الجمعة، 11 ديسمبر، 2009

مين اللى يقدر يبيع حلمه ((بوست قديم))


حكاية للاطفال تحكى عن ملك طماع يمتلك كل شئ فى الدنيا تقريبا وعلى الرغم من ذلك كان يرغب فى المزيد وعندما سأل وزيره ما ينقصه من ملكه أخبره بإنه يمتلك كل شئ إلا الحلم ولكى يكمل سلطانه لابد أن يكون لديه حلم غريب ويختلف عن اى إنسان آخر _ وينشر الملك فى البلاد يريد شراء أحلام الناس وسوف يدفع أغلى ثمن لأجمل حلم.

ولكن أغلب الأحلام كانت عادية ألا حلم شخص واحد فقط يحلم بقصر فوق السحاب يضيئه بالليل النجوم وبالنهار يتسرب اليه شعاع الشمس يعجب الملك بالحلم ويعرض عليه أن يشتريه بإى ثمن لكن الرجل يرفض أن يبيع حلمه ويدافع عنه حتى النهاية ويخدع الملك وينجح فى قتله وتنتهى القصة بموت الملك الطماع ويحتفظ الرجل بحلمه الجميل .

فى الحقيقة أعجبتنى القصة على الرغم من ساذجتها فى الإسلوب والعرض فهى ليست للأطفال من الأساس ولن يفهمها إلا من فى مثل حالى شاب أو فتاة يعيشون فى بلد تقتل أحلامهم بإبشع الطرق والأساليب الممكنة_ شباب ضاعت سنوات عمرها فى تعليم عقيم لا يسمن ولا يغنى ويتخرج ليجد نفسه بجانب الالاف بل الملايين من العاطلين والمحطمين نفسيا ومعنويا توارى أحلامهم التراب حتى أصبح من لديه كرامة يقتل حلمه بنفسه وكما يقال "بيدى لا بيدى عمرو "

بالطبع سوف يجد البعض بل الأغلب منا أنه هذا الشخص صاحب الحلم يتسم بالغباء لم يستغل الفرص ولا يحسن استخدامها وفهو كان بمقدروه أن يبيع حلمه ويأخذ جميع أموال الملك .

لكن القصة هنا ليست الغرض منها الإستسلام والتنازل بكل سهولة أو حتى الخوف من سلطان أو أى انسان كان فى استطاعته قتل وسلب أحلامنا وأنما كان الهدف الأساسى منها عدم تعريض أحلامنا للإستيلاء من قبل الآخرين ولا تعرضها للقتل بإيدينا او بإيدى غيرنا فليست أحلامنا عرضة للبيع او للقتل حتى لو كانت أحلام بسيطة فى نظر الآخرين .

الأحلام غالية وقد تكون شحيحة لدى البعض وأن كان الله قد وهبك مقدرة على أن تحلم كثيرا وأن تتطمح أكثر فهو أيضا قادر على أن ينمحك القوة لتحقق بها أحلامك وتصبح بالفعل أحلام حقيقية

الأحد، 6 ديسمبر، 2009

قلب يعشق الهرب

اليوم أهرب قبل بدء الحكاية

وأضع بيدى آخر سطر فى النهاية

أنا الآن روح مضطربة
أفتقد بشدة روح الإرادة
أبكى من مرارة الآحزان
يشب فى قلبى لهيب ونيران
قررت الهروب منك الى اللامكان
سوف اهرب من حبك الذى بلا أمل
سوف اهرب من حبك المفعم بالآلم
سوف ارحل عنك وروحى معك
سوف اهرب من دفء مشاعرك
اشفق علي قلبك العاشق من الغرق
فى بحور قلبى الحزين المضطرب
قلبى الذى يعيش فى الحياة
كعابر سبيل أو مغترب
فلا تحـــــــــزن يوما َ
على قلب ٍ يعشق الهرب

السبت، 5 ديسمبر، 2009

بتبعدينى





بالصدفة لقيت اغنية لمحمد منير النهاردة اسمها بتبعدينى كنت اول مرة اسمعها بس بجد الاغنية دى عبقرية مش علشان كلماتها ولا ان منير غناها لا علشان الاغنية مرسومة عليا :)
*
*
*
كأنه بيتكلم عنى بالظبط ساعات والله بحس انى اسلوبى فى التعامل مع الناس يقول إنى معنديش قلب ولا بحس أنا خلاص قربت اقتنع بجد انى لو ربنا كرمنى وارتبطت بانسان هقرفه ببرودى وقلبى الحجر ده
اسيبكم مع كلمات الاغنية
*
*
*

بتبعديني عن حياتك بالملل
وخلتيني اقول خلاص مافيش أمل
استمري هتخسريني استحالة هتكسريني
وحسسيني انك حجر او ورده دبلت ع الشجر
صيرت صبر غريب رهيب لا يحتمل
عملت ايه يجرح كرامتك
كل اللى ممكن اعمله معاكي اتعمل
بتوهميني ان الحكاية بتنتهي
ابعد وقبل ضياعي منك تندمي
مابقتش بعرف دمعتك من ضحكتك
أصرخ مافيش ولا صرخة مني تعذبك
ما عرفش ليه بتعذبيني
لو بجرحك امشي وسيبيني
ساكته الحياه بينك وبيني
احساسي بيكي راح اكيد مش محتمل

*
*
*
صحيح مش ننسى حملة ناولنى فرشة ارسم وطن

ناولنى فرشة هرسم وطن

محمد كمال صاحب مدونة صوت من مصر فكر فى حملة حلوة جدا اسمها ناولنى فرشة هرسم وطن وعمل مدونة بنفس الاسم ببساطة المدونة عبارة عن مدونة كل المصريين مدعوين للكتابة فيها عندك مدونة مش عندك بتعرف تكتب مش بتعرف انت مدعو معانا تكتب فيها مادام انت مصرى يبقى واجب عليك تكتب معانا فى المدونة وتقولنا حلمك عن وطنك
تقولنا نفسك ترسم وطنك ازاى هترسمها بفرشة هترسمها بجرة قلم هترسمها بحلم جواك بكرة يكبر ويبقى حقيقة زى ما تحب بس المهم تكون واثق ان كلامك واحلامك بكرة تتحقق باذن الله وتبقى الاحلام بدل ما هى كلمات وصور فى مدونة فعل وعمل حقيقى
*
*
اكتب لنا حلمك عن وطنك وابعته علشان يتنشر على المدونة
ابن وزير ابن غفير لازم نحلم بمصر اجمل ومصر اعلى ومصر افضل ولازم حلمنا يكبر ويتحول لحقيقية
الحملة ليها جروب على الفيسبوك وده اللينك بتاعه هنــــــــــــــــــــا
*
*
وده الايميل اللى هتبعت عليه اى بوست هتكتبه علشان يتنشر على المدونة guevara0000014@yahoo.com
محدش يعتذر محدش يتحجج ومحدش يقول مش هعرف اكتب سيب قلبك يعبر عن حلمك

الاثنين، 30 نوفمبر، 2009

inshallah

Every time... You feel like you can not go on... You feel so lost and that you so alone... All you see is night.. And darkness all around.. You feel so helpless.. You can't see which way to go.. Don't despair and never lose hope..Cause ALLAH is always by your side .. InshAllah you find your way

video

الاغنية عجبتنى وادتنى امل يمكن للحظات بس غيرت حالتى كتير وباذن الله هتغير حال ناس كتير

اتمنى تحبوها

صحيح المطرب اسمه ماهر زين بس صوته تحفة واحساسه رائع

الأربعاء، 28 أكتوبر، 2009

اعطاء من لا يملك لمن لا يستحق




يافتاح ياعليم يارزاق ياكريم استعنا على الشقى بالله بعد طول غياب عن المدونة كان لازم تحتاج تنضيف وتلميع ومسح وكنس والذى منه وهو ده الشقى بعينه بما انى ام الكسل بذات نفسه .

