههههههههههه
    يابنتي من الموثات الشعبية الطابور بذمتك لو في يوم رحتي تجيبي العيش وملاقتيش طابور مش حتتنكدي ع الصبح عشان ملاقتيش حد ترغي معاه وا تضربية او تتخانقي معاه
    هههههههههههههه بوست جميل يا ايوشة واديني رجعتللك تاني يافندم

    ردحذف
  14. حروف (دلو مرة ثانية وجرح ثاني سابقا) ي

    نورتى ياجميل من تانى ايوة كده عايزين نشوف حروف اللى دايما بتسعدنا بتواجدها المستمر معانا ربنا يخليكى ويسعدك دايما يارب
    اما موضوع الطابور فيه حل انا هبئا اوقف اخواتى طابور لو حسيت انى مفتقدة جو الطوابيرى هههههه

    ردحذف
  15. ياااااااااه يا آيوشة الله يرحمك يا بنتي
    دانا كرهت نفسي من حكاية التوابير دي
    تعرفي أنا كمان ان شاء الله اكون مدرسة واطفال برضه
    بس انا قسم رياض اطفال مش تعليم اساسي
    يعني المفروض ان انا اللي اعلم الاطفال يقفوا طابور
    ربنا يعينك يا بنتي ده برضه بيكون نفس الناتج اللي بوصله لما بقف في طابور
    افضل واقفة 3 ساعات وفي النهاية امشي
    يا اما واحدة بنت حلال تلاقيها عاملالي حماية وتدافع عني لأني فعلا شكلي بيكون يصعب على الواحد مش بتكلم لو واحدة وقفت قدامي بقولها مرة واحدة بس ان ده مكاني مستجبتش مبعدهاش يا كدة يا بمشي بقى

    ردحذف
  16. الله يكون في عونك

    وفي عونا احنا كمان

    امال لو ركبتي المترو هتقولي ايه

    والا بقا طابور شباك المترو

    دا انا جالي تلوث بصري من المناظر

    وبجد خديها مني كلمه

    اللي خرج من داره قل مقداره

    خليكي متهنيه وفي البيت مبسوطه بلا وجع دماغ وقله قيمه

    وشعبنا الكريم مهما قلتي لا حياة لمن تنادي

    وعلي قول احمد المسلماني

    احنا شعب بنخالف اي شئ اصلا الدوله عمله القوانين علشان نخلفها وندفع غرامه

    مهما تقولي مفيش فايده

    من شب علي شئ شاب عليه

    نفسي القي حته هاديه في البلد ديه

    الا تلوث سمعي وبصري وكل انواع التلوث تلاقيها

    كفايه كدا النهارده

    غربتي

    ردحذف
  17. احم احم
    انا جيت ارد الزيارة

    عارفة يا ايوشة احلى فكرة شوفتها فى مصر للطوابير هى فى البنوك

    لما بتدخلى بيديكى رقم وتفضلى مستنية لحد ما تشوفى رقمك على المونيتور وتقومى تروحى على الشباك وتخلصى اللى انتى عايزاة

    دة مفيش طابور اصلا ولا حد واقف وراكى ولا عارف انت عايزة اية


    بس طبعا تعميم الفكرة دى صعب اوىىىىىىىىىىىىىىى لان دى بنوك

    يعنى معقولة تتعمل فى طابور العيش؟


    معتقدتش

    سلام

    ردحذف
  18. E73

    مرسيى للمرورك وربنا يكون فى عون كل الناس ربنا يوفقك فى دراستك وحياتك يارب التدريس ده عايز بال رايق على الاخر :(

    ردحذف
  19. ghorBty
    هو الشعب المصرى مش بحترم اى نظام ولا قانون مش عارفة ده نتيجة للاضطهاد والظلم اللى حاسس بيه ولا دى سمة فيه من زمااااااااان مرسيى للمرورك ياغربتى
    وانتى قافلة التعليق فى مدونتك ليه ان شاء الله هيكون غير :)

    ردحذف
  20. زوجة عنيدة
    نورتى المدونة بزيارتك هى الفكرة اللى فى البنوك ممتازة بس بردو مش فى كل البنوك فى البنوك المحترمة بس
    وهى صعبة تتنفذ فى كل مكان وصدقينى الناس مادام مش عارفة تتعلم النظام مش اى اختراع ولا طريقة هتعدلهم الا لما يكونوا بنفسهم مقتنعين بان ده الصح
    مرسيى للمرورك

    ردحذف
  21. يانهار ابيض يآيوشه
    ههههههههههههههههههههه
    عاوز تغيره طريقة الناس فى الطابور
    طب ونعيش ازاى من غير طوابير قوليلى
    وبعدين بتقارنى ليه بينا وبين الناس الوحشين اللى عندهم طوابير محترمه
    لا ماسمحلكيش
    وان كان على قعدة البيت انا بحسدك بجد عليها
    عقبالى ياااااااارب بس أعمل ايه أستقيل من الشغل يعنى طب ياريت
    بصى نصيحه لوجه الله بلاشغل بلاوجع قلب
    ربنا يوعدك بابن الحلال اللى يستتك فى البيت قولى آمين

    ردحذف
  22. wesoooooooooo

    مرسيى للمرورك ومفيش احسن من قعدة البيت

    ردحذف