*
*

المهم طبعا انا كنت مختفية ليه ورجعت ليه هقولكم كالعادة مكتئبة ايه الجديد فى ده ولا حاجة بتحصل فى احسن البلوجرات صاحبه يكتئب يجيب دولفها ويرجع لما الغزالة تروق بس انا لسه مرقتش لسه مجنونة زى ما هى عندى ملل فظيييييييييييع وقولت الدبلومة هتسلينى لكن تقولوا ايه الفقرى فقرى شحططونى رايحة جاية جاية رايحة وفى الاخر قالولى بقى تعالى فى شهر 11 اسالى على الجدول الله يخرب بيتكم انا بجد مليت ونفسى ابدا اعمل اى حاجة ليها معنى فى حياتى

يلا قدر الله وماشاء فعل وفى عز الاكتئاب ده طقت فى دماغى فكرة مجنونة انى اعمل مجموعة مواضيع متسلسلة اكتبها كلها عندى على الجهاز لغاية ما اخلصها ولو كنت راضية عنها باذن الله يمكن اتجنن اكتر وانشرها كتاب " احلام اليقظة " ^_^

ادعولى بقى مش احبط واجى فى النص واقول مش هكمل لانى بدات تقريبا فى اول عشر صفحات ماشاء الله المهم ادعولى الدبلومة تبدا علشان انا حاسه انى عاملة زى الجزرة المخللة فى البيت انا كان ايه اللى خلانى افكر اصلا اكمل دراستى .

*
*


قولنا المهم نيجى للى مش مهم خااااااالص هو وجع قلب ودماغ وبس وكمان موضوع بيجيبلى شلل رباعى انا مكنتش ناوية انزل بوستات خاااااااالص لغاية ما استقر فى الدبلومة وامورى تظبط بس النهاردة بصراحة صعقت صدمت وجالى تقريبا نوبة صرع لقيت فيديو على الفيسبوك اللى جيبالنا المصايب دايما عاملين شوية صور كده للحزن الوطنى على الريس على ابنه تشكيلة يعنى على اغنية نانسى حبيبتشى

لو سالتك انت مصرى تقولى ايه

تقولى مصرى وابويا مصرى وكل مصر الله عليه

قولها باعلى صوت وارفع راسك لفوق

انا مصرى وابويا مصرى والى اخر الاغنية طبعا


لغاية ما الصرع والشلل جاب اخره معايا فى كلمة ملوك الجدعنة ودى حاجة فى طبعهم هنا بقى ياجماعة قولت لاااااااااا استوب يانانسى جدعنة وهى الجدعنة دى معناها ايه معلش لانى انا مش شايفة ام الجدعنة دى فى البلد فى نفر واحد ده حتى يااخت نانسى عيب عليكى ده احنا لسه فى حداد على ضحايا حادث القطار الجديد مهو تقريبا ربنا مش هيقطعلنا عادة كل كام سنة تحصل حادثة قطار على اساس الحكومة بتقولنا شكلكم نسيتوا ياكلاااااااااب ضحايا قطار الصعيد واحنا من كرم اخلاقنا قولنا نفكركم علشان انتم شعب بينسى و تيييييييييييت

*
*


النكتة البايخة بقى موضوع التوريث ده من كام سنة لما غيروا الدستور طلع شوية ناس تقول ده بيغيروه علشان خاطر يبقى فى مبرر للتوريث فى مصر بصراحة مش اخدت ولا اديت فى الكلام مهو كلام هو الكلام بيلزق ده حتى الشتيمة مش بتلزق _

وهب الكلام كبر والاشاعات بقيت حقيقية والناس كلها بترفض وتندد بالتوريث ومش عايزينك مش عايزينك ولا انت ولا اللى جيبنك _ونلاقى فيديوهات ضد الحزن الوطنى واعضاء لكن انا مكنتش مستغربة يعنى مهو داه الطبيعى شوفنا ايه حلو فى حياة باباه عمو الريس علشان نقبل ان ابنه يبقى مكانه بعد عمر طويييييييييييل باذن الله .

*
*

لكن العجب ركبنى ومش عايز ينزل من على كتفى خالص لما لقيت ان فى ناس بتقبل بالتوريث وعاملة له اغانى زى ليه ميحكمششششششششششششى ودى تقريبا كانت من تاليف ام سيد فى شبرا

*
*

وتلاقى زى ما يكون خطة مدروسة حتى انا ببص فى الاصدقاء عندى على الفتيس بوء لقيت ناس كاتبة انها من الحزن الوطنى

عااااااااااااادى انما اللى مش يتسكت عليه ابدا انهم يدنسوا الاغنية الطاهرة بالشكل ده لااااااااااااا لن اقبل

ومن الاخر كده احب اقول كلمة بتيجى على بالى كل ما سمعت موضوع التوريث ده فى الا وهى " اعطاء من لا يملك لمن لا يستحق "

مصر دى مش فيلا علشان يقولوا خد ياحبيبى علشان انت ولد مطيع وشطور واللى بيحصل دلوقتى ده احنا السبب فيه الحزب رسمها صح طلع اشاعة التوريث وساب الشعب يلت ويعجن لدرجة الستات فى البيوت بيقيت بتكلم فى الموضوع ده لغاية ما بقى فى عقولنا امر مسلم بيه يعنى احنا اللى كبرنا الموضوع واديناه اكبر من حجمه مين اصلا فيه نفس يفكر من هيحكم بعد مين هو حد ضامن عمره ولا حد ضامن بكرة فى ايه ولا ايه اللى هيحصل بعد ساعة واحدة

*
*

انا لا مع جمال ولا ضده لان بساطة ولا اعرفه ولا عايزة اعرفه من اصله لما تيجى الانتخابات هتلاقى شوية مرشحين اى كلام سيكو سيكو مش هتعرف تختار منهم حد وتقول خلينا فى اللى نعرفه احسن من اللى منعرفوش

وبعدين لو الشعب كان شعب فيه الخير وعارف يدافع عن نفسه صح مش جبان يحط راسه فى الرمل ويمشى جوه الحيط ويقول انا مالى كان ده بقى حالنا

ااااااااااااااااه ياشعب عايز السك على دماغه عايز يتساق زى الاغنام هو ده اللى ينفعه

السبت، 17 أكتوبر، 2009

قالوا الملايكة



قالوا الملايكة مصيرهم جنة مع الأبرار . مع الابرار

و ازاي نلاقي ملايكة وعايشين وسط النار ؟!. في وسط النار

!اطفال معجزين . واحنا ولا حاسين

.اكيد قلوبنا حجر مش قلب بني آدمين. مش قلب بني آدمين

.نفسك في ايه يا حلوة . قالتلي في الحنان.

وانا نفسي ارسم جنينة مليانة بالألوان.

ويا حلم بسيط وعادي مالك يا حلم بعيد .

معقولة الناس تعيِّد ودول مالهمش عيد.

اطفال معجزين . واحنا ولا حاسين .

اكيد قلوبنا حجر مش قلب بني آدمين. مش قلب بني آدمين.

وطن من غير زهور مالوش حلم و عهود

و ازاي نحلم ببكرة وهوا مش موجود

و زمنا للحضارة ولسه في عبيدطفلة مالها لقمة .

ضحكة وفستان جديد.

اطفال معجزين . واحنا ولا حاسين .

اكيد قلوبنا حجر مش قلب بني آدمين. مش قلب بني آدمين.






الخميس، 15 أكتوبر، 2009

رفضك يازمانى

رفضك يازمانى يا اوانى يامكانى انا عايز اعيش فى كوكب تانى فى عالم تانى فى لسه امانى فيه الانسان لسه انسان عايش من تانى عالم تيار ورياحه قويه بتهز كيانى تاثر فيه من غير مواعيد بتاخدنى بعيد عن معنى حياتى عن اصلى وذاتى وده مش باديه فى سد منيع عالى وفظيع عالى وفظيع بينى وبين نفسى بين روحى ورسمى بين يومى وامسى واللى اتمنيته وبنيته فى الهوا بيضيع وده مش باديه مكبوته فى قلبى احلام محسوره وحطام اقدار ايتام مبتوره وامال مطويه بتعافر فيه وكأن اوانى كان لسه شويه وفى وسط الناس والزحمه تاه الاحساس والرحمه ضاع منى سلامى تاه حتى كلامى ضاق بيه وقال كداب يازمانى كداب يازمانى رفضك يازمانى ياوانى يامكانى انا عايز اعيش فى كوكب تانى فيه الانسان لسه انسان عايش من تانى





الاثنين، 12 أكتوبر، 2009

الهامى




اسم الكتاب :الهامى
صاحب الكتاب :أحمد محى الدين أحمد

مدونة:elham-me2.blogspot.com

اسماء واحلام فى وجدانى

الكتاب عبارة عن ديوان شعر
فية الكثير من الاشعار الجميلة والرائعة

لتحميل الكتاب
http://www.4shared.com/file/140034494/5eb080a2/_online.html



عقبال ما نبارك على الكتاب المطبوع باذن الله يااحمد

الأحد، 11 أكتوبر، 2009

راية بيضا

يوم الخميس جت عندنا جنا بنت اخويا ومامتها قالت انها حفظت اغنية جديدة والشعنونة كانت حفظها وهى يدوب لسه عندها سنتين وشهرين بس ماشاء الله عليها لسانها متبرى منها وبتكلم احسن منى كمان بس الاغنية كنت اول مرة اسمعها وعجبتنى جدا , بس اكتر حاجة عجبتنى بجد ان مرات اخويا بتعرف بتختار للبنت ايه اللى تسمعه وايه اللى تحفظه وطول اليوم يلا نغنى ويلا نقول الادعية ويلا نسمع القرآن بجد البنت بقيت ماشاء الله فى قمة الذكاء بتفكرنى بنفسى وانا صغيرة ^_^



بجد ساعات كتير لما بشوف جنا بنت اخويا بتمنى بنتى او ابنى ان شاء الله يكونوا زيها فى ذكاءها واتمنى انى اقدر فعلا اربى اولادى صح زى ما رسمه فى بالى وان الدنيا مش ترغمنى انى اربيهم والسلام يبقى ساعتها بالهم احسن لو مكنش الاولاد يرفعوا الراس ويكونوا سبب فى دخول الجنة يبقى بلاش احسن
صدعت دماغكم شوف الاغنية



الثلاثاء، 6 أكتوبر، 2009

حب ايه ده اللى من غير اى حرية ؟؟؟




بيقولوا النهاردة مر 36 سنة على حرب اكتوبر , وبيقولوا برضو اننا انتصارنا دول هما اللى بيقولوا مش انا اللى بقول , وبيقولوا كمان اننا عبرنا ورفعنا العلم المصرى ورجعنا ارضك ودفعنا غالى قوى يوميها دفعنا دماء اولادك _ دفعوا اروحهم بكل حب ومن غير مقابل ادوكى اروحهم ودافعوا عنك لاخر نفس فى حياتهم وسابوا دمائهم تسيل على ارضك وانتى شربتيها بس انت طلعتى ليه جاحدة كده شربتى الدم ونسيتى اللى حصل وكل سنة بتمر بنتنسى اللى حصل اكتر واكتر ولا كأن دول اولادك ولا كأن دول ضحوا بكل حياتهم علشانك .
*
*
طيب تفتكرى لو رجع الزمان بينا تانى كنت هتلاقى نفس التضحية لو رجعوا وشافوا اللى حال اللى وصلت ليه وان دمائهم راحت هدر على ارض بقيت مش ملكنا ولا لينا الحق نسال حتى عن اللى صابها ولا حتى لينا الحق نفتح بقنا ونقول جاريلك ايه ؟؟؟
*

*
بقيتى مش بتاعتنا يامصر بقيتى مش بلدنا زمان سيناء ضاعت مننا وحسينا ان جوانا جرح مش بيلتم ابدا الا لما رجعت بعد سنين من الاحتلال تفتكرى دلوقتى محتاجين كمان قرن علشان نرجع مصر كلها ونحررها من الاحتلال اللى خانقها وبيموتها ببطئ .
*
*

ساعات بحس ان اسرائيل ضحكت علينا ورمت لينا طعم واحنا صدقناه قالت لنا يلا تعالوا حاربوا ورجعوا سيناء تانى وافرحوا بانتصاركم وافرحوا بانكم قولتوا للعالم كله احنا شعب يقدر يعمل المستحيل ويقهر الاسطورة اللى كانت فاكرة نفسها لا تقهر _علشان تيجى بعد 36 سنة تتضحك علينا واحنا مش بنفكر العزة والنصر والكرامة غير يوم واحد فى السنة نسمع شوية اغانى على كام فيلم وباقى السنة كرامة منداسة بالجزم تانى يوم بالظبط ننسى ونرجع تانى نلف فى الطاحونة اللى عايشين فيها فى مصر ونرجع لكسرة النفس والذل .
*
*
تخيلى حتى السنة دى اليوم الوحيد اللى مفروض نحس بالفخر والعزة والانتصار ملقتش حد حاسس بكده بقى مفيش جوانا نفس يمكن علشان نفتخر بمجد زايل ولا يمكن ابتدينا نفوق ونصدق اننا اتخدعنا وانهم كدبوا علينا _سنين بيربوا فينا ويملوا دماغنا بانتصار مش حقيقى ويقولنا فى كتب التاريخ شفتوا جدودكم عملوا ايه ونجحوا يعيشونا فى الماضى علشان ننسى الحاضر .
*
*
ساعات بحس اننا اتحررنا من محتل واضح وظاهر لمحتل مننا فينا خبيث بيتلون كل يوم بشكل مختلف علشان مش نقدر نحدده يااااااااااه اصعب شئ الغربة جوه الوطن و اصعب احتلال يكون احتلال الوطن ليك .
*
*

عبرنا ورفعنا العلم فى 73 وكل يوم بشوف العلم بيختفى من جزء من ارضك ومعرفش بيروح فين وشكل وطباع مصر الحقيقية بيختفى مع العلم وبيتحط اعلام تانية وبنطبع بطباع تانية غريبة علينا ومش لوننا .
*
*
بيقولوا ان فى حرب اكتوبر كان الدول العربية كلها مشاركة فى العرب "العراق- والادرن- والمغرب- وتونس -وسوريا وليبيا -والادرن- والسودان" هو ده اكيد كان خيال الدول العربية كلها متوحدة ومتجمعة على كلمة واحدة وكلمة حق مش باطل تخيلوا بقى احنا عاملنا ايه لما انتصارنا فككنا الوحدة اللى كانت موجودة وكأن الانتصار فى الحرب نهاية العروبة اللى بتغتصب كل يوم واحنا واقفين نتفرج وياريت من برة لا مننا فينا بقينا اعداء لبعضنا بقى بدل الحب والوحدة بقي الكره والفرقة .
*
*
حرب اكتوبر كان بداية اقوى عصور الظلام ليكى لان بصراحة انتى عمرك ما شفتى نور كل واحد بيجى بيسجنك اكتر من اللى قبله ولا كانك امهم وليكى حق عليهم فى حد يسجن امه ويحطها فى بير ويقفل عليها فى حد يوقف جلاد لاخواته تصورى طلع فيه تصورى كمان ان الام ممكن تجيب اولاد عاقين تجيب اولاد كل ما تفتكر انها تعبت اد ايه علشان تجيبه لنور تلعن اليوم اللى فكرت تجيبهم فيه .
*
*
انا كنت عاملة بوست وبعدين مسحته علشان حسيت انى قسيت قوى عليكى فيه يامصر وانتى مهما كان مش لازم نقسى عليكى كفاية اللى فيكى انتى ست عجوزة كل امراض الدنيا معششة جواكى سرطنات الدنيا كله اتجمعت فيكى علشان كده مسحت الكلام القاسى كله اللى كتبته وقولت هكتب تانى مس ههنيكى على الذكرى السعيدة دى لانها فى وجهة نظرى مش سعيدة ابدا بل بالعكس تعيسة جدا بتقلب علينا مواجع وبتفكرنا بايام مضت وولت وتقريبا مش هترجع تانى بتفكرنا بشعارات واحلام كدابة وبتفكرنا بقادة افتكروا البلد تكية او عزبة يقطعوا ويوزعوا فيها زى ما هما عايزين بتفكرنا اننا بقينا من بعد الحرب ومعاهدة السلام مقطوعين وبتفكرنا اننا نسينا اخواتنا فى اماكن تانى علشان نفرح بانتصار مزيف .
*
*
ولا اقولك كل سنة وانتى فى سجن يامصر كل سنة _وانتى سجن لاولادك بايدين اولادك _كل سنة وانتى من فقر لفقر ومن جوع لجوع _ومن فساد لفساد _ومن ظلم لظلم _ومن فرقة لفرقة _ومن عصر ظلام لعصر اشد ظلمة انا يئست انى اشوف يوم حلو فيكى وانتى كمان يئستى من انك تفرحى يوم واحد فى حياتك .
*
*

معلش انا كان لازم اتكلم واقول كل اللى عايزة اقوله بس هقوله من قلبى وهلغى عقلى علشان ده اللى انتى عايزه عايزانا عايشين من غير قلب ومن غير عقل كمان بس صدقينى انا ممكن الغى عقلى لكن قلبى مش هقدر علشان قلبى مليان بحبك وصعب انى الغى قلبى لانى هموت لو حبك فى قلبى مات بس حب ايه ده اللى من غير اى حرية ؟؟؟

الاثنين، 5 أكتوبر، 2009

مـــــدونتك هتـــنقذ طفـــــلك









فكرة حــــــملة" مـــــدونتك هتـــنقذ طفـــــلك " - اولا اسم الحملة نابع من ان الاطفال الى ان شاء الله هنساعدهم (اطفال مستفى 57357 )زى اطفالنا فواجب علينا نعمل كدة او هنقدم حاجة بسيطة لمساعدتهم وان شاء الله تكون ليها اثر كبير بأذن الله وخير علينا كلنا بأذن الله ومش تفتكروا ان مساعدتكوا دى بسيطة لا بالعكس ومش كلامى دة كلام رسولنا العظيم ومعلم البشرية جمعاء :-قال أتى النبي صلى الله عليه وسلم رجل يستحمله فلم يجد عنده ما يتحمله فدله على آخر فحمله فأتى النبي صلى الله عليه وسلم فأخبره فقال إن الدال على الخير كفاعله وفي الباب عن أبي مسعود البدري وبريدة قال أبو عيسى هذا حديث غريب من هذا الوجه من حديث أنس عن النبي صلى الله عليه وسلم ...قوله : ( يستحمله ) أي يطلب منه المركب ( فحمله ) أي أعطاه المركب ( فقال ) أي رسول الله -صلى الله عليه وسلم- ( إن الدال على الخير كفاعله ) لإعانته عليه ، فإن حصل ذلك الخير فله مثل ثوابه ، وإلا فله ثواب دلالته قاله المناوي
* * *
.- هنســـــــــــاعدهم ازاى :---- ان شاء الله الفكرة ببساطة اننا عاوزين كل المدونات الى هتشترك معانا فى الحملة دى هتحط شعار المستشفى واللينك الخاص بالمستشفى على المدونة الخاصة بكل واحد هيشترك بأذن الله معانا وكمان فوق الشعار هتكون كلمة( اتبرع وانت فى بيتك ولو بجنية او دولار من هنا ) والناس الى مبتدئين فى المدونات هشرح لهم بطريقة مختصرة ازاى هيحطوا الصورة واللينك وهى( انكوا تفتحوا صفحة التخطيط فى مدونتكم وبعدين اضافة اداة وبعدين نختار من اضافة اداة اختيار اضافة صورة وبعد كدة لما تفتح نحط فى خانة اسم النموذج الكلام الى اتفقنا علية وهو" اتبرع وانت فى بيتك" وفى خانة وصل هنحط اللينك بتاع موقع مستشفى 57357 والى هو

http://www.57357.com/Default.aspx?PageContentID=8&tabid=155

وبعد كدة هنضيف الصورة بتاعة المستشفى وهى موجودة اعلى الموضوع بتاعى فوق وبس وجزاكم الله خيرا ) علشان فية ناس كتيرة متعرفش عن طرق التيرع الى هى كتيرة ومش معروفة وممكن تحقق عائد كبير جداا جداا ومش متركز عليها فى اعلانات التلفزيون والراديو ووسائل الاعلام وهدفنا فى الحملة دى اننا نوضح طرق التبرع المتعددة الى بدورها هتجيب عائد اكبر واكتر لو كل واحد استخدم ولو طريقة واحدة وهو فى بيتة وهقولوكوا نبذة عن طرق التبرع دلوقت :- ....
- البنوك :- (ودى متركز عليها كتير فى وسائل الاعلام ومش هنخوض فيها ) .

* *

2- انترنت الخير (هنركز اكتر عليها ):-يمكنك التبرع من خلال أستخدام ارقام انترنت الخير : 07775757 أو 07075757 بنفس سعر المكالمة العادية كما انه يمكنك حساب صافي قيمة ما تبرعت به بأستخدام عداد الخير ...

* *

- التليفون (هنركز اكتر عليها ):- يمكنك الاتصال برقم 1468 أو 2357 من اي تليفون محمول او برقم 09009555 أو 09000957 و التبرع لصالح المستشفى اثناء استماعك للرسالة الصوتية . سعر الدقيقة جنيهان
* *


4- بطاقة الائتمان (هنركز اكتر عليها ):- خدمة جديدة تقوم بها مستشفى 57357 لتسهيل التبرع بالتعاون مع بنك مصر و شركه Verisign العالمية لتأمين المواقع على الانترنت. يمكنك التبرع بأي عملة صدرت بها بطاقتك الائتمانية في أي بلد في العالم بما يعادلها من الدولار و ستقوم مؤسسه فيزا و ماستر كارد بتحويلها إلى دولار .فقط اضغط على اختيار دولار ,فنحن بحاجة إلى العمله الصعبة لتمويل عملية استيراد الأجهزة و المعدات الطبية .
* *

5 - البريد المصرى (هنركز اكتر عليها ):- يمكن التبرع فى اى فرع من فروع مكاتب البريد المصرى لحساب رقم 26386
* *

حملتنا على ال facebook ( ودى اهداء من مدونة قطرات ندى . جزاها الله خيرا ) :-- احب قبل وماكتب لينك الجروب علشان ان شاء الله تشتركوا معانا فية احب اشكر المدونة وربنا يجزيها خير ودة مثال حى للعمل الجماعى و ياريت كمان ياجماعة الى يحب يشارك بعمل شعار للحملة وعندة معرفة بالفوتوشوب ويصمم شعار خاص للحملة يبقى جزاة الله خيرا وربنا يجعل عملة فى ميزان حسناتة ان شاء الله .واليكم لينك الجروب على الفيس بوك :-1 - http://www.facebook.com/group.php?gid=139959994897&ref=search&sid=100000133813777.2100342868..1

* *


وبعد ياجماعة ماستعرضنا كل حاجة عن الحملة عاوزين بقى ان شاء الله نبدأ بقى بأذن الله وتكون على خطوتين ان شاء الله :-1- ان كل صاحب مدونة او اى حد يقدر يساعد او اى حد يعرف صاحب مدونة يقولة على الموضوع والى معندوش مدونة ومشترك فى موقع يقدر يحط الموضوع ويبقى عمل خير ربنا يجزية علية بأذنة تعالى وبعد كدة نرجع للمدونين نحط زى ماتفقنا الصورة الى موجودة بالاعلى واللينك زى ماشرحنا عن سابق ... وتخيلوا ان شاء الله لو كل مدونة زارها فى اليوم 100 شخص او 200 شخص وضغط على اللينك وعرف طرق التبرع واتبرع تخيلوا الخير الى هيعم شكلة اية يأذن الله تعالى وان شاء الله ربنا هيوفقنا علشان نيتنا خير ان شاء الله وصدقة جارية كمان فى مدونتكوا ان شاء الله.. بقول رسول الله صلى الله عليه و سلم : « إذا ماتَ ابْنُ آدَم انْقَطَع عَملُهُ إلاَّ مِنْ ثَلاثٍ : صَدقَةٍ جارية ، أوْ عِلمٍ يُنْتَفَعُ بِهِ ، أوْ وَلدٍ صالحٍ يدْعُو لَهُ » - رواهُ مسلمٌ .
* *

2 - نحدد يوم نحط الموضوع دة كلة بكامل تفاصيلة على المدونات الى هتشترك معانا فى الحملة ويكون يوم موحد ان شاء الله لكل المدونات وهنعرف اليوم دة من خلال تعليقاتكوا على الموضوع علشان يقرا اكبر عدد وتعم الفايدة والخير علينا كلنا بأذن الله وربنا يكرمكوا يارب ويوفقكوا ويثبتكوا على العمل الصالح وعلى شكرة وحسن وعبادته اللهم امين



لينك الموضوع الاصلى مدونة طهر فؤادك جزاه الله كل خير

الأحد، 4 أكتوبر، 2009

أزمتى الحقيقية





البوست اللى فات مكنش لعبة بصراحة كان اختبار صغير ليا وليكم علشان اعرف انا ايه من وجهة نظركم واعرف اللى بتحبوه فيا واللى بتكرهوا فيه وبيضايقكم منى وده اللى كان يهمنى لانى عارفة وواثقة ومتاكدة من اللى بيضايقكم فيا بس كنت محتاجة اسمع منك زيادة تاكيد يعنى .

*
*
*

كل التعليقات تقريبا كانت بتقولى حاجة واحدة مكنتش بطريقة مباشرة بس هى كانت واضحة بين السطور انى عايشة مع نفسى ومش عارفة اعيش وسط الناس سواء فى الحقيقة او على النت قولتولى اخرجى وشوفى الدنيا وشوفى اصحابك الحقيقين الحياة مش نت وبس لكن اللى مش تعرفوه انى بتحجج بالنت علشان اهرب من ازمة جوايا ازمة.

*
*
*

ازمتى انى بحب اقرب من الناس واتعرف عليهم ويبقى حواليا اصدقاء وناس كتير مش بحب اعيش لواحدى لكن بعد ما بتعرف على الناس فجاة مرة واحدة ببعد وباخد ركن لواحدى حاولت افهم السبب اللى بيخلينى اعمل كده اللى بيخلينى انعزل واكتئب وانا فى قمة سعادتى بصداقتى ومعارفى الجداد مش بحاول حتى ادى نفسى فرصة علشان اوثق علاقتى باى انسان ويمكن ناس كتير من المدونين حسوا بالموضوع ده وفى ناس زعلتهم منى باسلوبى ده انى ببعد من غير اى مبررات او اعذار او اعتذار.

*
*
*

بعد تفكير طويل عرفت السبب الحقيقى اللى بيخلنى اعمل كده انا بخاف من الفراق قوى بخاف الظروف والدنيا زى ما عودتنى طول عمرها انها بتاخد منى كل شئ جميل وكل ذكرى جميلة فى سكتها بخاف تكرر نفس الكرة تانى جربت اصادق واتعرف على ناس كتير والدنيا فرقتنا علشان كده قولت مش عايزة اتعود على وجود حد فى حياتى وفجاة الحياة تحرمنى منها .

*
*
*
قولت النت مش زى الحقيقة ومش هتعلق بالناس بسرعة زى الحقيقة وحطيت فى بالى دايما ان النت وعلاقته وهمية جدا وكله زيف وخداع ومش لازم تكون علاقتى عليه قوية لكن اللى حصل غير كده اتعلقت بكل الناس اللى عرفتهم من على النت وبقيت حياتى كلها مرتبطة بيهم كلامى كله عليهم فلان قال وعلان عمل وفلانة حصلها كذا وكذا.

*
*
*

وتعلقى زاد اكتر بالمدونين حسيت انهم قريبين منى قوى يمكن هما شايفين روحى الحقيقية بقيوا شئ مهم فى حياتى بفرح جدا لما اشوف تعليقاتكم وبزعل جداااااا لما يغيب عن المدونة صديق او صديقة اعرفها بخاف جداااا لما حد يغيب وافضل اسال طيب هما روحوا فين وغابوا ليه ويمكن من المرات اللى اعصابى تعبت فيها لما غاب ثندر اللى بجد اكتر من اخ ومقلش لحد غايب ليه وفين ساعتها رجعلتى تانى فكرة الفراق اللى بتسيطر على عقلى باستمرار لقيته بيقولى فوقى بلاش تتعلقى بعالم وهمى كل حاجة ومصيرها لفراق وخصوصا انى عارفة ظروفى كويس قوى وعارفة انى هيجى يوم ومش هقدر اتواصل تانى مع كل الناس اللى حبتها وعرفتهم ظروفى اللى خنقتنى زمان ولسه بتخنقنى لغاية دلوقتى ومش عارفة هتخنقنى لامتى تانى .

*
*
*

انا بهرب من حاجات كتير فى حياتى بتخنقنى للنت علشان احس بشوية حرية وشوية لاحترام ذاتى وكيانى وانى الاقى ناس بتهتم بيا لكن لاقتنى شغلتكم باكتئابى وهمى وحزنى وبدل ما اكون صريحة فى كل كلامى بقيت غامضة ومش واضحة وبدل ما اقرب ببعد وابعد وابعد .

*
*
*

فى جملة قريتها بتقول ان الفقد علمنى محبش حد
دكتورة ستيتة ودكتورة مروة قالولى لو هتموتى بكرة صارحى اللى بتحبيهم بحبك تصوروا انى لما فكرت لقيت انى من كتر خوفى من الفراق والفقد بقيت مش بحب قوى ولا عايزة اتعلق بحد , لكن الحقيقة انى حبتكم واتعلقت بيكم واتمنيت كتير انى كنت اعرفكم على الحقيقة بكون حزينة جدا لما اسمع عن لقاء مدونين وانا مش قادرة احضر لما بتعملوا لقاءات خيرية وانا مش قادرة اشارك لما بتكونوا عارفين مناسبات الحلوة والحزينة وبتهنوا وبتواسوا بعض وانا مش قادرة لانى عايشة فى اخر بلاد المسلمين .

*
*
*
علاقاتكم ببعض بتتقرب وانا قررت ابعد لانى اعصابى تعبت ومبقتش مستحملة احساس انى كل يوم بزداد تعلق بيكم وفى نفس الوقت مش قادرة احتى اشوفكم ولو مرة واحدة وجها لوجهه.

*
*
*

حتى دكتورة علا لما اتكملت معايا وقالت لازم نتقابل خفت وحسيت انها لو شافتنى على الحقيقة الصورة اللى كانت رسمها لايوشة هتتهز واول كلمة هتقولها مش انتى ايوشة اللى اعرفها

*
*
*

عادل انت قولت انى جبانة ودى حقيقة واجبن خلق الله كلهم كمان ميمى قولتلى انى مغرورة بس هو مش غرور اكتر من خوف وانطواء زمان لما كنت بفكر اصدقائى فى المدوسة مش حابين يصاحبونى كنت باخد ديسك لواحدى فى اخر الفصل اقعد فيه ومش بتكلم مع حد مع انى بكون نفسى هموت انى ابقى فى وسط شلة البنات اللى جنبى بس بخاف انى اخد الخطوة واروح اتكلم احسن يحرجونى وكنت بقول خلينى كده لغاية ما يجوا هما ويكلمونى وفعلا جات واحدة كلمتنى بس قالتلى نفس كلمتك انتى مغرورة علشان مش بتكلمى حد ولا بتصاحبى حد فينا مبررتش موقفى ولا شرحت اسبابى اكتفيت انى اسكت .

*
*
*

الحقيقة انا بحب اخد خطوة الفراق قبل ما الخطوة تيجى غصب عنى انا مش بحب اكون لواحدى بحب دايما احس ان حواليا ناس كتير حواليا باى شكل بس مش بحب يقربوا قوى ولا بحب علاقاتى بالناس تكون جامدة وعلاقات قوية
اصحابى فى الجامعة حاولت ابعد عنهم فى اخر سنة علشان لما يجى وقت ونفترق مش اتاثر او ازعل وبدل ما استغل كل فرصة انى اقرب منهم واستغل كل لحظة كنت بفكر فى لحظة الفراق وبقيت ببعد بالتدريج
دى حالتى دلوقتى انا اتعودت عليكم وحبيتكم مع انى معرفكمش شخصيا واتعلقت بيكم حياتى كلها دلوقتى بقيت متعلقة بيكم ولانى عارفة وواثقة ان هيجى يوم مش هقدر استمر وهقولك سلام وظروفى هتكون اقوى منى وهتجبرنى ابطل تدوين وانسى النت نهائى ويوميها مش هقدر استحمل بجد لان هيبقى كل حاجة حبيتها واتعلقت بيها ضاعت منى .

*
*
*

كان الحل انى مش اتعود عليكم ولا على وجدكم فى حياتى باستمرار وبقيت ببعد اقفل المدونة اتعمد انى مش ازور المدونات اللى متعودة ازورها علاقاتى بقيت محدودة وتعليقاتى بقيت سخيفة وبايخة وبقيت برد بشكل الالى مفيهوش روح بقيت اغيب من على الايميل ومش بفتحه وايام قفلت الموبايل وقولت ده الحل علشان متعودتش على وجودكم وقولت هقدر ابعد بسهولة بعدها لكن مقدرتش ومش قادرة ابعد ورجعت تانى بس بعد ما خسرت ناس كتير بحبها وبعزها
ساعدونى اتغير للاحسن ساعدونى انى مخفش من انى احبكم ولا اتعلق بيكم



السبت، 3 أكتوبر، 2009

تيجى نلعب شوية




دى زى لعبة بيلعبوها على الفيسبوك وانا جبتها هنا لهدف فى دماغى اعتبروها تاج وهيتحل ممكن :))






ممكن توصفونى فى كلمة واحدة ؟؟؟؟
*
*
*
*
*
*
*
*


قولولى حاجة بتحبوها فيا وحاجة تانية بتكرهوها ؟؟؟

*
*
*
*
*
*
*


لو هموت بكرة وفى فرصة تقولولى حاجة هتقولولى ايه ؟؟؟؟؟



الثلاثاء، 29 سبتمبر، 2009

أملى الوحيد



اول مرة هتكلم عنك بصراحة ومن غير خوف او خجل وهتكلم قدام الناس كلها واقول انى بحبك وبحلم بيك وحبى ليك مش حرام ولا اى شرع يقدر يحرمه ولا اى انسان يقدر يجرمه لانه نصيب وقدر وربنا زرعه جوايا ليك من يوم ما اتولدت .... زمان كنت بحلم بيك كل فين وفين , مع الوقت كنت بتيجى لى فى الاحلام كل يوم لما بنام , لكن فى الوقت الحالى انا بحلم بيك فى كل لحظة بتمر عليا هقولك يمكن علشان حسيت ان العمر بيجرى ومحتاجة انك تكون جنبى فى كل لحظة فى حياتى الجاية ....
*
*
*
عارف انا اى حاجة بتفكرنى بيك لو شفت وردة بفكر ان الوردة دى منك لو صدفة اغنية جت فى ودنى بقول انك انت اللى بعتهالى لما بشوف اتنين ماشيين مع بعض بقول ياريت انا وانت نقدر نمشى زيهم كده والناس كلها تحسدنا على حبنا زى ماانا بحسد الناس على حبهم ....
*
*
*
بحبك من قبل ما اعرفك ومن قبل ما اشوفك ومن اقبل مع اعرف ملامحك عارف ليه لانك مرسوم فى بالى وفى خيالى مش عايزاك وسيم اكتر ما عايزاك كريم فى كل حاجة كريم فى طباعك , كريم فى مشاعرك , فى روحك.... كريم معايا ومع غيرى عايزاك الناس تحسدنى عليك ....عارف طيب ان الحسد عندى هيتقلب فى يوم لحقد وحقد وحش كمان علشان انت اتاخرت جدا جدا عارف كمان انى زهقت وانى خايفة العمر يعدى والحب اللى جوه قلبى ليك يموت ببطئ وانى خايفة اللهفة عليك تقل خايفة لما العمر يعدى كلام الحب والعشق على لسانى يموت ...
*
*
*
انا عارفة انى لسه صغيرة والعمر مش هيعدى ولا حاجة بس ده حلم كل بنت وانا بخاف لا دانا بموووووت من الخوف يجى يوم وابقى زى غيرى مستنية اى انسان والسلام يمر الوقت وانسى حلمى ويبقى مجرد سراب وافوق على بيت مفيهوش اى حب ولا حنان ولا مودة ورحمة مفيش فيه غير شوية عيال ومشاكل وهم وغم ....
*
*
*
عايزاك تيجى بسرعة واحنا لسه صغيرين علشان نقدر نعيش الحياة صح قبل ما نعجز ونكركب ونقول احنا كبرنا على لعب العيال وحب المراهقين وانا اوعدك انى هقدملك قلبى وعمرى وحياتى وروحى ليك مش كفاية عليك دول ولا انت شكلك طماع وعايز اكتر من كده ....
*
*
*
انا حياتى متوقفة عليك مش عايزة اعيش الحياة ولا ادوق طعمها الا معاك انا مش انانية انا عايزاك تشاركنى كل لحظة جاية تشاركنى احلامى وايامى علشان كده مش عايزة ابدء اى خطوة فى حياتى ولا احلامى الا لما تيجى انت فعلا املى الوحيد مش عايزة فى الدنيا دى غيرك انت ....
*
*
*
النصيب هيجمعنا فى يوم من الايام علشان تبقى حبى الاول والاخير ويشهد على الحب ده كل الناس انا قفلت على قلبى ب100 مفتاح وقفل علشان مفيش انسان يقدر يدخله قبل منك متتاخرش بقى ....
*
*
*
عارف من كام يوم البت صاحبتى بعتتلى حاجة بالبلوتوث طلعت اغنية وانا بحاول ابطل اسمع اغانى بس شغلتها وياريتنى ما شغلتها حسيت انها مكتوبة علشانى انا وانت لما تيجى ان شاء الله هخليك تسمعها وطبعا هتقولى الاغانى حرام ما انا عايزاك ملتزم مش اى كلام يعنى وهتشجعنى على انى التزام اكتر بس معلش هقولك المرة دى اسمعها وبعدين انا هسمعك كلامى انا مش كلام حد تانى ....
لمين هعيش
بعده هعيش انا ليه
هتسوى ايه ايامى لو مش ليه
وتسوى ايه احلامى لو مش بيه
من غيره صعب الدنيا ديه احس بيها
وحياتى بعده صعب اتعود عليها
مش كل حب بيتنسى هنحب بعده
ولا كل حاجة حلوة بسهولة نلاقيها
املى الوحيد ومليش امل قبليه
املى الوحيد ومفيش امل بعديه
حياتى ليه وحياتى واقفة عليه
من غيره صعب الدنيا ديه احس بيها
وحياتى بعده صعب اتعود عليها
مش كل حب بيتنسى هنحب بعده
ولا كل حاجة حلوة بسهولة نلاقيها


الجمعة، 25 سبتمبر، 2009

هو ده اسمه ايه






الانتظار صعب مفيش اصعب منه بس مش عارفة هفضل منتظرة لغاية امتى بس انا صبرى قليل ويمكن معنديش صبر اصلا كل حاجة فى حياتى محتاجة صبر وانا مبعرفش اصبر طيب اعمل ايه مش بيكون قدامى حل غير الياس مادام واثقة انى مش عارفة اصبر




طول عمرى كنت خايفة فى يوم اتحول لانسانة حقودة بس خوفى اتحقق بقيت حقودة فعلا وبقى جوه منى نقطة سودا بتكبر كل يوم ومش عارفة اتخلص منها اللى واثقة منه انى حقدى ده غصب عنى بلاقى قلبى غصبى عنى جوه مشاعر حقد غريبة حاولت كتير ابعد افكار الحقد والبغض دى من جوايا بس انا ملاحظة انها بتزيد طيب ليه مع انى فى نفس الوقت بكون فرحانة للناس وفرحانة بفرحهم بس النقطة السودا اللى جوه منى بتخنقونى






سؤال غريب لما حد يسالنى بتخافى من ايه ؟؟؟ على طول برد قول مش بخاف من ايه ؟؟؟انا بخاف من كل حاجة بخاف من الحياة ومن الموت ومن الحب ومن الكره بخاف من الماضى ومن المستقبل بخاف من الحاضر بكرة ودلوقتى وكل لحظة الخوف جوايا بيتملكنى تقدروا تقول انا بخاف من الخوف نفسه تقريبا كده بخاف اخاف لحسن اخاف





ساعات تحس ان الدنيا كلها بتدور حواليك بسرعة عجيبة وانت زى ماانت واقف مكانك ثابت مش عارفة ده صح ولا غلط كل حاجة فيك ثابتة ويمكن جامدة ومش بتتغير حياتك اسلوبك قيمك تفكيرك عقلك مشاعرك من الاخر كده تحس انك عايش فى تلاجة



ياترى انا غيرت المدونة واتغيرت فعلا ولا ايه اللى حصل من الاخر كده انا بشك فى نفسى انى مريضة لانفصام بالشخصية ساعة بتضحك وهزر وساعة بعيط وحزينة يوم عاقلة وهادية يوم مجنونة وشعنونة بس اللى واثقة منه انى مش عارفة اتغير الدنيا كلها ممكن تتغير وانا مش هقدر والسبب انى بخاف بخاف اتغير احسن معرفش اتغير مش بقولكم مجنونة

الأربعاء، 12 أغسطس، 2009

القرد هو السبب


مش انا عرفت السبب الرئيسى للقرار بتاع الاستخدام الغيرالعادل للانترنت اللى الحكومة فعلا مشكورة قدرت تحل المشكلة بسرعة قبل ما تتفاقم ومش هنقدر نحلها امبارح لقيت فيديو على اليوتيوب فيه اعلان وده نصه
_يعنى ايه الحيوانات هربت


_ياباشا اللى شفته ده عمرى ما شفته قبل كده تصدق القرد فتح القفص وجرى على الخرتيت ركب فوق ضهره وجريواعلى السيسى القرد وشوشه فى ودنه لقيتلك السيسى بينط لفوق وبيقول ياكريم وجريوا برة الجنينة
_بقى السيسى نط و قاله ياكريم

_ياباشا انا مش مجنون صدقنى بس اللى حاذذ فى نفسى مين ده كريم اللى يسبونى علشانه

*********

كريم اللى ركب وصلة دى اس ال من شركة هننصب عليك تاتا تاتا اكبر شبكة واسرع شبكة انترنت فى مصر تجيبلك الدنيا من اوسع ابوابها هننصب عليك تاتا تاتا طور حياتك
***********

ومن هنا نقدر نقول ان السبب الرئيسى للقرار ده عايزين يريحوا القرد والسيسى اللى كل يوم هربانين من الجونينة وجرى على كريم وعاملين ازمة مواصلات وتعب وارهاق على القرد بجد يعنى وده غير ان الجونينة اشتكت لاكبر واوسع شركة نصب اللى هى هاننصب عليك تاتا ان القرد والسيسى هربوا وبقيوا مفيس حد بيروح ينفعهم علشان مفيش حيوانات يلعبوا معاها يبقى الحل اللى توصلوا اليه بما انهم مش قادرين يشكموا القرد ولا السيسي ولا الخراتيت ويخلوهم يتهدوا ويركزوا فى مكانهم جوه الجونينة انهم يشوفوا الحل الاحسن كان لازم يتخلصوا من الوصلة اللى مركبها كريم اللى مشحططة القرد كل يوم ولو يطولوا يتخلصوا من كريم نفسه وابوكريم وام كريم وعيلة كريم كلها والشارع اللى ساكن فيه كريم مش هيتاخروا ده غير ان كريم شاب صايع ومفيش شغلة ولا مشغلة وباطل وعاطل واهله بيصرفوا عليه بعد ما خلص الجامعة من اكتر من خمس او ست سنين مثلا وبما انه متقل على اهله وبياخد مصروفه منهم جاب وصله هو ووصاحبه ابن الجيران اللى صايع زيه بردو واهو قال اى حاجة تسلى وقته وتخرجه من القرف والنكد اللى عايش فيه ويمكن يلاقى شغلانة ولا حاجة تفيده على النت يعنى شحات ونصاب وكل يوم مشحطط القرد معاه ده يصح بردو ا وكل ده فى سبيل القرد وعلشان راحة القرد تولع البلد كلها كله الا القرد ياجماااااااااااعة لذلك القرد والسيسى والخرتيت مش هايهربوا من الجونينة تانى الا لولد قادر يدفع تمن هروبهم ابن ناس يعنى ياحسبو :))
وعنده بابا وماما عندهم ارصدة فى البنوك ومهما ياخدوا من التل ومش بيختل
*
*
اتفرجوا على الفيديو بقى :)

video

الاثنين، 10 أغسطس، 2009

وظلمنا الحكومة


الله يكثفنى معقول اللى انا عملته فى البوست الاخير ده بصراحة مليش حق طلعت عيلة لسانها طويل ومتبرى منها وكمان ناكرة للجميل

معلش اعذرينى ياحكومة .....سامحينى ياحكومة..... غلطت فى حقك غلطة شنيعة مريعة ولا تغتفر اعمل ايه ما انا واحدة من الشعب الحاقد والناكر لاى جميل لا بجد شعب شرير ومش بيراعى الجهود العظيم والمبذولة فى سبيل الارتقاء بالبلد دى

معلش سامحينى انا الغضب عمانى وخلانى مش عارفة بقول ايه والشيطان شاطر ووزنى اعمل كده من غير ما افكر واحكم بااااااااااااالعقل انك بتعملى كل حاجة فى مصلحة المواطن وواعى تنسى مصلحتك اولا هى الاهم عندنا

بعد الثورة العارمة الله اجتاحت الدولة الايوشية اللى هى دولتى يعنى حدودها متمثل فى غرفتى المتواضعة بعد معرفتى بموضوع الاستخدام الغير عادل للنت ده ومن ساعتها وثورات بقى فى الاوضة ومحدش قادر يقرب منها وعملت اعتصام وامتناع عن الاكل والشرب ونزلت هوبااااااااا اشتم فى اى حاجة قدامى واللى تطولها ايدى او لسانى وكنت بقول كلام تيييييييييييييييييت خالص المهم فتحت الايميل وانا بتييييييييييييييييت للدنيا كلها لقيت صديقى الانتيخ فاتح ومش هنقول مين علشان مش نقطع عيشه المهم ده بشتغل فى شركة تبع اى تى داتا انا شفته من هنا واتفتحت فيه معرفش ليه يمكن علشان لقيته رمز للسلطة :))

بعد كلام ومناقشات وحوارت طلعت انا اللى غلطانة ولا ومش كده طلعت انا نصابة اهئ اهئ اهئ

لا اخص عليا اخص بجد انا طلعت سوووووو باد ياجماعة وناكرة للجميل وانا هعرضلكم الاسباب اللى خلتنى اتراجع عن تعصبى الاعمى ضد قرار النت المحدود واللى اتاكدت دلوقتى انى نصابة ولازم اروح اقدم نفسى للبوليس علشان العدل ياخد مجراه

بيقول ايه ياسيدى ان القرار ده سببه الاساسى انهم عايزين يلغوا موضوع الشبكات الغير شرعية وبصراحة مكنتش فاهمة قوى ازاى غير شرعية وكان جاى فى بالى السيبرات اللى بتتدى مثلا وصلات للبيت

قوووووووووووم ايه اطلع انا مش فاهمة مش يقصدوا دول بس لا يقصدوا كمان اللى زى حالاتى اللى المفروض واخدة وصلة مش لواحدى

يعنى انا وصلتى وابن عمى وقربنا التانى فى نفس العمارة بروتر واحد قالى لا انت كده تتدخلى فى نقاط النصب على الشركة وانك بتسرقيهم علشان المفروض العقد ينص على انك انت بس اللى تاخدى الوصلة مش حد تانى

وعليه يبقى الوصلة مثلا اللى 140 جنيه انا اللى اتحملها لواحدى ومفيش حد معايا وكل فرد فى من اللى معايا كمان يدفع 140 جنيه يعنى المفروض ندفع 380 جنيه فى الشهر واحنا شباب لا شغلة ولا مشغلة وبناخد مصروفنا من اهلينا اللى مش عايزين يسمعوا سيرة النت دى تانى

**************

طيب اقوله ما انا الشركة لما روحت اقدم فيها كانت عارفة ان الوصلة مش لواحدى بدليل اننا دفعنا كل فرد فينا مبلغ متساوى اول الاشتراك

قالى لا انتى مش بتتدفعى غير الاشتراك الشهر وبس طيب امال احنا دفعنا ليه تلات اضعاف الاشتراك الشهرى ؟؟؟؟

يعنى الشركة عارفة ومتاكدة انى مش هاخد الوصلة لواحدى ومش غبية هى بدليل ان كل شهر اللى بيدفع الاشتراك شخص مختلف عن التانى يعنى لو هى عايزة تلغى وتحكم موضوع الوصلات اللى فى البيوت ده يبقى كانت الاولى فصلت عننا النت وقالت انتم خلفت الشرط الاساسى فى العقد ده غير اننا اصلا لما وصلنا جه واحد هو اللى وصل الوصلة دخل الارقام على كل الكمبيوترات يعنى المفروض لو اصلا اسرة عايشة فى بيت واحد اب واولاده متجوزين معاه فى نفس البيت مينفعش ياخدوا واصلة واحدة كل واحد يبقى ليه وصلته وروتره الخاص بيه فى شقته :))

طيب انا من امبارح اغنية ابو جريشة بتاعت 145 جنيه شوف انا هعمل بيهم ايه!!!!! شغالة تنط فى دماغى انا دول اروح ادفهم وصلة نت واشحت باقى الشهر مش كفاية اهلى بيصرفوا عليا لا كمااااااااااان اقولهم اصرفوا على النت وكده ده ليه علشان انا نصابة ومش بنفذ بنود العقد صح فى حين انى كنت اخدت وصلة من سيبر بمبلغ بسيط وكنت هبقى نصابة اكبر بالشكل ده
***************

_يجى يقولى انكم انتم الشعب عايزين تاخدوا حاجة مش من حقكم احنا نقول اللى لينا واللى علينا بخصوص الحكومة وهى عاملة الموضوع ده لمصلحة الجميع وان النت سرعته مش هتقل ولا حاجة وال40 جيجا مش وحشين انتى هفترى ده على اساس 40جيجا دول ليا انا بس ولانى اقتنعنى انى المفروض اصلح الغلط واعمل وصلة لواحدى وكل اول شهر اروح اسرق بنك علشان ادفع 140 جنيه دانا لو اشتغلت يعنى ده لو فى ظل ظروف البلد دى هشتغل مدرسة محترمة ب250 جنيه بحااااااالهم هصرف اكتر منهم على مواصلاتى ليه بقى علشان مش بشتغل فى نفس البلد لازم اتمرمت فى بلد تانية علشان اشقى واتعب فى الفلوس يعنى حتى وصلة النت مش هلاقى ادفعها بعد مصاريف المواصلات

ده غير قالى ان اصلا مفيش فى مصر حاجة اسمها النت الغير محدود حتى الوصلات العالية اللى المفروض غير محدودة ليه حد معين بس ده مش بيبان للعملاء علشان السرعة بتكون عالية وده سر من اسرار الشركة :))

_واياكم تفكروا فى يوم ان الحكومة واخدة القرار ده مثلا علشان تمنع الناس تعبر عن رايها لان النت اكبر مكان بيعبر فيه الناس عن رايهم فى قضايا البلد ومكان فسيح لمعارضة كل ما هو سئ فى البلد يبقى عيب عليكم قوى لو فكرتم كده ليه بقى علشان احنا فى شعب ديمقراطى لو انت غلطت واغضبت في يوم الناس اللى فوق مش هتعيش على وش الارض ياحلو وببساطة ممكن يخلكوا انت بنفسك تقول النت ده عمرى ما اهوب ناحيته تانى



طيب نستفيد ايه من الموضوع ده اننا زى الشاطرين نروح نصلح غلطنا وكل فرد يشترك لواحده وياخد النت المحدود اللى كل جيجا فيه زيادة ب10 جنيه يعنى انت عايز بتاع 500 جنيه لواحدك نت كل شهروبما اننا شعب ينعم بالرخاء والرفاهية وشقق مرمية واللحمة بخمسة جنيه وساعات تلاقيها بستة المفروض نحترم نفسنا بقى وبلاش نعمل زى القرد اللى بياكل فى اته محلولة مش من حقه

اهو احنا عاملين كده زى القرد ده عاملين ناكل زى ما يكون الموز مش هيخلص ابدا وفروا شوية ياجماعة حرام عليكم الحكومة هتجبلكم منين لما الموز يخلص تسرق يعنى وتغضب ربنا اعوذ بالله اعوذ بالله
وحسبوها صح وبدل ما تشترى شريطين علاج اشترى شريط واحد ووفر تمن التانى علشان تقدر تدفع فلوس الكيف قصدى تدفع للنت :))
بدل ما تشترى هدمة كل سنة اللى حيلتك مش تشترى خالص ووفر ومشى بلبوص وادفع وصلة النت
بلااااااااااش تاكل الفول اللى هو بقى اكلت الوحيدة والفريدة وعيش على الهوا ووفر واحسبها صح وادفع وصله النت علشان مش تكون نصاب وتساعد الحكومة ولا اعمل بنصيحة واحد قالها اللى معهوش ميلزموش واشرب من البحر واخبط دماغك فى اتخن حيطة واشرب من اقرب ترعة ومتقولش ايه ادتنا مصر قول هتسرق ايه مننا تانى مصر
***********
وعلى فكرة اللى مضايقنى فى الموضوع ده مش ان التحميل هيقل لان انا اصلا مش بحمل اى حاجة غير حاجات بسيطة جدا يعنى اغنية صورة ومش كتير يعنى انما اللى حارق دمى التحكم اللى عايزين يفرضوا على الشعب وانا عندى احساس بيقول ان الموضوع ده وراءه حجب عقول واصوات الناس اللى بتطالب بالتغير